ក្រុមអ្នកចូលរួមប្រកួតកីឡាលើកទី៨ នៅលើភ្នំបូកគោ។ រូបថត Preah Monivong Bokor Marathon
ភ្នំពេញៈ មនុស្សប្រុស ស្រី ទាំងក្មេង ចាស់ និងជនបរទេសសរុបជិត ៩០០ នាក់ បាននាំគ្នាទៅចូលរួមការប្រកួតប្រណាំងកង់ និងរត់ពាក់កណ្តាលម៉ារ៉ាតុង លើកទី៨ នៅលើភ្នំបូកគោ (The 8th Bokor Cycling Tour and Half Marathon 2023) ខណៈព្រឹត្តិការណ៍សប្បុរសធម៌ប្រចាំឆ្នាំដ៏ធំនៅលើទឹកដីខេត្តកំពតនេះ ត្រូវបានរៀបចំឡើង ដើម្បីរៃអង្គាសថវិកាយកទៅជួយដល់មន្ទីរពេទ្យកុមារគន្ធបុប្ផា។
លោក កែវ សិទ្ធ នាយកផ្នែកលក់នៃសណ្ឋាគារសុខា បានប្រាប់ថា ព្រឹត្តិការណ៍ប្រណាំងកង់ និងរត់ពាក់កណ្តាលម៉ារ៉ាតុង នៅលើភ្នំបូកគោនេះត្រូវបានបង្កើតឡើង តាំងពីឆ្នាំ ២០១៣ ក្រោមគំនិតផ្តួចផ្តើមរបស់អ្នកឧកញ៉ា សុខ គង់ ប្រធានក្រុមហ៊ុនសុខាអូតែល ដែលលោកតែងគិតគូរ និងចូលរួមយ៉ាងសកម្ម នៅក្នុងកិច្ចការមនុស្សធម៌ និងសង្គម ហើយការប្រកួតនៅឆ្នាំនេះមានអ្នកស្នេហាកីឡាចូលរួមសរុបចំនួន ៨៩៧ នាក់ ក្នុងនោះមានអ្នករត់ប្រណាំង៧៣៥នាក់ និងមានអ្នកប្រណាំងកង់១៦២នាក់។
នាយកផ្នែកលក់នៃសណ្ឋាគារសុខារូបនេះ បានបញ្ជាក់ថា៖ «ព្រឹត្តិការណ៍កីឡា នៅភ្នំបូកគោនេះ ត្រូវបានអ្នកឧកញ៉ា សុខ គង់ រៀបចំឱ្យមានឡើងជារៀងរាល់ឆ្នាំ ដើម្បីការងារសប្បុរសធម៌ ដើម្បីរួមគ្នាជួយដល់មន្ទីរពេទ្យកុមារគន្ទបុប្ផា អ៊ីចឹងថវិកាទាំងអស់ ដែលទទួលបានពីការចុះឈ្មោះ និងការរៀបចំការប្រកួតនេះ នឹងត្រូវផ្តល់ជូនទៅមន្ទីរពេទ្យគន្ធបុប្ផា ខណៈឆ្នាំនេះ មានអ្នកចូលរួមច្រើនជាងពីឆ្នាំមុន ហើយកម្មវិធីបានប្រព្រឹត្តទៅដោយរលូន និងបានបញ្ចប់ដោយជោគជ័យ ក្រោមបរិយាកាសដ៏សប្បាយរីករាយ»។
សម្រាប់ការប្រកួត ដែលត្រូវបានធ្វើឡើងរយៈពេល២ថ្ងៃ នៅលើភ្នំបូកគោនេះ គឺការប្រកួតប្រណាំងកង់រយៈចម្ងាយ៣២គីឡូម៉ែត្រ ត្រូវបានធ្វើឡើង នៅព្រឹកថ្ងៃទី២៨ ខែតុលា ចំណែកការរត់ប្រណាំងពាក់កណ្តាលម៉ារ៉ាតុង រយៈចម្ងាយ២១គីឡូម៉ែត្រ រួមទាំងការរត់ប្រណាំង១០គីឡូម៉ែត្រ ៥គីឡូម៉ែត្រ និងការរត់បែបកម្សាន្ត៣គីឡូម៉ែត្រ ត្រូវបានធ្វើនៅព្រឹកថ្ងៃទី២៩ ខែតុលា ឆ្នាំ២០២៣។
ចំពោះស្ថានភាពជាក់ស្តែង នៃការប្រកួតប្រណាំងកង់ និងរត់ពាក់កណ្តាលម៉ារ៉ាតុង លើកទី៨ នៅលើភ្នំបូកគោនេះ អ្នកចូលរួមទាំងអស់ បានបង្ហាញភាពសប្បាយរីករាយ ក្នុងការចូលរួម ព្រោះថវិកាចុះឈ្មោះចូលរួមប្រកួតរបស់ពួកគេបានក្លាយជាការរួមចំណែកមួយយ៉ាងសំខាន់ ក្នុងការជួយដល់មន្ទីរពេទ្យកុមារគន្ធបុប្ផា ដើម្បីឱ្យមន្ទីរពេទ្យនេះ មានលទ្ធភាពកាន់តែច្រើន ក្នុងការជួយព្យាបាលជំងឺដល់កុមារក្រីក្រនៅកម្ពុជា។
ទន្ទឹមនឹងនេះ អ្នកចូលរួមក្នុងព្រឹត្តិការណ៍កីឡា នៅលើភ្នំបូកគោ ឆ្នាំនេះ សុទ្ធតែទទួលបាននូវចំណីចក្ខុដ៏ស្រស់ត្រកាលនៃសម្រស់ទេសភាពដ៏ស្អាត និងខ្យល់អាកាសបរិសុទ្ធ នៅលើភ្នំបូកគោ ដែលជាគោលដៅទេសចរណ៍ប្រវត្តិសាស្ត្រដ៏ល្បីល្បាញ នៅក្នុងប្រទេសកម្ពុជា ហើយអ្នកចូលរួម ក៏បានកម្សាន្តជាមួយការប្រគំតន្ត្រី ការលក់អាហារ និងភេសជ្ជៈតាមស្តង់ រួមទាំងការបោះតង់សម្រាកលម្ហែ ក្រោមរាត្រីដ៏សែនមនោរម្យ ខាងក្រៅបរិវេណសណ្ឋាគារសុខា នាថ្ងៃទី២៩ ខែតុលាផងដែរ។
លោក នេត ពិសិដ្ឋ តំណាងមកពីធនាគារអេស៊ីលីដា បានបង្ហាញភាពសប្បាយរីករាយខ្លាំង ចំពោះទស្សនីយភាព ដែលលោកបានឃើញ នៅតាមផ្លូវឡើងភ្នំ ចុះភ្នំ នៃការរត់ចម្ងាយ២១គីឡូម៉ែត្រ ហើយលោកបានអះអាងថា អេស៊ីលីដា និងដៃគូរបស់ខ្លួន បានសហការជាមួយសណ្ឋាគារសុខា ដើម្បីរៀបចំព្រឹត្តិការណ៍ប្រណាំងកង់ និងរត់ពាក់កណ្តាលម៉ារ៉ាតុង នៅលើភ្នំបូកគោ សម្រាប់ការងារសប្បុរសធម៌នេះ បានចំនួន៤ដងហើយ។
លោកបានបញ្ជាក់ក្រោយការប្រកួតថា៖ «ព្រឹត្តិការណ៍កីឡានេះ ពិតជាល្អមែនទែន ហើយធនាគារអេស៊ីលីដា និងដៃគូរបស់យើង តែងតែចូលរួមកម្មវិធីនេះជារៀងរាល់ឆ្នាំ ដោយឆ្នាំនេះយើងមានសហការីរបស់យើងចូលរួមជិត១០០នាក់ដែរ ដើម្បីរួមចំណែកជួយដល់ការងារសប្បុរសធម៌ ព្រមទាំងបំផុសឱ្យប្រជាពលរដ្ឋរបស់យើង បានស្គាល់តំបន់សក្តានុពល ជាពិសេសតំបន់ទេសចរណ៍ នៅលើភ្នំបូកគោ ដែលមានទេសភាពស្អាត និងធម្មជាតិ១០០ភាគរយ»៕
