ម្ចាស់មេដាយមាសស៊ីហ្គេម ឡៅ ចិត្ត្រា ដណ្តើមឈ្នះខ្សែក្រវាត់ និងប្រាក់រង្វាន់ ពីព្រឹត្តិការណ៍ Krud គុនខ្មែរ នៅវិមានពហុកីឡដ្ឋានជាតិ កាលពីយប់ថ្ងៃទី ២៩ ខែតុលា។ រូបថត TVK
ភ្នំពេញៈ ម្ចាស់មេដាយមាសស៊ីហ្គេម ឡៅ ចិត្ត្រា និងកីឡាករកំពុងសាងភាពល្បី ធន់ វណ្ណា សុទ្ធតែដណ្តើមបានខ្សែក្រវាត់ ពីព្រឹត្តិការណ៍ Krud Kun Khmer របស់សង្វៀនប្រដាល់ទទក ប៉ុន្តែជើងខ្លាំង ឡៅ ចន្ទ្រា បានបាត់បង់ខ្សែក្រវាត់ និងសន្លប់ក្នុងទឹកទី១ ចំណែកអ្នកលេងអំបោះឆៅ ធន់ រិទ្ធី ត្រូវបានកីឡាករអ៊ីរ៉ង់ វ៉ៃឱ្យសន្លប់ធំដូចគ្នា ក្នុងគ្រាដែល ឃីម ឌីម៉ា បានផ្តល់មេរៀនយ៉ាងចាស់ដៃឱ្យទៅអ្នកប្រដាល់បារាំង។
សម្រាប់ការប្រកួតម៉ារ៉ាតុង ដណ្តើមខ្សែក្រវាត់ ក្នុងព្រឹត្តិការណ៍ Krud គុនខ្មែរ នៅវិមានពហុកីឡដ្ឋានជាតិ កាលពីយប់ថ្ងៃទី ២៩ ខែតុលា កន្លងមកនេះ ឡៅ ចិត្រ្តា បានប្រើពេលមិនដល់ ៣ ទឹកស្រួលបួលផង សម្រាប់ការប្រកួតទាំង ២ លើក ដើម្បីឈ្នះបានខ្សែក្រវាត់ ក្នុងប្រភេទទម្ងន់ ៦៥ គីឡូក្រាម។
នៅក្នុងការប្រកួតជម្រុះ ៣ ទឹកដំបូង ឡៅ ចិត្ត្រា បានម៉ាត់ឆ្វេងចូលថ្គាមបណ្តាលឱ្យកីឡាករមីយ៉ាន់ម៉ា Anasin Pumea សន្លប់ត្រឹម ១ នាទីក្នុងទឹកទី១ ស្របពេល យ៉េន ឌីណា បានយកឈ្នះកីឡាករថៃ Zlatan Jitmuangnon ដោយពិន្ទុទាំងលំបាក ហើយសម្រាប់ការឡើងទៅជួបគ្នា នៅវគ្គផ្តាច់ព្រ័ត្រ ចិត្រ្តា បានម៉ាត់ យ៉េន ឌីណា ឱ្យសន្លប់ធំនៅចុងទឹកទី២ បន្ទាប់ពីវ៉ៃឱ្យអាជ្ញាកណ្តាលរាប់ចំនួន២លើក នៅចុងទឹកទី១ និងពាក់កណ្តាលទឹកទី២។
ការផ្តួល យ៉េន ឌីណា ឱ្យសន្លប់ត្រឹមទឹកទី២ ដើម្បីឈ្នះបានខ្សែក្រវាត់ អមដោយប្រាក់រង្វាន់ ៦ ៧៥៦ ០០០រៀល របស់ ឡៅ ចិត្ត្រា បានក្លាយជាជ័យជម្នះយ៉ាងកម្រ ព្រោះក្នុងរយៈពេលប៉ុន្មានឆ្នាំចុងក្រោយនេះ ម្ចាស់មេដាយមាសស៊ីហ្គេម ឆ្នាំ២០២២ យ៉េន ឌីណា មិនធ្លាប់ចាញ់ដោយសន្លប់នោះទេ ហើយ ឡៅ ចិត្រ្តា ក៏បានទទួលស្គាល់ដែរថា ជ័យជម្នះរបស់គេ ដោយសារ យ៉េន ឌីណា ប្រើកម្លាំងអស់ពេក ពេលប្រកួតជាមួយថៃ Zlatan Jitmuangnon។
ម្ចាស់មេដាយមាសស៊ីហ្គេម ឆ្នាំ២០២៣ ឡៅ ចិត្ត្រា បាននិយាយថា៖ «ដៃគូដំបូង ខ្ញុំបានផ្តួលគាត់ទឹកទី១ ហើយការប្រកួតលើកទី២ ដោយសារបង យ៉េន ឌីណា វ៉ៃជាមួយកីឡាករថៃ៣ទឹកពេញ ឡើងអស់រលីងហើយ អ៊ីចឹងខ្ញុំអាចយកឈ្នះលើគាត់រាងធូរដែរទេ។ នេះជាការប្រកួតដ៏ធំរបស់ខ្ញុំ នៅក្នុងឆ្នាំ២០២៣នេះ ហើយខ្ញុំសង្ឃឹមថា Krud Kun Khmer នឹងរៀបចំឱ្យខ្ញុំបានប្រកួតកម្មវិធីធំបែបនេះ នៅពេលក្រោយទៀត»។
ដោយឡែក សម្រាប់ការប្រកួតម៉ារ៉ាតុងដណ្តើមខ្សែក្រវាត់ ទម្ងន់៦០គីឡូក្រាមវិញ កីឡាករ ធន់ វណ្ណា បានក្លាយជាម្ចាស់ខ្សែក្រវាត់ជាលើកដំបូងយ៉ាងរំភើបបំផុត បន្ទាប់ពីរូបគេបានយកឈ្នះពិន្ទុលើកីឡាករមីយ៉ាន់ម៉ា Sow Aye See នៅវគ្គជម្រុះ៣ទឹក និងបានបន្តយកឈ្នះអ្នកប្រដាល់របស់ថៃ Phanpich R. PiTik ដោយពិន្ទុដូចគ្នា នៅវគ្គផ្តាច់ព្រ័ត្រ ខណៈថៃម្នាក់នេះ បានទម្លាក់ ទូច ដេវីត នៅវគ្គជម្រុះ។
ចំពោះការប្រកួតម៉ារ៉ាតុងដណ្តើមខ្សែក្រវាត់ទាំង២ស្ថាប័ននេះ លោក ម៉ុល នី ប្រធានផ្គូផ្គងរបស់សង្វៀនប្រដាល់ទទក បានប្រាប់ភ្នំពេញប៉ុស្តិ៍ កាលពីថ្ងៃទី៣០ ខែតុលាថា៖ «កីឡាករ ធន់ វណ្ណា បានវ៉ៃឡើងសុសខ្លួន ទម្រាំដណ្តើមបានខ្សែក្រវាត់ ចំណែក ឡៅ ចិត្ត្រា ក៏មិនបានបង្ហាញការយោគយល់ បើទោះបីជាប៉ះខ្មែរគ្នាឯង នៅវគ្គផ្តាច់ព្រ័ត្រ អ៊ីចឹងការឈ្នះខ្សែក្រវាត់របស់គាត់ គឺពិតជាស័ក្តិសម និងត្រឹមត្រូវបំផុត»។
ផ្ទុយពីនេះម្ចាស់មេដាយមាស ឡៅ ចន្ទ្រា ដែលជាបងប្រុសបង្កើតរបស់ ឡៅ ចិត្ត្រា ត្រូវបានជើងខ្លាំងរបស់ថៃ Dabmorn Phumpanmoung ទាត់ចូលឆ្អឹងជំនីរ បណ្តាលឱ្យសន្លប់ នៅដើមទឹកទី១តែម្តង សម្រាប់ការប្រកួតដណ្តើមខ្សែក្រវាត់ទម្ងន់៧៣គីឡូក្រាម ហើយបន្ទាប់ពីបានឈ្នះខ្សែក្រវាត់ ជាលើកដំបូង នៅកម្ពុជានេះ Dabmorn បានប្រកាសចង់ជួប ព្រំ សំណាង ម្តងទៀត ដើម្បីសងសឹកចំពោះការចាញ់ពិន្ទុ សំណាង ទាំងមិនអស់ចិត្ត សម្រាប់ការប្រកួតដណ្តើមខ្សែក្រវាត់គ្រុឌគុនខ្មែរនេះដូចគ្នា កាលពីថ្ងៃទី៣ ខែកញ្ញា ឆ្នាំ២០២៣។
ទន្ទឹមជាមួយគ្នានេះ កីឡាករមានរហស្សនាម «អធិរាជអំបោះឆៅ» ធន់ រិទ្ធី ត្រូវបានអ្នកប្រយុទ្ធមកពីអ៊ីរ៉ង់ ដែលធ្លាប់ឈ្នះ អ៊ុង វិរៈ ឈ្មោះ Arvin Mehboudi ម៉ាត់ឱ្យសន្លប់ធំ នៅក្នុងទឹកទី១ ហើយបន្ទាប់ពីដឹងខ្លួនវិញ រិទ្ធី នៅតែមានស្មារតីវង្វេង ដោយមិនដឹងថា រូបគេបានប្រកួតរួចរាល់ហើយនោះទេ ប៉ុន្តែប៉ុន្មានម៉ោងក្រោយមក ទើបអ្វីៗ បានវិលមករកភាពប្រសើរវិញ។
ចំណែកម្ចាស់មេដាយមាសស៊ីហ្គេម ឆ្នាំ២០១៧ ឃីម ឌីម៉ា បានបុកជង្គង់បង្ខំឱ្យកីឡាករបារាំង Seyed Bagher បោះបង់ចោលការប្រកួត នៅក្នុងទឹកទី២ ចំណែក អ៊ុង វីរៈ បានត្រឹមស្មើពិន្ទុ ជាមួយខ្លាចាស់របស់ថៃ Sudsakorn សម្រាប់ការប្រកួតក្នុងទម្ងន់៧៥គីឡូក្រាម ហើយជាមួយលទ្ធផលនេះ អ៊ុង វិរៈ បានសុំឱ្យអ្នកផ្គូផ្គងរបស់សង្វៀនប្រដាល់ទទក ជួយរៀបចំឱ្យរូបគេបានជួប Sudsakorn ជាថ្មីម្តងទៀត ដើម្បីជម្រះបញ្ជីចាស់ ចំពោះការចាញ់ កាលពី១០ឆ្នាំមុនឱ្យបានដាច់ស្រេច។
ចំពោះលទ្ធផលជារួម សម្រាប់ការប្រកួត Krud Kun Khmer លើកនេះ លោក ម៉ុល នី បានបញ្ជាក់ថា៖«កីឡាករទាំងអស់ បានប្រកួតយ៉ាងស្វិតស្វាញ និងអស់ពីសមត្ថភាព ដែលធ្វើឱ្យមានភាពទាក់ទាញខ្លាំង តែក៏នៅមានភាពខ្វះខាតខ្លះៗ ដែលយើងត្រូវធ្វើការកែតម្រូវ ដោយការប្រកួតដណ្តើមខ្សែក្រវាត់រវាង ឡៅ ចន្ទ្រា និងថៃ បានតែ១ទឹក ចំណែកការវ៉ៃអំបោះឆៅរបស់ ធន់ រិទ្ធី យើងមិនអាចបន្ទោសបានទេ ព្រោះឱ្យតែអ្នកណាវ៉ៃចូលមុន ដឹងតែទៅហើយ គ្រាន់តែយើងមានការសោកស្តាយ ដែលគុនខ្មែររបស់យើងចាញ់»។
តែទោះបីជាយ៉ាងណា ប្រធានផ្គូផ្គងរបស់សង្វៀនប្រដាល់ទទក បានសង្កត់ធ្ងន់ថា៖ «ក្រុមការងាររបស់យើងនៅតែប្រកាន់ជំហរ ក្នុងការសម្រិតសម្រាំងយកកីឡាករបរទេសល្អៗ មកប៉ះជាមួយកីឡាករខ្មែរយើង គឺយើងមិនយកកីឡាករបរទេសបែបទេសចរណ៍មកប្រកួតនោះឡើយ ព្រោះយើងជាម្ចាស់ក្បាច់គុន អ៊ីចឹងយើងត្រូវប៉ះកីឡាករបរទេសលំដាប់ល្អៗ ទើបជ័យជម្នះរបស់យើង វាមានន័យ»៕
