កីឡាការិនី នរោត្តម អម្រិតា ពេលកំពុងបង្ហាញសកម្មភាពជិះសេះឡើងវិញកាលពីថ្ងៃទី ១៩ ធ្នូ។ សហការី
ភ្នំពេញៈ ជាមួយឯកសណ្ឋានអាវស ខោជើងវែង ពាក់ស្បែកជើងកវែង និងមានពាក់មួកការពារផងនោះ កីឡាការិនីជាសែរាជវង្ស នរោត្តម អម្រិតា រួមទាំងកីឡាករ គង់ រតនៈ និង គិរី ចាន់តុលា ដែលជាមិត្តរួមក្រុម បានព្យាយាមបញ្ជាសេះលោតផ្លោះរបារយ៉ាងអំណត់ ទៅតាមជំនាញរបស់ខ្លួន នៅឯមជ្ឈមណ្ឌលកីឡា Cambodian Country Club (CCC)។
បើទោះបីជាការខំប្រឹងបញ្ជាសេះទាំងកណ្តាលថ្ងៃក្តៅនារសៀលម៉ោង ២:៣០ កាលពីថ្ងៃទី ១៩ ខែធ្នូកន្លងមក ត្រូវបានធ្វើឡើងដោយគ្មានអ្នកទស្សនា ប៉ុន្តែនេះជាសកម្មភាពបង្ហាញឡើងវិញនូវអ្វីដែលក្រុមអត្តពលិកទាំង ៣ រូបនេះបានធ្វើក្នុងពេលពួកគេចូលរួមការប្រកួតពានរង្វាន់ជើងឯកយុវជនអាស៊ីអាគ្នេយ៍ លើកទី ១ ឆ្នាំ ២០២៣ (The 1st SEA Youth Cup) នៅទីក្រុងបាងកក ប្រទេសថៃ កាលពីថ្ងៃទី ៩ ខែធ្នូ ដោយពួកគេបានឈ្នះមេដាយមាសលើវិញ្ញាសាប្រកួតជិះសេះលោតផ្លោះរបារជាក្រុម។
ការឈ្នះបានមេដាយមាស ក្នុងការប្រកួតដែលមាន ៧ ប្រទេសចូលរួមនេះ បានក្លាយជាជោគជ័យយ៉ាងធំធេងបំផុតដែលបង្ហាញឱ្យឃើញពីការតស៊ូមិនរាថយរបស់ក្រុមអត្តពលិកជិះសេះកម្ពុជា ដែលពួកគេ បានខំប្រឹងប្រែងហ្វឹកហាត់អស់រយៈពេលប្រមាណ ៥ ឆ្នាំ ទើបទទួលបានឱកាសចេញទៅប្រកួតជាផ្លូវការលើឆាកអន្តរជាតិលើកនេះបន្ទាប់ពីពួកគេបានខកខានបង្ហាញសមត្ថភាពសម្រាប់ការប្រកួតស៊ីហ្គេមចំនួន ៣ លើកជាប់ៗគ្នា ដែលសូម្បីតែស៊ីហ្គេមលើកទី ៣២ ឆ្នាំ ២០២៣លើទឹកដីខ្លួនឯងក៏ប្រភេទកីឡាជិះសេះមិនត្រូវបានដាក់បញ្ចូលដែរ។
សហការី
«យើងបានហ្វឹកហាត់ខ្លាំងមែនទែន ហើយវាពិតជារំភើបខ្លាំងណាស់ សម្រាប់ការដណ្តើមបានមេដាយមាសជាលើកដំបូងជូនប្រទេសជាតិនៅពេលនេះ»។ នេះជាការលើកឡើងរបស់កីឡាការិនីជាសែរាជវង្ស នរោត្តម អម្រិតា បន្ទាប់ពីយុវតី វ័យ ១៥ ឆ្នាំរូបនេះ បានបង្ហាញពីជំនាញបញ្ជាសេះ រួមទាំងការបង្ហាញមេដាយមាស និងពានលេខ ១ ដែលដណ្តើមបានពីប្រទេសថៃ ជាមួយថ្នាក់ដឹកនាំសហព័ន្ធកម្ពុជាបង្ហាត់ជិះសេះ និងគ្រូបង្វឹក នៅមជ្ឈមណ្ឌលកីឡា CCC កាលពីថ្ងៃទី ១៩ ខែធ្នូ។
បន្ថែមលើនេះ នរោត្តម អម្រិតា ដែលបានចូលហាត់ជិះសេះ ក្នុងវ័យ ១១ ឆ្នាំ បានបង្ហាញឆន្ទៈខ្ពស់ក្នុងការបន្តអាជីពមួយនេះ ដើម្បីស្វែងរកជោគជ័យថ្មីៗបន្ថែមទៀតសម្រាប់ជាតិ។ អត្តពលិករូបនេះបញ្ជាក់ថា៖«តាមរយៈការឈ្នះបានមេដាយមាសនៅថៃនេះបានធ្វើឱ្យពួកយើងកាន់តែមានទំនុកចិត្តក្នុងការប្រឹងប្រែងពង្រឹងសមត្ថភាពខ្លួនឯងបន្ថែមទៀត ដើម្បីអាចឈានទៅរកការដណ្តើមបានមេដាយបន្ត ជាពិសេសការប្រកួតស៊ីហ្គេម ឆ្នាំ ២០២៥ នៅប្រទេសថៃ ដោយខ្ញុំជឿថា យើងនឹងអាចឈ្នះបានមេដាយ»។
ទន្ទឹមនឹងនេះ កីឡាករ គង់ រតនៈ និង គិរី ចាន់តុលា ក៏បានបង្ហាញភាពសប្បាយខ្លាំង ចំពោះការរួមគ្នាដណ្តើមបានមេដាយមាស ពីការប្រកួត SEA Youth Cup នេះដែរ ហើយពួកគេ បានអះអាងថា ជ័យជម្នះនេះ វាបានបំពេញការខកចិត្តម្តងហើយម្តងទៀត ពីការមិនបានចូលរួមការប្រកួតស៊ីហ្គេម ជាពិសេសស៊ីហ្គេម លើកទី៣២ ឆ្នាំ ២០២៣ ដែលកម្ពុជាបានធ្វើជាម្ចាស់ផ្ទះជាលើកដំបូង។
កីឡាករជម្រើសជាតិ គង់ រតនៈ បានបញ្ជាក់ថា៖ «បើទោះបីជាយើងមិនបានចូលរួមការប្រកួតស៊ីហ្គេម ជាពិសេសស៊ីហ្គេម ឆ្នាំ ២០២៣ ប៉ុន្តែពួកយើងបានប្រឹងប្រែងហាត់ទាំងកណ្តាលថ្ងៃក្តៅជាប្រចាំ អត់មានខ្លាចទេ រហូតអាចដណ្តើមបានមេដាយមាសលើកនេះ។ ជ័យជម្នះនេះ បានធ្វើឱ្យពួកយើងកាន់តែមានទឹកចិត្តខ្លាំងឡើង ក្នុងការហ្វឹកហាត់បន្ថែមដើម្បីអាចឈ្នះបានមេដាយស៊ីហ្គេមឆ្នាំ ២០២៥ ហើយការដាក់គោលដៅបែបនេះ ដោយសារពួកខ្ញុំមានឆន្ទៈពិតប្រាកដ ក្នុងការរួមចំណែកលើកមុខមាត់ប្រទេសជាតិនៅលើឆាកអន្តរជាតិ»។
ជាមួយការដណ្តើមបានមេដាយមាសពីការប្រកួត SEA Youth Cup នៅប្រទេសថៃនេះដែរ ក៏បានឆ្លុះបញ្ចាំងឱ្យឃើញពីការតស៊ូយ៉ាងវែងឆ្ងាយរបស់សហព័ន្ធកម្ពុជាបង្ហាត់ជិះសេះ ដោយបានបង្កើតឡើងតាំងពីឆ្នាំ ២០០៦ ប៉ុន្តែទើបឈ្នះបានមេដាយមាសជាលើកដំបូង ពីការប្រកួតនៅលើឆាកអន្តរជាតិ បន្ទាប់ពីក្រុមជិះសេះកម្ពុជា បានឈ្នះមេដាយសំរឹទ្ធជាលើកដំបូងក្នុងការប្រកួតស៊ីហ្គេម ឆ្នាំ ២០១៧ នៅប្រទេសម៉ាឡេស៊ី និងឈ្នះបានមេដាយសំរឹទ្ធ១ទៀតពីការប្រកួតនៅហុងកុង។
លោកស្រី ទេព ម៉ូណា ប្រធានសហព័ន្ធកម្ពុជាបង្ហាត់ជិះសេះ បានឱ្យដឹងថា ក្រោយបង្កើតឱ្យសហព័ន្ធ នៅឆ្នាំ ២០០៦ គឺក្រុមកីឡាជិះសេះកម្ពុជា បានចូលរួមប្រកួតស៊ីហ្គេមជាលើកដំបូង នៅឆ្នាំ ២០១៣ ក្នុងពេលប្រទេសមីយ៉ាន់ម៉ា ធ្វើជាម្ចាស់ផ្ទះ រួចបន្តចូលរួមស៊ីហ្គេម ឆ្នាំ ២០១៥ នៅប្រទេសសិង្ហបុរី និងស៊ីហ្គេម ក្នុងឆ្នាំ ២០១៧ នៅម៉ាឡេស៊ី ដែលក្រុមអត្តពលិកជិះសេះកម្ពុជាបានឈ្នះមេដាយសំរឹទ្ធ លើវិញ្ញាសាលោតផ្លោះរបារជាក្រុម ក៏ប៉ុន្តែសម្រាប់ការប្រកួតស៊ីហ្គេមឆ្នាំ ២០១៩ នៅហ្វីលីពីន ស៊ីហ្គេមឆ្នាំ ២០២២ នៅវៀតណាម និងស៊ីហ្គេមឆ្នាំ ២០២៣ នៅកម្ពុជា គឺមិនមានប្រភេទកីឡាជិះសេះនេះទេ។
ចំពោះដំណើរការនៃការបង្កើតសហព័ន្ធកម្ពុជា បង្ហាត់ជិះសេះនេះ លោកស្រី ទេព ម៉ូណា បានបញ្ជាក់ថា៖ «ការបង្កើតឱ្យមានសហព័ន្ធរហូតមកទល់ពេលនេះ យើងបានឆ្លងកាត់ការលំបាក និងឧបសគ្គជាច្រើន ដែលមិនអាចរៀបរាប់អស់បានទេ ព្រោះកីឡានេះ វាទាមទារឱ្យយើងមានការបំពាក់សម្ភារ ព្រមទាំងការបង្វឹកទាំងទៅលើអត្តពលិក និងសេះដោយតួអង្គទាំង ២ នេះ ត្រូវតែមានចិត្ត និងអារម្មណ៍ដូចគ្នា ទើបលោតផ្លោះរបារបាន អ៊ីចឹងវាមិនមែនជារឿងងាយស្រួល»។
លោកស្រីបានបន្ថែមទៀតថា៖ «ដោយសារតែមានការពិបាកខ្លាំងពេក ពេលខ្លះខ្ញុំចង់លែងដៃចោលម្តងៗដែរ ប៉ុន្តែនៅពេលដែលបានឃើញទង់ជាតិរបស់យើងត្រូវបានបង្ហូតក្នុងពេល ដែលក្រុមអត្តពលិកយើងដណ្តើមបានមេដាយ ជាពិសេសពេលយើងឈ្នះបានមេដាយមាស ដោយគេបានចាក់ភ្លេងជាតិរបស់យើងឱ្យគេគោរពនៅលើឆាកអន្តរជាតិនោះ គឺវាពិតជាអស្ចារ្យ និងរំភើបខ្លាំងណាស់ ហើយនេះជាអ្វីដែលខ្ញុំមិនអាចបន្ធូរដៃបានក្នុងការពង្រឹងធនធាននៅលើវិស័យកីឡាជិះសេះនេះ គឺយើងបានខំប្រឹងប្រែងខ្លាំងសម្បើមណាស់»។
ជាមួយការដាក់ចិត្តក្នុងការបណ្តុះធនធានឱ្យបានកាន់តែច្រើន និងកាន់តែមានគុណភាពនេះ សហព័ន្ធកម្ពុជាបង្ហាត់ជិះសេះ បាននិងកំពុងផ្តោតការយកចិត្ដទុកដាក់ខ្លាំងបំផុតទៅលើការបង្ហាញវត្តមានជាថ្មី នៅក្នុងការប្រកួតស៊ីហ្គេមលើកទី ៣៣ ឆ្នាំ ២០២៥ នៅប្រទេសថៃ ដែលប្រភេទកីឡាជិះសេះត្រូវដាក់ជាផ្លូវការហើយ ហើយការបង្កើតឱ្យមានការប្រកួត SEA Youth Cup នេះ ក៏ដើម្បីជាការលើកទឹកចិត្ត និងជំរុញដល់បណ្តាប្រទេសនៅក្នុងតំបន់អាស៊ាន ចាប់ផ្តើមពង្រឹងប្រភេទកីឡាជិះសេះឡើងវិញ សម្រាប់ត្រៀមចូលរួមការប្រកួតស៊ីហ្គេម ឆ្នាំ ២០២៥ ផងដែរ។
អ្នកស្រី ទេព ម៉ូណា បានបញ្ជាក់ថា៖ «យើងបានកសាងធនធានអត្តពលិកបានមួយចំនួនធំហើយ ដោយសារគណៈកម្មាធិការជាតិអូឡាំពិកកម្ពុជា និងក្រសួងអប់រំ យុវជន និងកីឡា បានផ្តល់ទាំងគ្រូបង្វឹកបរទេស និងគ្រូបង្វឹកក្នុងស្រុក ដើម្បីបង្វឹកដល់ក្រុមអត្តពលិករបស់យើង អ៊ីចឹងយើងត្រូវបន្តពង្រឹងលើការងារនេះ ហើយទម្រាំដល់ស៊ីហ្គេម ឆ្នាំ ២០២៥ យើងរំពឹងថា យើងអាចនឹងដណ្តើមបានរង្វាន់លេខ ១ ព្រោះយើងមានសម្ទុះចិត្តខ្លាំងក្នុងការខិតខំប្រឹងប្រែងអភិវឌ្ឍខ្លួនឯង»។
ចំណែកលោកហូយ សុផារិទ្ធ គ្រូបង្វឹកក្រុមជម្រើសជាតិជិះសេះកម្ពុជា និងជាគ្រូបង្វឹកប្រចាំសហព័ន្ធកម្ពុជាបង្ហាត់ជិះសេះ ក៏បានឱ្យដឹងដែរថា គិតមកទល់បច្ចុប្បន្ន សហព័ន្ធមានកីឡាករជម្រើសជាតិចំនួន ១៤ នាក់ (ស្រី ៣ នាក់) ដោយអ្នកទាំងនេះមានសមត្ថភាពអាចចូលរួមប្រកួតប្រជែងក្នុងកម្រិតស៊ីហ្គេមបាន ប៉ុន្តែសហព័ន្ធមានមហិច្ឆតាចង់បណ្តុះបណ្តាលឱ្យពួកគេឱ្យរឹតតែមានសមត្ថភាពខ្ពស់ជាងនេះដើម្បីអាចចូលរួមឱ្យដល់កម្រិតអាស៊ីឬលើសនោះទៅទៀត។
គ្រូបង្វឹកវ័យ ៤២ ឆ្នាំរូបនេះ បានបញ្ជាក់ថា៖ «ធនធានអត្តពលិករបស់យើងពេលនេះ អាចមានលទ្ធភាព ប្រជែងយកមេដាយស៊ីហ្គេមឆ្នាំ ២០២៥ បានដែលមានកម្រិតលោតពី ១,២០ ទៅ ១,២៥ ម៉ែត្រ ប៉ុន្តែយើងនៅមានការប្រកួតលើស៊ីហ្គេមទៀត ដូចជាការប្រកួតកម្រិតអាស៊ី ដែលសេះ និងអត្តពលិក អាចលោតបានពី ១,៣៥ ទៅ ១,៤០ ម៉ែត្រ និងការប្រកួតកម្រិតពិភពលោកដែលអាចលោតដល់កម្ពស់ ១,៦០ ម៉ែត្រ អ៊ីចឹងជាទិសដៅយើងត្រូវជំរុញអត្តពលិក និងសេះរបស់យើងឱ្យឈានទៅដល់កម្រិតខ្ពស់បែបនោះដែរ»៕
សហការី
