ក្រុមបាល់បោះរទេះនារីកម្ពុជា បានឈ្នះគ្រប់ការប្រកួតក្នុងវគ្គជម្រុះប៉ារ៉ាឡាំពិកនៅប្រទេសថៃ។ រូប សហការី
ក្រុមកីឡាការិនីជម្រើសជាតិបាល់បោះរទេះជនពិការកម្ពុជា នៅតែអាចរក្សាកម្រិតលេងរួមគ្នាបានយ៉ាងល្អ ដណ្តើមបានជ័យជម្នះជាបន្តបន្ទាប់ ក្នុងការប្រកួតជើងឯកតំបន់អាស៊ី-អូសេអានី IWBF AOZ Championship និងជម្រុះព្រឹត្តិការណ៍កីឡាប៉ារ៉ាឡាំពិក ឆ្នាំ២០២៤ លើវិញ្ញាសា៣ទល់៣ ដែលកំពុងដំណើរការនៅប្រទេសថៃ។
ចំពោះការប្រកួតប្រជែង ដើម្បីដណ្តើមយកកៅអីទៅប្រកួតកីឡាប៉ារ៉ាឡាំពិក ឆ្នាំ២០២៤ (Paris 2024 Paralympics Games) នៅទីក្រុងបារីស ប្រទេសបារាំងនេះ ក្រុមបាល់បោះរទេះនារីកម្ពុជា ដែលឈរនៅពូលB ជាមួយក្រុមបាល់បោះរទេះនារីអូស្រ្តាលី ក្រុមនារីឥណ្ឌា និងក្រុមម្ចាស់ផ្ទះថៃ (A) នោះ គឺបានឈ្នះទាំង៣ប្រកួតតែម្តង ដើម្បីទទួលបានចំណាត់ថ្នាក់លេខ១ ប្រចាំពូល។
សម្រាប់ការប្រកួតបើកឆាកប្រចាំពូល B នេះ ដែលបានធ្វើឡើង នៅប្រទេសថៃ កាលពីថ្ងៃទី១០ ខែមករា ឆ្នាំ២០២៤ ក្រុមបាល់បោះរទេះនារីកម្ពុជា បានយកឈ្នះក្រុមបាល់បោះរទេះនារីអូស្រ្តាលី ដោយលទ្ធផល ១០-៣ រួចបានបន្តយកឈ្នះក្រុមនារីឥណ្ឌា ១៤-០ ចំណែកការប្រកួតចុងក្រោយជាមួយក្រុមម្ចាស់ផ្ទះថៃ (A) នៅយប់ថ្ងៃពុធនោះដែរ ក្រុមនារីកម្ពុជា បានយកឈ្នះ ដោយលទ្ធផល ៩-២។
ជាមួយការឈ្នះទាំង៣ប្រកួតជាប់ៗគ្នា ដើម្បីទទួលបានលេខ១ប្រចាំពូលBនេះ បានបង្ហាញឱ្យឃើញថា ក្រុមបាល់បោះរទេះនារីកម្ពុជា នៅតែអាចរក្សាភាពខ្លាំង ក្នុងនាមជាក្រុម ដែលឈ្នះបានមេដាយមាសចំនួន ២ សម័យកាលជាប់ៗគ្នា សម្រាប់ការប្រកួតអាស៊ានប៉ារ៉ាហ្គេម គឺលើកទី ១ បានឈ្នះក្នុងការប្រកួតអាស៊ានប៉ារ៉ាហ្គេម លើកទី១១ ឆ្នាំ២០២២ នៅឥណ្ឌូនេស៊ី និងលើកទី២ ក្នុងការប្រកួតអាស៊ានប៉ារ៉ាហ្គេម លើកទី១២ ឆ្នាំ២០២៣ នៅលើទឹកដីខ្លួនឯង ដោយពួកគេ បានយកឈ្នះក្រុមនារីថៃ នៅវគ្គផ្តាច់ព្រ័ត្រដូចគ្នា។
ចំណែកក្រុមបាល់បោះរទេះនារីចិន ក៏ធ្វើបានយ៉ាងល្អ សម្រាប់ការប្រកួតជម្រុះនៅក្នុងពូល A ផងដែរ ដោយពួកគេ បានយកឈ្នះក្រុមម្ចាស់ផ្ទះថៃ (B) ឈ្នះក្រុមហ្វីលីពីន និងឈ្នះក្រុមបាល់បោះរទេះនារីឡាវ សម្រាប់ការប្រកួតទាំង៣លើករបស់ខ្លួន ដើម្បីទទួលបានលេខ១ប្រចាំពូលAនេះ។
ជាមួយលទ្ធផលនៃការប្រកួតជម្រុះតាមពូលទាំង២នេះ ក្រុមបាល់បោះរទេះនារីកម្ពុជា នឹងត្រូវធ្វើការប្រកួតវគ្គខ្វែង៨ក្រុមចុងក្រោយ ជាមួយក្រុមឈរនៅបាតតារាងប្រចាំពូលA គឺក្រុមនារីឡាវ ដែលបានចាញ់ទាំង៣ប្រកួតតែម្តង ហើយជំនួបរវាងក្រុមទាំង២នេះ នឹងធ្វើនៅយប់ម៉ោង ៧:៤០ ថ្ងៃព្រហស្បតិ៍នេះ ចំណែកក្រុមនារីចិន ត្រូវប៉ះក្រុមនារីឥណ្ឌូនេស៊ី រីឯក្រុមអូស្រ្តាលី ត្រូវជួបក្រុមនារីហ្វីលីពីន ខណៈក្រុមនារីថៃ (A) ត្រូវប្រកួតជាមួយក្រុមនារីថៃ (B) នៅថ្ងៃនេះដូចគ្នា។
ចំពោះក្រុមដែលទទួលបានជ័យជម្នះ នៅក្នុងវគ្គខ្វែង ៨ ក្រុមចុងក្រោយនេះ ត្រូវឡើងទៅប្រកួតគ្នានៅវគ្គពាក់កណ្តាលផ្តាច់ព្រ័ត្រ ដែលធ្វើនៅយប់ថ្ងៃទី១១ ខែមករានេះតែម្តង ដើម្បីយកក្រុមឈ្នះ ឡើងទៅប្រកួតផ្តាច់ព្រ័ត្រ ដែលត្រូវធ្វើនៅថ្ងៃសុក្រស្អែកនេះ ខណៈក្រុមម្ចាស់ជើងឯក នឹងទទួលបានកៅអីទៅប្រកួតកីឡាប៉ារ៉ាឡាំពិក ឆ្នាំ២០២៤ នៅប្រទេសបារាំង។ ចំណែកក្រុមលេខ២ និងក្រុមលេខ៣ នឹងទទួលបានកៅអីទៅប្រកួតជើងឯក 2024 IWBF Women’s Repechage នៅទីក្រុង Osaka ប្រទេសជប៉ុន៕
រូប សហការី
រូប សហការី
