កីឡាការិនី អេ យ៉ានុត និងកីឡាការិនីគូប្រកួតជាតិថៃ។ រូបថត Bayon and BTV Boxing FB
ភ្នំពេញៈកីឡាការិនីជាត្រកូលអ្នកប្រយុទ្ធ អេ យ៉ានុត ដែលជាកូនស្រីរបស់លោកគ្រូ អេ ភូថង បានប្រឹងប្រែងហ្វឹកហាត់ខ្លាំង ព្រោះនៅថ្ងៃទី១៣ ខែមករានេះ នាងត្រូវឡើងប្រកួតដណ្តើមខ្សែក្រវាត់ពិភពលោក (KKIF Kun Khmer World Champion) ផ្នែកស្ត្រីជាលើកដំបូងជាមួយជើងខ្លាំងមកពីប្រទេសថៃ AkkaranneeKadsin ដែលរៀបចំដោយសង្វៀនCambodia Kun Khmer KKIF។
ការប្រកួតដណ្តើមខ្សែក្រវាត់ពិភពលោកក្នុងប្រភេទទម្ងន់ ៥៤ គីឡូក្រាម ផ្នែកស្ត្រីជាលើកដំបូងនេះ នឹងត្រូវធ្វើនៅភូមិស្ពានក្រឡ ឃុំបន្ទាយនាង ស្រុកមង្គលបុរី ខេត្តបន្ទាយមានជ័យ ចាប់ពីម៉ោង ៨ យប់តទៅ ហើយបងប្អូនត្រកូល«ឡៅ» រួមទាំងជើងខ្លាំង ឡុង សំណាង, ខាំ ខ្លានាង, គង់ ហូវ និងខ្លាចាស់ស្ទើរកម្លាំង អូត ភូថង ក៏ត្រូវបានដាក់ឱ្យប្រកួតមិត្តភាពអន្តរជាតិជាមួយអ្នកប្រយុទ្ធមកពី ៥ ប្រទេស អមគូខ្សែក្រវាត់នេះផងដែរ។
ជាមួយគ្នានេះ លោក ស្រ៊ឺ ស្រេង ហៅ សំណព្វ អ្នកផ្គូផ្គងប្រចាំនៅសង្វៀន Cambodia Kun Khmer KKIF បានប្រាប់កាលពីថ្ងៃទី១១ ខែមករាថា នេះជាខ្សែក្រវាត់ផ្នែកនារីលើកដំបូង ដែលសង្វៀនថ្មីមួយនេះ បានបង្កើតឱ្យមានឡើង បន្ទាប់ពី Cambodia Kun Khmer KKIF បានរៀបចំឱ្យមានការប្រកួតដណ្តើមខ្សែក្រវាត់ពិភពលោក ចំនួន២ ប្រភេទទម្ងន់កន្លងមក គឺការប្រកួតទម្ងន់ ៦០ គីឡូក្រាម ដែលម្ចាស់ជើងឯកបានទៅកីឡាករ សុខ ធី និងទម្ងន់ ៦៥ គីឡូក្រាម ដែល ចាន់ ប៊ុនហឿន បានក្លាយជាម្ចាស់ខ្សែក្រវាត់។
លោក សំណព្វ បានបញ្ជាក់ថា៖ «ខ្ញុំមិនច្បាស់ថា សង្វៀនផ្សេងគេមានរៀបចំឱ្យមានការប្រកួតដណ្តើមខ្សែក្រវាត់ផ្នែកនារី ឬយ៉ាងណានោះទេ ប៉ុន្តែចំពោះសង្វៀន Cambodia Kun Khmer KKIF របស់យើង វាជាលើកដំបូង ខណៈកន្លងមកយើងបានរៀបចំការប្រកួតដណ្តើមខ្សែក្រវាត់ផ្នែកបុរសបាន២ ប្រភេទទម្ងន់ហើយ គឺគីឡូ ៦០ និងគីឡូ ៦៥ ហើយយើងនឹងរៀបចំឱ្យមានការប្រកួតដណ្តើមខ្សែក្រវាត់ឱ្យបានគ្រប់ប្រភេទទម្ងន់ ព្រោះយើងជាស្ថាប័នផ្សព្វផ្សាយថ្មី»។
ជាមួយការទទួលបានឱកាសប្រកួតដណ្តើមខ្សែក្រវាត់ពិភពលោកជាលើកដំបូងនេះ អេ យ៉ានុត បានបង្ហាញភាពអន្ទះសា ចង់បានខ្សែក្រវាត់នេះយកមកគ្រប់គ្រង ដើម្បីបំពេញក្តីស្រមៃជាង ១០ ឆ្នាំ របស់ខ្លួន ហើយនេះជាមូលហេតុដែល យ៉ានុត បុកហ្វឹកហាត់ខ្លាំង ដើម្បីពង្រឹងសមត្ថភាពខ្លួនឯង ឱ្យបានកាន់តែល្អ ប៉ុន្តែកូនស្រីរបស់លោក អេ ភូថង ម្នាក់នេះ មិនហ៊ានមើលរំលងសមត្ថភាពគូប្រកួត របស់ខ្លួន AkkaranneeKadsin ដែលមានខ្សែក្រវាត់ គ្រប់គ្រងរួចទៅហើយនោះទេ។
ស្ត្រីកូន១ អេ យ៉ានុត បាននិយាយថា៖ «ខ្ញុំចង់បានខ្សែក្រវាត់យូរហើយ តាំងពីខ្ញុំឡើងប្រកួតនៅឆ្នាំ២០១០ តែខ្ញុំមិនទាន់អាចធ្វើបាន ចំណែកលើកនេះ ខ្ញុំក៏មិនទាន់ច្បាស់ថា អាចដណ្តើមបានខ្សែក្រវាត់នេះ ឬយ៉ាងណានោះទេ ព្រោះដៃគូរបស់ខ្ញុំ គាត់ខ្លាំងដែរ អាចនឹងមានការពិបាកច្រើន។ តែទោះបីជាយ៉ាងណា ខ្ញុំបានប្រឹងប្រែងហ្វឹកហាត់ខ្លាំងមែនទែន ព្រោះខ្ញុំពិតជាចង់បានខ្សែក្រវាត់នេះណាស់»។
យ៉ាងណាក៏ដោយ លោក សំណព្វ បានអះអាងថា កីឡាការិនីរបស់ថៃ AkkaranneeKadsin ដែលជាដៃគូរបស់ អេ យ៉ានុត មានបទពិសោធន៍ប្រកួតនៅលើសង្វៀនធំៗបានច្រើន ហើយក៏ជាកីឡាការិនីដែលធ្លាប់ដណ្តើមបានខ្សែក្រវាត់ចំនួន២ស្ថាប័នផងដែរ ប៉ុន្តែលោកបានមើលឃើញពីចំណុចល្អរបស់ អេ យ៉ានុត ដូចគ្នា ដែលកំពុងឡើងជើងខ្លាំង។
អ្នកផ្គូផ្គងប្រចាំសង្វៀន Cambodia Kun Khmer KKIF រូបនេះ បាននិយាយថា៖ «សម្រាប់ការវិលត្រឡប់មកប្រកួតគុនខ្មែរវិញនេះ អេ យ៉ានុត គាត់ធ្វើបានល្អ ដោយបានឈ្នះជាបន្តបន្ទាប់ ចំណែកកីឡាការិនី Akkarannee Kadsin ក៏ល្អ ដោយគាត់ធ្លាប់ប្រកួតព្រឹត្តិការណ៍ធំៗច្រើន ហើយបច្ចុប្បន្នកីឡាការិនីថៃរូបនេះ កំពុងមានខ្សែក្រវាត់២ អ៊ីចឹងការប្រកួតនេះ នឹងមានភាពស្វិតស្វាញដោយសង្ឃឹមថា នឹងមានបងប្អូនយើងគាំទ្រច្រើន»។
យ៉ាងណាមិញ សម្រាប់ការប្រកួត Cambodia Kun Khmer KKIF នៅលើទឹកដីខេត្តបន្ទាយមានជ័យនៅយប់ថ្ងៃសៅរ៍នេះដែរ បងប្អូនត្រកូល «ឡៅ» ដែលជាម្ចាស់មេដាយមាសស៊ីហ្គេម ឆ្នាំ២០២៣ ក៏ត្រូវដាក់ឱ្យប្រកួតអន្តរជាតិផងដែរ ដោយក្នុងនោះ ឡៅ ចន្ទ្រា ត្រូវជួបកីឡាករឡាវ Sytheun-Silabouth ក្នុងទម្ងន់៧៣គីឡូក្រាម រីឯ ឡៅ ចិត្ត្រា ត្រូវប៉ះអ្នកប្រដាល់ថៃ ChanonPentamwa ក្នុងទម្ងន់ ៦៥ គីឡូក្រាម។
ចំណែកកីឡាករ ឡុង សំណាង ត្រូវប្រកួតជាមួយអ្នកប្រដាល់ថៃ SuriyaWongarmard ក្នុងទម្ងន់ ៦៥ គីឡូក្រាម រីឯ ខាំ ខ្លានាង ត្រូវជួបអ្នកប្រយុទ្ធអ៊ីរ៉ង់ Mehran Sadeghi ក្នុងទម្ងន់៥១ គីឡូក្រាម ហើយ គង់ ហូវ ត្រូវតទល់នឹងកីឡាករហ្វីលីពីន Jonathan Pardo ក្នុងទម្ងន់ ៦០ គីឡូក្រាម ខណៈខ្លាចាស់ស្ទើរកម្លាំង អូត ភូថង ត្រូវដាក់ប្រកួតជាមួយអ្នកប្រដាល់ Henry Johnson ក្នុងទម្ងន់ ៦៨ គីឡូក្រាម៕
