កីឡាករ រិន ដេវីត និង ធន់ ធៀងឡៃ ត្រូវប្រកួតដណ្តើមពានលេខ១ នៅយប់ថ្ងៃព្រហស្បតិ៍នេះ។ រូប សហការី
ភ្នំពេញ៖ កីឡាករជើងខ្លាំងជំនាន់ក្រោយ រិន ដេវីត និង ធន់ អៀងឡៃ នឹងត្រូវជួបគ្នាជាថ្មីម្តងទៀត ក្នុងការប្រកួតផ្តាច់ព្រ័ត្រ ដណ្តើមពានរង្វាន់ GANZBERG រាជសីហ៍ Kun Khmer នៅលើសង្វៀនថោន នាយប់ម៉ោង៨ ថ្ងៃព្រហស្បតិ៍នេះ ហើយកីឡាករលំដាប់ខ្លាំងៗរបស់កម្ពុជាមួយចំនួនទៀត ក៏ត្រូវបានដាក់ឱ្យប្រកួតអន្តរជាតិ ជាមួយអ្នកប្រដាល់បរទេស ក្នុងពេលជាមួយគ្នានេះដូចគ្នា។
នៅមុនឡើងមកជួបគ្នា នៅវគ្គផ្តាច់ព្រ័ត្រនេះ រិន ដេវីត និង ធន់ អៀងឡៃ ធ្លាប់បានជួបគ្នា នៅក្នុងវគ្គជម្រុះតាមពូលម្តងហើយ ហើយក្នុងជំនួបសន្សំពិន្ទុនោះ ដេវីត បានឈ្នះ អៀងឡៃ ហើយរូបគេ ក៏បានយកឈ្នះ ឡុង ជិន និង ស៊ន រ៉ាគីម ផងដែរ ដើម្បីទទួលបានលេខ១ប្រចាំពូល។
ចំណែក ធន់ អៀងឡៃ ដែលបានចាញ់ពិន្ទុ ឡុង ជិន ដែរនោះ បែរជាអាចផ្តួល ស៊ន រ៉ាគីម ឱ្យសន្លប់ នៅក្នុងការប្រកួតជម្រុះចុងក្រោយ ដើម្បីមានប្រៀបលើ ឡុង ជិន វិញ ដើម្បីបានឡើង ទៅកាន់វគ្គពាក់កណ្តាលផ្តាច់ព្រ័ត្រជាមួយ រិន ដេវីត ដែរ ហើយតាមរយៈការប្រកួតវគ្គ១/២ផ្តាច់ព្រ័ត្រ កាលពីថ្ងៃទី២១ ខែធ្នូ ឆ្នាំ២០២៣នោះ អៀងឡៃ បានឈ្នះពិន្ទុ ទូច ដេវីត ចំណែក រិន ដេវីត បានឈ្នះពិន្ទុ ចាន់ សំអាត។
យ៉ាងណាមិញ សម្រាប់ការឡើងមកជួបគ្នាជាថ្មី នៅវគ្គផ្តាច់ព្រ័ត្រ ដើម្បីដណ្តើមយកពាន អមជាមួយប្រាក់រង្វាន់ចំនួន២០លានរៀល សម្រាប់អ្នកបានលេខ ១ និង ១២ លានរៀល សម្រាប់អ្នកចាញ់បានលេខ២នេះ រិន ដេវីត និង ធន់ អៀងឡៃ បានបោះពាក្យសម្តីឌឺដងគ្នាខ្លាំង ដោយក្នុងនោះ ដេវីត បានផ្តាំទៅរៀមច្បង អៀងឡៃ ឱ្យបញ្ចេញឱ្យអស់ក្បាច់មក ចំណែក អៀងឡៃ បានឆ្លើយតបទៅវិញថា រូបគេ នឹងមិនលាក់ទុកអ្វីទាំងអស់។
ជាមួយការឌឺដងគ្នាដោយពាក្យសម្តីរបស់ រិន ដេវីត និង ធន់ អៀងឡៃ បានធ្វើឱ្យជំនួបផ្តាច់ព្រ័ត្ររបស់ពួកគេ កាន់តែមានការចាប់អារម្មណ៍ខ្លាំង ខណៈមតិភាគច្រើន បានផ្តល់ទំនុកចិត្តលើ រិន ដេវីត ច្រើនជាង ដោយសាររូបគេទើបតែបានឈ្នះ ធន់ អៀងឡៃ នៅវគ្គជម្រុះ កាលពីថ្ងៃទី២ ខែវិច្ឆិកា ឆ្នាំ២០២៣ ប៉ុន្តែនៅមុនការជួបគ្នា ក្នុងការប្រកួតដណ្តើមពាននេះ ដេវីត ក៏ធ្លាប់បានចាញ់ អៀងឡៃ នៅសង្វៀនបាយ័ន កាលពីថ្ងៃទី៧ ខែតុលា ឆ្នាំ២០២៣ផងដែរ។
ទន្ទឹមជាមួយគ្នានេះដែរ រិន ដេវីត ខ្លួនឯងផ្ទាល់ ក៏នៅតែចាត់ទុក ធន់ អៀងឡៃ ជាកីឡាករពិបាកក្នុងការយកឈ្នះផងដែរ។ រិន ដេវីត បាននិយាយថា៖ «ការប្រកួតជម្រុះដណ្តើមពាននេះ ខ្ញុំបានឈ្នះទាំង៤ប្រកួត ហើយក្នុងនោះការយកឈ្នះបង អៀងឡៃ តឹងជាងគេ ព្រោះគាត់ជាកីឡាករដើរបុកវ៉ៃ មានស៊ុហ្វល្អ ហើយអាវុធរបស់គាត់ចេញបានរហូត»។
តែទោះបីជាយ៉ាងណា រិន ដេវីត បានអះអាងថា រូបគេបានហ្វឹកហាត់ពង្រឹងបន្ថែមទៅលើការចូលចាប់ និងកម្លាំងស៊ុហ្វបានល្អ១០០ភាគរយហើយ ហើយរូបគេបានបញ្ឆេះពាក្យឌឺដងដាក់ ធន់ អៀងឡៃ បែបនេះថា៖ «ខ្ញុំសូមផ្តាំទៅបង ធន់ អៀងឡៃ ថា បើមានក្បាច់អ្វី ចេញឱ្យអស់មកបង ព្រោះយើងត្រៀមខ្លួនបានល្អដូចគ្នា ហើយនេះជាកម្មវិធីធំទៀត អ៊ីចឹងយើងត្រូវប្រកួតគ្នាឱ្យដាច់ស្រឡះលើកនេះតែម្តង»។
ជាមួយពាក្យផ្តាំផ្ញើបែបផ្លែផ្កានេះ ធន់ អៀងឡៃ បានឆ្លើយតបទៅវិញ ដោយភាពប្រាកដប្រជាថា៖ «ខ្ញុំបានហ្វឹកហាត់ខ្លាំងណាស់ ដោយមិនបានគិតពីថ្ងៃសៅរ៍ និងថ្ងៃអាទិត្យនោះទេ ហើយឈានដល់វគ្គនេះទៅហើយ មិនចាំបាច់ផ្តាំអ្វីច្រើនឡើយ គឺអ្វីដែលខ្ញុំមាន ខ្ញុំនឹងបញ្ចេញឱ្យអស់ ព្រោះនេះជាការប្រកួតផ្តាច់ព្រ័ត្រ ដែលខ្ញុំត្រូវតែខំប្រឹងឱ្យអស់ពីសមត្ថភាព ដើម្បីដណ្តើមយកពាន»៕
