សកម្មភាពប្រកួតពានរង្វាន់ CSF IPSC Challenge Series ឆ្នាំ២០២៤ នៅខេត្តមណ្ឌលគិរី។ រូប សហការី
ភ្នំពេញ៖ ប្រធានសហព័ន្ធកីឡាបាញ់កាំភ្លើងកម្ពុជា លោក សុខ ពុទ្ធិវុធ បានលើកទឹកចិត្ត និងជំរុញឱ្យកីឡាករ និងគ្រូបង្វឹកផ្នែកកីឡាបាញ់កាំភ្លើងរបស់កម្ពុជា ត្រូវបង្កើនការហ្វឹកហាត់ពង្រឹងសមត្ថភាពឱ្យបានល្អថែមទៀត ដើម្បីត្រៀមខ្លួនចូលរួមការប្រកួតអន្តរជាតិ ទាំងនៅក្នុងតំបន់អាស៊ាន អាស៊ី និងពិភពលោក។
ការលើកឡើងបែបនេះរបស់លោក សុខ ពុទ្ធិវុធ ត្រូវបានធ្វើឡើង ពេលលោកចូលរួមក្នុងការប្រកួតកីឡាបាញ់កាំភ្លើងពានរង្វាន់ CSF IPSC Challenge Series ឆ្នាំ២០២៤ នៅខេត្តមណ្ឌលគិរី កាលពីថ្ងៃទី១៤ ខែមករា ហើយតាមរយៈការប្រកួតពេញ ១ ថ្ងៃនោះ លោក ពុទ្ធិវុធ បានវាយតម្លៃខ្ពស់ ទៅលើការខិតខំប្រឹងប្រែងប្រកួតយ៉ាងចិត្តទុកដាក់របស់កីឡាករទាំងអស់។ តែទោះបីជាយ៉ាងណា លោកបានជំរុញឱ្យក្រុមបាញ់កាំភ្លើង ខំប្រឹងពង្រឹងសមត្ថភាពបន្ថែមទៀត ដើម្បីត្រៀមការប្រកួតអន្តរជាតិ។
លោកបានថ្លែងថា៖ «គោលបំណងសំខាន់នៃការរៀបចំការប្រកួតពានរង្វាន់នេះ គឺដើម្បីពង្រឹងសមត្ថភាពកីឡាករ សម្រាប់ត្រៀមចូលរួមការប្រកួតជាអន្តរជាតិធំៗ ដូចជាការប្រកួតអន្តរជាតិនៅតំបន់អាស៊ាន និងអាស៊ី ហើយក្នុងនោះ សហព័ន្ធ ក៏កំពុងពង្រឹងវិញ្ញាសាកីឡាអូឡាំពិក គឺវិញ្ញាសាបាញ់កាំភ្លើង ISSF ផងដែរ»។
ប្រធានសហព័ន្ធកីឡាបាញ់កាំភ្លើងកម្ពុជា លោក សុខ ពុទ្ធិវុធ ពេលថ្លែង នៅក្នុងពិធីការប្រកួតពាន CSF IPSC Challenge Series ឆ្នាំ២០២៤។រូប សហការី
យ៉ាងណាក៏ដោយ លោក ពុទ្ធិវុធ បានបន្ថែមថា៖ «ដើម្បីឱ្យក្រុមបាញ់កាំភ្លើងរបស់យើង ទទួលបានជោគជ័យ ក្នុងការប្រកួតធំៗទាំងនេះបាន ខ្ញុំសូមស្នើឱ្យកីឡាករ និងគ្រូបង្វឹក ត្រូវបង្កើនការយកចិត្តទុកដាក់លើការបណ្តុះបណ្តាល នៅលើទីលានប្រកួតជាក់ស្តែង ទាំងទ្រឹស្តី បច្ចេកទេស និងបទពិសោធន៍ប្រកួត ដល់កីឡាករថ្មីៗរបស់យើង ដែលទើបប្រកួតរួច ដើម្បីឱ្យពួកគេមានសមត្ថភាពកាន់តែល្អប្រសើរ»។
ជាមួយគ្នានោះ លោក សុខ ពុទ្ធិវុធ បានឱ្យដឹងទៀតថា ក្រៅពីផ្តោតលើសិទ្ធផលការហ្វឹកហាត់ និងការបណ្តុះបណ្តាល គឺការប្រកួតពាន CSF IPSC Challenge Series នេះ ក៏បានរួមចំណែកបំផុស ផ្សព្វផ្សាយកីឡាបាញ់កាំភ្លើងឱ្យកាន់តែទូលំទូលាយ និងរីកចម្រើន ព្រមទាំងអាចរឹតចំណងសាមគ្គីភាព មិត្តភាព និងបង្កើនកិច្ចសហប្រតិបត្តិការគ្នាឱ្យកាន់តែស្អិតល្មួតថែមទៀត ខណៈកីឡាទំនើបមួយនេះ ក៏ជាចលករអាចស្រូបទាញកីឡាករបរទេស និងភ្ញៀវទេសចរណ៍អន្តរជាតិមកលេងនៅកម្ពុជាផងដែរ។
បើតាមលោក ស៊ិន សូផានណាក់ អគ្គលេខាធិការសហព័ន្ធកីឡាបាញ់កាំភ្លើង បានឱ្យដឹងថា ការប្រកួតកីឡាបាញ់កាំភ្លើងពានរង្វាន់ CSF IPSC Challenge Series ឆ្នាំ២០២៤ នេះ មានកីឡាករចូលរួមសរុប ២៧ នាក់ ដោយបានបែងចែកការប្រកួតជា ៤ វិញ្ញាសា ហើយលទ្ធផលដែលទទួលបាន គឺមានភាពល្អប្រសើរ ចំណែកការប្រកួតប្រជែង ក៏បានដំណើរទៅយ៉ាងរលូនផងដែរ។
អគ្គលេខាធិការរូបនេះ បានបន្ថែមថា បន្ទាប់ពីការប្រកួតពានរង្វាន់ CSF IPSC Challenge Series នេះ សហព័ន្ធកីឡាបាញ់កាំភ្លើងកម្ពុជា គ្រោងនឹងរៀបចំការប្រកួតជើងឯកថ្នាក់ជាតិជាបន្តទៀត ដើម្បីស្វែងរកកីឡាករឆ្នើមចូលក្រុមជម្រើសជាតិ សម្រាប់ហ្វឹកហាត់បង្កើនសមត្ថភាព និងបច្ចេកទេសឱ្យកាន់តែល្អប្រសើរ ជាពិសេសសហព័ន្ធ មានផែនការបញ្ជូនកីឡាករទៅហ្វឹកហាត់ក្រៅប្រទេស និងចូលរួមការប្រកួតជាលក្ខណៈអន្តរជាតិ ដូចជាក្នុងតំបន់អាស៊ាន អាស៊ី និងលើវិញ្ញាសាកីឡាអូឡាំពិកជាដើម៕
