ក្រុមកីឡាករកម្ពុជា និងកីឡាករចិន ដែលត្រៀមប្រកួតនៅថ្ងៃទី ១៩ ខែមករា។ រូបថត Town Sports
ភ្នំពេញៈ អ្នកលេងពូថៅដៃ ធឿន ធារ៉ា និងសិស្សរួមក្លិបរបស់គេដែលទើបឈ្នះខ្សែក្រវាត់កម្រិតពិភពលោកផ្នែកស្ត្រី អេ យ៉ានុត សុទ្ធតែបានបង្ហាញការបារម្ភ ដោយគិតថា ការប្រកួតជាមួយក្រុមអ្នកលេងកុងហ្វូ (Kung Fu) របស់ចិន អាចមានការពិបាក រីឯជើងខ្លាំង ផល សោភ័ណ្ឌ ដែលធ្លាប់ប្រកួតឃីកបុកស៊ីងជាមួយកីឡាករចិន ក៏បានអះអាងថា មានការពិបាកនឹងរកជ័យជម្នះដូចគ្នា។
ការបង្ហាញក្តីបារម្ភរបស់សិស្សរួមក្លិបទាំងនេះ ដោយសារពួកគេ ត្រូវបានដាក់ឱ្យប្រកួតជាមួយកីឡាករ កីឡាការិនីកុងហ្វូរបស់ចិនក្នុងព្រឹត្តិការណ៍ Kun Khmer Kung Fu ជាលើកដំបូងនៅទីតាំងដីឡូត៍ក្បែរវត្តស្ងួនពេជ្រ ខណ្ឌកំបូល រាជធានីភ្នំពេញនៅយប់ថ្ងៃទី ១៩ ខែមករា ឆ្នាំ ២០២៤ ដែលរៀបចំដោយស្ថានីយទូរទស្សន៍ថោននិងទូរទស្សន៍ Hainon របស់ចិននេះ មានការប្រកួតសរុបចំនួន ៧ គូគឺការប្រកួតបែបគុនខ្មែរ ៥ គូ និងប្រកួតបែបឃីកបុកស៊ីងចំនួន ៣ គូ។
ជាមួយគ្នានេះ កីឡាការិនី អេ យ៉ានុត ដែលត្រូវប្រកួតឃីកបុកស៊ីងជាមួយកីឡាការិនីចិន Kuang Fei ក្នុងទម្ងន់ ៥៧ គីឡូក្រាម បានបង្ហាញការបារម្ភថា៖ «នេះជាលើកដំបូងដែលខ្ញុំវ៉ៃបែបឃីកបុកស៊ីង ហើយខ្ញុំក៏មិនធ្លាប់បានហាត់វ៉ៃបែបនេះពីមុនមកនោះដែរ អ៊ីចឹងការប្រកួតនេះ ខ្ញុំមានការបារម្ភដែរ ប៉ុន្តែដោយសារខ្ញុំធ្លាប់ហាត់កីឡាវ៉ូវីណាម និងប្រដាល់សកលផងនោះ ប្រហែលជាមិនអីទេ គឺវាអាស្រ័យទៅលើការប្រកួតជាក់ស្តែងនៅលើសង្វៀនថា យើងចេញចូលបានលឿនកម្រិតណាដែរ»។
ចំណែកកីឡាករ ធឿន ធារ៉ា ដែលត្រូវប្រកួតបែបគុនខ្មែរជាមួយកីឡាករចិន Chiao Zhou ក្នុងទម្ងន់ ៧២ គីឡូក្រាម ក៏ដូចមិនទាន់ប្រាកដពីការយកជ័យជម្នះដូចគ្នា ព្រោះរូបគេយល់ថា ការប្រកួតជាមួយកីឡាករមានជំនាញផ្នែកឃីកបុកស៊ីងរបស់ចិនអាចមានការពិបាកច្រើន។
ធឿន ធារ៉ា បានបញ្ជាក់ថា៖ «នេះជាលើកទី១ ដែលខ្ញុំបានជួបអ្នកប្រដាល់កុងហ្វូ ដែលភាគច្រើនប្រកួតបែបឃីកបុកស៊ីង ហើយដោយសារខ្ញុំមិនធ្លាប់ឃើញការប្រកួតរបស់គាត់ អ៊ីចឹងវាអាចមានការពិបាកដែរ ព្រោះយើងមិនដឹងថា គាត់វាយចេញចូល និងប្រកួតយ៉ាងម៉េច។ តែទោះបីជាយ៉ាងណា ខ្ញុំត្រៀមខ្លួនបានល្អទាំងកម្លាំងស៊ុហ្វ និងក្បាច់វ៉ៃ ហើយខ្ញុំប្តេជ្ញាប្រកួតឱ្យអស់ពីលទ្ធភាព ទោះបីចាញ់ឬឈ្នះ ត្រូវប្រកួតឱ្យល្អមើល»។
សម្រាប់ការប្រកួត Kun Khmer Kung Fu នៅយប់ថ្ងៃសុក្រខាងមុខនេះដែរ ជើងខ្លាំង ផល សោភ័ណ្ឌ ត្រូវដាក់ឱ្យប្រកួតបែបគុនខ្មែរជាមួយកីឡាករចិន Liu Longquan ក្នុងទម្ងន់ ៦៥ គីឡូក្រាម ចំណែក ពេជ្រ សម្បត្តិ ត្រូវប្រកួតឃីកបុកស៊ីងជាមួយចិន Yang Huo ក្នុងទម្ងន់ ៦០ គីឡូក្រាម ហើយ ម៉ឺន មេឃា ក៏ត្រូវប្រកួតឃីកបុកស៊ីងជាមួយកីឡាករចិន Zhang Jingtao ទម្ងន់ ៦៣,៥ គីឡូក្រាមដូចគ្នា។
ជាមួយការប្រកួតនេះ កីឡាករជំនាញទាំងគុនខ្មែរ និងប្រដាល់សកល ផល សោភ័ណ្ឌ ដែលធ្លាប់ប្រកួតឃីកប៊ុកស៊ីង បានមើលឃើញថា បេក្ខភាពកីឡាករ កីឡាការិនីទាំង ៣ នាក់ ដែលត្រូវប្រកួតឃីកបុកស៊ីងជាមួយចិនអាចនឹងមានការពិបាក ព្រោះឃីកបុកស៊ីង មិនឱ្យប្រើកែង មិនឱ្យចូលចាប់ឡាំជង្គង់ តែអាចបោះជង្គង់ពីចម្ងាយបាន អ៊ីចឹងការប្រកួតអាចហត់ជាងប្រកួតគុនខ្មែរ ព្រោះត្រូវវាយប្តូរគ្នា ដោយគ្មានពេលសម្រាក ឬដកខ្យល់ឡើយ ខណៈការវ៉ៃបែបឃីកបុកស៊ីងនេះ ជាជំនាញរបស់កីឡាករចិនតែម្តង។
ផល សោភ័ណ្ឌ បានបញ្ជាក់ថា៖ «សម្រាប់ខ្ញុំគិតថា ការប្រកួតឃីកបុកស៊ីង យើងពិបាកជាមួយកីឡាករចិនបន្តិចហើយ ព្រោះវាជាជំនាញ ដែលគេហាត់តាំងពីតូចមក ចំណែកយើងហាត់គុនខ្មែរ ដូច្នេះនៅពេលយើងផ្លាស់ប្តូរពីគុនខ្មែរទៅវ៉ៃបែបឃីកបុកស៊ីង អាចមានពិបាកដែរ។ ចំពោះការប្រកួតគុនខ្មែរ ខ្ញុំផ្តល់ទំនុកចិត្តដល់កីឡាកររបស់យើងដល់ ៨០ ភាគរយ តែចំពោះការប្រកួតឃីកបុកស៊ីង ត្រឹម ៥០ ភាគរយទេ អ៊ីចឹងមានតែខំប្រឹងទាំងអស់គ្នា ដោយសង្ឃឹមថា ថ្ងៃអនាគត យើងអាចនឹងវ៉ៃឃីកបុកស៊ីងបានល្អ»។
បន្ថែមលើការប្រកួតរវាងកីឡាករគុនខ្មែរ ជាមួយក្រុមអ្នកលេងកុងហ្វូចំនួន ៥ គូនេះ អ្នកលេងកណ្តាប់ដៃឆ្វេង រឿង សោភ័ណ្ឌ ត្រូវដាក់ឱ្យប្រកួតម៉ារ៉ាតុងដណ្តើមខ្សែក្រវាត់ទម្ងន់ ៦៩ គីឡូក្រាម ជាមួយបេក្ខភាពកីឡាករបរទេស ៣ នាក់ទៀត រួមមាន អ្នកប្រដាល់ហ្វីលីពីន Bacus Juvanie កីឡាករចិន Luo Jie និងអ្នកប្រយុទ្ធរបស់រុស្ស៊ី Sotavov Albert ដោយអ្នកទាំង ៤ នេះ ត្រូវចាប់ឆ្នោតប្រកួតជម្រុះ ៣ ទឹក រួចយកអ្នកឈ្នះឡើងទៅប្រកួតផ្តាច់ព្រ័ត្រ យកខ្សែក្រវាត់ក្នុងរាត្រីនោះតែម្តង។
ទន្ទឹមនឹងនេះ លោក Tommy Kim ទីប្រឹក្សាស្ថានីយទូរទស្សន៍ថោន និងជាតំណាង IPCC ប្រចាំនៅកម្ពុជា បានចាត់ទុកការប្រកួត Kun Khmer Kung Fu នេះ ជាការបើកទំព័រសករាជថ្មីរវាងប្រដាល់គុនខ្មែរ និង Kung Fu ក៏ដូចជាបើកសករាជថ្មីនៃកិច្ចសហប្រតិបត្តិការរវាងស្ថានីយទូរទស្សន៍ថោន និងស្ថានីយទូរទស្សន៍ Hainan ប្រចាំនៅប្រទេសចិន គឺយើងបានរួមគ្នារៀបចំព្រឹត្តិការណ៍ប្រកួតដ៏ធំមួយមិនធ្លាប់មាន ដោយមានការចូលរួមពីកីឡាករជើងខ្លាំងប្រចាំប្រទេសចិន ៦ រូប ព្រមទាំងកីឡាករហ្វីលីពីន និងកីឡាកររុស្ស៊ី ឱ្យមានប្រកួតជាមួយក្រុមប្រដាល់គុនខ្មែរ។
លោកបានថ្លែង នៅចំពោះមុខកីឡាករ កីឡាការិនីកម្ពុជា ក្នុងសន្និសីទកាសែត កាលពីថ្ងៃទី ១០ ខែមករាថា៖ «ពេលនេះយើងមានឱកាសមាស ក្នុងការផ្សព្វផ្សាយគុនខ្មែររបស់យើង ទៅក្រៅប្រទេសហើយ ព្រោះមិនថាកម្មវិធីធំៗ នៅប្រទេសចិន ជប៉ុន និងនៅអឺរ៉ុប គេបានសម្លឹងឃើញសមត្ថភាពប្អូនៗរួចហើយ អ៊ីចឹងប្អូនៗត្រូវខិតខំពង្រឹងសមត្ថភាពឱ្យគ្រប់ទាំងកម្លាំងកាយ ស៊ូហ្វ ក្បាច់គ្រប់ស្នៀតទាំងអស់»។
លោកបានបន្ថែមថា៖ «ការខំប្រឹងរបស់ប្អូនៗគឺផ្សព្វផ្សាយខ្លួនឯងឱ្យគេស្គាល់ ដើម្បីគេអញ្ជើញយើងទៅប្រកួតក្នុងកម្មវិធីរបស់គេនៅក្រៅប្រទេស ហើយយើងក៏មានគម្រោងបញ្ជូនកីឡាករ កីឡាការិនីរបស់យើង ទៅប្រកួតនៅប្រទេសចិនផងដែរ។ ម្យ៉ាងទៀត ការខំប្រឹងរបស់ប្អូនៗ គឺដើម្បីចូលរួមផ្សព្វផ្សាយក្បាច់គុនដូនតារបស់យើងដែលមានអាយុកាលរាប់ពាន់ឆ្នាំមកហើយ។ដូនតាខ្មែរជាអ្នកបង្កើតក្បាច់គុនខ្មែរ អ៊ីចឹងក្នុងនាមយើងជាកូនខ្មែរជំនាន់ក្រោយ ត្រូវនាំគ្នាអភិរក្ស និងអភិវឌ្ឍក្បាច់គុននេះឱ្យកាន់តែល្បីល្បាញ»។
ចំណែកលោក Jiang Kaihon តំណាងឱ្យស្ថានីយទូរទស្សន៍ Hainan របស់ប្រទេសចិន បានថ្លែងថា៖ «យើងពិតជាសប្បាយចិត្តខ្លាំងដែលបានមកដល់ប្រទេសកម្ពុជាដើម្បីរួមគ្នាបង្កើតឱ្យមានព្រឹត្តិការណ៍ដ៏ធំមិនធ្លាប់មាននេះឡើង ដោយការប្រកួតនេះ វាបានរឹតចំណងមិត្តភាពថែមទៀតរវាងកម្ពុជា និងចិនហើយវាក៏ជាការប្រកួតដើម្បីផ្លាស់ប្តូរបទពិសោធន៍គ្នារវាងគុនខ្មែរ និងគុងហ្វ៊ូផងដែរ»៕
