សិក្ខាកាមជាមន្រ្តីបច្ចេកទេសទាំង២៥នាក់ ពេលថតជាមួយថ្នាក់ដឹកនាំ នៅក្នុងពិធីបិទវគ្គបណ្តុះបណ្តាល។ រូបភាព សហការី
ភ្នំពេញ៖ សិក្ខាកាមជាកីឡាករ កីឡាការិនី និងមន្រ្តីកីឡាចំនួន២៥នាក់ ដែលទើបបានបញ្ចប់វគ្គបណ្តុះបណ្តាលមន្រ្តីបច្ចេកទេសរៀបចំការប្រកួតកីឡាទូកក្តោង នៅខេត្តព្រះសីហនុ ត្រូវបានថ្នាក់ដឹកនាំសហព័ន្ធកីឡាទូកក្តោងកម្ពុជា ចាត់ទុកថា ជាធនធានដ៏សំខាន់ ក្នុងការរួមចំណែកពង្រឹងការប្រកួតកីឡាទូកក្តោងទាំងថ្នាក់ជាតិ និងអន្តរជាតិ នៅក្នុងប្រទេសកម្ពុជាឱ្យបានកាន់តែល្អ និងមានគុណភាពថែមមួយកម្រិតទៀត។
វគ្គបណ្តុះបណ្តាលមន្រ្តីបច្ចេកទេសរៀបចំការប្រកួតកីឡាទូកក្តោងនេះ ត្រូវបានធ្វើឡើង នៅមជ្ឈមណ្ឌលជាតិហ្វឹកហ្វឺនកីឡាទូកក្តោងកម្ពុជា ស្ថិតក្នុងតំបន់អភិវឌ្ឍន៍ទីក្រុងរណប Bay of Lights ខេត្តព្រះសីហនុ កាលពីថ្ងៃទី២៤ ដល់ទី២៦ ខែមករា ហើយវគ្គបណ្តុះបណ្តាលនេះ ជាផ្នែកមួយដ៏សំខាន់នៃផែនការសកម្មភាពការងារ ឆ្នាំ២០២៣ របស់សហព័ន្ធកីឡាទូកក្តោងកម្ពុជា ក្រោមគម្រោងថវិការបស់ក្រសួងអប់រំ យុវជន និងកីឡា។
លោក សោម សុទ្ធរិទ្ធិពង្ស អគ្គលេខាធិការសហព័ន្ធកីឡាទូកក្តោងកម្ពុជា បានឱ្យដឹងថាការធ្វើជាម្ចាស់ផ្ទះការប្រកួតស៊ីហ្គេម លើកទី៣២ ឆ្នាំ២០២៣ នៅទីលានតេជោ ខេត្តព្រះសីហនុ កាលពីខែឧសភា ឆ្នាំ២០២៣ កន្លងមក សហព័ន្ធកីឡាទូកក្តោងកម្ពុជា បានទទួលមេដាយប្រាក់១ សំរឹទ្ធ២ ព្រមទាំងចំណេះដឹង បទពិសោធន៍ល្អៗជាច្រើន តែយើងក៏នូវមានចំណុចខ្វះខាតមួយចំនួន ដែលតម្រូវឱ្យមន្ត្រីបច្ចេកទេសរបស់យើង ត្រូវសិក្សាស្វែងយល់បន្ថែម ដើម្បីបន្តអភិវឌ្ឍន៍ខ្លួនទៅមុខ សម្រាប់ត្រៀមការធ្វើជាម្ចាស់ផ្ទះការប្រកួតជាតិ និងអន្តរជាតិឱ្យបានកាន់តែល្អ។
លោកបានបន្ថែមថា៖ «វគ្គបណ្តុះបណ្តាលមន្ត្រីបច្ចេកទេសរៀបចំការប្រកួតកម្រិតមូលដ្ឋាននេះ ត្រូវបានធ្វើឡើង ដើម្បីឱ្យប្រភេទកីឡាទូកក្តោងរបស់កម្ពុជា មានមន្រ្តីបច្ចេកទេស ដែលមានជំនាញកម្រិតខ្ពស់ សម្រាប់ត្រៀមការប្រកួតកីឡាជាតិ និងអន្តរជាតិផ្សេងៗ នាពេលខាងមុខ ជាពិសេសការត្រៀមខ្លួនធ្វើជាម្ចាស់ផ្ទះការប្រកួតកីឡាយុវជនអាស៊ី ឆ្នាំ២០២៩ និងដើម្បីបង្ហាញដល់មហាជន បានឃើញ និងស្វែងយល់អំពីប្រភេទកីឡាទូកក្តោង កាន់តែច្បាស់ថែមទៀត»។
អគ្គលេខាធិការរូបនេះ បានបញ្ជាក់ថា៖ «មន្រ្តីបច្ចេកទេសរៀបចំការប្រកួត គឺជាក្រុមការងារសំខាន់មួយ ដែលអាចធ្វើឱ្យការប្រកួតមួយ ទទួលបានជោគជ័យ ហើយបើមន្រ្តីបច្ចេកទេសរៀបចំការប្រកួតរបស់កម្ពុជាយើង មានចំណេះជំនាញកម្រិតខ្ពស់ ស្របតាមស្តង់ដា របស់សហព័ន្ធកីឡាទូកក្តោងអន្តរជាតិ នោះគ្រប់ការប្រកួតទាំងថ្នាក់ជាតិ និងអន្តរជាតិ ដែលកម្ពុជា ត្រូវធ្វើជាម្ចាស់ផ្ទះ នឹងសុទ្ធសឹងតែទទួលបានជោគជ័យ និងគុណភាពនៃការប្រកួតក្នុងកម្រិតខ្ពស់»។
តាមរយៈការសិក្សាទាំងទ្រឹស្តី និងការអនុវត្តជាក់ស្តែងរយៈពេល៣ថ្ងៃ នៅលើទឹកដីខេត្តព្រះសីហនុ កន្លងមកនេះ វគ្គបណ្តុះបណ្តាលមន្ត្រីបច្ចេកទេសរៀបចំការប្រកួតកីឡាទូកក្តោង បានបញ្ចប់ដោយជោគជ័យ ដោយសិក្ខាកាមទាំង២៥នាក់ ទទួលបាននូវចំណេះដឹងកម្រិតខ្ពស់លើការរៀបចំទម្រង់នៃការប្រកួត ការប្រើប្រាស់ទង់សញ្ញា សំឡេងសម្គាល់ និងច្បាប់បញ្ញតិ្តផ្សេងៗ និងបានអនុវត្តផ្ទាល់នៅលើផ្ទៃទឹក។
ជាមួយគ្នានេះ លោកឧត្តមនាវីទោ គឹម សាវុធ មេបញ្ជាការរង បញ្ជាការដ្ឋានមូលដ្ឋានសមុទ្រ ដែលជាគណៈអធិបតី នៅក្នុងពិធីបិទវគ្គ កាលពីថ្ងៃទី២៦ ខែមករានោះ បានថ្លែងកោតសរសើរដល់សិក្ខាកាមទាំងអស់ ដែលបានខិតខំ និងយកចិត្តទុកដាក់សិក្សារៀនសូត្រ ទទួលបានចំណេះ និងជំនាញថ្មីៗ មកអភិវឌ្ឍខ្លួនបន្ថែមទៀត ដើម្បីរួមចំណែកជាមួយសហព័ន្ធកីឡាទូកក្តោងកម្ពុជា រៀបចំការប្រកួតទាំងថ្នាក់ជាតិ និងអន្តរជាតិឱ្យបានកាន់តែល្អ ដើម្បីជាមុខមាត់របស់ប្រទេសកម្ពុជា។
ទន្ទឹមជាមួយគ្នានេះ លោក សោម សុទ្ធរិទ្ធិពង្ស អគ្គលេខាធិការសហព័ន្ធកីឡាទូកក្តោងកម្ពុជា បានឱ្យដឹងថា នៅក្នុងចំណោមសិក្ខាកាមជាមន្រ្តីបច្ចេកទេសទាំង២៥នាក់ ដែលទើបបានបញ្ចប់វគ្គបណ្តុះបណ្តាលនេះ នឹងត្រូវចូលរួមរៀបចំការប្រកួតកីឡាទូកក្តោងថ្នាក់ជាតិ ឆ្នាំ២០២៣ ដែលនឹងធ្វើនៅមជ្ឈមណ្ឌលជាតិហ្វឹកហ្វឺនកីឡាទូកក្តោងកម្ពុជា ក្នុងខេត្តព្រះសីហនុ ពីថ្ងៃទី២៧ ដល់ទី២៩ ខែមករា ឆ្នាំ២០២៤។
លោក សោម សុទ្ធរិទ្ធិពង្ស បានបញ្ជាក់ថា៖ «នៅក្នុងចំណោមសិក្ខាកាមទាំង២៥នាក់នេះ គឺមានមន្រ្តីបច្ចេកទេសជាង១០នាក់ ដែលនឹងត្រូវចូលរួមរៀបចំការប្រកួតថ្នាក់ជាតិរបស់យើងលើកនេះ ចំណែកអ្នកផ្សេងទៀត គឺជាកីឡាករ កីឡាការិនី ដែលពួកគាត់ នឹងត្រូវចូលរួមការប្រកួតនេះដូចគ្នា ហើយតាមរយៈវគ្គបណ្តុះបណ្តាល កាលពីពេលថ្មីៗនេះ ខ្ញុំជឿថា ទាំងមន្រ្តីបច្ចេកទេស និងក្រុមអត្តពលិករបស់យើង នឹងអាចយល់កាន់តែច្បាស់ពីលក្ខខណ្ឌ និងច្បាប់ទម្លាប់ថ្មីៗ ដែលនឹងធ្វើឱ្យពួកគេ អាចបំពេញការងារបានល្អរៀងៗខ្លួន»៕
