លោក ថោង ខុន បានប្រគល់វត្ថុអនុស្សាវរីយ៍ ជូនលោក Ingmar DE VOS បន្ទាប់ពីកិច្ចពិភាក្សាការងារ នៅ NOCC កាលពីព្រឹកថ្ងៃទី៣០ ខែមករា។ រូបថត NOCC
ភ្នំពេញ៖ លោក Ingmar DE VOS ប្រធានសហព័ន្ធកីឡាបង្ហាត់ជិះសេះអន្តរជាតិ (FEI) បានធ្វើការវាយតម្លៃខ្ពស់ ទៅលើការខិតខំប្រឹងប្រែងរបស់សហព័ន្ធកម្ពុជាបង្ហាត់ជិះសេះ (CEF) ដែលបានជំរុញឱ្យប្រភេទកីឡាមួយនេះ វិវឌ្ឍទៅមុខគួរឱ្យកត់សម្គាល់ ដោយមានទាំងធនធានកីឡាករ កីឡាការិនី គ្រូបង្វឹក និងសត្វសេះ ហើយកម្ពុជា ក៏មានទីលានប្រណាំងសេះបែបស្តង់ដាផងដែរ។
ការមើលឃើញពីការអភិវឌ្ឍកីឡាជិះសេះនៅកម្ពុជានេះ គឺបន្ទាប់ពី លោក Ingmar DE VOS និងលោក Jack HUANG ជាអនុប្រធាន FEI បានធ្វើដំណើរមកទស្សនកិច្ច នៅក្នុងប្រទេសកម្ពុជា ហើយបានធ្វើការសំណេះសំណាលដោយផ្ទាល់ជាមួយថ្នាក់ដឹកនាំ គ្រូបង្វឹក និងកីឡាករ កីឡាការិនីរបស់ CEF នៅមជ្ឈមណ្ឌលជិះសេះ Genius Resort កាលពីថ្ងៃទី២៩ ខែមករា ឆ្នាំ២០២៤។
បើទោះបីជា ប្រភេទកីឡាជិះសេះ មិនត្រូវបានដាក់បញ្ចូល នៅក្នុងការប្រកួតស៊ីហ្គេម ចំនួន៣លើកជាប់ៗគ្នា តាំងពីឆ្នាំ២០១៩ ដល់ឆ្នាំ២០២៣ ប៉ុន្តែការដណ្តើមបានមេដាយសំរឹទ្ធ១ សម្រាប់ការបង្ហាញវត្តមានលើកចុងក្រោយ ក្នុងស៊ីហ្គេម ឆ្នាំ២០១៧ នៅម៉ាឡេស៊ី លើវិញ្ញាសាលោតផ្លោះរបារជាក្រុមបុរស និងការឈ្នះបានមេដាយមាស ការប្រកួតពានរង្វាន់ជើងឯកយុវជនអាស៊ីអាគ្នេយ៍ លើកទី ១ ឆ្នាំ២០២៣ (The 1st SEA Youth Cup) នៅទីក្រុងបាងកក ប្រទេសថៃ កាលពីថ្ងៃទី៩ ខែធ្នូ បានក្លាយជាលទ្ធផលដ៏វិជ្ជមានរបស់ក្រុមជិះសេះកម្ពុជា។
លោក Ingmar DE VOS បានថ្លែងថា៖ «យើងតែងតែបានគាំទ្រទៅដល់គម្រោងនៃការអភិវឌ្ឍរបស់ CEF ដូចជាការបណ្តុះបណ្តាលធនធានគ្រូបង្វឹក ធនធានកីឡាករ កីឡាការិនី និងធនធានអ្នកជំនាញថែរក្សាសេះ ហើយយើងពិតជាសប្បាយចិត្ត ដែលគម្រោងទាំងអស់នេះ បានជួយឱ្យក្រុមជិះសេះកម្ពុជា បានឈ្នះមេដាយមាស ជាលើកដំបូង នៅប្រទេសថៃ»។
សម្រាប់ការទៅទស្សនកិច្ចដោយផ្ទាល់ នៅកម្ពុជានេះ លោក Ingmar DE VOS និងលោក Jack HUANG បានបង្ហាញការចាប់អារម្មណ៍ពីមជ្ឈមណ្ឌលជិះសេះ Genius Resort ស្ថិតនៅសង្កាត់ទឹកថ្លា ខណ្ឌសែនសុខ ដោយបានសាងសង់ស្របតាមស្តង់ដាអន្តរជាតិរបស់ FEI និងអាចរៀបចំការប្រកួតអន្តរជាតិបាន ហើយមជ្ឈមណ្ឌលថ្មីនេះ បានក្លាយជាកន្លែងហ្វឹកហាត់របស់ក្រុមជម្រើសជាតិកម្ពុជា។
លោក Ingmar DE VOS បានបញ្ជាក់ថា៖ «យើងពិតជាមានអារម្មណ៍រំភើប ដែលកម្ពុជា មានទីលានបែបស្តង់ដាអន្តរជាតិ ជាមួយនឹងគ្រូបង្វឹក ដែលមានលក្ខណសម្បត្តិគ្រប់គ្រាន់ ពិសេសកម្ពុជាពេលនេះមានកីឡាករ កីឡាការិនីជាយុវជន ដែលកំពុងហ្វឹកហាត់បង្កើនសមត្ថភាព ហើយនេះជាកត្តាយ៉ាងសំខាន់ ក្នុងការអភិវឌ្ឍធនធានអត្តពលិក ដោយខ្ញុំសង្ឃឹមថា ពួកគេនឹងមានឱកាសបានចូលរួមប្រកួត នៅក្នុងតំបន់ ក៏ដូចជាការប្រកួតស៊ីហ្គេមផងដែរ»។
ជាមួយគ្នានោះ អ្នកស្រី ទេព ម៉ូណា ប្រធានសហព័ន្ធកម្ពុជាបង្ហាត់ជិះសេះ បានអះអាងថា សហព័ន្ធកម្ពុជាបង្ហាត់ជិះសេះ បានទទួលការគាំទ្រ និងជួយជ្រោមជ្រែងច្រើនពី FEI នៅក្នុងផែនការអភិវឌ្ឍន៍ធនធានមនុស្សកន្លងមកនេះ ហើយបច្ចុប្បន្នដោយសារកម្ពុជា កង្វះខាតអ្នកជំនាញផ្នែកថែទាំសេះ គឺយើងបានបង្កើតកម្មវិធីបណ្តុះបណ្តាលវិជ្ជាជីវៈនេះ ដែលគាំទ្រដោយ FEI ។
អ្នកស្រីបានបន្ថែមថា សហព័ន្ធ បានសហការជាមួយអង្គការ Just World International ក្នុងការបណ្តុះបណ្តាលយុវតីក្រីក្រ ចំនួន២០នាក់ មានអាយុ១៥ឆ្នាំ ដល់២០ឆ្នាំ នៅអង្គការ People Improvement Organization “PIO” មានទីតាំង នៅរាជធានីភ្នំពេញ ដោយនឹងផ្តល់ឱកាសការងារដល់ពួកគ ក្លាយជាអ្នកថែទាំសេះ ព្រោះក្រោយបញ្ចប់ការសិក្សា សិក្ខាកាម នឹងទទួលបានវិញ្ញាបនបត្រទទួលស្គាល់ពី CEF និងត្រូវបានអនុញ្ញាតឱ្យធ្វើការជាអ្នកជំនាញថែទាំសត្វសេះ នៅមជ្ឈមណ្ឌលជិះសេះ ដោយកម្មវិធីនេះ គ្រោងនឹងចាប់ផ្តើមនៅពាក់កណ្តាលខែកុម្ភៈ ឆ្នាំ២០២៤។
ដោយឡែកប្រតិភូរបស់ FEI ដឹកនាំដោយលោក Ingmar DE VOS និងលោក Jack HUANG ព្រមទាំងសហព័ន្ធកម្ពុជាបង្ហាត់ជិះសេះ ដឹកនាំដោយអ្នកស្រី ទេព ម៉ូណា និងព្រះអង្គម្ចាស់ នរោត្តម ណានដាទេវី ជាអគ្គលេខាធិការ ក៏បានចូលជួបសម្តែងការគួរសម និងពិភាក្សាការងារជាមួយ លោក ថោង ខុន ទេសរដ្ឋមន្ត្រីទទួលបន្ទុកជំរុញអភិវឌ្ឍចលនាកីឡា និងជាប្រធានគណៈកម្មាធិការជាតិអូឡាំពិកកម្ពុជា (NOCC) កាលពីព្រឹកថ្ងៃទី៣០ ខែមករា ផងដែរ។
នៅក្នុងឱកាសនោះ លោក ថោង ខុន បានថ្លែងផ្តោតសំខាន់លើការបន្តគាំទ្រអភិវឌ្ឍកីឡាជិះសេះ នៅកម្ពុជា តាមរយៈការពិនិត្យលទ្ធភាព ក្នុងការជំរុញបញ្ចូលប្រភេទកីឡានេះ ទៅក្នុងការប្រកួតកីឡាកម្រិតតំបន់ នាពេលអនាគត ជាពិសេសពិនិត្យលទ្ធភាពក្នុងបញ្ចូលទៅក្នុងការប្រកួតកីឡាយុវជនអាស៊ី លើកទី៥ ឆ្នាំ២០២៩ នៅកម្ពុជា ដែលទាមទារឱ្យមានការវាយតម្លៃយ៉ាងហ្មត់ចត់ពីក្រុមប្រឹក្សាអូឡាំពិកអាស៊ី (OCA) ស្របតាមស្តង់ដាកំណត់បច្ចេកទេស ដូចការរៀបចំការប្រកួតកីឡាអូឡាំពិក ដែរ។
ជាមួយគ្នានោះ លោក ថោង ខុន បានស្នើសុំការគាំទ្រពីសហព័ន្ធកីឡាបង្ហាត់ជិះសេះអន្តរជាតិ លើការរៀបចំអភិវឌ្ឍធនធានអត្តពលិក,ធនធានបច្ចេកទេសជំនាញថែទាំសេះ និងការសាងសង់ទីលានស្របតាមស្តង់ដាអន្តរជាតិ ដើម្បីស្នើសុំរាជរដ្ឋាភិបាល ក្នុងការពិនិត្យលទ្ធភាពបញ្ចូលប្រភេទកីឡាជិះសេះ ក្នុងការប្រកួតកីឡាយុវជនកម្រិតអាស៊ីនេះ។
លោកបានថ្លែងថា៖ «ផ្អែកលើស្នាដៃការឈ្នះមេដាយសំរឹទ្ធ សម្រាប់ការប្រកួតស៊ីហ្គេម នៅម៉ាឡេស៊ី និងការឈ្នះមេដាយមាស នៅថៃ បានបង្ហាញឱ្យឃើញថា កីឡាជិះសេះ ជាប្រភេទកីឡាមានសក្តានុពលមួយ ដែលយើងគួរពិចារណារួមគ្នា ដើម្បីឱ្យប្រភេទកីឡានេះ មានការប្រកួត នៅក្នុងតំបន់ ឬពិចារណាគិតទៅដល់ការប្រកួតកីឡាយុវជនអាស៊ី ឆ្នាំ២០២៩ ដែលកម្ពុជាត្រូវធ្វើជាម្ចាស់ផ្ទះ»។
ជាការឆ្លើយតប លោក Ingmar DE VOS បានថ្លែងថា៖ «ការមកទស្សនកិច្ចនៅប្រទេសកម្ពុជាលើកនេះ យើងបាននឹងកំពុងពិនិត្យទៅលើលទ្ធភាពនៃគម្រោងផ្សេងៗទៀតរបស់ FEI ក្នុងការបន្តជួយអភិវឌ្ឍប្រភេទកីឡាជិះសេះនៅកម្ពុជា ហើយខ្ញុំសូមកោតសរសើរទៅដល់សហព័ន្ធ ដែលបានប្តេជ្ញាចិត្ត និងខិតខំអភិវឌ្ឍធនធានកីឡាជិះសេះឱ្យមានការរីកចម្រើននៅកម្ពុជា»៕
