កីឡាករ សាលី ហ្វីលីន បានឈ្នះមេដាយមាសចំនួន២ និងប្រាក់១ ពីការប្រកួត WGP1 Water Jet World Series 2024 ដែលកំពុងធ្វើនៅសហរដ្ឋអាមេរិក។ រូបថត សាលី អ៊ូម៉ើត
កីឡាករវ័យក្មេង សាលី ហ្វីលីន ដណ្ដើមបានមេដាយមាស១ទៀត ពីការប្រកួតកីឡាម៉ូតូទឹកពិភពលោកតាមស៊េរី (WGP1 Water Jet World Series 2024) ជុំទី២ នៅសហរដ្ឋអាមេរិក ហើយនេះក៏ជាមេដាយមាសទី៣ ដែលក្រុមម៉ូតូទឹកកម្ពុជា ដណ្តើមបានសម្រាប់ការប្រកួតដ៏ធំនេះផងដែរ។
តាមការបង្ហោះសាររបស់វីរកីឡាករម៉ូតូទឹកកម្ពុជា សាលី អ៊ូម៉ើត ដែលជាអគ្គលេខាធិការសហព័ន្ធកីឡាម៉ូតូទឹកកម្ពុជា បានឱ្យដឹងថា សាលី ហ្វីលីន បានឈ្នះមេដាយមាស លើវិញ្ញាសា Amateur Runabout 1100 Limited សម្រាប់ការប្រកួត កាលពីថ្ងៃទី៩ ខែតុលា (ម៉ោងនៅអាមេរិក)។
តាមរយៈលទ្ធផលនេះបង្ហាញថា សាលី ហ្វីលីន ដណ្តើមបានមេដាយចំនួន៣ហើយ សម្រាប់ការប្រកួត Water Jet World Series 2024 នៅសហរដ្ឋអាមេរិកនេះ ព្រោះនៅមុនការឈ្នះបានមេដាយមាសលើវិញ្ញាសា Amateur Runabout 1100 Limited នេះ ហ្វីលីន ក៏បានឈ្នះមេដាយមាស លើវិញ្ញាសា Amateur Runabout 1100 Stock និងឈ្នះបានមេដាយប្រាក់ លើវិញ្ញាសា Amateur Runabout Rec Lites ផងដែរ។
សម្រាប់ការដណ្តើមបានមេដាយចំនួន៣ សម្រាប់ការប្រកួត៣វិញ្ញាសាជាប់ៗគ្នានេះ សាលី ហ្វីលីន បានបង្ហាញសារនៅលើហ្វេសប៊ុករបស់ខ្លួន នៅថ្ងៃព្រហស្បតិ៍នេះថា៖ «ការបំបែកកំណត់ត្រាមកបានពាក់កណ្ដាលផ្លូវហើយ»។
ការលើកឡើងបែបនេះ ក៏ព្រោះតែ សាលី ហ្វីលីន នៅសល់ការប្រកួតចំនួន៣វិញ្ញាសាទៀត គឺវិញ្ញាសា Expert Runabout 1100 Stock វិញ្ញាសា Expert Runabout 1100 Superstock និងវិញ្ញាសា Pro Am 1100 Stock ហើយវិញ្ញាសាទាំង៣នេះ ហ្វីលីន មានមហិច្ឆតាដណ្តើមឱ្យបានមេដាយដូចគ្នា ដើម្បីបង្កើតបាននូវកំណត់ត្រាល្អបំផុត សម្រាប់អាជីពរបស់ខ្លួន។
ក្រុមម៉ូតូទឹកកម្ពុជា បានថតជាមួយក្រុមការងារ ក្នុងអំឡុងការប្រកួត WGP1 Water Jet World Series 2024 នៅអាមេរិក ពីថ្ងៃទី៧ ដល់ទី១៣ ខែតុលា។ រូបថត សាលី អ៊ូម៉ើត
បន្ថែមលើនេះ កីឡាករ កៃ វ៉ាន់ស៊ីដែន ក៏ឈ្នះបានមេដាយមាស លើប្រភេទវិញ្ញាសា Novice Ski Stock ផងដែរ រីឯកីឡាករ ម៉ីន មូសស្ដាន ឈ្នះបានមេដាយប្រាក់ លើវិញ្ញាសា Novice Runabout 1100 Stock ធ្វើឱ្យកម្ពុជា ហេតុនេះសម្រាប់លទ្ធផលជាបណ្តោះអាសន្ននៅពេលនេះគឺក្រុមម៉ូតូទឹកកម្ពុជា ដណ្តើមបានមេដាយសរុបចំនួន៥ ក្នុងនោះមេដាយមាស៣ និងប្រាក់២។
តាមរយៈលទ្ធផលជាបណ្តោះអាសន្ននេះបង្ហាញថា ក្រុមម៉ូតូទឹកកម្ពុជា បានបំបែកកំណត់ត្រាការឈ្នះបានមេដាយមាសច្រើនជាងការប្រកួត Water Jet World Series 2024 ជុំទី១ នៅប្រទេសប៉ូឡូញ កាលពីថ្ងៃទី២៤ ដល់ទី២៨ ខែកក្កដា រួចទៅហើយ ដោយកាលនោះពួកគេ ដណ្តើមបានមេដាយមាស២ ប្រាក់២ និងសំរឹទ្ធ២ ខណៈការប្រកួតជុំទី២ នៅអាមេរិកនេះ ក្រុមម៉ូតូទឹកកម្ពុជា នៅសល់វិញ្ញាសាប្រកួតជាច្រើនទៀត។
គួរបញ្ជាក់ថា សម្រាប់ការប្រកួត Water Jet World Series 2024 ជុំទី២ នៅសហរដ្ឋអាមេរិកនេះ កម្ពុជាបានបញ្ជូនកីឡាករចំនួន៥នាក់ទៅប្រកួត ក្នុងនោះមានកីឡាករ សាលី ហ្វីលីន, កៃ វ៉ាន់ស៊ីដែន, ម៉ីន មូសស្ដាន, ម៉ីន អូស្មាន់ និងវីរកីឡាករ សាលី អ៊ូម៉ើត ដែលជាអ្នកដឹកនាំក្រុម ហើយការប្រកួតបានចាប់ផ្តើមកាលពីថ្ងៃទី៧ និងគ្រោងបញ្ចប់នៅថ្ងៃទី១៣ ខែតុលា ខាងមុខនេះ៕
