កីឡាការិនីឥណ្ឌា Neelakandan Neena បានធាក់ចូលផ្ទៃមុខរបស់ នៅ ស្រីពៅ ក្នុងការប្រកួតផ្តាច់ព្រ័ត្រ កាលពីថ្ងៃអាទិត្យ។ រូបថត PEAK
ក្រុមកីឡាករ កីឡាការិនីឃីកបុកស៊ីងកម្ពុជា បានរួមគ្នាបង្កើតកំណត់ត្រាប្រវត្តិថ្មី ចំពោះការធ្វើម្ចាស់ផ្ទះការប្រកួតកីឡាឃីកបុកស៊ីងជើងឯកអាស៊ី ឆ្នាំ២០២៤ (Asian Kickboxing Championships) តាមរយៈការដណ្តើមបានជោគជ័យយ៉ាងត្រចះត្រចង់ ជាមួយការឈ្នះបានមេដាយសរុបចំនួន ៤១ គឺមេដាយមាស៩ ប្រាក់៤ និងមេដាយសំរឹទ្ធចំនួន២៨។
តាមរយៈការដណ្តើមបានមេដាយយ៉ាងច្រើននេះ បានជួយឱ្យម្ចាស់ផ្ទះកម្ពុជា ឈរនៅក្នុងចំណាត់ថ្នាក់លេខ៤ ក្នុងចំណោមប្រទេសទាំង ២៣ ដែលបានចូលរួមការប្រកួតកីឡា ឃីកបុកស៊ីង ជើងឯកអាស៊ី ឆ្នាំ២០២៤នេះ ខណៈ អ៊ូសបេគីស្ថាន ឈរនៅលេខ១ ដោយបានមេដាយមាស ២០ ប្រាក់ ៥ និងសំរឹទ្ធ ៣ ហើយកាហ្សាក់ស្ថាន ឈរលេខ២ ឈ្នះបានមេដាយមាស ១៨ ប្រាក់ ១២ និងសំរឹទ្ធ៧ រីឯប្រទេសវៀតណាម ឈរលេខ៣ ដោយឈ្នះមេដាយមាស ១០ ប្រាក់ ១១ និងសំរឹទ្ធ ១១ ចំណែកអត្តពលិកមកពី១០ប្រទេសទៀត ក៏ដណ្ដើមបានមេដាយមាសផងដែរ។
តាមរយៈការប្រកួត ដែលធ្វើនៅវិមានពហុកីឡដ្ឋានជាតិ កាលពីថ្ងៃទី៦ និងបានបញ្ចប់ កាលពីយប់ថ្ងៃទី១៣ ខែតុលានេះ កីឡាករ ឆុង វិសាល បានក្លាយជាបេក្ខភាពដំបូង ដែលបានឈ្នះមេដាយមាសជូនម្ចាស់ផ្ទះកម្ពុជាមុនគេ ពីការប្រកួតកីឡាឃីកបុកស៊ីងជើងឯកអាស៊ីនេះ បន្ទាប់ពីរូបគេបានយកឈ្នះកីឡាកររបស់វៀតណាម Nguyen Si Thang លើវិញ្ញាសា FC ក្នុងប្រភេទទម្ងន់ក្រោម៥១គីឡូក្រាម (-៥១គីឡូក្រាម) កាលពីថ្ងៃសៅរ៍ ទី១២ ខែតុលា។
ចំណែក កីឡាករ ខាំ ខ្លានាង បានឈ្នះមេដាយមាស សម្រាប់ការប្រកួតផ្តាច់ព្រ័ត្រ កាលពីថ្ងៃសៅរ៍នោះដែរ បន្ទាប់ពីរូបគេបានឈ្នះកីឡាករកាហ្សាស្ថាន Zhumabayev Nursultan លើវិញ្ញាសា K1 ទម្ងន់ -៥១គីឡូក្រាម ហើយការប្រកួតផ្តាច់ព្រ័ត្រ កាលពីថ្ងៃអាទិត្យ ដែលជាថ្ងៃចុងក្រោយ គឺកីឡាករ កីឡាការិនីរបស់កម្ពុជា ដណ្តើមបានមេដាយមាសចំនួន៧ទៀត។
កីឡាការិនី ឆា ចាន់ដេង បានឈ្នះមេដាយមាស ក្រោយយកឈ្នះកីឡាការិនីឥណ្ឌា Khati Solomi ដោយពិន្ទុក្នុងវិញ្ញាសា K1 -៤៨គីឡូក្រាម រីឯកីឡាការិនី ទូច ចាន់វត្តី ដណ្តើមបានមេដាយមាស លើវិញ្ញាសា KL -៥៥គីឡូក្រាម ដោយបានយកឈ្នះកីឡាការិនីរបស់ឥណ្ឌូណេស៊ី Pieters Diandra Ariesta ហើយកីឡាករ ភ័ណ្ឌ ចាន់ធី បានឈ្នះមេដាយមាស តាមរយៈការយកឈ្នះកីឡាករឥណ្ឌូនេស៊ី Aziz Abdul នៅវគ្គផ្តាច់ព្រ័ត្រ។
ប្តីប្រពន្ធ សុខ រិទ្ធ និង នៅ ស្រីពៅ ពេលឡើងទទួលបាន និងមេដាយមាស ពីការប្រកួតកីឡាឃីកបុកស៊ីងជើងឯកអាស៊ី ឆ្នាំ២០២៤ ដែលកម្ពុជា ធ្វើជាម្ចាស់ផ្ទះ។ រូបថត សហការី
ទន្ទឹមនឹងនេះ កីឡាការិនី ទួន ស្រីពីន បានផ្តួលកីឡាការិនីគុយវែត Alkharif Seham ឱ្យបោះបង់ចោលការប្រកួតក្នុងទឹកទី៣ ដើម្បីទទួលបានមេដាយមាស លើវិញ្ញាសា K1-៥៦គីឡូក្រាម ហើយកីឡាករ ហ៊ឹម គឹមរៀង បានយកឈ្នះកីឡាករវៀតណាម Nguyen Ngoc Hoang ក្នុងវគ្គផ្តាច់ព្រ័ត្រ ដើម្បីទទួលបានមេដាយមាសលើវិញ្ញាសា LK-៥៤គីឡូក្រាម។
ជាមួយគ្នានេះប្តីប្រពន្ធ សុខ រិទ្ធ និង នៅ ស្រីពៅ បានបង្កើតស្នាដៃជូនជាតិក្នុងពេលតែមួយ តាមរយៈការដណ្តើមបានមេដាយមាសរៀងៗខ្លួន ដោយក្នុងនោះកីឡាករ សុខ រិទ្ធ បានយកឈ្នះកីឡាករថៃ Phrommakhot Netipong លើវិញ្ញាសា LK-៥១គីឡូក្រាម នៅវគ្គផ្តាច់ព្រ័ត្រ រីឯ នៅ ស្រីពៅ បានយកឈ្នះកីឡាការិនីឥណ្ឌា Neelakandan Neena ដើម្បីទទួលបានមេដាយមាសលើវិញ្ញាសា LC -៥៥គីឡូក្រាម។
នៅក្នុងការដណ្តើមបានជោគជ័យយ៉ាងធំធេងនេះ គឺការប្រកួតផ្តាច់ព្រ័ត្ររវាងកីឡាការិនី នៅ ស្រីពៅ និងកីឡាការិនី Neelakandan Neena បានក្លាយជាការចងចាំ ដែលអ្នកគាំទ្រ ជាពិសេសក្រុមគ្រូបង្វឹក និងកីឡាករ កីឡាការិនីឃីកបុកស៊ីងកម្ពុជា មិនអាចបំភ្លេចបាន ព្រោះម្នាក់ៗសុទ្ធតែបានបង្ហាញក្តីរំភើបឡើងស្រក់ទឹកភ្នែកដោយមិនដឹងខ្លួន នៅពេលឃើញ នៅ ស្រីពៅ បានប្រើភាពអំណត់របស់ខ្លួន ដេញវាយទៅកីឡាការិនីរបស់ឥណ្ឌា រហូតដណ្តើមបានជ័យជម្នះវិញ នៅក្នុងទឹកទី៣ចុងក្រោយ។
សម្រាប់ការប្រកួតទឹកទី១ និងទី២ នៅ ស្រីពៅ បានចាញ់ប្រៀបកីឡាការិនី ជំនាញប្រើជើង Neelakandan Neena ដោយពិន្ទុ ៣-០ ប៉ុន្តែនៅទឹកទី៣ ស្រីពៅ បានព្យាយាមវាយសម្រុក ហើយអាចប្រើកណ្តាប់ដៃវាយចំគោលដៅល្អចំនួន ២ដៃ ធ្វើឱ្យលទ្ធផលនៃការប្រកួតកែប្រែនៅនាទីចុងក្រោយ ពីការចាញ់ ៣-០ មកជាឈ្នះវិញ ដោយលទ្ធផលផ្លូវការ ២-១ ដើម្បីទទួលបានមេដាយមាស ជាលើកដំបូង នៅក្នុងអាជីពរបស់ខ្លួន។
កីឡាការិនី ទូច ចាន់វត្តី បានទាត់ទៅលើកីឡាការិនីរបស់ឥណ្ឌូណេស៊ី Pieters Diandra Ariesta ក្នុងពេលប្រកួតផ្តាច់ព្រ័ត្រ នៅវិមានពហុកីឡដ្ឋានជាតិ។ រូបថត PEAK
នៅ ស្រីពៅ បានបង្ហាញការរំភើបឡើងស្រក់ទឹកភ្នែក ហើយនាងបាននិយាយក្រោយការប្រកួតទាំងអួលដើមកថា៖ «ខ្ញុំធ្វើតាមក្តីស្រមៃប៉ារបស់ខ្ញុំបានហើយ! ទោះបីជាខ្ញុំមិនអាចបានមេដាយមាសស៊ីហ្គេមមែន ប៉ុន្តែអានេះ (មេដាយមាសពីការប្រកួតកីឡាឃីកបុកស៊ីងជើងឯកអាស៊ី) ធំជាងមេដាយស៊ីហ្គេមទៅទៀត អ៊ីចឹងខ្ញុំសូមផ្តាំទៅប៉ាថា កូនស្រីម្នាក់នេះធ្វើបានហើយ»។
ចំណែកកីឡាករ សុខ រិទ្ធ ដែលជាស្វាមី ហើយក៏ដណ្តើមបានមេដាយមាស ពីការប្រកួតជើងឯកអាស៊ីនេះដែរ បាននិយាយថា៖ «ខ្ញុំមានអារម្មណ៍ភ័យ នៅពេលឃើញប្រពន្ធខ្ញុំ ចាញ់ប្រៀបគេ នៅ២ទឹកដំបូង ប៉ុន្តែខ្ញុំនៅតែជឿជាក់ថា គាត់អាចធ្វើបាន ព្រោះគាត់មានការប្រឹងប្រែងខ្លាំង ដ្បិតអីនេះជាមេដាយដំបូងរបស់គាត់ ហើយចុងក្រោយគាត់ពិតជាធ្វើបានមែន ខ្ញុំសប្បាយចិត្តខ្លាំងណាស់»។
ជាមួយគ្នានេះ លោក ឃឹម ប៊ុនសុង រដ្ឋលេខាធិការក្រសួងការពារជាតិ ដែលជាគណៈអធិបតីក្នុងពិធីបិទការប្រកួតកីឡាឃីកបុកស៊ីងជើងឯកអាស៊ី កាលពីយប់ថ្ងៃអាទិត្យនោះ បានថ្លែងថា៖ «ការប្រកួតជើងឯកឃីកបុកស៊ីងជើងឯកអាស៊ីរយៈពេល៦ថ្ងៃនេះបានដំណើរការប្រកួតដ៏មហោឡារិក និងជោគជ័យ ហើយតាមរបាយការណ៍ឯកឧត្តម ហេង សុខឃន ប្រធានសហព័ន្ធកីឡាប្រដាល់ឃីកបុកស៊ីងកម្ពុជា និងចំណាប់អារម្មណ៍របស់ប្រធានសហព័ន្ធកីឡាឃីកបុកស៊ីងអាស៊ី បានបញ្ជាក់ពីដំណើរការប្រកួត និងលក្ខណៈបច្ចេកទេសនៃការប្រកួតបានប្រព្រឹត្តទៅតាមស្តង់ដាកីឡា»។
លោកបានបន្ថែមថា៖ «ខ្ញុំសូមសម្តែងការកោតសរសើរ និងអបអរសាទរចំពោះកិច្ចខិតខំប្រឹងប្រែងរបស់ក្រសួងអប់រំ យុវជន និងកីឡា គណៈកម្មាធិការជាតិអូឡាំពិកកម្ពុជា សហព័ន្ធកីឡាប្រដាល់ឃីកបុកស៊ីងកម្ពុជា និងក្រុមហ៊ុនដៃគូអភិវឌ្ឍន៍ទាំងអស់ ព្រមទាំងស្ថាប័នពាក់ព័ន្ធនានា បានសហប្រតិបត្តិការល្អ ក្នុងការបង្កើតឱ្យមានការប្រកួតដ៏ឧត្តុង្គឧត្តមនេះឡើង ដែលជាមហាកិត្តិយសដ៏ធំធេងរបស់ប្រទេសកម្ពុជា ក្នុងការរួមចំណែកដល់ការផ្សព្វផ្សាយពីព្រះរាជាណាចក្រកម្ពុជាទៅលើឆាកអន្តរជាតិនូវវប្បធម៌ អរិយធម៌ និងការអភិវឌ្ឍរបស់ប្រទេសកម្ពុជា»៕
