សកម្មភាពប្រកួតរវាងក្រុមជម្រើសជាតិកម្ពុជា (ខៀវ) និងក្រុមឆាយនីសតៃប៉ិ នៅពហុកីឡដ្ឋានជាតិអូឡាំពិក កាលពីថ្ងៃទី១១ ខែតុលា ឆ្នាំ២០២៤។ រូបថត FFC
ក្រុមជម្រើសជាតិបាល់ទាត់កម្ពុជា នឹងត្រូវប្រកួតមិត្តភាពអន្តរជាតិជាមួយក្រុមម្ចាស់ផ្ទះ ហុងកុង នៅកីឡដ្ឋានហុងកុង នាល្ងាចម៉ោង៦ថ្ងៃអង្គារនេះ ហើយនេះជាការវិលជួបគ្នាជាថ្មីរវាងក្រុមទាំង២ បន្ទាប់ពីខកខានជួបគ្នាអស់រយៈពេលជាង១ឆ្នាំ ខណៈបច្ចុប្បន្ន គេមើលឃើញថា ក្រុមហុងកុង កំពុងទម្រង់លេងកាន់តែល្អជាងមុន។
ក្រោមការដឹកនាំរបស់គ្រូបង្គោលថ្មី លោក Koji Gyotoku គឺក្រុមជម្រើសជាតិកម្ពុជា ទើបតែបានយកឈ្នះលើក្រុមឆាយនីសតៃប៉ិ ៣-២ សម្រាប់ការប្រកួតមិត្តភាពអន្តរជាតិ នៅពហុកីឡដ្ឋានជាតិអូឡាំពិក កាលពីយប់ថ្ងៃទី១១ ខែតុលា ហើយវាជាការរកឃើញជ័យជម្នះជាថ្មីរបស់ក្រុមគោព្រៃកម្ពុជា បន្ទាប់ពីក្រុមនេះរកមិនឃើញការឈ្នះសោះជាង១ឆ្នាំពេញ ក្រោមការដឹកនាំរបស់គ្រូបង្គោលចាស់ លោក Felix Dalmas ដែលទើបបញ្ចប់កិច្ចសន្យា កាលពីថ្ងៃទី១៣ ខែកញ្ញា។
ការរកបាន២គ្រាប់តែម្នាក់ឯងរបស់ មិន រតនៈ និង១គ្រាប់ទៀតរបស់ខ្សែប្រយុទ្ធ សៀង ចន្ធា ដើម្បីយកឈ្នះក្រុមឆាយនីសតៃប៉ិ ៣-២ កាលពីយប់ថ្ងៃសុក្រនោះ បានក្លាយជាចលករយ៉ាងសំខាន់ ធ្វើឱ្យអ្នកគាំទ្រ ចាប់ផ្តើមងាកមកគាំទ្រដល់ក្រុមគោព្រៃកម្ពុជា ពេញទំហឹងវិញ ហើយពួកគេសង្ឃឹមថា ក្រុមតំណាងឱ្យកម្ពុជាមួយនេះ នឹងធ្វើបានល្អម្តងទៀត សម្រាប់ការជួបក្រុមហុងកុង នៅល្ងាចថ្ងៃអង្គារនេះ បើទោះបីជា ក្រុមកម្ពុជា មិនធ្លាប់មានប្រវត្តិឈ្នះកន្លងមកក៏ដោយ។
លោក សៅ សុខា ប្រធានសហព័ន្ធកីឡាបាល់ទាត់កម្ពុជា បានចាប់ដៃស្វាគមន៍លោក Koji Gyotoku បន្ទាប់ពីគ្រូបង្វឹកជនជាតិជប៉ុនរូបនេះ បានដឹកនាំក្រុមកម្ពុជា យកឈ្នះក្រុមឆាយនីសតៃប៉ិ ៣-២ កាលពីថ្ងៃទី១១ ខែតុលា ឆ្នាំ២០២៤។ រូបថត FFC
ជាមួយគ្នានេះ លោក Koji Gyotoku ក៏បានមើលឃើញថា ក្រុមជម្រើសជាតិហុងកុង មានកម្រិតលេងល្អជាងក្រុមជម្រើសជាតិឆាយនីសតៃប៉ិ ដែលក្រុមកម្ពុជា ទើបបានយកឈ្នះ ៣-២ ប៉ុន្តែគ្រូបង្វឹកជនជាតិជប៉ុនរូបនេះ នៅតែមានសុទិដ្ឋិនិយមទៅលើកីឡាករកម្ពុជាថា នឹងអាចស្វែងរកបានជ័យជម្នះ ដើម្បីបំបែកកំណត់ត្រា ការមិនធ្លាប់ឈ្នះក្រុមហុងកុង តាំងពីឆ្នាំ១៩៥៧មក។
លោក Koji Gyotoku បាននិយាយ ក្នុងសន្និសីទកាសែត នៅទឹកដីហុងកុង កាលពីថ្ងៃចន្ទថា៖ «ពួកយើងរីករាយណាស់ ដែលមកប្រកួតនៅទីនេះ។ ខ្ញុំបានមកកាន់តំណែងជាគ្រូបង្វឹកក្រុមជម្រើសជាតិកម្ពុជា១០ថ្ងៃប៉ុណ្ណោះ មុនការប្រកួតជាមួយក្រុមឆាយនីសតៃប៉ិ ប៉ុន្តែពួកយើងពិតជាធ្វើបានល្អ ក្នុងការប្រកួតនោះ»។
គ្រូបង្គោលក្រុមជម្រើសជាតិកម្ពុជារូបនេះ បានបន្ថែមថា៖ «ជាការពិតណាស់ ហុងកុង ជាក្រុមមួយខ្លាំង គឺពួកគេខ្លាំងជាងក្រុមឆាយនីសតៃប៉ិ ទៅទៀត។ ពួកគេលេងបានល្អ និងមានកីឡាករល្អៗច្រើន ប៉ុន្តែពួកយើងក៏នឹងខំប្រឹងដូចគ្នា ដើម្បីយកជ័យជម្នះជូនអ្នកគាំទ្រកម្ពុជា»។
គួររំឭកថា ការជួបគ្នាទាំងការប្រកួតមិត្តភាព និងប្រកួតពានរង្វាន់ចំនួន៩លើក ចាប់តាំងពីឆ្នាំ១៩៥៧ រហូតមកដល់ពេលនេះ គឺក្រុមជម្រើសជាតិបាល់ទាត់កម្ពុជា មិនធ្លាប់ឈ្នះក្រុមជម្រើសជាតិហុងកុងនោះទេ ដោយពួកគេ បានត្រឹមស្មើ២ដង និងចាញ់ ៧ដង ហើយជំនួបចុងក្រោយ ដែលជាការប្រកួតមិត្តភាពអន្តរជាតិ នៅពហុកីឡដ្ឋានជាតិអូឡាំពិក កាលពីថ្ងៃទី៧ ខែកញ្ញា ឆ្នាំ២០២៣ គឺក្រុមទាំង២នេះ បានស្មើគ្នា ១-១៕
