វីរកីឡាករម៉ូតូទឹកកម្ពុជា សាលី អ៊ូម៉ើត បានបង្ហាញពីមោទនភាពចំពោះសមិទ្ធផលការឈ្នះបានមេដាយមាស ៦ ប្រាក់៣ និងសំរឹទ្ធ១ របស់ក្រុមជម្រើសជាតិម៉ូតូទឹកកម្ពុជា ដែលដណ្តើមបានពីកប្រកួតកីឡាម៉ូតូទឹកពិភពលោកតាមស៊េរី Water Jet World Series 2024 (WGP1) ជុំទី២ នៅសហរដ្ឋអាមេរិក។
សាលី អ៊ូម៉ើត បានចាត់ទុកការដណ្តើមបានមេដាយសរុបចំនួន១០ ជាពិសេសការឈ្នះបានមេដាយមាសចំនួន៦នេះថា ជាសមិទ្ធផលដ៏ល្អ ដែលបានបំបែកកំណត់ត្រាចាស់ ចំពោះការដណ្តើមបានមេដាយមាស ៤ ព្រមទាំងមេដាយប្រាក់ និងសំរឹទ្ធចំនួន៥ទៀត ពីការប្រកួត Water Jet World Series ដែលបានធ្វើនៅសហរដ្ឋអាមេរិកនេះដែរ កាលពីឆ្នាំ ២០២៣ ហើយជាលទ្ធផល ដែលធ្វើឱ្យពិភពលោកមានការកក្រើកខ្លាំង។
ប្រធានក្រុមម៉ូតូទឹកកម្ពុជា សាលី អ៊ូម៉ើត បាននិយាយតាមរយៈវីដេអូខ្លីរបស់ខ្លួនថា៖ «នេះជាឆ្នាំទី៣ ដែលខ្ញុំបានដឹកនាំសិស្សប្អូនមកប្រកួតនៅសហរដ្ឋអាមេរិក ជាប្រទេសមហាអំណាច ហើយឆ្នាំនេះ យើងទទួលបានសមិទ្ធផលសឹងតែធ្វើឱ្យទូទាំងពិភពលោកកក្រើកមែនទែន ដោយសារយើងមកតែគ្នា ៥នាក់ទេ ប៉ុន្តែយើងដណ្តើមបានមេដាយមាសរហូតដល់៦ ប្រាក់៣ និងសំរឹទ្ធ១»។
«សមិទ្ធផលនេះ និយាយទៅព្រឺរោមមែនទែន សឹងតែមិនមានប្រទេសណាធ្វើបានទេ អ៊ីចឹងកម្ពុជាយើង បានបំបែកកំណត់ត្រារបស់ខ្លួនឯង កាលពីឆ្នាំមុន ហើយវាជារឿងមួយ ដែលយើងនឹកស្មានមិនដល់ថា ក្រុមកីឡាកររបស់យើងអាចធ្វើបានល្អដល់ថ្នាក់នេះ»។ សាលី អ៊ូម៉ើត បានបន្ថែម។
សម្រាប់ការប្រកួត Water Jet World Series 2024 ជុំទី២ នៅអាមេរិក ដែលបានធ្វើកាលពីថ្ងៃទី៧ និងបានបញ្ចប់ កាលពីថ្ងៃទី១៣ ខែតុលា កីឡាករវ័យក្មេង សាលី ហ្វីលីន ដែលជាប្អូនប្រុសរបស់ សាលី អ៊ូម៉ើត បានឈ្នះមេដាយមាស៤ និងមេដាយប្រាក់២ នៅក្នុងការប្រកួតទាំង ៦វិញ្ញាសារបស់ខ្លួន ហើយលទ្ធផលដ៏ល្អនេះ បានជួយឱ្យរូបគេ អាចបំបែកកំណត់ចាស់របស់ខ្លួន ចំពោះការឈ្នះបានមេដាយមាស២ ប្រាក់២ និងសំរឹទ្ធ១ សម្រាប់ការប្រកួត Water Jet World Series នេះកាលពីឆ្នាំ ២០២៣ ដែលធ្វើនៅអាមេរិកដូចគ្នា។
ចំណែកមេដាយចំនួន៤ទៀត គឺកីឡាករ សាលី អ៊ូម៉ើត បានឈ្នះមាស១ និងសំរឹទ្ធ១ កីឡាករ កៃ វ៉ាន់ស៊ីដែន ដណ្តើមបានមេដាយមាស១ និងកីឡាករ ម៉ីន មូសស្ដាន បានមេដាយប្រាក់១ ហើយការដណ្តើមបានមេដាយសរុបចំនួន១០ គឺមាស៦ ប្រាក់៣ និងសំរឹទ្ធ១ ពីការប្រកួត Water Jet World Series 2024 ជុំទី២ នៅអាមេរិកនេះ សាលី អ៊ូម៉ើត បានទម្លាយថា កីឡាករកម្ពុជាទាំង៥នាក់ បានយកបេះដូងទៅប្រកួត ដើម្បីលើកមុខមាត់កម្ពុជា នៅលើឆាកអន្តរជាតិ។
អគ្គលេខាធិការសហព័ន្ធកីឡាម៉ូតូទឹកកម្ពុជា សាលី អ៊ូម៉ើត បានបញ្ជាក់ថា៖ «យើងមកប្រកួតដោយឆន្ទៈ មានចិត្ត និងបេះដូងជាខ្មែរ ដោយចង់ផ្សព្វផ្សាយឱ្យប្រទេសជិតខាង ក៏ដូចជាសហរដ្ឋអាមេរិកដឹងថា ខ្មែរយើងជាប្រទេសតូចមែន តែក៏មានកីឡាករខ្លាំងៗ មកបង្ហាញស្នាដៃឱ្យបរទេសបានឃើញ ជាពិសេសខ្ញុំចង់យកទង់ជាតិរបស់យើងមកបង្ហាញឱ្យពិភពលោកបានដឹងថា កម្ពុជា ជាប្រទេសល្បីមួយ»។
ជាមួយការទទួលបានឱកាសដឹកនាំក្រុមជម្រើសជាតិម៉ូតូទឹកកម្ពុជា ទៅប្រកួតព្រឹត្តិការណ៍ Water Jet World Series 2024 នេះ សាលី អ៊ូម៉ើត បានបង្ហាញការដឹងគុណដល់ប្រមុខដឹកនាំប្រទេស តាំងពីអតីតនាយករដ្ឋមន្រ្តី លោក ហ៊ុន សែន និងលោក ហ៊ុន ម៉ាណែត ជានាយករដ្ឋមន្រ្តីថ្មី ដែលបានផ្តល់នូវសុខសន្តិភាព និងបានយកចិត្តទុកដាក់លើគ្រប់វិស័យ រួមទាំងវិស័យកីឡាឱ្យមានការរីកចម្រើន និងមានឱកាសបានចេញទៅប្រកួតនៅក្រៅប្រទេស។
ម្ចាស់មេដាយមាសកីឡាអាស៊ី និងស៊ីហ្គេម សាលី អ៊ូម៉ើត បញ្ជាក់ថា៖ «ចំពោះខ្ញុំផ្ទាល់ពិតជាមានមោទនភាពណាស់ ដែលបានបន្តជួយលើផ្នែកកីឡាករម៉ូតូទឹកនេះ តាំងពីសម្តេចពុក រហូតដល់សម្តេចបវរធិបតី គឺខ្ញុំពិតជាមានមោទនភាពមែនទែន ដែលបានកើតរមកជាកូនខ្មែរ ហើយបានរួមចំណែកជួយបន្តិចបន្តួលដល់ប្រទេសកម្ពុជា ដើម្បីឱ្យពិភពលោកបានស្គាល់»។
យ៉ាងណាក៏ដោយ សម្រាប់ការអភិវឌ្ឍកីឡាម៉ូតូទឹក ក៏ដូចជាការបញ្ជូនក្រុមកីឡាករទៅប្រកួត នៅក្រៅប្រទេសនេះ សាលី អ៊ូម៉ើត បានទម្លាយថា ជួបការពិបាកច្រើនលើការចំណាយផ្សេងៗ ដោយវីរកីឡាកររូបនេះ បានធ្វើការអំពាវនាវដល់ថ្នាក់ដឹកនាំ ជាពិសេសក្រុមហ៊ុនឯកជនជួយឧបត្ថម្ភគាំទ្រ ដើម្បីឱ្យប្រភេទកីឡានេះ កាន់តែមានការរីកច្រើនខ្លាំង។
ទន្ទឹមនឹងនេះ អ៊ូម៉ើត បានឱ្យដឹងទៀតថា កីឡាម៉ូតូទឹកនេះ គឺមានសក្តានុពលិក និងពេញនិយមខ្លាំង ក្នុងការទាក់ទាញបាននូវភ្ញៀវទេសចរអន្តរជាតិឱ្យមកកម្សាន្តនៅកម្ពុជា ហេតុនេះ អ៊ូម៉ើត ចង់ទាញយកព្រឹត្តិការណ៍ Water Jet World Series មករៀបចំនៅកម្ពុជា បើសិនជាមានដៃគូសហការគ្រប់គ្រាន់។
អ៊ូមើត បញ្ជាក់ថា៖ «កម្ពុជាមានសក្តានុពលខ្លាំងលើវិស័យកីឡាម៉ូតូទឹកនេះ ដោយយើងតែងតែដណ្តើមបានមេដាយមាស និងលើកទឹកទង់ជាតិលើឆាកអន្តរជាតិ នៅស្ទើរគ្រប់ប្រទេស មិនថានៅអឺរ៉ុប សហរដ្ឋអាមេរិក និងទ្វីបអាស៊ីយើងទេ អ៊ីចឹងសង្ឃឹមថា ក្រុមហ៊ុនមួយចំនួននៅកម្ពុជា នឹងមកវិយោគលើវិស័យមួយនេះ ដើម្បីទាក់ទាញភ្ញៀវទេសចរឱ្យមកស្គាល់ប្រទេសកម្ពុជាកាន់តែច្បាស់»។
វីរកីឡាកររបស់កម្ពុជារូបនេះ បន្ថែមថា៖ «ជាពិសេសយើងចង់បង្កើតព្រឹត្តិការណ៍ដ៏ធំនេះ នៅក្នុងប្រទេសកម្ពុជា ដើម្បីទាក់ទាញកីឡាករមកពី៣០ទៅ៤០ប្រទេសផ្នែកកីឡានេះ ឱ្យមកប្រកួតប្រជែងដណ្តើមយកមេដាយនៅក្នុងប្រទេសកម្ពុជាវិញម្តង ដើម្បីឱ្យគេដឹងថា កម្ពុជាយើងជាប្រទេសមានសក្តានុពលប៉ុនណា!»៕