អនុប្រធានសហព័ន្ធកីឡាចំបាប់កម្ពុជា លោក ខេស៊ី បាណេត (Casey Barnett) បានអះអាងថា ក្មេងៗ ដែលបានចូលរួមការប្រកួតកីឡាចំបាប់សាកល្បងបច្ចេកទេសយុវជនថ្នាក់ជាតិ ឆ្នាំ២០២៤ នឹងទទួលបានអនុស្សាវរីយពេញមួយជីវិតរបស់ពួកគេពីការប្រកួតនេះ ហើយអ្នកទាំងនេះ ក៏នឹងក្លាយជាធនធានដ៏សំខាន់សម្រាប់ប្រកួតតំណាងឱ្យជាតិនៅលើឆាកអន្តរជាតិ ព្រមទាំងរួមចំណែកអភិរក្សកីឡាប្រពៃណីចំបាប់កម្ពុជាផងដែរ។
ដោយធ្លាប់ជាអ្នកហាត់កីឡាចំបាប់កម្ពុជាមួយរូបដែរនោះ លោក Casey បានចាត់ទុកការប្រើកម្លាំង និងបច្ចេកទេស ក្នុងពេលប្រកួតយកឈ្នះចាញ់គ្នា គឺជាបទពិសោធន៍ និងជាអនុស្សាវរីយ ដែលអ្នកហាត់ចំបាប់មិនអាចបំភ្លេចបាន ជាពិសេសក្មេងៗ ដែលទើបចូលហាត់ និងមានឱកាសបានប្រកួតគ្នាជាលើកដំបូង។
ជាក់ស្តែងក្មេងៗចំនួន ៨២នាក់ (ស្រី៣៩នាក់) ដែលបានចូលរួមក្នុងការប្រកួតកីឡាចំបាប់សាកល្បងបច្ចេកទេសយុវជនថ្នាក់ជាតិ ជាលើកដំបូង នៅសាលដំបូលទូកនៃពហុកីឡដ្ឋានជាតិអូឡាំពិក កាលពីថ្ងៃទី១៧ និងទី១៨ ខែតុលានេះ ពិតជាមានការរំភើប និងរីករាយខ្លាំង ព្រោះវាជាលើកដំបូង ដែលពួកគេបានប្រកួតគ្នាដណ្តើមយកមេដាយ និងប្រាក់រង្វាន់ ហើយក៏ជាពេលដែលក្មេងៗមកពីតាមខេត្តទាំងនេះ បានមកលេងនៅភ្នំពេញផងដែរ។
លោក Casey បានថ្លែងថា៖ «យើងមើលឃើញថា ក្មេងៗដែលបានចូលរួមប្រកួត មានការសប្បាយរីករាយណាស់ ហើយអ្វីដែលពួកគេបានជួបនៅក្នុងព្រឹត្តិការណ៍នេះ នឹងក្លាយជាអនុស្សាវរីយពេញមួយជីវិតសម្រាប់ពួកគេ។ ម្យ៉ាងទៀតយុវជនចូលរួមមួយចំនួន អត់ដែលបានមកភ្នំពេញទេ អ៊ីចឹងការប្រកួតនេះបានផ្តល់នូវបទពិសោធន៍ និងស្នាដៃជាច្រើន សម្រាប់ក្មេងៗដែលបានចូលរួម»។
ក្រៅពីការទទួលបានឱកាសប្រកួតប្រជែងគ្នាដណ្តើមយកមេដាយ គឺក្មេងៗចូលរួមទាំងអស់ ទាំងក្រុមអាយុពី ៨ ដល់ ១០ឆ្នាំ និងអាយុពី ១៥ ដល់ ១៧ឆ្នាំ ក៏ទទួលបានការបង្ហាត់បង្ហាញផ្នែកបច្ចេកទេសផ្សេងៗ ពីសំណាក់គ្រូបង្វឹកចំបាប់កម្ពុជាចំនួន២៥រូប ដែលទើបទទួលបានចំណេះជំនាញពីគ្រូឧទ្ទេសអន្តរជាតិរបស់ស្ថាប័ន United World Wrestling គឺ លោក Martin Hauck ផងដែរ។
សកម្មភាពទាំងអស់នោះ បានក្លាយជាការលើកទឹកចិត្តដ៏សំខាន់ដល់ក្មេងៗ ដើម្បីឱ្យពួកគេ បន្តខំប្រឹងអភិវឌ្ឍសមត្ថភាពបន្ថែមទៀត ក្នុងការក្លាយទៅជាកីឡាករ កីឡាការិនីអាចប្រកួតតំណាងឱ្យជាតិ នៅលើឆាកអន្តរជាតិនាពេលអនាគត និងក្លាយជាធនធានជំនាន់ក្រោយ ក្នុងការរួមចំណែកអភិវឌ្ឍកីឡាប្រពៃណីចំបាប់កម្ពុជា។
លោក ខេស៊ី បាណេត បានបញ្ជាក់ថា ៖ «ការរៀបចំឱ្យមានការប្រកួតពីអាយុ៨-១០ឆ្នាំ និងពីអាយុ១៥-១៧ ឆ្នាំ ជាលើកដំបូងនេះ ពិតជាសំខាន់ណាស់ ទី១ រក្សាកីឡាប្រពៃណីចំបាប់កម្ពុជា ដែលនៅលើជញ្ជាំងប្រាសាទបាយ័នមានរូបចម្លាក់អ្នកចំបាប់ជាដើម ហើយនៅតាមខេត្តមួយចំនួន ដូចជានៅឃុំវិហារសួគ៌ ស្រុកខ្សាច់កណ្តាល ខេត្តកណ្តាល តែងតែមានការលេងកីឡាចំបាប់ នៅរៀងរាល់បុណ្យភ្ជុំបិណ្ឌ អ៊ីចឹងនេះជាការថែរក្សាវប្បធម៌ខ្មែរ»។
នាយកវិទ្យាស្ថានខេមអេដរូបនេះ បានបន្ថែមថា៖ «ម្យ៉ាងទៀតតាមរយៈការប្រកួតនេះ ជាការបណ្តុះបណ្តាលធនធានថ្នាលយុវជនលើប្រភេទកីឡាចំបាប់អន្តរជាតិ គឺកីឡាករ កីឡាការិនីមានគុណភាពបច្ចេកទេសល្អ ត្រូវចាប់ផ្តើមហ្វឹកហាត់ពីវ័យ៨ឆ្នាំ ឬ១០ឆ្នាំឡើងទៅ ព្រោះបើមនុស្សម្នាក់ចាប់ផ្តើមហ្វឹកហាត់ពីអាយុ ១៥ឆ្នាំឡើង ឬ១៧ឆ្នាំឡើងទៅ គឺយឺតពេល ឬមិនសូវបានល្អ»។
ដោយមើលឃើញពីអត្ថប្រយោជន៍ទាំងនេះ លោក Casey បានប្តេជ្ញាចំណាយថវិកាផ្ទាល់ខ្លួនបន្ថែមទៀត ដើម្បីរៀបចំការប្រកួតកីឡាចំបាប់សាកល្បងបច្ចេកទេសយុវជនថ្នាក់ជាតិនេះ នៅឆ្នាំក្រោយៗទៀត ហើយលោកក៏នឹងបន្ថែមនូវវិញ្ញាសាលើប្រភេទអាយុ ១១ ដល់ ១២ឆ្នាំផងដែរ ដោយរំពឹងថា នឹងមានអ្នកចូលរួមកាន់តែច្រើន ខណៈឆ្នាំ ២០២៤នេះ មានប្រតិភូកីឡាសរុប ១០៤នាក់ មកពី១១ក្លិបចូលរួម ក្នុងនោះមានគ្រូបង្វឹក គ្រូជំនួយ ២២នាក់ និងកីឡាករ៤៣នាក់ កីឡាការិនី៣៩នាក់ ចំណែកមន្ត្រីគណៈកម្មការបច្ចេកទេស និងអាជ្ញាកណ្តាល ដែលដឹកនាំការប្រកួតមានចំនួន២៧នាក់៕