លោកនាយករដ្ឋមន្រ្តី ហ៊ុន ម៉ាណែត បានទម្លាយថា លោកមានអារម្មណ៍រំភើបចង់ស្រកទឹកភ្នែក នៅពេលបានឃើញការបង្ហាញក្បាច់គុនខ្មែរបុរាណគ្រប់ទម្រង់ ក្នុងពិធីបិទការប្រកួតយុទ្ធគុនចម្រុះខ្មែរបុរាណ “ពានរង្វាន់សម្តេចបវរធិបតី” លើកទី១ ឆ្នាំ២០២៤ កាលពីយប់ថ្ងៃអាទិត្យ ហើយលោកបញ្ជាក់ថា ការបង្ហាញពីភាពសម្បូរបែបរបស់ក្បាច់គុនខ្មែរបុរាណ វាជាការងារដ៏សំខាន់ ដែលកូនខ្មែគ្រប់រូប ត្រូវរួមគ្នាធ្វើ និងផ្សព្វផ្សាយដើម្បីជំរុញឱ្យអត្តសញ្ញាណក្បាច់គុនខ្មែរ កាន់តែផុសផុល។
ចំពោះរៀបចំឱ្យមានការប្រកួតយុទ្ធគុនចម្រុះខ្មែរបុរាណ ឆ្នាំ២០២៤ ដែលបានធ្វើឡើង នៅវិមានពហុកីឡដ្ឋានជាតិអូឡាំពិក កាលពីថ្ងៃទី១៨ និងបានបញ្ចប់កាលពីយប់ថ្ងៃទី២០ ខែតុលានេះដែរ លោក ហ៊ុន ម៉ាណែត បានឱ្យដឹងថា ជាការសម្រេចក្តីសុបិនមួយរបស់លោក ដែលមានបំណងរៀបចំឱ្យមានការប្រកួតបែបនេះ តាំងពី៥ឆ្នាំមុន ហើយវាជាព្រឹត្តិការណ៍ ដែលមានការដាក់បញ្ចូលនូវក្បាច់គុនខ្មែរច្រើនទម្រង់ឱ្យប្រកួតគ្នា ដើម្បីផ្តល់នូវបទពិសោធន៍ និងការអភិវឌ្ឍជាបន្តទៀត។
ថ្លែងក្នុងពិធីបិទកាប្រកួតនេះ លោក ហ៊ុន ម៉ាណែត បញ្ជាក់ថា៖ «កិច្ចការងារធំបំផុត គឺយើងចង់បង្ហាញពីភាពសម្បូរបែបក្បាច់គុនខ្មែរបុរាណរបស់យើង ជាពិសេសពេលបិទចុងក្រោយនេះ ខ្ញុំរំភើបចង់ស្រក់ទឹកភ្នែក ព្រោះឃើញក្បាច់គុនសង្ខេបខ្លីតែម្តង ក្នុងការសម្តែងមិនដល់១០នាទីទេ។ ឃើញទម្រង់ផ្សេងៗ មានល្ខោនខល របាំអប្សរា ផ្គុំជាមួយក្បាច់គុនរបស់យើង សុទ្ធតែអ្វីដែលដូនតាយើងបានរៀបចំឱ្យទាំងអស់ អត់មានការបំបែកគ្នាជាសិល្បៈ វប្បធម៌ ក្បាច់គុនទេ គឺនៅជាធ្លុងមួយ»។
លោកបន្ថែមថា៖ «គ្រប់ប្រភេទនៃទម្រង់សិល្បៈ ទម្រង់ក្បាច់គុន បានមកជាមួយគ្នា ហើយអ្នកហាត់ក្បាច់គុន ព្រឹទ្ធាចារ្យក្បាច់គុនច្រើនជំនាន់ បានមកចូលរួមជាមួយគ្នានៅថ្ងៃនេះ ក្រោមទង់ជាតិប្រាសាទអង្គរវត្តរបស់យើង។ នេះហើយជាស្មារតី ដែលយើងបង្ហាញពីភាពសម្បូរបែបនៃក្បាច់គុនវប្បធម៌ដូនតាយើង ដោយយើងបានរួមគ្នាធ្វើ ហើយខ្ញុំសូមអរគុណណាស់ ចំពោះការរៀបចំនេះ»។
ជាមួយគ្នានេះ លោកនាយករដ្ឋមន្រ្តី បានអះអាងថា ការអភិរក្ស និងអភិវឌ្ឍក្បាច់គុនខ្មែរបុរាណ ចាំបាច់ត្រូវមានការស្រាវជ្រាវចងក្រង និងការប្រមូលផ្តុំអ្នកហាត់គុន និងព្រឹទ្ធាចារ្យកីឡា ដើម្បីបំផុសចលនាការហ្វឹកហាត់ក្បាច់គុន ហើយលោកសង្ឃឹមថា ការប្រកួតយុទ្ធគុនចម្រុះខ្មែរបុរាណ នៅឆ្នាំក្រោយៗទៀត នឹងមានក្បាច់គុនច្រើនប្រភេទទៀត ដែលយើងមិនធ្លាប់បានឃើញ មកចូលរួមដែរ។
ចំណែកព្រឹទ្ធាចារ្យកីឡាចំនួន៣៥នាក់មកពីតាមខេត្ត-រាជធានីផ្សេងៗ ដែលបានចូលរួមការប្រកួតយុទ្ធគុនចម្រុះខ្មែរបុរាណ លើកទី១នេះ លោក ហ៊ុន ម៉ាណែត បានទទួចសុំពួកគាត់ឱ្យមកចូលរួមចងក្រងក្បាច់គុនខ្មែរជាមួយក្រុមគណៈកម្មការស្រាវជ្រាវគម្ពីរអាថ៌កំបាំងយុទ្ធគុនដូនតាខ្មែរ ដែលលោកបានផ្តួចផ្តើម និងបានបង្កើតរួចរាល់ កាលពីថ្ងៃទី ១១ ខែកញ្ញា ឆ្នាំ២០២៤។
ទន្ទឹមនឹងនេះ លោក ម៉ាណែត បានទទួលស្គាល់ថា សម័យសកលភាវូបនីយកម្ម ពិតជាមានការងាយស្រួលក្នុងការចម្លង ឬទទួលឥទ្ធិពលក្បាច់គុនពីបណ្តាប្រទេសផ្សេងៗ ប៉ុន្តែដោយសារខ្មែរយើង មានវប្បធម៌ និងអរិច្ឆយធម៌ដ៏សម្បូរបែប អ៊ីចឹងលោកបានស្នើឱ្យកូនខ្មែរ និងគ្រប់ស្ថាប័នពាក់ព័ន្ធ ត្រូវនាំគ្នាចងក្រង និងផ្សព្វផ្សាយអត្តសញ្ញាណជាតិក្បាច់គុនរបស់យើងផងដែរ។
ប្រមុខដឹកនាំប្រទេសរូបនេះ បញ្ជាក់ថា៖ «យើងមានវប្បធម៌ អរិច្ឆយធម៌ យើងត្រូវជំរុញការផ្សព្វផ្សាយបន្ត តែត្រូវចាប់ផ្តើមពីខ្មែរយើងមុនគេ។ ផ្សព្វផ្សាយនៅទូទាំងប្រទេសរបស់យើង និងដាក់ឱ្យអនុវត្ត ដោយយើងជំរុញនៅតាមកងទ័ព កងយោធពលខេមរភូមិន្ទ ខាងបូលិស ខាងក្លិប ខាងសាលារៀន គឺសង្ឃឹមថា នឹងជំរុញនៅក្នុងការប្រើប្រាស់ដាក់ឱ្យហាត់ក្បាច់គុនខ្មែរឱ្យបានច្រើនបន្តទៅទៀត»។
លោក ម៉ាណែត ដែលធ្លាប់ហាត់ការ៉ាតេ និងតេក្វាន់ដូដែរនោះ បន្ថែមថា៖ «ពិតណាស់ យើងមិនបានហាមឃាត់ឱ្យមានការហាត់ហ្វឹកហ្វឺនក្បាច់គុនប្រទេសណាទេ ព្រោះជាការអភិវឌ្ឍ ប៉ុន្តែក្បាច់គុនខ្មែរយើងក៏ត្រូវបន្ត ដើម្បីជំរុញឱ្យបានច្រើន ហើយបងប្អូនទាំងអស់នៅទីនេះ គឺជាតួអង្គផ្ទាល់តែម្តង ក្នុងការចូលរួមអភិរក្ស និងអភិវឌ្ឍក្បាច់គុនខ្មែរបុរាណរបស់យើង។ សូមបន្តតទៅទៀត»។
ចំណែកលោកទេសរដ្ឋមន្រ្តី ថោង ខុន ប្រធានគណៈកម្មាធិការអូឡាំពិកកម្ពុជា និងជាប្រធានគណៈកម្មការចំពោះកិច្ចរៀបចំការប្រកួតយុទ្ធគុនចម្រុះខ្មែរបុរាណ “ពានរង្វាន់សម្តេចបវរធិបតី” ឆ្នាំ២០២៤នេះ បានឱ្យដឹងថា ព្រឹត្តិការណ៍នេះ មានប្រតិភូចូលរួម៤៨២នាក់ ក្នុងនោះមានកីឡាករ ៣៤៨នាក់និងកីឡាការិនី ៧៧នាក់ដែលប្រកួត៤វិញ្ញាសា គឺប្រយុទ្ធស្ម័គ្រចិត្តបុរស៤ប្រភេទទម្ងន់ ប្រយុទ្ធស្ម័គ្រចិត្តនារី ៤ទម្ងន់ ប្រយុទ្ធអាជីព ២ទម្ងន់ និងប្រកួតសម្តែងមាន៤វិញ្ញាសា។
ចំពោះលទ្ធផលវិញ លោក ថោង ខុន បញ្ជាក់ថា អត្តពលិកទាំងអស់ គោរពបានយ៉ាងខ្ជាប់ខ្ជួនតាមលក្ខខណ្ឌបច្ចេកទេសថ្មីនៃយុទ្ធគុនចម្រុះខ្មែរបុរាណ ស្របតាមគោលការណ៍ប្រកួតដោយយុត្តិធម៌ Fair-Play ក្រោមស្មារតីបំផុសសុខដុមនីយកម្ម និងសាមគ្គីភាពក្នុងមហាគ្រួសារយុទ្ធគុនខ្មែរបុរាណ ហើយទាំងក្រុមអត្តពលិកមកពីសហព័ន្ធកីឡាយុទ្ធគុនចម្រុះកម្ពុជា, សហព័ន្ធកីឡាប្រដាល់គុនខ្មែរ, សហព័ន្ធកីឡាគុនល្បុក្កតោកម្ពុជា, សហព័ន្ធកីឡាយុទ្ធក្រមខម, សហព័ន្ធកីឡាចំបាប់បុរាណ, ក្បាច់គុនកងយោធពលខេមរភូមិន្ទ និងយុទ្ធគុនខ្មែរមហាជន សុទ្ធតែដណ្តើមបានមេដាយដូចគ្នា»៕