ការប្រកួតរវាងក្រុមម្ចាស់ផ្ទះវិសាខា (ពណ៌ខៀវ) និងក្រុមគិរីវង់សុខសែនជ័យ នៅកីឡដ្ឋានព្រីនស៍ កាលពីយប់ថ្ងៃពុធ។រូបថត CPL
គ្រូបង្វឹកក្រុមគិរីវង់សុខសែនជ័យ លោក វិនតា សាប៊ូន បានទម្លាយថា លោកបានត្រៀមបង្វេចរួចជាស្រេច ក្នុងការចាកចេញពីក្លិបមានមូលដ្ឋាននៅទីរួមខេត្តតាកែវមួយនេះ បើសិនជាថ្នាក់ដឹកនាំក្លិប មិនពេញចិត្តលទ្ធផលប្រកួត ក្រោមការដឹកនាំរបស់លោក សម្រាប់ការប្រកួតលីគកំពូលកម្ពុជា រដូវកាលថ្មី ឆ្នាំ២០២៤-២០២៥នេះ។
អតីតគ្រូបច្ចេកទេសរបស់សាលាកីឡាបាល់ទាត់ជាតិបាទី និងជាអតីតគ្រូបច្ចេកទេសរបស់ក្លិបអាយអេសអាយដង្កោសែនជ័យ លោក សាវិន សាប៊ូន បានលើកឡើងបែបនេះ ក្នុងពេលលោកបានដឹកនាំក្រុមគិរីវង់សុខសែនជ័យ មកប្រកួតជាមួយក្រុមម្ចាស់ផ្ទះវិសាខា នៅកីឡដ្ឋានព្រីនស៍ កាលពីថ្ងៃទី២៣ ខែតុលា។
តាមរយៈការប្រកួតយ៉ាងស្វិតស្វាញនោះ ក្រុមគិរីវង់ បានចាញ់ក្រុមវិសាខា រហូតដល់ ៧-០ ហើយជាមួយការបរាជ័យយ៉ាងជូរចត់នេះ បានធ្វើឱ្យការប្រកួតទាំង៩លើករបស់ក្រុមមួយនេះ មានត្រឹម១ពិន្ទុជាមួយការស្មើ១ដង និងចាញ់រហូតដល់៨ដង ហើយកំពុងឈរនៅបាតតារាងនៃលីគកំពូលកម្ពុជា ខណៈក្រុមភ្នំពេញក្រោន បានបន្តយកឈ្នះក្រុមក្រសួងមហាផ្ទៃ ៥-១ កាលពីថ្ងៃពុធនោះដែរ ដើម្បីបន្តឈរនៅកំពូលតារាង ដោយមាន២៤ពិន្ទុពេញ។
ជាមួយលទ្ធផលដ៏អាក្រក់របស់ក្រុមគិរីវង់នេះ វាបាននឹងកំពុងធ្វើឱ្យកៅអីគ្រូបង្គោលរបស់លោក វិនតា សាប៊ូន ឡើងកម្តៅ និងមានភាពរង្គោះរង្គើខ្លាំង ហើយគ្រូបង្វឹករូបនេះ ក៏បានត្រៀមខ្លួនរួចស្រេចក្នុងការដើរចេញផងដែរ បើសិនជាថ្នាក់ដឹកនាំក្លិបគិរីវង់សុខសែនជ័យ សម្រេចបញ្ចប់កិច្ចសន្យារបស់លោក ក្នុងពេលណាមួយ។
លោក វិនតា សាប៊ូន បាននិយាយថា៖ «ខ្ញុំតែងទទួលខុសត្រូវលើលទ្ធផលក្រោមការដឹកនាំ និងការរៀបចំរបស់ខ្ញុំ ហើយការដឹកនាំរបស់ខ្ញុំមិនជោគជ័យ ខ្ញុំទទួលស្គាល់។ ខ្ញុំឱ្យក្លិបជាអ្នកសម្រេចទៅលើតួនាទីរបស់ខ្ញុំ ហើយខ្ញុំដឹងថា តួនាទីជាគ្រូបង្វឹក គឺតែងតែមានបង្វេច ក៏ដូចជាវ៉ាលីរួចស្រេច ដោយយើងមិនអាចទៅស្នាក់នៅកន្លែងណាទៀងទាត់ទេ គឺយើងបានត្រៀមគ្រប់ការប្រកួត»។
លោក វិនតា សាប៊ូន ពេលដឹកនាំក្រុមគិរីវង់សុខសែនជ័យ ចាញ់ក្រុមម្ចាស់ផ្ទះវិសាខា ៧-០ កាលពីយប់ទី២៣ ខែតុលា ឆ្នាំ២០២៤។ រូបថត CPL
លោកបានបន្ថែមថា៖ «ការប្រកួតទាំងអស់ ខ្ញុំតែងគិតថា ជាការប្រកួតចុងក្រោយនៃអាជីពរបស់យើង អ៊ីចឹងសម្រាប់ខ្ញុំ ខ្ញុំមិនខ្លាចចុះចេញពីតំណែងទេ បើសិនជាក្លិបបញ្ចប់(កិច្ចសន្យា)ខ្ញុំបាន សម្រាប់ការដឹកនាំរបស់ខ្ញុំមិនបានល្អ ប៉ុន្តែបើសិនក្រុមគិតថា ឱ្យខ្ញុំកែប្រែស្ថានភាពឡើងវិញ ខ្ញុំគោរពគោលការណ៍តាមក្លិប ដែលក្លិបបានផ្តល់ទំនុកចិត្តដល់ខ្ញុំផងដែរ»។
ដោយឡែក ក្រុមកងយោធពលខេមរភូមិន្ទ(ទ័ព) ដែលបានប្តឹងដល់ឧទ្ទរណ៍ ជុំវិញភាពចម្រូងចម្រាសពេលប្រកួតជាមួយក្រុមវិសាខា កាលពីថ្ងៃទី២៨ ខែកញ្ញានោះ បានសម្រេចចូលប្រកួតលីគកំពូលកម្ពុជាវិញហើយ បន្ទាប់ពីសហព័ន្ធកីឡាបាល់ទាត់កម្ពុជា បន្ធូរបន្ថយការដាក់ពិន័យទៅលើគ្រូបង្គោល លោក ភា សុភ័ក្ត្រា និងកីឡាកររបស់ខ្លួនទាំង៣នាក់ ដែលបានប្រើកាយវិការមិនសមរម្យ ក្នុងការតវ៉ាទៅលើការកាត់សេចក្តីលម្អៀងរបស់លោកអាជ្ញាកណ្តាល ឃិន ឧសីហា នោះ។
តាមការសម្រេចចុងក្រោយរបស់សហព័ន្ធកីឡាបាល់ទាត់កម្ពុជា គឺបានបន្ថយការពិន័យគ្រូបង្គោល ភា សុភ័ត្ត្រា ពី៥ប្រកួត រួមទាំងការព្យួរដោយស្វ័យប្រវត្តិ មកត្រឹម៣ប្រកួត ព្រមទាំងការព្យួរដោយស្វ័យប្រវត្តិ និងតម្កល់ទឹកប្រាក់ (១លានរៀល) ទុកនូវដដែល ចំណែកកីឡាករ ជឿន ណាចា ត្រូវបានបន្ថយការពិន័យ ពីចំនួន២ប្រកួត រួមទាំងការព្យួរដោយស្វ័យប្រវត្តិ មកនៅត្រឹម១ប្រកួត ហើយព្យួរដោយស្វ័យប្រវត្តិ និងលុបចោលការពិន័យជាប្រាក់។
សកម្មភាពការតវ៉ារបស់ក្រុមទ័ព ទៅលើលោកអាជ្ញាកណ្តាល ឃិន ឧសីហា ក្នុងពេលប្រកួតជាមួយក្រុមវិសាខា កាលពីថ្ងៃទី២៨ ខែកញ្ញា។រូបថត Peak Sports
ចំណែកកីឡាករ JOSEMAR BALANGA AGOSTINHO របស់ក្រុមទ័ព ត្រូវបានសម្រេចបន្ថយការពិន័យពីចំនួន២ប្រកួត រួមទាំងការព្យួរដោយស្វ័យប្រវត្តិ មកត្រឹម១ប្រកួត ហើយព្យួរដោយស្វ័យប្រវត្តិ និងលុបចោលការពិន័យជាប្រាក់ រីឯកីឡាករ អ៊ុព កាម៉ុល ត្រូវបានសម្រេចបន្ថយការពិន័យពីចំនួន៣ប្រកួត រួមទាំងការព្យួរដោយស្វ័យប្រវត្តិ មកនៅត្រឹម២ប្រកួត រួមទាំងការព្យួរដោយស្វ័យប្រវត្តិ និងបន្ថយទឹកប្រាក់មកត្រឹម២៥០០០០រៀល។
ជុំវិញការសម្រេចនេះ ក្រុមទ័ព បានប្រកាសព័ត៌មាន កាលពីយប់ថ្ងៃពុធថា៖ «បន្ទាប់ពីការដាក់បណ្ដឹងឧទ្ធរណ៍ និងកិច្ចប្រជុំជាមួយសហព័ន្ធកីឡាបាល់ទាត់កម្ពុជា និងគណៈកម្មការវិន័យរបស់សហព័ន្ធ ជាច្រើនលើកហើយនោះ ថ្នាក់ដឹកនាំសមាគមកីឡាបាល់ទាត់កងយោធពលខេមរភូមិន្ទ បានសម្រេចចិត្តបន្តការប្រកួតតាមកាលវិភាគរបស់ក្រុមហ៊ុនលីគកម្ពុជា និងយល់ព្រមតាមការពិន័យមកលើគ្រូបង្គោល កីឡាករ របស់សមាគកីឡាបាល់ទាត់កងយោធពលខេមរភូមិន្ទ ដោយឈរលើស្មារតី រួមគ្នាអភិវឌ្ឍន៍វិស័យកីឡាបាល់នៅកម្ពុជាយើង»។
ជាមួយគ្នានេះ សមាគមកីឡាបាល់ទាត់កងយោធពលខេមរភូមិន្ទ បានសុំណូមពរដល់អ្នកគាំទ្រទាំងអស់ ឱ្យបន្តការគាំទ្រវិស័យបាល់ទាត់កម្ពុជាកាន់តែខ្លាំងឡើងថែមទៀត។
ចំណែកក្រុមទ័ព ក៏បានហ្វឹកហាត់ជាប្រចាំ ដើម្បីត្រៀមការប្រកួតលីគកំពូលកម្ពុជាផងដែរ បើទោះបីជាពួកគេ ទើបតែទទួលបានដំណឹងពីការសម្រេចចុងក្រោយ លើការប្តឹងរបស់ខ្លួនទៅកាន់ឧទ្ទរណ៍ជំទាស់នឹងការសម្រេចលើកទី១ របស់សហព័ន្ធកីឡាបាល់ទាត់កម្ពុជា និងគណៈកម្មការវិន័យ ចំពោះការពិន័យទៅលើគ្រូបង្វឹក និងកីឡាករទាំង៣នាក់របស់ក្រុមទ័ព តាំងពីថ្ងៃទី១១ ខែតុលាមកក៏ដោយ៕
