អ្នកចាំទី វិរៈ ដារ៉ា បានព្យាយាមលោតទៅសង្គ្រោះបាល់ ហើយគេបានដើរតួយ៉ាងសំខាន់ ក្នុងការជួយឱ្យក្រុមព្រះខ័នរាជស្វាយរៀង យកឈ្នះក្រុម SP Falcons ដោយលទ្ធផល ២-១។ រូបថត AFC
ក្រុមព្រះខ័នរាជស្វាយរៀងរបស់កម្ពុជា បានយកឈ្នះក្រុមម្ចាស់ផ្ទះ SP Falcons FC របស់ម៉ុងហ្គោលី ២-១ យ៉ាងរំភើបបំផុត នៅក្នុងការប្រកួតវគ្គជម្រុះតាមពូលពានរង្វាន់ AFC Challenge League 2024/2025 ប្រចាំតំបន់អាស៊ីខាងកើត ហើយក៏ជាលទ្ធផល ដែលបានជួយឱ្យពួកគេ ឡើងទៅកាន់ការប្រកួតវគ្គបន្ត ដោយស្វ័យប្រវត្តិផងដែរ បើទោះបីជានៅសល់១ប្រកួតទៀតក្នុងដៃ។
សម្រាប់ការប្រកួត នៅ MFF Stadium Ulaanbaatar ប្រទេសម៉ុងហ្គោលី ដែលទើបបានបញ្ចប់ កាលពីរសៀលម៉ោង៤ ថ្ងៃពុធនេះ ខ្សែប្រយុទ្ធប្រេស៊ីល Pablo Augusto ជាអ្នករកបានគ្រាប់បាល់បើកឆាកឱ្យក្រុមព្រះខ័នរាជស្វាយរៀង តាមរយៈការស៊ុតបាល់ពិន័យ១១ម៉ែត្របានសម្រេចនៅនាទីទី២៥ បន្ទាប់ពីកីឡាករ Batikhishig Myagmar របស់ក្រុម SP Falcons បានយកដៃទៅប៉ះពាល់ ពីការតែតបាល់ទម្លាក់នៅក្នុងតំបន់គ្រោះថ្នាក់របស់កីឡាករជប៉ុន Ryo Fujii នោះ។
ជាមួយការរកបានគ្រាប់បាល់នាំមុខ ១-០ នេះ ខ្សែប្រយុទ្ធ Pablo Augusto គួរណាស់តែរកបាន១គ្រាប់ទៀត នៅពេល សារ៉េត គ្រីយ៉ា បានបោះបាល់កាត់ឱ្យយ៉ាងស្អាតនៅមុខទីក្រុម SP Falcons នោះ ប៉ុន្តែ Pablo បែរជាប្រើជើងឆ្វេង ស៊ុតបាល់ដាច់នោះ ខុសទីដ៏គួរឱ្យសោកស្តាយទៅវិញ។
ដោយឡែក សម្រាប់ការប្រកួតនៅតង់ទី២ ក្រុមម្ចាស់ផ្ទះ SP Falcons បានព្យាយាមវាយលុកទៅលើក្រុមស្វាយរៀង យ៉ាងអំណត់ ហើយភាពសប្បាយរីករាយបានកើតមានឡើងវិញ ចំពោះពួកគេ បន្ទាប់ពីកីឡាករ Daniil Musatkin ស៊ុតបាល់ផុតដៃអ្នកចាំទៅ វិរៈ ដារ៉ា បានសម្រេច នៅនាទីទី៦៧។
ប៉ុន្តែការព្យាយាមបង្អក់ដំណើរការអូសបាល់ចូលតំបន់គ្រោះថ្នាក់ យ៉ាងលឿនរបស់ ខ្សែប្រយុទ្ធ Cristian Roque បានធ្វើឱ្យកីឡាករ Taiyo Toyoda ឈានដល់ការទាញ Cristian ឱ្យដួល នាំឱ្យលោកអាជ្ញាកណ្តាល Wong Wai Lun សម្រេចពិន័យកាតលឿង និងផ្តល់បាល់ពិន័យ១១ម៉ែត្រឱ្យក្រុមស្វាយរៀង ជាថ្មីម្តងទៀត ហើយ Cristian ជាអ្នកស៊ុតបាល់នេះដោយខ្លួនឯង បានសម្រេចនៅនាទីទី៨០។
នៅក្នុងរយៈពេល១០នាទីចុងក្រោយនេះ ក្រុម SP Falcons កាន់តែមានភាពពុះកញ្ជ្រោលក្នុងការវាយលុកទៅលើក្រុមស្វាយរៀង ប៉ុន្តែពួកគេ មិនអាចរកបានគ្រាប់បន្ថែមនោះទេ ហើយថែមទាំងបាត់បង់សមាជិកម្នាក់នៅក្នុងម៉ោងបន្ថែមផងដែរ ខណៈលោកអាជ្ញាកណ្តាល បានសម្រេចពិន័យកាតក្រហមទៅដល់កីឡាករ Matheus Almeida Silva ដែលបានបង្ករបួសដល់ប្រធានក្រុម សឿយ វិសាល នោះ។
ក្រុម SP Falcons និងអ្នកគាំទ្ររបស់ពួកគេ បានសម្តែងការមិនពេញចិត្តចំពោះលោកអាជ្ញាកណ្តាលរបស់ហុងកុង Wong Wai Lun នោះទេ ដែលបានធ្វើការពិន័យច្រើនក្នុងការប្រកួតនេះ ជាពិសេសការពិន័យបាល់១១ម៉ែត្រទាំង២លើក ទៅឱ្យក្រុមស្វាយរៀង ធ្វើឱ្យពួកគេចាញ់ ២-១ ទាំងមិនអស់ចិត្ត។
លទ្ធផលចាញ់ ២-១ នេះបានធ្វើឱ្យក្រុមម្ចាស់ផ្ទះ SP Falcons ធ្លាក់ពីកំពូលតារាងនៃពូលE មកឈរនៅលេខ៣ចុងក្រោយគេ ចំណែកក្រុមស្វាយរៀង បានឡើងទៅឈរនៅលេខ១ជាបណ្តោះអាសន្ន ហើយការទទួលបាន៣ពិន្ទុ ក្នុងការប្រកួតបើកឆាករបស់ខ្លួននេះ បានជួយឱ្យក្រុមស្វាយរៀង មានកៅអីឡើងទៅប្រកួតនៅវគ្គបន្តរួចទៅហើយ បើទោះបីជាពួកគេ នៅសល់ការប្រកួត១លើកទៀតជាមួយក្រុម Madura United របស់ឥណ្ឌូនេស៊ី ដែលបានស្មើ ០-០ ជាមួយក្រុម SP Falcons កាលពីថ្ងៃទី២៧ ខែតុលា។
សម្រាប់ការជួបគ្នារវាងក្រុមស្វាយរៀង និងក្រុម Madura United ដែលនឹងធ្វើនៅថ្ងៃសៅរ៍ចុងសប្តាហ៍នេះ ក៏ជាការប្រកួតកាត់សេចក្តី កំណត់ជោគវាសនារបស់ម្ចាស់ផ្ទះ SP Falcons ផងដែរ។ មានន័យថា បើសិនជា ក្រុម Madura United ឈ្នះ ឬស្មើជាមួយក្រុមស្វាយរៀង គឺ SP Falcons នឹងធ្លាក់ចេញពីការប្រកួតនេះហើយ ប៉ុន្តែបើសិនជា ក្រុម Madura United ចាញ់ក្រុមស្វាយរៀង លើសពី១គ្រាប់ នោះ SP Falcons នឹងបានឡើងទៅវគ្គ Knockout Stage ជាមួយក្រុមស្វាយរៀង ដើម្បីប្រកួតខ្វែងជាមួយក្រុមលេខ១ និងលេខ២ មកពីពូលD៕
