កីឡាការិនី នៅ ស្រីពៅ (ស្តាំ) បានម៉ាត់ទៅកីឡាការិនីរបស់ថៃ ក្នុងការប្រកួត ONE Championships កាលពីឆ្នាំ២០១៩។ រូបថត ONE
កីឡាករជើងខ្លាំង បឺត សង្ឃឹម ដែលមានឈ្មោះក្នុងបញ្ជីជាតិថា «ទូច រ៉ាឆាន់» និងកីឡាការិនី នៅ ស្រីពៅ បានបង្ហាញការតាំងចិត្តខ្ពស់ ក្នុងការប្រជែងដណ្តើមយកមេដាយជូនជាតិ ពីការប្រកួតកីឡាឃីកបុកស៊ីងជើងឯកអាស៊ី ឆ្នាំ២០២៤ (Asian Kickboxing Championships) នៅលើទឹកដីខ្លួនឯង ដែលនឹងបើកការប្រកួតនៅវិមានពហុកីឡដ្ឋានជាតិអូឡាំពិក នាថ្ងៃអង្គារ ទី៧ រហូតដល់ថ្ងៃទី១៣ ខែតុលា ដោយមានប្រតិភូកីឡាជាង៦០០នាក់ មកពី២២ប្រទេសបានចូលរួម។
ក្នុងនាមជាកីឡាករជម្រើសជាតិឃីកបុកស៊ីងកម្ពុជា ដែលធ្លាប់ឈ្នះមេដាយមាសទាំងការប្រកួតឃីកបុកស៊ីង ក្នុងព្រឹត្តិការណ៍ស៊ីហ្គេម លើកទី៣១ ឆ្នាំ២០២២ នៅប្រទេសវៀតណាម និងស៊ីហ្គេម លើកទី៣២ ឆ្នាំ២០២៣ នៅកម្ពុជានោះ បឺត សង្ឃឹម បានមើលឃើញថា ការប្រកួត Asian Kickboxing Championships 2024 នេះ អាចនឹងមានភាពតានតឹង ព្រោះមានអត្តពលិកខ្លាំងៗជាច្រើនបានមកប្រកួត។
ប៉ុន្តែ សង្ឃឹម បានតាំងចិត្តខ្ពស់ ក្នុងការដណ្តើមយកមេដាយមាសជូនកម្ពុជា សម្រាប់ការប្រកួតក្នុងប្រភេទទម្ងន់៦០គីឡូក្រាមរបស់ខ្លួន។ សង្ឃឹម បាននិយាយថា៖ «សម្រាប់ការប្តេជ្ញាចិត្ត គឺខ្ញុំនឹងខំប្រឹងធ្វើឱ្យអស់ពីសមត្ថភាព ដែលខ្ញុំបានហ្វឹកហាត់ ដើម្បីដណ្តើមយកមេដាយមាសជូនជាតិ»។
ជើងខ្លាំង បឺត សង្ឃឹម (ក្រហម) ពេលប្រកួតឃីកបុកស៊ីង ក្នុងព្រឹត្តិការណ៍ស៊ីហ្គេម លើកទី៣២ ឆ្នាំ២០២៣ នៅកម្ពុជា។ រូបថត សហការី
ដោយសារការប្រកួតនេះ មានកីឡាករចូលរួមច្រើន ហេតុនេះ បឺត សង្ឃឹម នៅមិនទាន់ដឹងថា រូបគេត្រូវប៉ះកីឡាកររូបណាខ្លះទេ ប៉ុន្តែ សង្ឃឹម បានបញ្ជាក់ថា៖ «ខ្ញុំបានត្រៀមខ្លួនរួចរាល់អស់ហើយ ហើយអ្វីដែលជាក់ស្តែង គឺនៅពេលប្រកួតលើសង្វៀន ដោយខ្ញុំប្តេជ្ញាចិត្តថា នឹងខំប្រឹងធ្វើឱ្យបានល្អ ដើម្បីជាតិមាតុភូមិ ហើយខ្ញុំក៏សូមសំណូមពរឱ្យបងប្អូនយើងទៅទស្សនាឱ្យបានច្រើន ដើម្បីលើកទឹកចិត្តដល់ក្រុមអត្តពលិកយើង ក្នុងការប្រកួតប្រជែងដណ្តើមយកមេដាយ»។
ដោយឡែកកីឡាការិនីគុនចម្រុះ នៅ ស្រីពៅ ដែលទើបទទួលរងការបរាជ័យ នៅក្នុងការប្រកួតកីឡាយុទ្ធគុនចម្រុះជើងឯកអាស៊ី លើកទី២ ឆ្នាំ២០២៤ (AMMA Championship 2024) នៅវិមានពហុកីឡដ្ឋានជាតិអូឡាំពិកនេះ កាលពីខែសីហា ក៏បានតាំងចិត្តប្រជែងរកមេដាយពីការប្រកួត Asian Kickboxing Championships 2024 នេះ បើទោះបីជានាង មិនធ្លាប់ឈ្នះការប្រកួតឃីកបុកស៊ីងកន្លងមកក៏ដោយ។
កីឡាការិនីទម្ងន់ ៥៥គីឡូក្រាម នៅ ស្រីពៅ បាននិយាយថា៖ «ទោះបីជាខ្ញុំធ្វើមិនបានល្អ សម្រាប់ការប្រកួតឃីកបុកស៊ីងចំនួន៣ដងកន្លងមក ប៉ុន្តែសម្រាប់ការប្រកួតលើកនេះ ខ្ញុំប្តេជ្ញាចិត្តថា នឹងខំប្រឹងធ្វើឱ្យបានល្អជាងមុនៗ ហេតុនេះហើយទើបខ្ញុំខំប្រឹងហ្វឹកហាត់ ដោយមិនបានគិតពីថ្ងៃបុណ្យទានអ្វីទេ ព្រោះខ្ញុំចង់បានមេដាយពីការប្រកួតឃីកបុកស៊ីងជើងឯកអាស៊ីនេះ ដើម្បីទុកជាស្នាដៃសម្រាប់ខ្លួនឯង»។
សម្រាប់ការប្រកួត Asian Kickboxing Championships 2024 នេះ កម្ពុជា ក្នុងនាមជាម្ចាស់ផ្ទះ បានសម្រិតសម្រាំងយកកីឡាករ កីឡាការិនីឆ្នើមៗសរុប៦២នាក់ ដើម្បីចូលរួមប្រកួតដណ្តើមយកមេដាយ ជាមួយអត្តពលិកអន្តរជាតិចំនួន៤៨៥នាក់ មកពី២២ប្រទេស ហើយក្នុងនោះកីឡាករ ធ្លាប់ឈ្នះមេដាយមាស នៅស៊ីហ្គេម ឆ្នាំ២០២៣ ដូចជា ព្រំ សំណាង, ឈឿង ល្វៃ, រិន ដេវីត, សុខ រិទ្ធ និង ឡៅ សៃណាត ជាដើម សុទ្ធតែមានវត្តមាន នៅក្នុងការប្រកួតឃីកបុកស៊ីងជើងឯកអាស៊ីនេះ។
ជាមួយគ្នានេះ លោក ហេង សុខឃន ប្រធានសហព័ន្ធកីឡាប្រដាល់ឃីកបុកស៊ីងកម្ពុជាបានក្រើនរម្លឹកដល់គ្រូបង្វឹក កីឡាករ កីឡាការិនីឃីកបុកស៊ីងជម្រើសជាតិកម្ពុជាទាំងអស់ថា ក្នុងនាមជាអត្តពលិកម្ចាស់ផ្ទះ ត្រូវតែគោរពឱ្យបាននូវវិន័យ ក្រមសីលធម៌ ក្នុងការប្រកួត ជាពិសេសអត្តពលិកឃីកបុកស៊ីង ត្រូវមានមោទនភាពជាតិ ក្នុងការបញ្ចេញសមត្ថភាពឱ្យអស់ ដើម្បីប្រជែងយកមេដាយមាសឱ្យបានច្រើនយកមកជូនជាតិ។
បន្ថែមលើនេះ លោក ហេង សុខឃន បានណែនាំកីឡាករកីឡាការិនីកម្ពុជា ត្រូវចៀសវាងឱ្យបានដាច់ខាតពីការប្រើប្រាស់សារធាតុហាមឃាត់នៅក្នុងវិស័យកីឡា និងត្រូវពិនិត្យសុខភាពឱ្យបានគ្រប់ៗគ្នា។
លោកសង្កត់ធ្ងន់ថា៖ «ពិភពលោក គេប្រយ័ត្នបំផុតលើបញ្ហាសារធាតុលើកកម្លាំងនេះ ព្រោះការធ្វើបែបនេះ គឺដើម្បីរក្សានូវភាពយុត្តិធម៌ក្នុងការប្រកួតដោយស្មើភាពគ្នា ចំណែកការឈ្នះចាញ់ ត្រូវស្ថិតនៅលើបច្ចេកទេសកីឡា ហើយក្នុងនាមជាម្ចាស់ផ្ទះ យើងត្រូវតែប្រយ័ត្នទាំងអស់គ្នា ព្រោះការប្រើប្រាស់សារធាតុហាមឃាត់ក្នុងវិស័យកីឡានេះ គេខ្លាចខ្លាំងណាស់ អ៊ីចឹងយើងត្រូវចៀសវាងឱ្យបានដាច់ខាត»៕
