ការប្រកួតផ្តាច់ព្រ័ត្ររវាងក្រុម Wildcats (ខៀវ) និងក្រុម Maniac ក្នុងវគ្គផ្តាច់ព្រ័ត្រ កាលពីថ្ងៃអាទិត្យ។ រូបថត ឈន ណន
សាស្រ្តាចារ្យផ្នែកគ្រប់គ្រងធុរកិច្ចមកពីសហរដ្ឋអាមេរិក លោក ខេស៊ី បាណេត (Casey Barnett) បានអះអាងថា ការរងសម្ពាធ និងឧបសគ្គគ្រប់បែបយ៉ាង ដែលកើតមាននៅក្នុងការលេងកីឡា ជាពិសេសកីឡាលេងជាក្រុម នឹងក្លាយជាបទពិសោធន៍ដ៏សំខាន់ ដែលនឹងជួយឱ្យក្រុមនិស្សិត អាចទទួលបានជោគជ័យ នៅពេលពួកគេ បញ្ចប់ការសិក្សា រួចចេញទៅធ្វើការងារ ឬបើកអាជីវកម្មអ្វីមួយ។
ជាមួយហេតុផលនេះ នាយកវិទ្យាស្ថានខេមអេដ លោក Casey Barnett តែងតែរៀបចំឱ្យមានការប្រកួតកីឡាបាល់ទាត់ហ្វុតសាល បាល់បោះ និងកីឡាអត្តពលកម្មជារៀងរាល់ឆ្នាំ ហើយថ្មីៗនេះ ក៏បានបន្ថែមឱ្យមានការហ្វឹកហាត់ និងប្រកួតគុនដាវ វាយកូនឃ្លីលើតុ និងកីឡាហែលទឹក ដើម្បីឱ្យនិស្សិតនៅវិទ្យាស្ថានខេមអេដ បានចូលលេងកីឡា ដើម្បីទទួលបានចំណេះដឹង និងបទពិសោធន៍ជាក់ស្តែង យកទៅបំពេញបន្ថែមនូវចំណេះដឹង ដែលពួកគេទទួលបានពីការសិក្សានៅក្នុងសាលា។
ជាក់ស្តែង កាលពីថ្ងៃទី១០ ខែវិច្ឆិកានេះ វិទ្យាស្ថានខេមអេដ ទើបតែបានបញ្ចប់ ការប្រកួតកីឡាបាល់បោះពានរង្វាន់ CamEd Men’s & Women’s Basketball Tournament 2024 នៅតារាង Platinum Sport Centre ដោយព្រឹត្តិការណ៍នេះ មានក្រុមនិស្សិតចូលរួម១៩៣នាក់ ស្មើនឹង២៩ក្រុម គឺក្រុមបុរសមាន១៥ បែងចែកការប្រកួតជា៤ពូល និងក្រុមនារីមាន១៤ក្រុម បែងចែកការប្រកួតជា៤ពូលដូចគ្នា។
ក្រុម Soy Bad (អាវពណ៌ប្រផេះ) បានយកឈ្នះក្រុម Oni Chan ដោយពិន្ទុ ២១-១៤ ដើម្បីក្លាយជាម្ចាស់ជើងឯក នៅតារាង Platinum Sport Centre។ រូបថត ឈន ណន
តាមរយៈការប្រកួតយ៉ាងស្វិតស្វាញ ដែលបានចាប់ផ្តើមពីថ្ងៃទី២ ខែវិច្ឆិកាមកនោះ ក្រុម Soy Bad បានក្លាយជាម្ចាស់ជើងឯក សម្រាប់ការប្រកួតបាល់បោះផ្នែកបុរស បន្ទាប់ពីពួកគេបានយកឈ្នះក្រុម Oni Chan ដោយពិន្ទុ ២១-១៤ ខណៈលេខ៣ បានទៅលើក្រុម Utopia ហើយកីឡាករ ចាន់ធឿន រតនៈ (Chanthoeun Rothanak) របស់ក្រុម Oni Chan បានឈ្នះពាន ជាកីឡាកររកបានពិន្ទុច្រើនជាងគេ ប្រចាំការប្រកួតនេះ។
ចំណែកក្រុម Wildcats ទទួលបានចំណាត់ថ្នាក់លេខ១ ក្នុងការប្រកួតបាល់បោះផ្នែកនារី បន្ទាប់ពីពួកគេបានយកឈ្នះក្រុម Maniac ក្នុងវគ្គផ្តាច់ព្រ័ត្រ ហើយលេខ៣បានទៅក្រុម Little Star រីឯកីឡាការិនី សុខ ស្រីពីន (Sok Sreypin) របស់ក្រុម Manniac បានទទួលពានរង្វាន់ជាកីឡាការិនី ដែលរកបានពិន្ទុច្រើនជាងគេ សម្រាប់ការប្រកួតក្នុងឆ្នាំ២០២៤នេះ។
ដោយបានទស្សនាការប្រកួតប្រជែង នៅវគ្គផ្តាច់ព្រ័ត្រនេះដោយផ្ទាល់ លោក Casey Barnett បានថ្លែងថា៖ «ទាំងការប្រកួតផ្នែកបុរស និងនារី គឺមានការរីកចម្រើនខ្លាំង បើប្រៀបធៀបទៅនឹងឆ្នាំមុនៗ ជាពិសេសបច្ចេកទេស ដោយកីឡាករ កីឡាការិនីបានបន្ថែមបច្ចេកទេស ហើយបានបង្កើនការខិតខំ និងពោះពារឧបសគ្គ គឺពួកគេមានទំនុកចិត្តលើខ្លួនឯង កាន់តែខ្ពស់ ក្នុងការប្រកួតប្រជែង ទោះបីស្ថិតក្នុងស្ថានភាពចាញ់ ឬឈ្នះ»។
លោក Casey Barnett ពេលចូលរួមពិពាក់មេដាយ ដល់ក្រុមម្ចាស់ជយលាភី នៅក្នុងពិធីការប្រកួតពាន CamEd Men’s & Women’s Basketball Tournament 2024។ រូបថត ឈន ណន
យ៉ាងណាក៏ដោយ ជាមួយភាពរីកចម្រើនលើការលេងកីឡារបស់ក្រុមនិស្សិតរៀននៅវិទ្យាស្ថាន ខេមអេដនេះ លោក Casey បានបង្ហើបថា សាលារបស់លោកបានជួលគ្រូផ្នែកកីឡាមកបង្វឹកដល់ក្រុមនិស្សិតទាំងអស់នេះ ហើយការហ៊ានចំណាយទាំងទៅលើការជួលគ្រូបង្វឹក និងការរៀបចំការប្រកួតកីឡាផ្សេងៗឱ្យនិស្សិតបានចូលរួមលេងនេះ ព្រោះលោកបានមើលឃើញថា ការលេងកីឡាបានផ្តល់អត្ថប្រយោជន៍ ដែលជាបទពិសោធន៍ពេញមួយជីវិតដល់ក្រុមនិស្សិត ក្រោយពេលពួកគេបានបញ្ចប់ការសិក្សា ហើយចេញទៅរកការងារធ្វើ ឬបង្កើតមុខរបរអ្វីមួយ។
បុរសជនជាតិអាមេរិក មានសញ្ជាតិខ្មែរ លោក Casey បញ្ជាក់ថា៖ «ការលេងកីឡានៅវិទ្យាស្ថានខេមអេដ យើងមានជាជម្រើស តែយើងលើកទឹកចិត្តឱ្យក្រុមនិស្សិតចូលលេងកីឡាឱ្យបានច្រើន ព្រោះយើងមើលឃើញថា វាមានអត្ថប្រយោជន៍ដល់ក្រុមនិស្សិតពេលចូលធ្វើការគឺជួយឱ្យពួកគេខិតខំព្យាយាមធ្វើការ ដើម្បីទទួលបានជោគជ័យ, ចេះធ្វើការងារជាក្រុម ដែលអាចដឹងពីចំណុចខ្លាំង និងចំណុចខ្សោយខ្លួនឯង ហើយលេងកីឡា បានបង្រៀនឱ្យក្រុមនិស្សិតចេះពុះពារឧបសគ្គ ចេះធ្វើការក្រោមសម្ពាធ គឺមិនបោះបង់ ទោះជួបការលំបាក»។
លោកបន្ថែមថា ៖ «វាដូចជាការធ្វើការងារដែរ នៅពេលយើងចង់ឈ្នះ យើងត្រូវបង្កើនបច្ចេកទេស និងខំប្រឹងប្រែងក្រោមសម្ពាធផ្សេងៗ ដូច្នេះការលេងកីឡាជាជំនាញទន់ ដែលនឹងផ្តល់បទពិសោធន៍មួយជីវិតដល់ក្រុមនិស្សិតយើង ក៏ដូចជាការលើកទឹកចិត្តដល់ពួកគេឱ្យមានការខិតខំប្រឹងប្រែងជម្នះនូវរាល់ឧបសគ្គ ដើម្បីឈានទៅទទួលបានជោគជ័យ ក្នុងការធ្វើការងារ ក៏ដូចជាការបង្កើតអាជីវកម្មអ្វីមួយ»៕
