អ្នកចាំទី រ៉េត លីហេង បានឈរមើលការលោតទៅទះបាល់ចេញរបស់ វីរៈ ដារ៉ា ពេលពួកគេហ្វឹកហាត់ក្នុងក្រុមជម្រើសជាតិកម្ពុជាជាមួយគ្នា កាលពីខែតុលា។ រូបថត ffc
អ្នកចាំទីវ័យក្មេងរបស់ក្លិបភ្នំពេញក្រោន សាវែង សំណាង ត្រូវបានកោះហៅចូលរួមជាមួយក្រុមជម្រើសជាតិ ជាលើកទី២ បន្ទាប់ពីខកខានអស់រយៈពេលចូល៤ឆ្នាំ ចំណែកខ្សែប្រយុទ្ធ គី រីណា និង ស រតនា ក៏ត្រូវបានកោះហៅឱ្យចូលរួមជាមួយក្រុមជម្រើសជាតិជាថ្មីផងដែរ សម្រាប់ការប្រមូលផ្តុំហ្វឹកហាត់នៅកាតា ពីថ្ងៃទី១២ ដល់ទី១៧ ខែវិច្ឆិកា។
បើតាមបញ្ជីរាយនាមកីឡាករទាំង២៣នាក់ ដែលត្រូវចេញទៅហ្វឹកហាត់នៅកាតានេះ គឺសាវែង សំណាង ត្រូវបានកោះហៅឱ្យចូលរួមជាមួយក្រុមជម្រើសជាតិ ជំនួសអ្នកចាំទីដៃទី១របស់ក្រុមវិសាខា ហ៊ុល គីមហ៊ុយ ចំណែកអ្នកទីដៃទី១របស់ក្រុមព្រះខ័នរាជស្វាយរៀង វីរៈ ដារ៉ា និងអ្នកចាំទីរបស់ក្រុមណាហ្គាវើលដ៍ រ៉េត លីហេង នៅតែជាជម្រើសរបស់គ្រូបង្គោលជនជាតិជប៉ុន លោក Koji Gyotoku ដដែល។
ការទទួលបានឱកាសចូលរួមជាមួយក្រុមជម្រើសជាតិកម្ពុជា ជាលើកទី២នេះ ដោយសារតែ សាវែង សំណាង មានសមត្ថភាពសង្រ្គោះបាល់កាន់តែល្អ សម្រាប់ការបង្ហាញខ្លួនជាបន្តបន្ទាប់ ក្នុងពេលដែលអ្នកចាំទី អ៊ុំ វិចិត្រ មានរបួស។ សំណាង បានរួមចំណែកយ៉ាងសំខាន់ជួយឱ្យក្រុមភ្នំពេញក្រោន មិនទាន់ស្គាល់ការចាញ់សោះ សម្រាប់ការប្រកួតលីគកំពូលកម្ពុជា ចំនួន១១លើកមកនេះ ដោយពួកគេឈ្នះ១០ និងស្មើ១ដង ហើយកំពុងឈរនៅលេខរៀងទី១ ដោយមាន៣១ពិន្ទុដាច់ឆ្ងាយពីក្រុមលេខ២ វិសាខា រហូតដល់៦ពិន្ទុ។
យ៉ាងណាក៏ដោយ សម្រាប់ការប្រជែងយកឱកាស ដើម្បីបានលេងនៅលើទីលាន ក្នុងក្រុមជម្រើសជាតិនេះ គឺអាចមានការពិបាកចំពោះម្ចាស់ស្រោមដៃមាស ឆ្នាំ២០២២ សាវែង សំណាង ព្រោះតាមរយៈការប្រកួតមិត្តភាពអន្តរជាតិចំនួន២លើក ក្រោមការដឹកនាំរបស់គ្រូបង្គោលថ្មី លោក Koji Gyotoku គឺអ្នកចាំទី វីរៈ ដារ៉ា និង ហ៊ុល គីមហ៊ុយ បានជាប់ក្នុងជម្រើសដំបូងម្នាក់១ប្រកួត រីឯ រ៉េត លីហេង បានត្រឹមអង្គុយចាំនៅកន្លែងកៅអីបម្រុង។
សាវែង សំណាង បានប្រាប់នាព្រឹកថ្ងៃអង្គារនេះថា៖ «សម្រាប់ជម្រើសជាតិ ខ្ញុំធ្លាប់ជាប់ច្រើនដងក្នុងឈុតយុវជន ចំណែកឈុតធំ ខ្ញុំជាប់លើកដំបូង កាលពីឆ្នាំ២០២០-២០២១ ក្នុងពេលក្រុមកម្ពុជា ទៅលេងនៅប្រទេសអាហ្វហ្គានីស្ថាន ហើយខ្ញុំសប្បាយចិត្ត សម្រាប់ការជាប់ជម្រើសជាតិឡើងវិញនេះ ដោយសារមានការខិតខំប្រឹងប្រែងហ្វឹកហាត់ និងប្រកួតទាំងក្នុងទីលាន និងក្រៅទីលាន»។
អ្នកចាំទី សាវែង សំណាង ពេលបង្ហាញខ្លួនក្នុងក្រុមភ្នំពេញក្រោន ហើយពេលនេះរូបគេ ត្រូវបានកោះហៅឱ្យចូលរួមជាមួយក្រុមជម្រើសជាតិកម្ពុជា ជាលើកទី២ ក្រោយខកខានចូល ៤ឆ្នាំ។ រូបថត ភ្នំពេញក្រោន
កីឡាករវ័យ២៥ឆ្នាំ សាវែង សំណាង បន្ថែមថា៖ «សម្រាប់ការប្រជែងយកកៅអីលេង នៅក្នុងក្រុមជម្រើសជាតិ ខ្ញុំមើលឃើញថា វីរៈ ដារ៉ា គាត់ល្អ គឺពិបាកប្រជែងជាមួយគាត់តាំងពីកាយសម្បទា កម្លាំង និងតាក់ទិច ប៉ុន្តែការប្រកួតប្រជែងនៅតែមានចំពោះខ្ញុំ ព្រោះនៅក្នុងក្លិបក៏ខ្ញុំខំប្រឹងហាត់ ហើយពេលទៅជម្រើសជាតិ ក៏ត្រូវតែខំប្រឹង គឺប្តេជ្ញាធ្វើយ៉ាងម៉េចហាត់ឱ្យអស់ពីសមត្ថភាព ដើម្បីឱ្យគ្រូបង្វឹក គាត់មើលឃើញសមត្ថភាពរបស់យើង»។
ជាមួយគ្នានេះ ខ្សែប្រយុទ្ធធ្លាប់លេងឱ្យក្រុមខេត្តព្រៃវែង និងវិសាខា គី រីណា ដែលកំពុងបង្ហាញទម្ងន់លេងយ៉ាងល្អ ដើម្បីជួយឱ្យក្រុមអង្គរថាយហ្គឺរ ឡើងមកឈរនៅកំពូលតារាងទាំង៤ (Top4) នៃការប្រកួតលីគកំពូលកម្ពុជា ឆ្នាំ២០២៤-២០២៥ ត្រូវបានកោះហៅឱ្យចូលរួមជាមួយក្រុមជម្រើសជាតិជាថ្មី បន្ទាប់ពីបាត់មុខមួយរយៈពេល។ រីឯខ្សែប្រយុទ្ធវ័យក្មេង ស រតនា របស់វិសាខា ក៏ត្រូវបានកោះហៅចូលរួមជាមួយក្រុមជម្រើសជាតិជាថ្មីដូចគ្នា។
ចំណែកកីឡាករចំនួន២០នាក់ទៀត នៅតែត្រូវបានគ្រូបង្គោលលោក Koji Gyotoku ផ្តល់ទំនុកចិត្តឱ្យចូលរួមជាមួយក្រុមជម្រើសជាតិ ក្នុងនោះមាន សៀង ចន្ធា, តាំង ប៊ុនឆៃ របស់ក្លិបបឹងកេត កីឡាករ យូឌៃ អូកាវ៉ា, អ៊ន ចាន់ប៉ូលីន, សឿត បារាំង, យ៉ើ ម៉ូស្លីម និង លឹម ពិសុទ្ធ របស់ក្រុមភ្នំពេញក្រោន។ ញាណ សុស៊ីដាន, មីហ្ស៊ូ ហ៊ីការ៉ូ, សឿយ វិសាល, សារ៉េត គ្រីយ៉ា, ថេឡរ នីកូឡាស់, គឹម សុខយុទ្ធ និង មិន រតនៈ របស់ក្លិបព្រះខ័នរាជស្វាយរៀង កីឡាករ កាន់ ម៉ូ, សារ ទី, ឡេង ណូរ៉ា របស់ក្រុមវិសាខា និងខ្សែបម្រើប្រយុទ្ធ សុះ ស៊ូហាណា របស់ក្រុមណាហ្គាវើលដ៍។
ការប្រកួតមិត្តភាពអន្តរជាតិរបស់ក្រុមជម្រើសជាតិកម្ពុជាជាមួយក្រុមម្ចាស់ផ្ទះហុងកុងកាលពីថ្ងៃទី១៥ ខែតុលា ឆ្នាំ២០២៤។ រូបថត FFC
សម្រាប់ការប្រមូលផ្តុំហ្វឹកហាត់នៅកាតានេះ លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា បានប្រាប់ភ្នំពេញប៉ុស្តិ៍ នៅព្រឹកថ្ងៃអង្គារនេះថា ក្រុមជម្រើសជាតិកម្ពុជា នឹងមានការប្រកួតមិត្តភាពបិទទ្វារនៅទីនោះ តែចំពោះការប្រកួតមិត្តភាពអន្តរជាតិជាផ្លូវការផ្សេងទៀត នៅមិនទាន់បញ្ជាក់នោះទេ។
លោក សារ៉េត បានបញ្ជាក់ថា៖ «ដោយសារតែពេលវេលាខ្លី ហើយម្ចាស់ផ្ទះកាតា ក៏មិនមានពេលគ្រប់គ្រាន់ក្នុងការសុំជាគោលការណ៍ច្បាប់ ដើម្បីរៀបចំការប្រកួត អ៊ីចឹងមានតែការប្រកួតបិទទ្វារទេ ហើយក្រៅតែពីការប្រកួតមិត្តភាពបិទទ្វារនៅកាតា យើងនៅមិនទាន់មានការបញ្ជាក់ថា នឹងមានការប្រកួតមិត្តភាពអន្តរជាតិណាផ្សេងទៀតនៅឡើយទេ គិតមកដល់ពេលនេះ»។
គួររំឭកថា ក្រោមការដឹកនាំរបស់គ្រូបង្គោលលោក Koji Gyotoku គឺក្រុមជម្រើសជាតិកម្ពុជា បានធ្វើការប្រកួតមិត្តភាពអន្តរជាតិ ចំនួន២លើកហើយ ដោយក្នុងនោះក្រុមកម្ពុជា បានយកឈ្នះក្រុមឆាយនីសតៃប៉ិ (Chinese Taipei) ៣-២ នៅពហុកីឡដ្ឋានជាតិអូឡាំពិក កាលពីថ្ងៃទី១១ ខែតុលា តែកម្ពុជាបានចាញ់ក្រុមម្ចាស់ផ្ទះហុងកុង ៣-០ ក្នុងការប្រកួតមិត្តភាព កាលពីថ្ងៃទី១៥ ខែតុលា។
ដោយឡែកសម្រាប់ការប្រមូលផ្តុំហ្វឹកហាត់ក្រុមជម្រើសជាតិកម្ពុជា លើកនេះ គឺត្រៀមខ្លួនសម្រាប់ការប្រកួតពានរង្វាន់ ASEAN Championship 2024 ពីថ្ងៃទី៨ ដល់ទី២០ ខែធ្នូ ដោយកម្ពុជាឈរនៅពូលA ជាមួយក្រុមជម្រើសជាតិថៃ ម៉ាឡេស៊ី សិង្ហបុរី និងទីម័រខាងកើត ខណៈពូលB មានវៀតណាម ឥណ្ឌូនេស៊ី មីយ៉ាន់ម៉ា ហ្វីលីពីន និងឡាវ៕
