កីឡាករទាំង៥នាក់ ដែលបានឈ្នះខ្សែក្រវាត់ក្នុងការប្រកួតជើងឯកគុនខ្មែរអន្តរជាតិកម្ពុជា ក្រិក ឆ្នាំ២០២៤ ថតជាមួយថ្នាក់ដឹកននាំតំណាងឱ្យប្រទេសទាំង២។ រូបថត SengMoliny
ក្រុមប្រតិភូកីឡាប្រដាល់គុនខ្មែរ បានទទួលលទ្ធផលដ៏ត្រចះត្រចង់ សម្រាប់ការរៀបចំការប្រកួតជើងឯកគុនខ្មែរអន្តរជាតិកម្ពុជា ក្រិក ជាប្រវត្តិសាស្រ្តលើកដំបូង នៅទីក្រុង Heraklion កោះ Crete ប្រទេសក្រិក ដោយក្នុងនោះកីឡាករកម្ពុជា ធន់ រិទ្ធី, សន រ៉ាគីម, គឹម វាសនា និង ធន់ ស៊ីហុង សុទ្ធតែដណ្តើមបានខ្សែក្រវាត់រៀងៗខ្លួន ប៉ុន្តែជើងខ្លាំង លន បញ្ញា បែរជាលះបង់ខ្សែក្រវាត់របស់ខ្លួនឱ្យអ្នកផ្សេងទៅវិញ។
តាមរយៈការប្រកួត កាលពីយប់ថ្ងៃអាទិត្យ ម្សិលមិញនេះ កីឡាករវ័យក្មេង ធន់ ស៊ីហុង បានប្រើពេលតិចជាងគេ ដើម្បីដណ្តើមបានខ្សែក្រវាត់ ក្នុងប្រភេទទម្ងន់៥៧គីឡូក្រាម តាមរយៈការផ្តួលអ្នកប្រដាល់របស់ក្រិក Tahir Dervishi ឱ្យសន្លប់ នៅចុងទឹកទី១ បន្ទាប់ពីវ៉ៃឱ្យអាជ្ញាកណ្តាលរាប់ចំនួន២លើករួចមក។
ចំណែកកីឡាករ គឹម វាសនា បានម៉ាត់ចូលពោះពេញៗ បណ្តាលឱ្យអ្នកប្រដាល់របស់ម្ចាស់ផ្ទះ Vasilis Paraskevopoulos សន្លប់នៅចុងទឹកទី២ ដើម្បីក្លាយជាម្ចាស់ផ្ទះក្នុងទម្ងន់៧២គីឡូក្រាម រីឯ សន រ៉ាគីម ក៏បានវ៉ៃឱ្យកីឡាកររបស់ក្រិក Ention Mouchai សន្លប់នៅចុងទឹកទី២ផងដែរ ដើម្បីឈ្នះបានខ្សែក្រវាត់ ក្នុងទម្ងន់ ៦៣,៥គីឡូក្រាម ហើយអ្នកលេងកណ្តាប់ដៃ ធន់ រិទ្ធី ដណ្តើមបានខ្សែក្រវាត់ក្នុងទម្ងន់៧៥គីឡូក្រាម ក្រោយឈ្នះកីឡាករម្ចាស់ផ្ទះ Panagiotis Kousis ដោយពិន្ទុ។
ដោយឡែក ម្ចាស់មេដាយមាសស៊ីហ្គេម ឆ្នាំ២០២៣ លន បញ្ញា ក៏ត្រូវទទួលបានខ្សែក្រវាត់ ក្នុងប្រភេទទម្ងន់៦៦គីឡូក្រាមផងដែរ ខណៈដៃគូរបស់គេ Mario Gousho មានបញ្ហាសុខភាព មិនអាចឡើងប្រកួតបាននោះ ប៉ុន្តែ បញ្ញា មិនទទួលយកខ្សែក្រវាត់នេះទេ គឺរូបគេបានសម្រេចដាក់ខ្សែក្រវាត់នេះ ឱ្យគូផ្សេងប្រកួតដណ្តើមវិញ។
ជុំវិញរឿងនេះ លន បញ្ញា បាននិយាយថា៖ «ខ្សែក្រវាត់ហ្នឹងស្អាត ខ្ញុំចង់បាន ប៉ុន្តែបើយើងមិនបានប្រកួតផង តើយកមកធ្វើអី? វាគ្មានតម្លៃ ព្រោះខ្ញុំមកទីនេះ ដើម្បីប្រកួតបង្ហាញពីគុនខ្មែរ តែបែរជាមិនបានប្រកួត»។
ចំពោះការសម្រេចមិនយកខ្សែក្រវាត់របស់ លន បញ្ញា នេះ គណៈកម្មការរៀបចំការប្រកួត បានយកខ្សែក្រវាត់នេះ ដាក់ឱ្យកីឡាករ គង់ សំបូរ និងអ្នកប្រដាល់ក្រិក Petro Sacho ប្រកួតដណ្តើមគ្នា ហើយជាលទ្ធផល Petro បានយកឈ្នះ គង់ សំបូរ ដោយពិន្ទុ ដើម្បីទទួលបានខ្សែក្រវាត់មួយនេះយ៉ាងរំភើបបំផុត។
ការឈ្នះខ្សែក្រវាត់របស់កីឡាករ Petro Sacho បានធ្វើឱ្យការលះបង់ខ្សែក្រវាត់របស់ លន បញ្ញា ក្លាយជាការចង់ចាំដ៏ល្អបំផុតរបស់ម្ចាស់ផ្ទះក្រិក ព្រោះវាជាខ្សែក្រវាត់តែមួយគត់ ដែលកីឡាកររបស់ម្ចាស់ផ្ទះដណ្តើមបាន។
ចំណែកការប្រកួតមិត្តភាពដណ្តើមពានកិត្តិយសវិញ កីឡាករម្ចាស់ផ្ទះ Matin Latifi ត្រូវបានអ្នកប្រដាល់ចាស់វស្សារបស់កម្ពុជា ឡុង សុវណ្ណឌឿន ចាប់បុកជង្គង់រហូតអ្នកឱ្យទឹកបោះកន្សែងសុំចុះចាញ់នៅចុងទឹកទី២ តែកីឡាការិនី Fani Peloumpi បានយកឈ្នះ ធន់ ស្រីពេញ ដោយពិន្ទុ៕
