កីឡាកររបស់ជប៉ុន Taimu Hisai បានប្រើក្បាច់ពិសេសផ្តួល ឈុត សេរីវ៉ាន់ថង ឱ្យសន្លប់ក្នុងទឹកទី១ សម្រាប់ការប្រកួត Knockout X Kun Khmer នៅជប៉ុន កាលពីថ្ងៃទី៤ ខែសីហា ឆ្នាំ២០២៤។ រូបថត សហការី
គ្រូបង្វឹកដែលកំពុងមានប្រជាប្រិយខ្លាំង នៅក្នុងពិភពប្រដាល់គុនខ្មែរ លោក ពេជ្រ សុផាន់ បានអះអាងថា សិស្សសំណព្វរបស់លោក ពេជ្រ សម្បត្តិ ត្រូវតែពង្រឹងសមត្ថភាពខ្លួនឯងឱ្យបានខ្លាំងថែមទៀត ដើម្បីត្រៀមការប្រកួតម៉ារ៉ាតុងដណ្តើមខ្សែក្រវាត់ ជាប្រវត្តិសាស្រ្ត នៅសង្វៀន Knockout របស់ជប៉ុន ក្នុងព្រឹត្តិការណ៍ KO CLIMAX 2024 នាថ្ងៃទី៣០ ខែធ្នូ ខាងមុខនេះ។
ការដាក់ផែនការពង្រឹងសមត្ថភាពដល់ ពេជ្រ សម្បត្តិ នេះ គឺបន្ទាប់ពីលទ្ធផលចាប់ឆ្នោតនៃការប្រកួតម៉ារ៉ាតុងដណ្តើមខ្សែក្រវាត់ ក្នុងកម្មវិធី KO CLIMAX 2024 នេះ គឺ ពេជ្រ សម្បត្តិ ត្រូវជួបដៃគូចាស់ជាម្ចាស់ខ្សែក្រវាត់របស់ជប៉ុន Taimu Hisai ក្នុងវគ្គជម្រុះជុំទី១ ស្របពេលកីឡាករជប៉ុន Kanato Shomoji ត្រូវប៉ះអ្នកប្រដាល់ថៃ Lom Leesan Tiger Reon ហើយអ្នកឈ្នះ នៅក្នុងវគ្គជម្រុះនេះ ត្រូវឡើងទៅប្រកួតផ្តាច់ព្រ័ត្រ ដណ្តើមយកខ្សែក្រវាត់តែម្តង។
លោក ពេជ្រ សុផាន់ ដែលមើលកម្មវិធីចាប់ឆ្នោតនេះ តាមការផ្សាយផ្ទាល់ ចេញពីប្រទេសជប៉ុន កាលពីថ្ងៃទី២៧ ខែវិច្ឆិកា បានឱ្យដឹងថា លោកបានត្រៀមចិត្តត្រៀមកាយអស់ហើយ តាំងពីរបៀបថែសុខភាព និងរបៀបនៃការហ្វឹកហាត់ដល់ ពេជ្រ សម្បត្តិ ព្រោះនេះជាឱកាសលើកទី១ សម្រាប់ប្រដាល់គុនខ្មែរ ដែលបានចូលរួមប្រកួតម៉ារ៉ាតុងដណ្តើមខ្សែក្រវាត់ នៅប្រទេសជប៉ុន។
លោកបញ្ជាក់ថា៖ «ការប្រកួតនេះ ជាឱកាសលើកដំបូង ក្នុងពិភពប្រដាល់គុនខ្មែរ គឺយើងអត់ដែលមានប្រវត្តិសាស្រ្តទៅប្រកួតម៉ារ៉ាតុងដណ្តើមខ្សែក្រវាត់ ក្នុងព្រឹត្តិការណ៍ Knockout នៅប្រទេសជប៉ុនទេ អ៊ីចឹងខ្ញុំត្រូវបង្កើតការហ្វឹកហាត់ដល់ ពេជ្រ សម្បត្តិ ឱ្យបានពេញលក្ខណៈ ដើម្បីបង្កើតសមត្ថភាពរបស់គេឱ្យកើនទ្វេដង ត្រៀមការប្រកួតដ៏សំខាន់នេះ»។
គួររំឭកថា សម្រាប់ការជួបគ្នាជាលើកទី១ នៅក្នុងកម្មវិធី Ganzberg Kun Khmer របស់សង្វៀនថោន កាលពីថ្ងៃទី២៥ ខែមេសា ឆ្នាំ២០២៤ ពេជ្រ សម្បត្តិ បានយកឈ្នះលើកីឡាករវ័យ១៨ឆ្នាំ Taimu Hisai ដោយពិន្ទុទាំងលំបាក ព្រោះការប្រកួតត្រឹម៣ទឹកនោះ អ្នកទាំង២ បានវាយប្តូរគ្នាយ៉ាងស្វិតស្វាញបំផុត ប៉ុន្តែ សម្បត្តិ មានភាពធន់ជាង និងវាយចូលគោលដៅពេញៗល្អជាង ហើយការវាយកែងរបស់គេ ក៏បានធ្វើឱ្យ Taimu បែកចិញ្ចើមស្តាំ មានឈាមហូរស្រោចពីមុខ នៅទឹកទី៣ផងដែរ។
ជើងខ្លាំងជាម្ចាស់ខ្សែក្រវាត់របស់ជប៉ុន Taimu Hisai និង ពេជ្រ សម្បត្តិ ត្រូវជួបគ្នាម្តងទៀត ក្នុងការប្រកួតម៉ារ៉ាតុងដណ្តើមខ្សែក្រវាត់ នៅប្រទេសជប៉ុន នាថ្ងៃទី៣០ ខែធ្នូ ឆ្នាំ២០២៤។ រូបថត សហការី
យ៉ាងណាក៏ដោយ បន្ទាប់ពីបានសម្រក់ទឹកភ្នែក ព្រោះចាញ់ ពេជ្រ សម្បត្តិ នៅលើទឹកដីកម្ពុជា កាលពីខែមេសានោះ Taimu Hisai បានស្តាកិត្តិយសរបស់ខ្លួនឱ្យខ្ពស់ត្រដែតវិញ តាមរយៈការប្រើក្បាច់ពិសេសទាត់បកក្រោយដោយកែងជើង ចូលថ្គាមពេញ បណ្តាលឱ្យជើងខ្លាំងរបស់កម្ពុជា ឈុត សេរីវ៉ាន់ថង សន្លប់បាត់មាត់ឈឹង នៅចុងទឹកទី១ សម្រាប់ការជួបគ្នា ក្នុងកម្មវិធី Knockout X Kun Khmer ដែលធ្វើនៅប្រទេសជប៉ុន កាលពីថ្ងៃទី៤ ខែសីហា ឆ្នាំ២០២៤។
តែទោះបីជាយ៉ាងណា សម្រាប់ការម៉ារ៉ាតុងដណ្តើមខ្សែក្រវាត់ ក្នុងព្រឹត្តិការណ៍ KO CLIMAX 2024 នាថ្ងៃទី៣០ ខែធ្នូ ខាងមុខនេះ គឺម្ចាស់សង្វៀន Knockout របស់ជប៉ុន បានសម្រេចដាក់ឱ្យបេក្ខភាពទាំង៤នាក់ ប្រកួតគ្នា ដោយពាក់ហ្គង់ចេញម្រាម បែប MMA ដែលវាត្រូវនឹងជំនាញរបស់ ពេជ្យ សម្បត្តិ តែម្តង។
លោក ពេជ្រ សុផាន់ បានបញ្ជាក់ថា៖ «ការប្រកួតហ្គង់ចេញម្រាមនេះ វាស្របទៅនឹងសមត្ថភាពរបស់ ពេជ្រ សម្បត្តិ ព្រោះបច្ចុប្បន្ននេះ វាសឹងតែគ្មានកីឡាករខ្មែររូបណា ហ៊ានវ៉ៃហ្គង់ចេញម្រាមនេះជាមួយ សម្បត្តិ ទៅហើយ ចំណែកអ្នកគាំទ្រ និងកីឡាករនៅក្រៅប្រទេស ក៏ទទួលស្គាល់ពីសមត្ថភាពវ៉ៃហ្គង់ចេញម្រាមរបស់ ពេជ្រ សម្បត្តិ ដែរ គឺវាចំជំនាញរបស់យើងតែម្តង»។
ប៉ុន្តែលោកបានសង្កត់ធ្ងន់ថា៖ «បន្ថែមទៅលើអ្វីដែលមាននេះ យើងត្រូវពង្រឹងសមត្ថភាពរបស់យើងទៀត ដើម្បីឱ្យប្រាកដថា តើយើងអាចធ្វើបានល្អសម្រាប់កម្មវិធីនេះដែរឬអត់?។ យើងនឹងខំប្រឹងប្រែងធ្វើឱ្យអស់ពីសមត្ថភាព ដើម្បីជាកាដូមួយសម្រាប់ពុកម៉ែបងប្អូនជាអ្នកគាំទ្រខ្មែរយើង និងធ្វើឱ្យអ្នកនៅប្រទេសជប៉ុន ទទួលស្គាល់ថា ប្រដាល់គុនខ្មែរយើង មានសមត្ថភាពប៉ុនណា!»។
ចំណែក ពេជ្រ សម្បត្តិ ក៏បានអះអាងពីការត្រៀមចិត្តរួចរាល់ សម្រាប់ការប្រកួតនេះដូចគ្នា។ កីឡាករវ័យ២២ឆ្នាំរូបនេះ បាននិយាយថា៖ «ខ្ញុំសប្បាយចិត្ត ដែលបានជួបដៃគូចាស់ Taimu Hisai ម្តងទៀត ក្នុងការប្រកួតនៅ Knockout នាថ្ងៃទី៣០ ខែធ្នូ ខាងមុខនេះ ហើយការជួបគ្នាលើកនេះ អាចនឹងមានអ្វីប្លែកជាងលើកមុន»៕
