លោកបណ្ឌិត ព្រុំ វិរៈ ពេលថ្លែងទៅកាន់សិស្សនិស្សិត ដែលបានចូលរួមការប្រកួតពានរង្វាន់ CamEd Men’s & Women’s Basketball Tournament 2024 កាលពីថ្ងៃទី២ ខែវិច្ឆិកា។ រូបថត ឈន ណន
សាស្រ្តាចារ្យ ដែលបានបញ្ជាក់ការសិក្សាថ្នាក់បណ្ឌិតនៅប្រទេសជប៉ុន លោក ព្រុំ វិរៈ បានអះអាងថា ការលេងកីឡាជាផ្នែកមួយដ៏សំខាន់នៅក្នុងការសិក្សារបស់សិស្សនិស្សិត ហើយនៅប្រទេសជឿនលឿន សិស្សដែលត្រូវបានអនុញ្ញាតិឱ្យលេងកីឡានៅក្នុងសាលារៀន គឺលុះត្រាតែជាអ្នករៀនពូកែ។
លោកបណ្ឌិត ព្រុំ វិរៈ បាននិយាយបែបនេះ នៅក្នុងពិធីបើកការប្រកួតកីឡាបាល់បោះពានរង្វាន់ CamEd Men’s & Women’s Basketball Tournament 2024 នៅតារាង Platinum Sport Centre កាលពីថ្ងៃទី២ ខែវិច្ឆិកា ដោយព្រឹត្តិការណ៍រៀបចំដោយវិទ្យាស្ថានខេមអេដមួយនេះ មានក្រុមនិស្សិតចូលរួម១៩៣នាក់ ស្មើនឹង២៩ក្រុម គឺក្រុមបុរសមាន១៥ បែងចែកការប្រកួតជា៤ពូល និងក្រុមនារីមាន១៤ក្រុម ដោយបែងចែកការប្រកួតជា៤ពូលដូចគ្នា។
សាស្រ្តាចារ្យ ដែលបង្រៀនផ្នែកច្បាប់ពាណិជ្ជកម្ម នៅវិទ្យាស្ថានខេមអេស លោក ព្រុំ វិរៈ បានថ្លែងនៅចំពោះក្រុមនិស្សិតទាំង១៩៣នាក់បែបនេះថា៖ «កីឡាជាផ្នែកមួយនៃកិច្ចសិក្សារបស់អ្នករាល់គ្នា ហើយកាលគ្រូទៅរៀននៅបរទេស (ជប៉ុន) គឺសិស្សដែលចូលលេងកីឡាបាន លុះត្រាតែមិនមាននិទ្ទេស C នៅគ្រប់មុខវិជ្ជាសិក្សារបស់ខ្លួន គឺហ៊ានតែមានមុខវិជ្ជាណាមួយ បាននិទ្ទេស C អត់ឱ្យចូលកីឡាទេ»។
លោកបានបន្ថែមថា៖ «សិស្សដែលចូលលេងកីឡា លុះត្រាតែសិស្សនោះ បាននិទ្ទេសចាប់ពីBទៅ ហើយការធ្វើបែបនេះ គឺគេលើកទឹកចិត្តឱ្យសិស្ស ដែលចង់លេងកីឡា ត្រូវតែខំរៀន យ៉ាងហោចឱ្យបាន B នៅគ្រប់មុខវិជ្ជាដែរ»។
លោកបញ្ជាក់ថា៖ «ការនិយាយបែបនេះ មិនមែនមានន័យថា អ្នកបាននិទ្ទេស C ធ្លាក់ពីការសិក្សានោះទេ ប៉ុន្តែគេមិនចង់លើកទឹកចិត្ត ព្រោះគេគិតថា បើរៀនបានត្រឹម C ឬ D ហើយត្រូវចំណាយពេលទៅលេងកីឡាទៀត នឹងកាន់តែធ្លាក់ថែមទៀត អ៊ីចឹងហើយបានជានៅស្រុកគេ គេដាក់គោលការណ៍ហ្នឹង»។
យ៉ាងណាក៏ដោយ លោក ព្រុំ វិរៈ បានអះអាងថា ការកំណត់គោលការណ៍លេងកីឡារបស់សិស្សនិស្សិត តាមបែបប្រទេសជឿនលឿននេះ នៅមិនទាន់អាចយកមកអនុវត្តនៅវិទ្យាស្ថានខេមអេដ បានទេ។ ទោះបីជាវិទ្យាស្ថាននេះ មានភាពលេចធ្លោជាងគេ ក្នុងការរៀបចំព្រឹត្តិការណ៍កីឡាច្រើនប្រភេទ ឱ្យក្រុមនិស្សិតរបស់ខ្លួនបានប្រកួតប្រជែងគ្នាជាប្រចាំឆ្នាំ ប៉ុន្តែទិសដៅសំខាន់របស់ ខេមអេដ នាបច្ចុប្បន្ន គឺធ្វើយ៉ាងណាត្រូវកៀរគរក្រុមនិស្សិតចូលលេងកីឡាឱ្យបានកាន់តែច្រើន។
សកម្មភាពប្រកួតបើកឆាកពានរង្វាន់ CamEd Men’s & Women’s Basketball Tournament 2024 នៅតារាង Platinum Sport Centre កាលពីថ្ងៃសៅរ៍។ រូបថត ឈន ណន
ជាមួយគ្នានិស្សិតឆ្នាំទី២ ផ្នែកគណនី និងហិរញ្ញវត្ថុ នៅវិទ្យាស្ថានខេមអេដ ឈរ យូឈុង បានបង្ហាញភាពសប្បាយរីករាយ សម្រាប់ការទទួលបានឱកាសចូលរួមប្រកួតពានរង្វាន់ CamEd Women’s Basketball Tournament ជាលើកទី២ នៅឆ្នាំ២០២៤នេះ ដោយកញ្ញាមើលឃើញថា កាន់តែមានភាពផុសផុលខ្លាំង និងមានការប្រកួតប្រជែងកាន់តែតានតឹង។
កីឡាការិនី ដែលធ្លាប់លេងបាល់បោះតាំងពីរៀននៅវិទ្យាល័យ ឈរ យូឈុង បាននិយាយថា៖ «កីឡាបាល់បោះនេះ ជាក់ស្តែងខ្ញុំឈប់លេងម្តងហើយ ប៉ុន្តែដោយសារនៅវិទ្យាស្ថានខេមអេដ មានរៀបចំការប្រកួតជាប្រចាំឆ្នាំ ខ្ញុំក៏បានសម្រចចិត្តចូលលេងវិញ ហើយឃើញថា ខ្លួនឯងនៅតែចូលចិត្តបាល់បោះដដែល និងបានជួបមនុស្សថ្មីៗ ដែលមានចំណង់ចំណូលចិត្តដូចគ្នា និងមកពីសាលាជាមួយគ្នា»។
និស្សិតវ័យ១៩ឆ្នាំ យូឈុង បានបន្ថែមថា៖ «ការលេងកីឡានេះ ជាវេទិកាប្រកួតប្រជែងមួយ ដែលធ្វើឱ្យយើងទទួលបាននូវបទពិសោធន៍ និងអ្វីដែលថ្មីៗបន្ថែមទៀត ហើយកីឡាក៏ជាកន្លែង ដែលលាងជម្រះនូវភាពធុញថប់ និងតប់ប្រមល់ ធ្វើឱ្យអារម្មណ៍យើងស្រស់ថ្លាក្នុងការសិក្សារៀនសូត្រផងដែរ ហើយខ្ញុំឃើញថា នៅឆ្នាំនេះ មាននិស្សិតចូលរួមកាន់តែច្រើន ដោយសារខាងសាលា បានផ្តល់ទាំងសម្លៀកបំពាក់កីឡា គ្រូបង្វឹក និងការចំណាយគ្រប់បែបយ៉ាង សម្រាប់រៀបចំព្រឹត្តិការណ៍នេះ ធ្វើឱ្យក្រុមនិស្សិតមានភាពរីករាយក្នុងការចូលរួម»៕
