លោកអាជ្ញាកណ្តាលបានលើកដៃឱ្យកីឡាករ យ៉េន ឌីណា ឈ្នះពិន្ទុ ឡុង សំណាង ខណៈការសម្រេចនេះ បានទទួលរងការប្តឹងតវ៉ាពីភាគីកីឡាករ ឡុង សំណាង ផងដែរ។ រូបថត ទទក
ការប្រកួតកីឡាឃីកបុកស៊ីងក្នុងព្រឹត្តិការណ៍កីឡាជាតិលើកទី៤ និងកីឡាជនពិការលើកទី២ ឆ្នាំ២០២៤ នៅមជ្ឈមណ្ឌលកងយោធពលខេមរភូមិន្ទ (ស្តាតចាស់) បានបញ្ចប់ ដោយភាពចម្រូងចម្រាស និងបន្សល់ទុកនូវពាក្យបណ្តឹង ដែលបានតវ៉ាទៅលើលទ្ធផលនៃការប្រកួតផ្តាច់ព្រ័ត្រលើវិញ្ញាសា Full Contact ក្នុងប្រភេទទម្ងន់ ៦០គីឡូក្រាមរវាង យ៉េន ឌីណា និង ឡុង សំណាង។
តាមរយៈការប្រកួតផ្តាច់ព្រ័ត្រពេញ១ព្រឹកនាថ្ងៃអង្គារនេះ កីឡាករ កីឡាការិនីចំនួន១០នាក់ ត្រូវបានប្រកាសឱ្យឈ្នះ ដើម្បីក្លាយជាម្ចាស់មេដាយមាស ទៅតាមប្រភេទទម្ងន់ និងវិញ្ញាសារៀងៗខ្លួន ដោយក្នុងនោះកីឡាករ ជា ចំរើន បានឈ្នះមេដាយមាសលើវិញ្ញាសា Full Contact ទម្ងន់ ៤៨គីឡូក្រាម រីឯកីឡាការិនី ឆា ចាន់ដេង បានឈ្នះមេដាយមាសលើវិញ្ញាសា Full Contact ទម្ងន់៤៨គីឡូក្រាម។
ចំណែកកីឡាករ ពេជ្រ សិង្ហៈ បានឈ្នះមេដាយមាសលើវិញ្ញាសា Low Kick ក្នុងប្រភេទទម្ងន់ ៥១គីឡូក្រាម។ កីឡាករ ទាំ រមលី បានឈ្នះមេដាយមាសលើវិញ្ញាសា K1 ទម្ងន់ ៥៤គីឡូក្រាម ហើយកីឡាករ វ៉ន គឹមចេងបានលេខ១លើវិញ្ញាសា Full Contact ទម្ងន់ ៥៧គីឡូក្រាម។
ចំពោះកីឡាការិនី ធន់ ស្រីពេញ បានឈ្នះមេដាយមាសលើវិញ្ញាសា K1 ក្នុងប្រភេទទម្ងន់ ៥២គីឡូក្រាម រីឯកីឡាករ លី សុខា ឈ្នះមេដាយមាសលើវិញ្ញាសា Low Kick ទម្ងន់ ៦០គីឡូក្រាម។
កីឡាករ យ៉េន ឌីណា ឈ្នះមេដាយមាស លើវិញ្ញាសា Full Contact ទម្ងន់៦០គីឡូក្រាម ហើយកីឡាករ ឡុង សុភី បានឈ្នះមេដាយមាស លើវិញ្ញាសា Low Kick ទម្ងន់៧៥គីឡូក្រាម ខណៈកីឡាករ ស៊ន រ៉ាគីម បានឈ្នះមេដាយមាស លើវិញ្ញាសា K1 ទម្ងន់៦៣.៥គីឡូក្រាម។
តែទោះបីជាយ៉ាងណា សម្រាប់ការប្រកួតផ្តាច់ព្រ័ត្ររវាង យ៉េន ឌីណា និង ឡុង សំណាង បានបញ្ចប់ដោយភាពចម្រូងចម្រាស ព្រោះភាគី ឡុង សំណាង មិនព្រមទទួលយកលទ្ធផលនេះទេ គឺលោក ស្រ៊ឺ ស្រេង ហៅ សំណព្វ និងក្រុមការងារតំណាងមកពីក្រសួងមហាផ្ទៃ បានសរសេរលិខិតស្នាម ដាក់ពាក្យបណ្តឹងតវ៉ាភ្លាមៗ ដើម្បីឱ្យគណៈកម្មាធិការវិនិច្ឆ័យ និងអ្នកពាក់ព័ន្ធផ្សេងទៀត ពិនិត្យមើលទៅលើការប្រកួតនេះឡើងវិញ។
ការសម្រេចដាក់ពាក្យដណ្តឹងនេះ ក៏ព្រោះតែខាងក្រសួងមហាផ្ទៃ ធ្លាប់បានទទួលជោគជ័យម្តងហើយ ចំពោះការដាក់ពាក្យបណ្តឹងប្តឹងតវ៉ា លើការកាត់សេចក្តីការប្រកួតវគ្គពាក់កណ្តាលផ្តាច់ព្រ័ត្ររវាង ពេជ្រ ប៊ុនសិទ្ធ និង គោរមៈ ច័ន្ទរាជ ដោយដំបូងឡើយ ចៅក្រមបានសម្រេចឱ្យ ពេជ្រ ប៊ុនសិទ្ធ ជាអ្នកឈ្នះពិន្ទុ ក្រោយការប្រកួតចំនួន៣ទឹកបានបញ្ចប់។
ការប្រកួតរវាងកីឡាករ គោមរៈ ច័ន្ទរាជ (ក្រហម) និងកីឡាករ ឃន សុម៉ាលី ក្នុងវគ្គផ្តាច់ព្រ័ត្រ កាលពីព្រឹកថ្ងៃអង្គារ ទី៥ ខែវិច្ឆិកានេះ។ រូបថត ទទក
ប៉ុន្តែក្រោយការប្តឹងតវ៉ារបស់ក្រសួងមហាផ្ទៃ គណៈកម្មការរៀបចំការប្រកួត ក៏បានកែប្រែលទ្ធផល ដោយសម្រេចឱ្យកីឡាករ គោរមៈ ច័ន្ទរាជ ជាអ្នកឈ្នះពិន្ទុវិញ ដើម្បីបានឡើងទៅវគ្គផ្តាច់ព្រ័ត្រ ប៉ុន្តែតាមរយៈការប្រកួត កាលពីព្រឹកថ្ងៃអង្គារនេះ គោរមៈ ច័ន្ទរាជ បានត្រឹមមេដាយប្រាក់ក្រោយចាញ់កីឡាករ វ៉ន គឹមចេង (ឃន សុម៉ាលី) ដោយពិន្ទុ លើវិញ្ញាសា Full Contact ក្នុងប្រភេទទម្ងន់ ៥៧គីឡូក្រាម។
តែទោះបីជាយ៉ាងណា ចំពោះការប្តឹងតវ៉ាលទ្ធផលប្រកួតរវាង យ៉េន ឌីណា និង ឡុង សំណាង នេះវិញ ត្រូវបានលោក សំណព្វ ប្រាប់ភ្នំពេញប៉ុស្តិ៍ថា មិនទទួលបានផលអ្វីទេ ព្រោះគណៈកម្មការរៀបចំការប្រកួត និងគណៈកម្មាធិការវិនិច្ឆ័យ នៅតែរក្សាយកលទ្ធផលសម្រេចលើកមុន គឺឱ្យ យ៉េន ឌីណា របស់ក្រសួងការពារជាតិ ឈ្នះកីឡាករ ឡុង សំណាង របស់ក្រសួងមហាផ្ទៃដដែល។
ជាមួយសម្រេចនេះ បានជួយឱ្យក្រុមអត្តពលិករបស់ក្រសួងការពារជាតិ ដណ្តើមបានមេដាយមាសសរុបចំនួន៦ និងមេដាយសំរឹទ្ធ១ ដើម្បីឈរនៅចំណាត់ថ្នាក់លេខ១ សម្រាប់ការប្រកួតកីឡាឃុកបុកស៊ីងក្នុងព្រឹត្តិការណ៍កីឡាជាតិ លើកទី៤ ឆ្នាំ២០២៤នេះ រីឯក្រុមអត្តពលិកខេត្តស្វាយរៀង ឈរនៅលេខ២ ដោយបានមេដាយមាស២ ប្រាក់៣ សំរឹទ្ធ១ ហើយតាមពីក្រោយដោយខេត្តសៀមរាប ដែលឈ្នះបានមេដាយមាស១ ប្រាក់២ និងសំរឹទ្ធ៥។
ផ្ទុយពីនេះ ក្រុមក្រសួងមហាផ្ទៃ ដែលធ្លាប់តែមានភាពលេចធ្លោជាងគេ ក្នុងការប្រជែងយកមេដាយ សម្រាប់ការប្រកួតកន្លងមកនោះ ឈ្នះបានមេដាយមាសតែ១គត់ រួមទាំងមេដាយប្រាក់២ និងសំរឹទ្ធ៤ ហើយមេដាយមាស១នេះ ដណ្តើមបានដោយកីឡាករចាស់វស្សា ឡុង សុភី តាមរយៈការយកឈ្នះកីឡាករ សំណាង ចុងក្រោយ ដោយពិន្ទុទាំងវេទនា។
រូបថត ពីស្ថានីយទូរទស្សន៍ទទក
ចំណែកក្រុមអត្តពលិកមកពីខេត្តកណ្តាល ខេត្តបន្ទាយមានជ័យ និងខេត្តតាកែវ ដណ្តើមបានត្រឹមមេដាយប្រាក់ និងសំរឹទ្ធ ខណៈខេត្តមណ្ឌលគិរី ខេត្តកំពង់ធំ និងខេត្តកែប បានឈ្នះមេដាយសំរឹទ្ធចំនួន១ដូចគ្នា៕
