កីឡាការិនី កាំង មុយនីន ពេលឡើងទទួលមេដាយមាស នៅក្នុងការប្រកួតកីឡាហែលទឹកពាក់ជើងទាជ្រើសរើសជើងឯកអាស៊ីអាគ្នេយ៍ លើកទី១ ឆ្នាំ២០២៤។ រូបថត សហព័ន្ធ
ក្រុមកីឡាហែលទឹកពាក់ជើងទាកម្ពុជា ដណ្តើមបានជោគជ័យជាទីមោទនភាព នៅក្នុងការប្រកួតកីឡាហែលទឹកពាក់ជើងទាជ្រើសរើសជើងឯកអាស៊ីអាគ្នេយ៍ លើកទី១ ឆ្នាំ២០២៤ (CMAS 1ST SEA Finswimming Championship Indoor) ដែលត្រូវបានរៀបចំឡើងនៅលើទឹកដីកម្ពុជា ហើយបានបញ្ចប់ដោយរលូន កាលពីល្ងាចថ្ងៃអង្គារ។
តាមរយៈការប្រកួតប្រជែងចំនួន៥ថ្ងៃ នៅអាងហែលទឹកនៃពហុកីឡដ្ឋានជាតិអូឡាំពិក ក្រុមអត្តពលិកហែលទឹកពាក់ជើងទាកម្ពុជា បានបញ្ចប់ការប្រកួតប្រជែង នៅលើវិញ្ញាសាទាំង២៥ ដោយដណ្តើមបានមេដាយមាស២ ប្រាក់៧ និងសំរឹទ្ធ៦ ដោយឈរនៅចំណាត់ថ្នាក់លេខ២ ក្នុងចំណោមប្រទេសចូលរួមទាំង៧ សម្រាប់ការប្រកួតកីឡាហែលទឹកពាក់ជើងទាជើងឯកអាស៊ាន ជាលើកដំបូងនេះ។
ចំណែកក្រុមអត្តពលិករបស់វៀតណាម បានឈរនៅចំណាត់ថ្នាក់លេខ១ ដោយដណ្តើមបានមេដាយមាសរហូតដល់២១ រួមជាមួយមេដាយប្រាក់១៤ និងសំរឹទ្ធ៤ ហើយឥណ្ឌូនេស៊ី ឈរនៅលេខ៣ ដោយឈ្នះបានមេដាយមាស២ ប្រាក់៣ សំរឹទ្ធ២ តាមពីក្រោយដោយប្រទេសថៃ ដែលឈ្នះបានមេដាយប្រាក់១ និងសំរឹទ្ធ១០ ប៉ុន្តែក្រុមអត្តពលិករបស់ម៉ាឡេស៊ី ហ្វីលីពីន និងសិង្ហបុរី មិនដណ្តើមបានមេដាយ ពីការប្រកួតនេះទេ។
សម្រាប់ការធ្វើម្ចាស់ផ្ទះការប្រកួតកីឡាហែលទឹកពាក់ជើងទាជ្រើសរើសជើងឯកអាស៊ីអាគ្នេយ៍ លើកទី១នេះ លោក ហែម គីរី អគ្គលេខាធិការសហព័ន្ធខ្មែរកីឡាហែលទឹក បានអះអាងថា កម្ពុជា បានទទួលជោគជ័យទាំងលើការរៀបចំ និងការប្រកួតប្រជែងយកមេដាយ ហើយនេះជាជោគជ័យរួមគ្នារបស់កម្ពុជា ក្រោមការគាំទ្រយ៉ាងពេញទំហឹងរបស់លោកនាយករដ្ឋមន្រ្តី ហ៊ុន ម៉ាណែត និងលោក ស៊ុន ចាន់ថុល ប្រធានសហព័ន្ធខ្មែរកីឡាហែលទឹក ព្រមទាំងស្ថាប័នពាក់ព័ន្ធផ្សេងៗទៀត។
លោក ហែម គីរី ពេលឡើងបំពាក់មេដាយមាស ប្រាក់ និងសំរឹទ្ធ នៅក្នុងពិធីបិទការប្រកួតកីឡាហែលទឹកពាក់ជើងទាជើងឯកអាស៊ាន ឆ្នាំ២០២៤ កាលពីថ្ងៃអង្គារ។ រូបថត ឈន ណន
លោក ហែម គីរី បានប្រាប់ក្រោយការប្រកួតថា៖ «នេះជាជោគជ័យ សម្រាប់ប្រទេសកម្ពុជាទាំងមូល ព្រោះបើសិនជាយើង មិនមានគោលការណ៍អនុញ្ញាតពីរាជរដ្ឋាភិបាល ក៏យើងមិនអាចរៀបចំការប្រកួតនេះបានដូចគ្នា។ យើងមានការរៀបចំយ៉ាងច្បាស់លាស់ ក្រោមកិច្ចសហការជាមួយស្ថាប័នពាក់ព័ន្ធ ដោយបានផ្តល់នូវសុខសុវត្ថិភាព និងការទទួលបដិសណ្ឋារកិច្ចល្អ ធ្វើឱ្យប្រតិភូកីឡាចូលរួមទាំងអស់ បានកោតសរសើរដល់កម្ពុជាយើង»។
លោកបន្ថែមថា៖ «អ្វីដែលជាមោទនភាពខ្លាំងបំផុតនោះ គឺកម្ពុជា បានឈរនៅលំដាប់ថ្នាក់លេខ២ បន្ទាប់ពីវៀតណាម ដែលជាប្រទេសខ្លាំងលើប្រភេទកីឡា Finswimming នេះ ខណៈការធ្វើម្ចាស់ផ្ទះស៊ីហ្គេម ឆ្នាំ២០២៣ កម្ពុជាយើងឈរនៅលេខ៤ ក្រោមវៀតណាម ឥណ្ឌូនេស៊ី និងថៃ ដោយឈ្នះមេដាយមាស២ ប្រាក់១ និងសំរឹទ្ធ៤ មានន័យថា យើងបានរក្សាមេដាយមាស ហើយបានបង្កើនចំនួនមេដាយប្រាក់ និងសំរឹទ្ធ ដើម្បីឈរនៅលើឥណ្ឌូនេស៊ី និងថៃ វិញ គឺជាចំណុចល្អ ដែលយើងសប្បាយចិត្តក្នុងការទទួលយក»។
យ៉ាងណាក៏ដោយ លោក ហែម គីរី បានសង្កត់ធ្ងន់ថា ក្រុមអត្តពលិកហែលទឹកពាក់ជើងទាកម្ពុជា ត្រូវអភិវឌ្ឍខ្លួនឱ្យបានខ្លាំងថែមទៀត ក្នុងការប្រកួតប្រជែងជាមួយប្រទេសដែលខ្លាំងជាងកម្ពុជា ជាពិសេសប្រទេសវៀតណាម ដើម្បីឱ្យក្រុមកម្ពុជា អាចឈានទៅដល់កម្រិតនៃការដណ្តើមយកមេដាយមាស កាន់តែច្រើន សម្រាប់ការប្រកួតជាបន្តបន្ទាប់ទៀត។
ជាមួយការដាក់គោលដៅនេះ លោក ហែម គីរី មានការផ្តោតខ្លាំងទៅលើកីឡាការិនី ជាម្ចាស់មេដាយមាសស៊ីហ្គេម ឆ្នាំ២០២៣ កាំង មុយនីន ដែលដណ្តើមបានមេដាយមាស២ ប្រាក់៣ និងសំរឹទ្ធ១ ហើយត្រូវបានជ្រើសរើសជាកីឡាការិនីឆ្នើម ប្រចាំការប្រកួត SEA Finswimming Championship Indoor នេះ។
លោក គីរី បានបញ្ជាក់ថា៖ «តាមរយៈការប្រកួតនេះ កាំង មុយនីន ដណ្តើមបានមេដាយច្រើន និងពិន្ទុច្រើន អ៊ីចឹងហើយគណៈកម្មការរៀបចំការប្រកួត បានផ្តល់រង្វាន់លើកទឹកចិត្តជាកីឡាការិនីឆ្នើម រីឯរង្វាន់កីឡាករឆ្នើមបានទៅកីឡាករវៀតណាម Vu Dang Nhat Nam អ៊ីចឹងទៅថ្ងៃអនាគត យើងនឹងទទួលបានលទ្ធផលកាន់តែល្អជាងនេះ គឺយើងអាចធ្វើបាន ឱ្យតែយើងមានតាំងចិត្ត និងមានការរៀបចំច្បាស់លាស់»។
ការប្រកួតផ្តាច់ព្រ័ត្រផ្នែកបុរស ក្នុងព្រឹត្តិការណ៍ប្រកួតកីឡាហែលទឹកពាក់ជើងទាជើងឯកអាស៊ីអាគ្នេយ៍ ឆ្នាំ២០២៤ នៅអាងហែលទឹកនៃពហុកីឡដ្ឋានជាតិ កាលពីថ្ងៃទី៥ ខែវិច្ឆិកា។ រូបថត ឈន ណន
ចំណែកកីឡាការិនីម្ចាស់មេដាយមាស កាំង មុយនីន បានបង្ហាញភាពរីករាយ ដែលកញ្ញាដណ្តើមបានមេដាយច្រើន និងទទួលបានពានរង្វាន់ជាកីឡាការិនីឆ្នើម ប្រចាំព្រឹត្តិការណ៍ SEA Finswimming Championship Indoor នេះ ប៉ុន្តែ មុយនីន ធ្វើមិនសូវបានល្អប៉ុន្មានទេ ចំពោះការប្រកួតវិញ្ញាសា Bi-Fins ទាំងចម្ងាយ៤០០ម៉ែត្រ និង២០០ម៉ែត្រ ដែលនាងធ្លាប់ដណ្តើមបានមេដាយមាស នៅស៊ីហ្គេម លើកទី៣២ ឆ្នាំ២០២៣។
កាំង មុយនីន ដែលទើបទទួលបាននិទ្ទេស B ក្នងការប្រឡងជាប់បាក់ឌុប បាននិយាយថា៖«ចំពោះវិញ្ញាសា២០០ម៉ែត្រ និង៤០០ម៉ែត្រ ដែលខ្ញុំឈ្នះមេដាយមាស កាលស៊ីហ្គេម ឆ្នាំ២០២៣ មានការធ្លាក់ចុះ ដោយសារពេលចប់ស៊ីហ្គេម ខ្ញុំត្រូវចូលរៀនថ្នាក់ទី១២ ហើយទើបប្រឡងជាប់បាននិទ្ទេស B។ នេះជាមោទនភាពមួយចំពោះខ្ញុំផ្ទាល់ ដែលចុងក្រោយមេដាយក៏ដណ្តើមបាន និងនិទ្ទេសរៀនសូត្រក៏បានល្អទៀត គឺខ្ញុំសប្បាយចិត្តនឹងលទ្ធផលហ្នឹង»៕
