លោក ថោង ខុន ពេលចូលរួមបំពាក់មេដាយ នៅក្នុងពិធីបិទការប្រកួតកីឡាកាយសម្ព័ន្ធក្នុងព្រឹត្តិការណ៍កីឡាជាតិ លើកទី៤ ឆ្នាំ២០២៤ កាលពីល្ងាចថ្ងៃព្រហស្បតិ៍។ រូបថត ឈន ណន
លោកទេសរដ្ឋមន្រ្តី ថោង ខុន ប្រធានគណៈកម្មាធិការជាតិអូឡាំពិកកម្ពុជា (NOCC) និងជាប្រធានសហព័ន្ធកីឡាកាយសម្ព័ន្ធកម្ពុជា បានជំរុញឱ្យមន្រ្តីបច្ចេកទេសរបស់សហព័ន្ធនេះ និងអ្នកពាក់ព័ន្ធ ត្រូវចាប់ផ្តើមពង្រឹងសមត្ថភាពធនធានមនុស្សពីពេលនេះទៅ ដើម្បីត្រៀមការប្រកួតកីឡាយុវជនអាស៊ី លើកទី៥ ឆ្នាំ២០២៩ ដែលកម្ពុជា ត្រូវធ្វើជាម្ចាស់ផ្ទះលើកដំបូង។
បើទោះបីជាការប្រកួតយុវជនកម្រិតអាស៊ីនេះ នៅរយៈពេល៥ឆ្នាំទៀត ប៉ុន្តែលោក ថោង ថោង បានមើលឃើញថា ការបណ្តុះធនធានកីឡាករ កីឡាការិនី ធនធានមន្រ្តីបច្ចេកទេស និងគ្រូបង្វឹក គឺរឿងចាំបាច់ ដែលសហព័ន្ធកីឡាកាយសម្ព័ន្ធកម្ពុជា ត្រូវចាប់ផ្តើមអនុវត្តពីពេលនេះទៅ ដើម្បីធ្វើយ៉ាងណាឱ្យក្រុមនេះ អាចមានលទ្ធភាពកាន់តែច្រើន ក្នុងការទទួលបានជោគជ័យទាំងលើការរៀបចំ និងការដណ្តើមយកមេដាយជូនជាតិ។
លោក ថោង ខុន បានថ្លែងថា៖ «គិតចាប់ពីពេលនេះ រហូតដល់ឆ្នាំ២០២៩ យើងមានរយៈពេលតែ៥ឆ្នាំទៀតប៉ុណ្ណោះ ដើម្បីឱ្យវិស័យកីឡានៅកម្ពុជា កាន់តែមានការរីកចម្រើនទាំងបរិមាណជាមួយគុណភាព និងទទួលបានលទ្ធផលល្អ ក្នុងការចូលរួមការប្រកួតលើឆាកអន្តរជាតិ ជាពិសេសការត្រៀមលក្ខណៈឱ្យបានពេញលេញធ្វើជាម្ចាស់ផ្ទះ ការប្រកួតកីឡាយុវជនអាស៊ី លើកទី៥ ឆ្នាំ២០២៩»។
លោក ថោង ខុន បានលើកឡើងបែបនេះ នៅពេលលោកបានចូលរួមពិធីបិទការប្រកួតកីឡាកាយសម្ព័ន្ធក្នុងព្រឹត្តិការណ៍កីឡាជាតិ លើកទី៤ និងកីឡាជាតិជនពិការ លើកទី២ ឆ្នាំ២០២៤ នៅសាលដំបូលទូកនៃពហុកីឡដ្ឋានជាតិអូឡាំពិក កាលពីល្ងាចថ្ងៃព្រហស្បតិ៍ ដោយការប្រកួតនេះ មានមន្រ្តីបច្ចេកទេស៤២នាក់ កីឡាករ កីឡាការិនី៥៤នាក់ រួមជាមួយមន្រ្តីស្ម័គ្រចិត្តចំនួន១០នាក់។
តាមរយៈការប្រកួតប្រជែង នៅលើវិញ្ញាសាចំនួន១៣ ពីថ្ងៃទី៣ ដល់ទី៨ ខែវិច្ឆិកា គឺក្រុមអត្តពលិកក្រសួងមហាផ្ទៃ ឈរនៅចំណាត់ថ្នាក់លេខ១ ដោយឈ្នះបានមេដាយមាស៥ ប្រាក់៧ សំរឹទ្ធ១ រីឯក្រសួងការពារជាតិ ឈរនៅលេខ២ ដោយបានមេដាយមាស៣ ប្រាក់២ សំរឹទ្ធ៥ ហើយខេត្តកំពង់ឆ្នាំង ឈរនៅលេខ៣ ឈ្នះបានមេដាយមាស៣ ប្រាក់១ សំរឹទ្ធ៣ ចំណែកខេត្តក្រចេះ បានឈ្នះមេដាយមាស២ ប្រាក់៣ និងសំរឹទ្ធ៤ ឈរនៅលេខ៤ក្រោយគេ។
ការសម្តែងបង្ហាញសមត្ថភាពរបស់ក្រុមកីឡាការិនីកាយសម្ព័ន្ធកម្ពុជា ក្នុងពិធីបិទការប្រកួតកីឡាកាយសម្ព័ន្ធក្នុងព្រឹត្តិការណ៍កីឡាជាតិ លើកទី៤ នៅសាលដំបូលទូកនៃពហុកីឡដ្ឋានជាតិអូឡាំពិក។ រូបថត ឈន ណន
ជាមួយលទ្ធផលនេះ លោក ថោង ខុន បានចាប់អារម្មណ៍ខ្លាំងទៅលើកីឡាករ កីឡាការិនិវ័យក្មេង ដែលមានចំនួនច្រើនជាងអត្តពលិកពេញវ័យ ហើយពួកគេក៏មានសមត្ថភាពល្អ ហេតុនេះ លោកបានប្រាប់ទៅសហព័ន្ធ ឱ្យជំរុញអ្នកទាំងអស់នេះបន្ថែមទៀត ព្រមទាំងបណ្តុះបណ្តាលថ្នាក់ថ្នាល មានទេពកោសល្យបន្ថែម ដើម្បីត្រៀមការប្រកួតកីឡាយុជនអាស៊ី ឆ្នាំ២០២៩។
លោកបានផ្តល់ជាអនុសាសន៍បែបនេះថា៖ «សូមបណ្តុះបណ្តាលថ្នាក់ថ្នាលតាមកម្រិតអាយុ បង្កើនបរិមាណ និងគុណភាពកីឡាករ កីឡាការិនីតាមក្លិប សមាគមកីឡាកាយសម្ព័ន្ធឱ្យបានទូលំទូលាយ និងជ្រើសរើសកីឡាករ កីឡាការិនីមានទេពកោសល្យវ័យក្មេង ព្រមទាំងពង្រឹងសមត្ថភាពចៅក្រម មន្រ្តីបច្ចេកទេស គ្រូបង្វឹកឱ្យកាន់តែល្អប្រសើរ ទាំងបរិមាណ និងគុណភាពដូចគ្នា»។
បន្ថែមលើនេះ លោក ថោង ខុន ក៏បានជំរុញឱ្យមន្រ្តីបច្ចេកទេសក្រោមឱវាទ ក៏ដូចជាថ្នាក់ដឹកនាំតាមក្លិប សមាគមកីឡាកាយសម្ព័ន្ធ ត្រូវលើកទឹកចិត្តឱ្យអត្តពលិករបស់ខ្លួន ចូលរួមការប្រកួតឱ្យបានច្រើនទាំងក្នុងស្រុក និងនៅលើឆាកអន្តរជាតិ ជាពិសេសស៊ីហ្គេម ឆ្នាំ២០២៥ ដោយត្រូវហ្វឹកហាត់ឱ្យបានជាប្រចាំ ហើយក៏ត្រូវពង្រឹងរចនាសម្ព័ន្ធគ្រប់គ្រងឱ្យបានរឹងមាំផងដែរ តាមរយៈការស្វែងរកដៃគូអភិវឌ្ឍបន្ថែមទៀត។
ឆ្លើយតបទៅនឹងការផ្តល់ជាអនុសាសន៍របស់លោក ថោង ខុន នេះ លោក ណយ ផាណា អគ្គលេខាធិការសហព័ន្ធកីឡាកាយសម្ព័ន្ធកម្ពុជា បានអះអាងថា លោក និងក្រុមការងារបច្ចេកទេសទាំងអស់របស់សហព័ន្ធ នឹងប្រឹងប្រែងអនុវត្តការងារឱ្យបានកាន់តែល្អថែមទៀត ដើម្បីភាពរីកចម្រើននៃវិស័យកីឡាមួយនេះ ហើយបើធ្វើការប្រៀបធៀបជាលក្ខណៈបច្ចេកទេស ពីឆ្នាំ២០២២ ឆ្នាំ២០២៣ កន្លងមក គឺឆ្នាំនេះបានប្រសើរច្រើន ព្រោះការត្រៀមរៀបចំបានពេញលេញ។
លោកបញ្ជាក់ថា៖ «ក្រុមអត្តពលិកវ័យក្មេង ដែលក្លិប សមាគម បានបញ្ជូនមកប្រកួត មានសមត្ថភាពល្អ អ៊ីចឹងបើប្រៀបធៀបឆ្នាំមុន គឺនៅឆ្នាំនេះ ខ្ញុំអាចជ្រើសរើសអត្តពលិកថ្នាលបានច្រើន ហើយចំពោះអនុសាសន៍របស់ឯកឧត្តមបណ្ឌិត ថោង ខុន ដែលបានដាក់ចេញ គឺយើងធ្វើបានច្រើនដែរហើយ អ៊ីចឹងយើងត្រូវអនុវត្តបន្ថែមទៀត ដោយក្នុងនោះយើងជ្រើសរើសបានអត្តពលិកថ្នាលច្រើនដែរ ហេតុនេះចំពោះការងារបច្ចេកទេស គឺបានល្អប្រសើរច្រើនមែនទែន»៕
