សិក្ខាកាមទាំង២៥នាក់ បានថតរូបជុំគ្នាជាមួយថ្នាក់ដឹកនាំ និងគ្រូឧទ្ទេស ក្នុងពិធីបិទវគ្គ នៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីថ្ងៃចន្ទ។ រូបថត NOCC
សហព័ន្ធកីឡាវាយកូនឃ្លីលើតុកម្ពុជា ក្រោមការដឹកនាំរបស់លោក គៀត ច័ន្ទថារិទ្ធ ទើបតែបណ្តុះបណ្តាលបានគ្រូបង្វឹកកម្រិត១ចំនួន២៥នាក់ ដើម្បីរួមចំណែកអភិវឌ្ឍវិស័យកីឡានេះ តាមរយៈការបណ្តុះបណ្តាលធនធានកីឡាករកីឡាការិនីវ័យក្មេងឱ្យបានកាន់តែច្រើន ដើម្បីត្រៀមការប្រកួតកីឡាយុវជនអាស៊ី លើកទី៥ ឆ្នាំ២០២៩ ដែលកម្ពុជា ត្រូវធ្វើម្ចាស់ផ្ទះ ជាប្រវត្តិសាស្រ្តលើកដំបូង។
គ្រូបង្វឹកទាំង២៥នាក់នេះ គឺជាសិក្ខាកាម ដែលទើបបានបញ្ចប់វគ្គសាមគ្គីអូឡាំពិក ស្តីពី គ្រូបង្វឹកកីឡាវាយកូនឃ្លីលើតុកម្រិត១ ក្រោមការបង្ហាត់បង្ហាញពីគ្រូឧទ្ទេសមកពីសហព័ន្ធកីឡាវាយកូនឃ្លីលើតុអន្តរជាតិ (ITTF) ពីថ្ងៃទី២ ដល់ទី៩ ខែធ្នូ ហើយវគ្គនេះជាជំនួយឧបត្ថម្ភរបស់គម្រោងសាមគ្គីអូឡាំពិក ដើម្បីជំរុញឱ្យវិស័យកីឡាវាយកូនឃ្លីលើតុនៅកម្ពុជា កាន់តែមានការរីកចម្រើន។
ជាមួយគ្នានេះ លោក ប៊ុយ សុភ័ណ្ឌ ទីប្រឹក្សាប្រចាំការនៃគណៈកម្មាធិការជាតិអូឡាំពិកកម្ពុជា បានសម្តែងការកោតសរសើរ និងវាយតម្លៃខ្ពស់ ចំពោះការខិតខំយកចិត្តទុកដាក់របស់សិក្ខាកាមទាំង២៥នាក់ ក្នុងការស្រូបយកចំណេះដឹងថ្មីៗ ពីគ្រូឧទ្ទេសកម្រិតអន្តរជាតិរបស់ ITTF ពាក់ព័ន្ធនឹងគោលការណ៍គ្រឹះនៃការបង្វឹកកីឡាវាយកូនឃ្លីលើតុ ហើយលោកជឿថា វគ្គបណ្តុះបណ្តាលនេះ នឹងចូលរួមចំណែកយ៉ាងសំខាន់ក្នុងការអភិវឌ្ឍកីឡាវាយកូនឃ្លីលើតុនៅកម្ពុជា។
លោកបានបញ្ជាក់នៅក្នុងពិធីបិទវគ្គកាលពីថ្ងៃ៩ ខែធ្នូថា៖ «ខ្ញុំសង្ឃឹមថា សិក្ខាកាមទាំងអស់នឹងយកចំណេះដឹង និងបច្ចេកទេសថ្មីៗ ដែលបានសិក្សាទៅប្រើប្រាស់ ដើម្បីអភិវឌ្ឍធនធានអត្តពលិក ឈានឆ្ពោះទៅទទួលបានជោគជ័យ សម្រាប់ការប្រកួតកីឡាកម្រិតជាតិ និងអន្តរជាតិ ជាពិសេសការចូលរួមជាមួយសហព័ន្ធ ដើម្បីអភិវឌ្ឍធនធានអត្តពលិកយុវជនថ្នាល ត្រៀមការប្រកួតកីឡាយុវជនអាស៊ី ឆ្នាំ២០២៩ នៅកម្ពុជា»។
លោកបន្ថែមថា៖ «ក្នុងនាមខ្ញុំជាអតីតថ្នាក់ដឹកនាំសហព័ន្ធកីឡាវាយកូនឃ្លីលើតុកម្ពុជា ១រូប ខ្ញុំសូមសម្តែងនូវការកោតសរសើរចំពោះ ឯកឧត្តម សន្តិបណ្ឌិត គៀត ច័ន្ទថារិទ្ធ ជាប្រធានសហព័ន្ធ និងគណៈកម្មាធិការប្រតិបត្តិ ចំពោះការដឹកនាំប្រកបដោយភាពប៉ិនប្រសប់ និងឆន្ទៈខ្ពស់ ក្នុងការអភិវឌ្ឍកីឡាវាយកូនឃ្លីលើតុឱ្យក្លាយជាប្រភេទកីឡាដ៏មានសក្តានុពល និងប្រជាប្រិយភាពនៅកម្ពុជា»។
ចំណែកលោក Trevor James ជាគ្រូឧទ្ទេសអន្តរជាតិរបស់ ITTF បានឱ្យដឹងថា មេរៀនដែលបានសិក្សាក្នុងវគ្គនេះ រួមមាន ការបង្វឹកកម្រិតដំបូង និងតាមសាលារៀន, មគ្គុទ្ទេសក៍ជំនួយអំពីការសង្គ្រោះបឋមកម្រិតស្រាល, សកម្មភាពសប្បាយៗសម្រាប់បង្ហាត់កីឡាវាយកូនឃ្លីលើតុ, ដំណាក់កាលមូលដ្ឋាន និងកម្រិតខ្ពស់, បច្ចេកទេសចេញសេវា, មូលដ្ឋានគ្រឹះនៃការបម្លាស់ទី, បច្ចេកទេសបោះបាល់ច្រើន, ប្រវត្តិ និងច្បាប់កីឡាវាយកូនឃ្លីលើតុសម្រាប់ប៉ារ៉ា, ការអប់រំកាយកម្រិតមូលដ្ឋាន, ការរៀបចំផ្លូវចិត្តជាមូលដ្ឋាន/ដំណើរការចិត្តសាស្ត្រកីឡា, ការចាត់ថ្នាក់កីឡាវាយកូនឃ្លីលើតុសម្រាប់ប៉ារ៉ា, ការរៀបចំ និងគ្រប់គ្រងការប្រកួត។
ជាលទ្ធផលក្រោយបញ្ចប់ការសិក្សា លោក Trevor James បានបញ្ជាក់ថា៖ «សរុបសិក្ខាកាម ដែលជាប់មានចំនួន២៣នាក់ ក្នុងចំណោម២៥នាក់ ស្មើនឹង៩២ភាគរយ ដែលជាចំនួនដ៏ល្អសម្រាប់វគ្គសិក្សានេះ ប៉ុន្តែតួរលេខមិនអាចបង្ហាញពីរឿងរ៉ាវបានពេញលេញនោះទេ គឺជារួមបុគ្គលម្នាក់ៗ សុទ្ធតែមានគុណភាពខ្ពស់»។
ជាមួយគ្នានេះ លោក Trevor James មានភាពស្ញប់ស្ញែង និងកោតសរសើរចំពោះអាកប្បកិរិយារបស់សិក្ខាកាមកីឡាវាយកូនឃ្លីលើតុរបស់កម្ពុជាទាំងអស់ ដែលចង់រៀនបន្ថែម នៅវគ្គក្រោយៗទៀត ដើម្បីពង្រឹងសមត្ថភាពរបស់ខ្លួនឱ្យកាន់តែប្រសើរ និងមានមូលដ្ឋានគ្រឹះក្នុងការបង្វឹកដល់កីឡាករ កីឡាការិនីជំនាន់ក្រោយកាន់តែច្បាស់ ក្នុងដំណើរទៅបង្កើតបានធនធានអត្តពលិកឆ្នើមជំនាន់ក្រោយ សម្រាប់ប្រកួតតំណាងឱ្យជាតិ នៅលើឆាកអន្តរជាតិ។
លោក Trevor James បានបញ្ជាក់នៅចំពោះមុខសិក្ខាកាមទាំងអស់បែបនេះថា៖ «អ្នកនឹងទទួលបានការជំរុញទឹកចិត្តពីអត្តពលិករបស់អ្នក នៅពេលអ្នកបន្តបោះជំហានទៅមុខក្នុងបទពិសោធន៍បង្វឹករបស់អ្នក។ ប្រសិនបើអ្នកបន្តខិតខំប្រឹងប្រែង នោះខ្ញុំប្រាកដថា អ្នកនឹងរកឃើញ អត្ថប្រយោជន៍ និងរង្វាន់ពីការមើលឃើញអត្តពលិករបស់ខ្លួន មានភាពរីកចម្រើនរហូតឈានដល់កម្រិតប្រកួតប្រជែង ទោះលទ្ធផលចុងក្រោយទៅជាបែបណា!»៕
