ទិដ្ឋភាពអ្នកចូលរួមរត់ប្រណាំងម៉ារ៉ាតុងអន្ដរជាតិ ឥណ្ឌូចិន នៅអង្គរវត្ត ខេត្តសៀមរាប កាលពីព្រឹកថ្ងៃអាទិត្យ។ រូបថត NOCC
ព្រឹត្តិការណ៍រត់ប្រណាំងម៉ារ៉ាតុងអន្ដរជាតិ ឥណ្ឌូចិន នៅអង្គរវត្ត (Angkor Wat Indochine Marathon) ដែលត្រូវបានធ្វើឡើងកាលពីព្រឹកថ្ងៃទី២២ ខែធ្នូនេះ គឺបានដំណើរទៅយ៉ាងរលូន និងបានបញ្ចប់ដោយជោគជ័យ ហើយមានអ្នកចូលរួមច្រើនជាងការរំពឹងទុក បើទោះបីជាព្រឹត្តិការប្រកួតនេះ ត្រូវបានសម្រេចរៀបចំភ្លាមៗ ជាលើកដំបូង នៅក្នុងប្រទេសកម្ពុជា។
លោក សែម ផល្លា នាយកបច្ចេកទេសព្រឹត្តិការណ៍ម៉ារ៉ាតុង អមគណៈកម្មាធិការជាតិអូឡាំពិកកម្ពុជា (NOCC) បានដាក់ក្តីរំពឹងថា ព្រឹត្តិការណ៍រត់ប្រណាំងម៉ារ៉ាតុងអន្ដរជាតិឥណ្ឌូចិន នៅអង្គរវត្តនេះ មិនអាចមានអ្នកចូលរួមរត់ដល់៤ពាន់នាក់ទេ ដោយសារមានរយៈពេលរៀបចំមិនដល់៣សប្តាហ៍ផង។
ប៉ុន្តែជាក់ស្តែង ព្រឹត្តិការណ៍រត់ប្រណាំងម៉ារ៉ាតុងអន្ដរជាតិ ឥណ្ឌូចិន នៅអង្គរវត្ត កាលពីព្រឹកថ្ងៃអាទិត្យនោះ គឺមានអត្តពលិកជាតិ-អន្ដរជាតិកម្រិតជំនាញ និងស្ម័គ្រចិត្ត ចូលរួមសរុប៥ ៣២៧ នាក់ មកពី១៤ប្រទេស ដែលជាសមាជិករបស់សហព័ន្ធកីឡាអត្តពលកម្មអាស៊ី ហើយអត្តពលិកមកពីប្រទេសវៀតណាម ជប៉ុន និងឡាវ មានចំនួនច្រើនជាងគេ។
ក្នុងនាមជាប្រធាន NOCC លោកទេសរដ្ឋមន្រ្តី ថោង ខុន បានសម្ដែងការស្វាគមន៍យ៉ាងកក់ក្ដៅ ចំពោះអត្តពលិកជាតិ-អន្តរជាតិទាំងអស់ ដែលបានមកកាន់អង្គរវត្ត ជាបេតិកភណ្ឌពិភពលោកនៃព្រះរាជាណាចក្រអច្ឆរិយៈ ក្នុងព្រឹត្តិការណ៍រត់ប្រណាំងម៉ារ៉ាតុងអន្តរជាតិឥណ្ឌូចិននេះ ដែលបានរួមចំណែកជួយផ្សព្វផ្សាយ និងលើកកម្ពស់ដល់វិស័យទេសចរណ៍នៅកម្ពុជា ជាពិសេសជំរុញការអភិវឌ្ឍសមត្ថភាពដល់អត្តពលិកជំនាញ។
លោក ថោង ខុន បានបញ្ជាក់ថា៖ «ព្រឹត្តិការណ៍រត់ប្រណាំងម៉ារ៉ាតុងអន្តរជាតិឥណ្ឌូចិន ឆ្នាំ២០២៤នេះ ជាការប្រកួតកីឡាកម្រិតជំនាញ ដែលរៀបចំឡើងនៅប្រទេសចំនួន៣ រួមមានកម្ពុជា ឡាវ និងវៀតណាម ដើម្បីផ្តល់ឱកាសដល់អត្តពលិកម៉ារ៉ាតុងកម្រិតជំនាញនៅជុំវិញពិភពលោកធ្វើការអភិវឌ្ឍគុណវុឌ្ឍិ និងឧត្តមភាពរបស់ខ្លួន»។
ចំណែកលោក វ៉ាត់ ចំរើន អគ្គលេខាធិការ NOCC បានលម្អិតបន្ថែមថា អត្តពលិកដែលបានចូលរួមរត់ប្រណាំងម៉ារ៉ាតុងអន្តរជាតិឥណ្ឌូចិននេះ គឺភាគច្រើនជាកីឡាករ កីឡាការិនីអាជីព ហើយអត្តពលិកជម្រើសជាតិកម្ពុជា ក៏បានចូលរួមព្រឹត្តិការណ៍នេះដូចគ្នា ដើម្បីទទួលបានបទពិសោធន៍ថ្មីៗបន្ថែមទៀត ក្នុងការពង្រឹងបច្ចេកទេស និងជំនាញរបស់ខ្លួនឱ្យបានកាន់តែប្រសើរ ត្រៀមការប្រកួតអន្តរជាតិ ជាពិសេសការប្រកួតស៊ីហ្គេម លើកទី៣៣ នៅប្រទេសថៃ នាចុងឆ្នាំ២០២៥។
លោកបញ្ជាក់ថា៖ «នេះជាការប្រកួតកម្រិតជំនាញ ដើម្បីស្វែងរកឧត្តមភាពបច្ចេកទេស ដោយមានការត្រួតពិនិត្យ និងវាយតម្លៃពីសហព័ន្ធកីឡាអត្តពលកម្មអាស៊ី អ៊ីចឹងយើងយកចំណាត់ថ្នាក់ការប្រកួតនេះ ទៅវាស់វែងបច្ចេកទេស ហើយរៀបចំការហ្វឹកហាត់របស់ខ្លួន ដើម្បីត្រៀមចូលរួមការការប្រកួតអន្តរជាតិផ្សេងៗទៀត»។
ជាមួយគ្នានេះ លោក វ៉ាត់ ចំរើន បានបន្ថែមថា មន្រ្តីបច្ចេកទេសរបស់សហព័ន្ធកីឡាអត្តពលកម្មវៀតណាម ឡាវ និងមន្រ្តីជំនាញរបស់សហព័ន្ធកីឡាអត្តពលកម្មអាស៊ី បានសម្តែងការសាទរចំពោះម្ចាស់ផ្ទះកម្ពុជា ដែលរៀបចំព្រឹត្តិការណ៍រត់ប្រណាំងម៉ារ៉ាតុងអន្តរជាតិឥណ្ឌូចិននេះ បានល្អ ធ្វើឱ្យអ្នកចូលរួមមានភាពសប្បាយរីករាយ ហើយចង់មកលេងនៅតំបន់អង្គរម្តងទៀត។
លោកបញ្ជាក់ថា៖ «ភ្ញៀវទាំងអស់ ក៏ដូចជាក្រុមអត្តពលិករបស់ប្រទេសនីមួយៗ ដែលបានចូលរួមក្នុងព្រឹត្តិការណ៍នេះ គឺពួកគាត់បានវាយតម្លៃខ្ពស់ទៅលើការរៀបចំរបស់យើង ថា ដំណើរការទៅបានល្អ មានសុវត្ថិភាព និងសណ្តាប់ធ្នាប់ល្អ ហើយបរិយាកាសដ៏ស្រស់ស្អាតនៅតំបន់អង្គរ ធ្វើឱ្យមានការទាក់ទាញ និងចាប់អារម្មណ៍ដល់អ្នកចូលរួម នាំឱ្យពួកគាត់មានភាពសប្បាយរីករាយខ្លាំង»៕
