ក្រុមជម្រើសជាតិនារីកម្ពុជា បានអបអរសាទរ សម្រាប់ការដណ្តើមបានឱកាសឡើងទៅកាន់ការប្រកួតវគ្គផ្តាច់ព្រ័ត្រពាន AFF Women's Cup ជាប្រវត្តិសាស្ត្រលើកដំបូង។ រូបថត FFC
ក្រុមជម្រើសជាតិនារីកម្ពុជា បានរួមគ្នាបង្កើតប្រវត្តិសាស្រ្តថ្មីមួយទៀត តាមរយៈការដណ្តើមបានឱកាសឡើងទៅកាន់វគ្គផ្តាច់ព្រ័ត្រ ក្នុងការប្រកួតពានរង្វាន់ជើងឯកនារីអាស៊ាន ឆ្នាំ២០២៤ (AFF Women’s Cup) ជាលើកដំបូង ដែលធ្វើឱ្យគ្រប់គ្នា មានការភ្ញាក់ផ្អើល និងកោតសរសើរខ្លាំង ចំពោះការប្រឹងប្រែងរបស់ក្រុមមួយនេះ។
ការបង្កើតប្រវត្តិសាស្រ្តថ្មីនេះ គឺបន្ទាប់ពីក្រុមជម្រើសជាតិនារីកម្ពុជា បានយកឈ្នះលើក្រុមជម្រើសជាតិនារីទីម័រខាងកើត ដោយលទ្ធផល ៣-០ ក្នុងការប្រកួតវគ្គពាក់កណ្តាលផ្តាច់ព្រ័ត្រ នៅពហុកីឡដ្ឋាន New Laos National Stadium ប្រទេសឡាវ កាលពីល្ងាចថ្ងៃចន្ទ ហើយគ្រាប់បាល់ទាំង៣នេះ រកបានដោយកីឡាការិនី សឿន វិផា និង ពឿន គន្ធា មកពីក្លិបបាល់ទាត់ភ្នំពេញក្រោន។
តាមរយៈការប្រកួតនោះ ខ្សែប្រយុទ្ធ សឿន វិផា ជាអ្នករកបានគ្រាប់បាល់ទី១ឱ្យក្រុមជម្រើសជាតិកម្ពុជា តាមរយៈការស៊ុតបាល់ពិន័យ១១ម៉ែត្រ បានសម្រេចនៅនាទីទី៣៦ ហើយការទទួលបានបាល់ពិន័យនេះ ដោយសារខ្សែការពាររបស់ទីម័រខាងកើត បានចាប់ទាញ វិផា ឱ្យដួល ក្នុងពេលដែលកីឡាការិនីរបស់កម្ពុជារូបនេះ បានព្យាយាមអូសបាល់ចូលតំបន់គ្រោះថ្នាក់ពីការបញ្ជូនបាល់ខ្លីរបស់ ហេង សុវណ្ណមុនី។
បន្ថែមលើគ្រាប់បាល់នាំមុខ ១-០ នេះ ខ្សែប្រយុទ្ធមកពីក្លិបភ្នំពេញក្រោន ពឿន គន្ធា ដែលដាក់ឱ្យចូលលេងនៅក្នុងតង់ទី២ បានធ្វើឱ្យគ្រប់គ្នាកាន់តែមានការភ្ញាក់ផ្អើល ពីការរកបាន២គ្រាប់តែម្នាក់ឯងរបស់នាង ដោយគ្រាប់បាល់ដំបូង ជាការទាត់បាល់ធ្លាក់មិនទាន់ដល់ដីបញ្ចូលទី ពីការលើកទម្លាក់ចូលក្នុងតំបន់គ្រោះថ្នាក់របស់ ហុក សៅឌី នៅនាទៅទីទី៧៣ ហើយ១គ្រាប់ទៀត ជាការស៊ុតបាល់ចេញពីជ្រុងគំនូសសខាងឆ្វេង បញ្ចូលទីបានយ៉ាងល្អបំផុត នៅនាទីទី៩០។
ការរកបាន២គ្រាប់បន្ថែមរបស់ ពឿន គន្ធា បានផ្តល់នូវជោគជ័យយ៉ាងធំធេងបំផុតដល់ក្រុមជម្រើសជាតិនារីកម្ពុជា លើក្រុមជម្រើសជាតិនារីទីម័រខាងកើត ដើម្បីឡើងទៅកាន់វគ្គផ្តាច់ព្រ័ត្រ ជាលើកដំបូង ហើយ គន្ធា ក៏កំពុងឈរលើគន្លងអាចឈ្នះបានស្បែកជើងមាសផងដែរ ព្រោះគិតត្រឹមពេលនេះ គន្ធា រកបាន៣គ្រាប់ច្រើនជាងគេ ហើយតាមពីក្រោយដោយកីឡាការិនីរបស់ឥណ្ឌូនេស៊ី Claudia Scheunemann ដែលរកបាន២គ្រាប់។
សម្រាប់ការដណ្តើមបានឱកាសឡើងទៅកាន់វគ្គផ្តាច់ព្រ័ត្រនេះ បានធ្វើឱ្យគ្រប់គ្នា នៅក្នុងវិស័យបាល់ទាត់ និងអ្នកគាំទ្រ មានការភ្ញាក់ផ្អើល និងកោតសរសើរខ្លាំង ពីការធ្វើបានយ៉ាងល្អរបស់ក្រុមជម្រើសជាតិនារីកម្ពុជា ហើយសហព័ន្ធកីឡាបាល់ទាត់កម្ពុជា បានចាត់ទុកជ័យជម្នះនេះថា ជាការបង្កើតប្រវត្តិសាស្រ្តថ្មី សម្រាប់ក្រុមបាល់ទាតិនារីកម្ពុជា។
ខ្សែប្រយុទ្ធ ពឿន គន្ធា ក្នុងពេលប្រកួតជាមួយក្រុមជម្រើសជាតិនារីទីម័រខាងកើត ដោយម្ចាស់អាវលេខ១៩រូបនេះ រកបាន២គ្រាប់តែម្នាក់ឯង ដើម្បីជួយឱ្យក្រុមនារីកម្ពុជា ឈ្នះ ៣-០។ រូប FFC
សហព័ន្ធកីឡាបាល់ទាត់កម្ពុជា បានបង្ហោះសារ លើផេចហ្វេសប៊ុកផ្លូវការរបស់ខ្លួនបែបនេះថា៖ «អបអរសាទរ ក្រុមជម្រើសជាតិនារីកម្ពុជា បានឡើងទៅកាន់ “វគ្គផ្ដាច់ព្រ័ត្រ” ជាលើកដំបូងក្នុងប្រវត្តិសាស្រ្តក្នុងការប្រកួតពានរង្វាន់ AFF Women’s Cup 2024»។
ចំណែកអតីតខ្សែប្រយុទ្ធដ៏ឆ្នើមរបស់ក្រុមជម្រើសជាតិកម្ពុជា ឃួន ឡាបូរ៉ាវី ដែលត្រូវបានតែងតាំងជាគ្រូបង្គោលក្រុមជម្រើសជាតិនារីកម្ពុជា សម្រាប់ការប្រកួតពាន AFF Women’s Cup 2024នេះ បានសម្តែងការរីករាយខ្លាំង ចំពោះការដឹកនាំក្រុមនារីកម្ពុជា ឡើងទៅដល់វគ្គផ្តាច់ព្រ័ត្រនេះ។
ការប្រកួតវគ្គពាក់កណ្តាលផ្តាច់ព្រ័ត្រ រវាងក្រុមជម្រើសជាតិនារីកម្ពុជា និងក្រុមជម្រើសជាតិនារីទីម័រខាងកើត នៅប្រទេសឡាវ កាលពីថ្ងៃចន្ទ។ រូបថត FFC
«អរគុណដល់កីឡាការិនីឆ្នើមទាំងអស់របស់ខ្ញុំ និងបុគ្គលិកបង្វឹករបស់ខ្ញុំ! យើងរួមគ្នាធ្វើឱ្យរឿងនេះកើតឡើង»។ នេះជាការបង្ហោះសារយ៉ាងខ្លីរបស់គ្រូបង្វឹក ឃួន ឡាបូរ៉ាវី ហើយលោកក៏បានបង្ហាញពីមហិច្ឆតា ក្នុងការដឹកនាំក្រុមនារីកម្ពុជា ឱ្យឈ្នះពាន AFF Women’s Cup 2024 នេះផងដែរ។
គួរបញ្ជាក់ថា ក្រុមជម្រើសជាតិនារីកម្ពុជា នឹងប្រកួតផ្តាច់ព្រ័ត្រជាមួយក្រុមជម្រើសជាតិនារីឥណ្ឌូនេស៊ី ដែលបានយកឈ្នះក្រុមជម្រើសជាតិនារីសិង្ហបុរី នៅវគ្គពាក់កណ្តាលផ្តាច់ព្រ័ត្រ ដោយលទ្ធផល ៣-០ ដូចគ្នា ហើយជំនួបនេះ នឹងធ្វើនៅ National Stadium KM16 នាម៉ោង ៧:៣០យប់ ថ្ងៃទី៥ ខែធ្នូនេះ ខណៈការជួបគ្នា នៅវគ្គជម្រុះក្នុងពូល ក្រុមនារីកម្ពុជា និងក្រុមនារីឥណ្ឌូនេស៊ី បានស្មើគ្នា ០-០។ រីឯក្រុមនារីទីម័រខាងកើត និងក្រុមនារីសិង្ហបុរី ក៏ត្រូវប្រកួតគ្នាដណ្តើមយកលេខ៣ នាថ្ងៃព្រហស្បតិ៍នោះផងដែរ៕
