លោក Austin Koledoye (ឆ្វេង) លោក គួច វរ្ម័ន ពេលចុះហត្ថលេខាកិច្ចព្រមព្រៀងលើការអភិវឌ្ឍកីឡាបាល់បោះយុវជន កាលពីថ្ងៃទី៣០ ខែវិច្ឆិកា។ រូបថត ឈន ណន
សហព័ន្ធកីឡាបាល់បោះកម្ពុជា បានឈានដល់ការចុះហត្ថលេខាលើកិច្ចព្រមព្រៀងលើការអភិវឌ្ឍកីឡាបាល់បោះយុវជន ជាមួយក្រុមហ៊ុន CSSR FUTURE NOW ដោយផ្តោតសំខាន់ទៅលើការបង្កើតឱ្យមានស្តង់ដាលីគយុវជន ដើម្បីពង្រឹងធនធានថ្នាល ឱ្យក្លាយទៅជាកីឡាករកីឡាការិនីពោរពេញដោយសមត្ថភាព ដើម្បីលេងតំណាងឱ្យជាតិ នៅលើឆាកអន្តរជាតិ។
បើទោះបីជាក្រុមជម្រើសជាតិបាល់បោះកម្ពុជា ទើបតែបានបង្កើតប្រវត្តិសាស្រ្តថ្មី ក្នុងការប្រកួតស៊ីហ្គេម លើកទី៣២ ឆ្នាំ២០២៣ នៅលើទឹកដីខ្លួនឯង ដោយដណ្តើមបានមេដាយមាស១ និងប្រាក់១ ជាលើកដំបូង ប៉ុន្តែការចាប់ដៃជាមួយ CSSR FUTURE NOW ដើម្បីរៀបចំឱ្យមានការប្រកួតលីគបាល់បោះយុវជនក្នុងរយៈពេលវែងនេះ វាជារឿងដ៏សំខាន់មួយទៀត ដើម្បីបណ្តុះបានថ្នាក់ថ្នាលមានគុណភាព សម្រាប់បន្តវេនក្នុងក្រុមជម្រើសជាតិ។
លោកស្រី កែវ មនោរម្យ ជានាយិកាវិទ្យាស្ថានជាតិអប់រំកាយ និងកីឡា និងជាសមាជិកប្រតិបត្តិសហព័ន្ធកីឡាបាល់បោះកម្ពុជា បានថ្លែងក្នុងពិធីចុះហត្ថលេខា នៅមជ្ឈមណ្ឌលជាតិហ្វឹកហ្វឺនកីឡា កាលពីថ្ងៃទី៣០ ខែវិច្ឆិកាថា ក្នុងភាពជាដៃគូនេះ ក្រុមហ៊ុន CSSR FUTURE NOW នឹងរៀបចំដំណើរការប្រកួត High School League ក្នុងគោលបំណងបំផុសឱ្យយុវជនចូលរួមគាំទ្រ និងលេងកីឡាបាល់បោះកាន់តែច្រើន។
លោកស្រីបញ្ជាក់ថា៖ «តាមរយៈកិច្ចព្រមព្រៀងគ្នានេះ យើងនឹងរួមគ្នារៀបចំផែនការប្រកួតលីគបាល់បោះឈុត U15 និងU19 ទាំងបុរស និងនារីរបស់ប្រទេសកម្ពុជា ឱ្យមានដំណើរការដោយរលូន ហើយនេះជាឱកាសដ៏ល្អក្នុងការបោះជំហានទៅពង្រឹងសមត្ថភាពយុវជនថ្នាលឱ្យមានភាពរឹងមាំ សម្រាប់បន្តវេនក្នុងក្រុមជម្រើសជាតិ អ៊ីចឹងវាជាផ្លែផ្កាដ៏ធំមួយសម្រាប់វិស័យកីឡាបាល់បោះកម្ពុជាតទៅថ្ងៃអនាគត»។
តាងនាមឱ្យ លោក ស៊ាន បូរ៉ាត់ ជាប្រធានសហព័ន្ធកីឡាបាល់បោះកម្ពុជា លោកស្រី កែវ មនោរម្យ ក៏បានកោតសរសើរ និងវាយតម្លៃខ្ពស់ ចំពោះក្រុមហ៊ុន CSSR FUTURE NOW ដែលមានឆន្ទៈខ្ពស់ និងឧបត្ថម្ភគាំទ្រដល់ការផលិតធនធានថ្នាលយុវជនឱ្យកាន់តែរីកចម្រើន ខណៈកម្ពុជាកំពុងត្រៀមខ្លួនឆ្ពោះទៅទទួលរៀបចំធ្វើម្ចាស់ផ្ទះ ការប្រកួតកីឡាយុវជនអាស៊ី លើកទី៥ ឆ្នាំ២០២៩ ដែលជាប្រវត្តិសាស្រ្តថ្មីមួយទៀតរបស់កម្ពុជា។
ជាមួយគ្នានេះ លោក អូស្ទីន កូលេដយ (Austin Koledoye) អគ្គលេខាធិការសហព័ន្ធកីឡាបាល់បោះកម្ពុជា បានអះអាងថា កិច្ចសហការជាមួយដៃគូអភិវឌ្ឍលើកមុនៗ គឺផ្តោតតែលើការអភិវឌ្ឍក្រុមឈុតធំប៉ុណ្ណោះ ប៉ុន្តែការចាប់ដៃជាមួយក្រុមហ៊ុន CSSR FUTURE NOW ពេលនេះខុសពីមុន ដោយផ្តោតសំខាន់ទៅលើការអភិវឌ្ឍថ្នាលយុវជន ដែលយកលំនាំតាមសហព័ន្ធកីឡាបាល់ទាត់កម្ពុជា។
សន្និសីទសារព័ត៌មាន និងពិធីចុះហត្ថលេខាលើកិច្ចព្រមព្រៀង ស្តីពីការអភិវឌ្ឍកីឡាបាល់បោះយុវជន រវាងសហព័ន្ធកីឡាបាល់បោះកម្ពុជា ជាមួយក្រុមហ៊ុន CSSR FUTURE NOW។ រូបថត ឈន ណន
លោកបញ្ជាក់ថា៖ «កិច្ចសហការថ្មី ដោយផ្តោតសំខាន់ទៅលើការរៀបចំការប្រកួតលីគយុវជននេះ នឹងជួយជំរុញឱ្យសហព័ន្ធរបស់យើង រៀបចំផែនការកាន់តែច្បាស់លាស់ក្នុងការអភិវឌ្ឍយុវជនថ្នាលក្នុងរយៈពេល៤ឆ្នាំ ក្នុងការជ្រើសរើសបានធនធានល្អៗចូលជម្រើសជាតិ ដើម្បីឱ្យក្រុមបាល់បោះកម្ពុជា មានលទ្ធភាពប្រកួតប្រជែងពានរង្វាន់នៅក្នុងតំបន់ និងលើឆាកអន្តរជាតិបន្ថែមទៀត»។
ចំណែកលោក គួច វរ្ម័ន ជា CEO របស់ក្រុមហ៊ុន CSSR FUTURE NOW បានឱ្យដឹងថា ការចុះកិច្ចព្រមព្រៀងជាមួយសហព័ន្ធកីឡាបាល់បោះកម្ពុជានេះ ដោយសារប្អូនប្រុសទាំង២នាក់របស់លោក ដែលកំពុងប្រកបអាជីពបាល់បោះនៅក្រៅប្រទេស ចង់នាំយកបទពិសោធន៍ពីក្រៅប្រទេស មកចែករំលែកនៅកម្ពុជា ហើយលោកផ្ទាល់ ក៏ចង់ផ្តល់ឱកាសដល់យុវជន យុវនារី ដែលជាសិស្សានុសិស្សចូលរួមលេងកីឡាបាល់បោះឱ្យបានកាន់តែច្រើន ព្រមទាំងលើកទឹកចិត្តដល់អត្តពលិកវ័យក្មេង ខំហ្វឹកហាត់ថែមទៀត ដើម្បីឈានឆ្ពោះទៅចូលរួមក្នុងក្រុមជម្រើសជាតិកម្ពុជា នាថ្ងៃអនាគត។
លោកបញ្ជាក់ថា៖ «ខ្ញុំបានខិតខំរយៈពេល២ឆ្នាំជាមួយលោក Austin ដើម្បីរៀបចំដំណើរការឱ្យមានស្តង់ដាលីគយុវជនបាល់បោះកម្ពុជា ឱ្យមានភាពយូរអង្វែង។ ភាពយូរអង្វែងនេះ នឹងផលិតបាននូវធនធានអត្តពលិកមានគុណភាព ដើម្បីចូលប្រកួតតំណាងឱ្យជាតិ ហើយវាពិតជាមានមោទនភាព ក្នុងនាមយើងជាកូនខ្មែរ នៅពេលឃើញក្រុមកម្ពុជា ទទួលបានជោគជ័យ សម្រាប់ការប្រកួតនៅលើឆាកអន្តរជាតិ»៕
