លោក Mark Jackson (ឆ្វេង) បានចាប់ដៃស្វាគមន៍លោក Oleg Starynskyi នៅក្នុងសន្និសីទកាសែត កាលពីថ្ងៃចន្ទ។ រូបថត ភ្នំពេញក្រោន
ភ្នំពេញ៖ ការប្រកួតវគ្គពាក់កណ្តាលផ្តាច់ព្រ័ត្រពានរង្វាន់ AFC Cup រវាងក្រុមភ្នំពេញក្រោនរបស់កម្ពុជា និងក្រុម Central Coast Mariners របស់ម្ចាស់ផ្ទះអូស្រ្តាលី នឹងត្រូវធ្វើឡើងនៅរសៀលម៉ោង ៤ (ម៉ោងនៅកម្ពុជា) ថ្ងៃអង្គារនេះ ចំណែកក្រុម Sabah របស់ម៉ាឡេស៊ី ក៏ត្រូវប្រឈមជាមួយក្រុម Macarthur FC របស់អូស្រ្តាលី នារសៀលថ្ងៃនេះដូចគ្នា ដើម្បីរកក្រុមឈ្នះឡើងទៅជួបគ្នា នៅវគ្គផ្តាច់ព្រ័ត្រ។
នៅក្នុងការប្រកួតដ៏សំខាន់នេះ ក្រុមភ្នំពេញក្រោន ត្រូវបានគេមើលឃើញថា អាចមានការលំបាកច្រើន ក្នុងការប្រជែងជាមួយក្រុម Central Coast Mariners ព្រោះពួកគេ បានធ្វើដំណើរវែងឆ្ងាយទៅកាន់ទឹកដីអូស្រ្តាលី ដែលមានអាកាសធាតុខុសប្លែកពីកម្ពុជា ហើយពួកគេ មានពេលត្រឹម ២ថ្ងៃគត់ ដើម្បីហ្វឹកសមនៅលើទឹកដីអ្នកមានមួយនេះ បន្ទាប់ពីភ្នំពេញក្រោន បានធ្វើដំណើរទៅដល់កាលពីថ្ងៃសៅរ៍។
លោក Oleg Starynskyi គ្រូបង្គោលក្រុមភ្នំពេញក្រោន បាននិយាយក្នុងសន្និសីទកាសែត នៅអូស្រ្តាលី កាលពីថ្ងៃចន្ទថា៖ «យើងបានចំណាយពេលវេលា និងកម្លាំងច្រើនដែរសម្រាប់ការមកដល់ទីនេះ ប៉ុន្តែយើងក៏មានភាពរំភើបដូចគ្នា។ ការប៉ះគ្នាជាមួយ Central Coast Mariners នឹងមានភាពតានតឹងជាមួយនឹងការប្រកួតប្រជែងខ្ពស់ ព្រោះប្រកួតតែ ១ជើង ក្នុងការយកក្រុមឈ្នះឡើងទៅវគ្គបន្ត ខណៈក្រុមអូស្រ្តាលីនេះជាក្រុមមួយដែលលេចធ្លោបើយើងប្រៀបធៀបជាមួយក្រុមផ្សេងៗទៀត»។
យ៉ាងណាក៏ដោយ លោក Oleg Starynskyi នៅតែមានទំនុកចិត្តទៅលើកូនក្រុមរបស់ខ្លួនថា នឹងអាចធ្វើបានល្អ ព្រោះនៅក្នុងការប្រកួតបាល់ទាត់ ឈ្នះចាញ់ មើលមិនឃើញទេ គឺលុះត្រាតែចប់៩០នាទីទើបដឹងច្បាស់។ លោក Oleg បានបញ្ជាក់ថា៖ «នៅក្នុងបាល់ទាត់អ្វីៗក៏អាចកើតឡើងបានដែរហើយយើងសង្ឃឹមថាយើងនឹងអាចធ្វើវាបាន ព្រោះគ្រប់គ្នាដែលមកទីនេះ បានត្រៀមខ្លួនរួចជាស្រេចដើម្បីការប្រកួត»។
ជាមួយគ្នានោះដែរ ខ្សែបម្រើជាប្រធានក្រុម អ៊នចាន់ប៉ូលីន បាននិយាយថា៖«ខ្ញុំរីករាយណាស់សម្រាប់ការប្រកួតនៅថ្ងៃស្អែក (ថ្ងៃអង្គារនេះ)ដោយយើងនឹងប្រឹងប្រែងឱ្យអស់ពីសមត្ថភាព។ យើងមកទីនេះជាមួយក្តីរំពឹងទុកហើយយើងក៏សង្ឃឹមថា នឹងឈ្នះការប្រកួតនេះដូចគ្នា»។
តែទោះបីជាយ៉ាងណា ការរំលេចចេញនូវក្តីសង្ឃឹមស្តួចស្តើងរបស់ក្រុមភ្នំពេញក្រោន វាកំពុងត្រូវបានកាត់ផ្តាច់ ដោយមហិច្ឆតារបស់គ្រូបង្វឹកក្រុម Central Coast Mariners លោកMark Jackson ដោយបុរសម្នាក់នេះ បានបង្ហាញភាពជឿជាក់ខ្លាំងក្នុងការយកឈ្នះក្រុមភ្នំពេញក្រោន ដោយបានអះអាងថា ក្រុមរបស់លោក បានត្រៀមខ្លួនរួចហើយ ក្នុងការទប់ស្កាត់ការរកគ្រាប់បាល់របស់ភ្នំពេញក្រោន។
លោក Mark Jackson បាននិយាយថា៖ «យើងរំភើបក្នុងការប្រកួត! យើងមានការប្រកួតនៅវគ្គចែកពូល ដែលវាមិនងាយស្រួលមួយចំនួន ប៉ុន្តែយើងនៅតែអាចធ្វើវាបានមកដល់វគ្គនេះ។ ចំពោះជំនួបលើកនេះ វានឹងក្លាយជាការប្រកួតដ៏ពិបាក ព្រោះក្រុមដែលមកដល់វគ្គនេះគឺសុទ្ធតែមានការប្រកួតប្រជែងខ្ពស់ ហើយភ្នំពេញក្រោន មានកីឡាករគ្រោះថ្នាក់មួយចំនួន គឺខ្សែប្រយុទ្ធល្អ ដែលអាចរកគ្រាប់បាល់បាន។ យើងដឹងពីភាពគ្រោះថ្នាក់ដែលក្រុមនេះអាចនាំមក ប៉ុន្តែយើងត្រៀមរួចរាល់ ដើម្បីទប់ទល់រឿងនេះហើយ»៕
