លោក អាំង សិរីពិសិដ្ឋ ពេលថ្លែង នៅក្នុងសន្និសីទកាសែត ស្តីពីការប្រកួតកីឡាបាល់ទះ ៤x៤ ទូទាំងប្រទេស កាលពីថ្ងៃទី២០ ខែកុម្ភៈ។ រូប សហការី
ភ្នំពេញ៖ មន្រ្តីជំនាញសហព័ន្ធកីឡាបាល់ទះកម្ពុជា លោក អាំង សិរិពិសិដ្ឋ បានអះអាងថា សកម្មភាពលេងបាល់ទះខុសបច្ចេកទេស ខុសស្តង់ដា ឬលេងក្រៅប្រព័ន្ធ នៅតាមទីសាធារណៈក្នុងប្រទេសកម្ពុជា ដែលមានការផ្សាយផ្ទាល់តាមបណ្តាញសង្គមយ៉ាងសន្ធឹកសន្ធាប់មួយរយៈពេលចុងក្រោយនេះ វាមិនបានផ្តល់ផលចំណេញដល់សង្គមជាតិរបស់យើងសូម្បីបន្តិចសោះ គឺមានតែបំផ្លាញ។
អគ្គលេខាធិការសហព័ន្ធកីឡាបាល់ទះកម្ពុជា លោក អាំង សិរីពិសិដ្ឋ បានឱ្យដឹងថា ការលេងបាល់ទះក្រៅប្រព័ន្ធ ដែលឃើញមានលើកបាល់ (ប៉ាស់សេ)ស្អិតជាប់ដៃ និងការលោតចាប់បាល់បោកខុសបច្ចេកទេស បានក្លាយជាទម្លាប់មិនល្អដល់ក្មេងៗជំនាន់ក្រោយ ហើយសហព័ន្ធកីឡាបាល់ទះអាស៊ីអាគ្នេយ៍ ក៏មានការបារម្ភទៅលើបញ្ហានេះដែរ អ៊ីចឹងក្នុងនាមយើងជាសាមីសហព័ន្ធផ្ទាល់ ពិតជាមានអារម្មណ៍ខ្មាសគេណាស់។
លោកបានបញ្ជាក់ថា៖ «ខ្ញុំមានអារម្មណ៍ខ្មាសគេណាស់ ក្នុងនាមជាសមាជិកសហព័ន្ធកីឡាបាល់ទះអាស៊ីអាគ្នេយ៍ ព្រោះគេបានបង្ហាញកង្វល់ទៅលើបញ្ហានេះ ដោយគេបានសួរមកខ្ញុំថា នេះជារបៀបលេងបាល់នៅកម្ពុជាឬ? ហើយខ្ញុំបានឆ្លើយតបបែបលេងសើចថា ស្រុកខ្ញុំមានការលេងបាល់ទះប្លែកៗបែបនេះ តែនេះគ្រាន់តែជាការលេងបែបបាយឆ្ងាញ់ប៉ុណ្ណោះ។ ប៉ុន្តែធាតុពិតនៃការលេងខុសស្តង់ដានេះ វាមិនបានផ្តល់ចំណេញមកដល់សង្គមជាតិយើងសូម្បីបន្តិច មានតែបំផ្លាញ!»។
លោកបានបន្ថែមថា៖ «បើលេងត្រឹមបាយឆ្ងាញ់មិនសូវជាអ្វីប៉ុន្មានទេ ប៉ុន្តែនេះមានការភ្នាល់លុយ ហើយមានការផ្សាយផ្ទាល់ ដោយដាក់ចំណងជើងសុទ្ធថា ជាគូលំដាប់ប្រទេសទៅទៀត តែតាមពិតជាការលេងបែបបាតប្រទេសទៅវិញទេ អ៊ីចឹងការលេងរបៀបនេះ វាបានក្លាយជាទម្លាប់មិនល្អសម្រាប់ក្មេងៗជំនាន់ក្រោយ ព្រោះនៅពេលគាត់ចាប់ផ្តើមរៀនលេងបាល់ទះ គឺគាត់លេងតាមបែបគ្មានស្តង់ដាហ្នឹង ហេតុនេះនៅពេលសហព័ន្ធ ចង់ជ្រើសរើសកីឡាករទាំងអស់នោះ ជាយុវជនបន្តវេនក៏អត់កើតដែរ»។
ការបង្ហាញពីផលប៉ះពាល់ ចំពោះការលេងបាល់ទះខុសស្តង់ដានេះ គឺលោក អាំង សិរីពិសិដ្ឋ បានលើកឡើង នៅក្នុងសន្និសីទកាសែត ស្តីពីការប្រកួតកីឡាបាល់ទះ ៤x៤ ទូទាំងប្រទេស (Wurkz Special Volleyball 4x4 Cup 2024) នៅផ្សារទំនើបជីបម៉ុងមេហ្គាម៉ល កាលពីថ្ងៃទី ២០ ខែកុម្ភៈ ហើយលោក សិរីពិសិដ្ឋ និងលោក លាង ម៉េង សហស្ថាបនិក និងជាប្រធានក្រុមអគ្គនាយកក្រុមហ៊ុន ខ្មែរ ប៊ែវើរីជីស បានអះអាងថា ការបង្កើតឱ្យមានព្រឹត្តិការណ៍នេះឡើងគឺដើម្បីកែប្រែទម្លាប់ការលេងបាល់ទះខុសស្តង់ដា នៅតាមភូមិដ្ឋាន គ្រប់រាជធានី-ខេត្ត ឱ្យងាកមកលេងតាមស្តង់ដាវិញ។
លោក អាំង សិរីពិសិដ្ឋ បានថ្លែងថា៖ «ខ្ញុំបានហាមក្រុមជម្រើសជាតិទាំងអស់ មិនឱ្យលេងបាល់ខុសស្តង់ដាទេ ព្រោះខ្ញុំបានជជែកជាមួយអ្នកឧកញ៉ា លាង ម៉េង រួចហើយថា ការបង្កើតឱ្យមានទម្រង់លេង ៤x៤ នេះគឺយើងត្រូវលេងតាមស្តង់ដា ដោយយើងចង់លុបបំបាត់ការលេងបាល់ខុសបច្ចេកទេសដោយសារសហព័ន្ធ ចង់ស្វែងរកអ្នកដែលមានកាយសម្បទាល្អនិងមានសមត្ថភាព យកមកច្នៃ ដើម្បីអាចក្លាយជាកីឡាករបន្តវេន និងលេងតំណាងឱ្យប្រទេសជាតិយើងបាន»។
ចំណែកលោក លាង ម៉េង បានថ្លែងថា៖ «ការបង្កើតព្រឹត្តិការណ៍នេះ គឺយើងចង់ឱ្យមនុស្សនៅគ្រប់ខេត្ត ក្រុង បានដឹងថា ពួកគាត់មានឱកាស និងក្តីសង្ឃឹម ក្នុងការក្លាយជាកីឡាករទៅតាមមហិច្ឆតារបស់ខ្លួន ព្រោះខ្ញុំជឿជាក់ថា សហព័ន្ធ ពិតជាត្រូវការធនធានល្អៗ ដើម្បីបន្តវេនក្នុងក្រុមជម្រើសជាតិ អ៊ីចឹងខ្ញុំនឹងត្រូវធ្វើដំណើរវែងឆ្ងាយជាមួយសហព័ន្ធដើម្បីធ្វើការងារនេះ គឺធ្វើយ៉ាងណារកឱ្យបានធនធានមានសមត្ថភាព និងទេពកោសល្យ នៅតាមភូមិដ្ឋាន យកមកបណ្តុះបណ្តាលសម្រាប់បន្តវេន ដើម្បីធ្វើឱ្យវិស័យបាល់ទះរបស់យើង កាន់តែរីកចម្រើនទៅមុខទៀត»។
សម្រាប់ការប្រកួតកីឡាបាល់ទះ ៤x៤ ទូទាំងប្រទេស ប្រចាំឆ្នាំ ២០២៤ នេះ គឺមានការប្រកួតជម្រុះនៅតាមភូមិភាគធំៗចំនួន ៥ ដោយផ្តើមចេញពី ភូមិភាគខេត្តបាត់ដំបងមុនគេ ចាប់ពីថ្ងៃទី ២៤ ដល់ ២៥ ខែកុម្ភៈ រួចបន្តទៅភូមិភាគខេត្តសៀមរាប ថ្ងៃទី ២-៣ ខែមីនា រីឯភូមិភាគខេត្តកំពង់ចាម ចាប់ប្រកួតពីថ្ងៃទី ៩ ដល់ទី ១០ ខែមីនា ហើយភូមិភាគខេត្តព្រៃវែង ថ្ងៃទី ១៦-១៧ ខែមីនា ចំណែកភូមិភាគខេត្តព្រះសីហនុ ក៏ត្រូវប្រកួតជម្រុះ ២ ថ្ងៃដូចគ្នា គឺពីថ្ងៃទី ២៣ ដល់ថ្ងៃទី ២៤ ខែមីនា។
ចំពោះភូមិភាគទាំង ៥ នេះ មានក្រុមចុះឈ្មោះចូលរួមប្រកួតសរុបចំនួន ៤២ ក្រុម ចំណែកភូមិភាគខេត្តបាត់ដំបង ដែលត្រូវប្រកួតមុនគេ មាន ១០ ក្រុមបានចូលរួម ហើយបានចាប់ឆ្នោតរួចរាល់ក្នុងសន្និសីទកាសែត កាលពីថ្ងៃអង្គារ។ រីឯលក្ខខណ្ឌប្រកួតវិញ គឺក្រុមទទួលបានលេខ ១ និងលេខ ២ នៅតាមភូមិភាគទាំង ៥ នឹងទទួលបានឱកាសឡើងមកប្រកួតជុំផ្តាច់ព្រ័ត្រ នៅរាជធានីភ្នំពេញ ជាមួយក្រុមលេខ ១ ដល់លេខ ៦ នៃការប្រកួត «តេជោលីគ» ដែលទើបបានបញ្ចប់ កាលពីថ្ងៃទី ១៨ ខែកុម្ភៈ ហើយវគ្គផ្តាច់ព្រ័ត្រនេះ គ្រោងនឹងរៀបចំពីថ្ងៃទី ២២ ដល់ថ្ងៃទី ២៨ ខែមេសា៕
