ក្រុមកីឡាទូកក្តោងកម្ពុជា បានឈ្នះមេដាយប្រាក់១ និងសំរឹទ្ធ១ ពីការប្រកួត នៅប្រទេសសិង្ហបុរី។
ភ្នំពេញ៖ ក្រុមកីឡាទូកក្តោងកម្ពុជា បានរកឃើញជ័យជម្នះយ៉ាងសំខាន់មួយទៀត គឺការដណ្តើមបានមេដាយប្រាក់ ១ និងសំរឹទ្ធ ១ ពីការប្រកួតកីឡាទូកក្តោងជ្រើសរើសជើងឯកប្រទេសសិង្ហបុរី លើកទី៤៣ និងការប្រកួតកីឡាទូកក្តោងប្រភេទ Techno ជ្រើសរើសជើងឯកទ្វីបអាស៊ី ឆ្នាំ២០២៤ (43rd Singapore Open Windsurfing & Foiling Championship And Techno Asian Championship 2024)។
សម្រាប់ការប្រកួត ដែលធ្វើនៅប្រទេសសិង្ហបុរីចាប់ពីថ្ងៃទី ២២ ដល់ថ្ងៃទី ២៥ ខែកុម្ភៈ ឆ្នាំ ២០២៤ នេះ សហព័ន្ធកីឡាទូកក្តោងកម្ពុជា បានបញ្ជូនក្រុមអត្តពលិករបស់ខ្លួនចំនួន ៨ នាក់ឱ្យទៅចូលរួម ហើយទទួលបានលទ្ធផលល្អប្រសើរជាទីមោទនៈ ដោយក្នុងនោះកីឡាករ សែម ប្រុសពៅ ទទួលបានមេដាយប្រាក់និងកីឡាករ កែវ ភារុណ បានមេដាយសំរឹទ្ធលើវិញ្ញាសា Windsurfing Techno 293 Plus Open ចំណែកពិធីបំពាក់មេដាយបានរៀបចំឡើងនៅមជ្ឈមណ្ឌលជាតិហ្វឹកហ្វឺនកីឡាទូកក្តោងសិង្ហបុរី។
លោកនាយករដ្ឋមន្រ្តី ហ៊ុន ម៉ាណែត និងលោក ហ៊ុន សែន ជាឪពុក សុទ្ធតែបានចូលរួមអបអរចំពោះជ័យជម្នះរបស់ក្រុមទូកក្តោងកម្ពុជានេះ ដោយថ្នាក់ដឹកនាំទាំង២ បានបង្ហោះសារនៅលើផេចហ្វេសប៊ុកផ្លូវការថា៖ «អបអរសាទរ កីឡាករទូកក្តោងកម្ពុជា សែម ប្រុសពៅ ដែលបានឈ្នះមេដាយប្រាក់និង កែវ ភារុណ ទទួលបានមេដាយសំរឹទ្ធក្នុងព្រឹត្តិការណ៍ប្រកួតកីឡាទូកក្តោងជ្រើសរើសជើងឯកប្រទេសសិង្ហបុរីលើកទី៤៣ និងការប្រកួតកីឡាទូកក្តោងប្រភេទ Techno ជ្រើសរើសជើងឯកទ្វីបអាស៊ីឆ្នាំ ២០២៤ លើវិញ្ញាសា Windsurfing Techno 293 Plus Openនៅប្រទេសសិង្ហបុរី»។
ចំពោះការដណ្តើមបានមេដាយប្រាក់ ១ និងសំរឹទ្ធ ១ ពីការប្រកួតកីឡាទូកក្តោង នៅប្រទេសសិង្ហបុរីនេះដែរ ត្រូវបានសហព័ន្ធកីឡាទូកក្តោងកម្ពុជា ចាត់ទុកថា ជាភាពជោគជ័យយ៉ាងសំខាន់ថ្មីមួយទៀត បន្ទាប់ពីក្រុមទូកក្តោងកម្ពុជា បានបង្កើតកំណត់ត្រាជាប្រវត្តិសាស្រ្ត សម្រាប់ការដណ្តើមបានមេដាយប្រាក់ ១ និងសំរឹទ្ធ ២ ពីការប្រកួតស៊ីហ្គេម លើកទី៣២ ឆ្នាំ ២០២៣ នៅលើទឹកដីខ្លួនឯងកន្លងមក។
សហព័ន្ធបានបញ្ជាក់បែបនេះថា៖ «នេះជាភាពជោគជ័យថ្មីមួយរបស់សហព័ន្ធកីឡាទូកក្តោងកម្ពុជា នៅដើមឆ្នាំ ២០២៤ ដែលក្រុមកីឡាករទូកក្តោងរបស់យើង បានឈ្នះមេដាយកម្រិតទ្វីបអាស៊ី ពីការប្រកួតកីឡាទូកក្តោងប្រភេទ Techno ជ្រើសរើសជើងឯកទ្វីបអាស៊ីឆ្នាំ ២០២៤ ក្រោមការដឹកនាំ និងចង្អុលបង្ហាញរបស់ ឯកឧត្តម ថាំង ហ្គោលដុន ប្រធានសហព័ន្ធ និងឯកឧត្តម ថោង រដ្ឋសក្កិ អនុប្រធានអចិន្ត្រៃយ៍នៃសហព័ន្ធ ដែលតែងតែផ្តល់ឱកាសដល់កីឡាករ កីឡាការិនី ចេញទៅចូលរួមប្រកួតជាលក្ខណៈអន្តរជាតិ រហូតទទួលបានមេដាយយកមកជូនជាតិជាបន្តបន្ទាប់»។
ជាមួយគ្នានេះ សហព័ន្ធកីឡាទូកក្តោងកម្ពុជា ក៏គ្រោងនឹងបញ្ជូនកីឡាករ កីឡាការិនី ចេញទៅចូលរួមការប្រកួតជាលក្ខណៈអន្តរជាតិជាបន្តបន្ទាប់ទៀតផងដែរ ជាពិសេសព្រឹត្តិការណ៍ ThailandWindsurfing Championship 2024 (Event2) ដែលធ្វើនៅនៅប្រទេសថៃ នាដើមខែមីនាខាងមុខនេះ ដើម្បីប្រកួតប្រជែងដណ្តើមមេដាយជូនជាតិ៕
