ការបង្ហាញពីបច្ចេកទេសលោតទាត់បន្ទះក្តាររបស់កីឡាករហាប់គីដូ នៅក្នុងពិធីប្រគល់វិញ្ញាបនបត្រ និងសញ្ញាបត្រ ដល់សិស្សគុនកាលពីថ្ងៃអាទិត្យ។ រូប សហព័ន្ធ
ភ្នំពេញ៖ គ្រូតាក្រមាមាស សាន គឹមស៊ាន ដែលជាស្ថានិកបង្កើតឱ្យមានសហព័ន្ធខ្មែរកីឡាហាប់គីដូ មុនគេនៅក្នុងប្រទេសកម្ពុជា បានកោតសរសើរពីកម្រិតបច្ចេកទេសសម្តែងរបស់កីឡាករ កីឡាការិនីជំនាន់ក្រោយថា បានឈានដល់កម្រិតពិភពលោកហើយ ប៉ុន្តែលោកបានជំរុញឱ្យអ្នកទាំងនេះ ខិតខំហ្វឹកហាត់ឱ្យបានកាន់តែខ្លាំងថែមទៀត និងកុំបោះបង់ចោលឱ្យសោះ ដើម្បីអាចក្លាយជាអត្តពលិកឆ្នើមលើប្រភេទកីឡាហាប់គីដូតំណាងឱ្យប្រទេសកម្ពុជា នាពេលអនាគត។
ព្រឹទ្ធាចារ្យ សាន គឹមស៊ាន បានថ្លែងថា៖ «សម្រាប់ការបង្ហាញក្បាច់គុនហាប់គីដូរបស់ក្មួយៗ និងចៅៗ នៅពេលនេះ គ្រូខានបានឃើញយូរហើយ អ៊ីចឹងធ្វើឱ្យគ្រូមានការរំភើប ព្រោះជំនាន់លោកគ្រូអត់បានធ្វើបែបនេះទេ ប៉ុន្តែឥឡូវនេះការសម្តែងរបស់ពួកយើង បានឈានចូលទៅដល់កម្រិតពិភពលោក អាចទទួលយកបាន ព្រោះខ្ញុំឃើញថា បច្ចេកទេសលោតផ្លោះ ការលោតធាក់ ទាត់ ការបំបែកក្តារ និងបច្ចេកទេសផ្សេងៗទៀតគឺល្អមែនទែន»។
អតីតប្រធានសហព័ន្ធខ្មែរកីឡាហាប់គីដូ លោក សាន គឹមស៊ាន បានបន្ថែមថា៖ «យើងត្រូវគិតថា តើការបង្ហាញរបស់យើងហ្នឹង ត្រូវក្បួន ត្រូវខ្នាត ត្រូវក្បាច់ តាមលំនាំល្បឿននៃការដាល់ ល្បឿននៃការទាត់ និងចលនាទាំងអស់ត្រឹមត្រូវឬអត់? ហើយខ្ញុំឃើញថា ៩៨ ភាគរយ គឺត្រឹមត្រូវទាំងអស់គ្នា ហេតុនេះខ្ញុំពិតជាសប្បាយចិត្តខ្លាំងមែនទែន»។
លោក សាន គឹមស៊ាន ពេលប្រគល់វិញ្ញបនបត្រ ដល់អ្នកហាត់កីឡាហាប់គីដូ។ រូបថត សហព័ន្ធ
ការថ្លែងបែបនេះរបស់លោក សាន គឹមស៊ាន ត្រូវបានធ្វើឡើង នៅក្នុងពិធីប្រគល់លិខិតបញ្ជាក់វិញ្ញាបនបត្រ និងសញ្ញាបត្រ ដល់សិស្សគុនហាប់គីដូចំនួន២៣នាក់ កាលពីថ្ងៃអាទិត្យ ទី ២៥ ខែកុម្ភៈ ក្រោមអធិបតីភាពលោក គួច ហុងជៀក ជាអនុប្រធាន តំណាងឱ្យលោកសៅ សេងហាក់ ជាប្រធានសហព័ន្ធខ្មែរកីឡាហាប់គីដូ នាពេលបច្ចុប្បន្ន។
ចំណែកព្រឹទ្ធាចារ្យ សេង ប៊ុនសុង ដែលធ្លាប់ធ្វើជាប្រធានសហព័ន្ធខ្មែរកីឡាហាប់គីដូ ពីឆ្នាំ ២០០៧ ដល់ឆ្នាំ ២០១៦ និងគណៈកម្មាធិការប្រតិបត្តិសហព័ន្ធមួយចំនួនទៀត ក៏ត្រូវបានអញ្ជើញចូលរួមក្នុងកម្មវិធីនេះដែរ ដើម្បីបានទស្សនាការសម្តែងក្បាច់បច្ចេកទេសផ្សេងៗរបស់កីឡាករ កីឡាការិនីហាប់គីដូ ដែលបានទទួលវិញ្ញាបនបត្រ និងសញ្ញាបត្រ បញ្ជាក់ពីកម្រិតខ្សែក្រវាត់នៃការខិតខំហ្វឹកហាត់របស់ពួកគេ នាពេលនោះ។
ជាមួយការខិតខំបង្កើតឱ្យមានសហព័ន្ធខ្មែរកីឡាហាប់គីដូ ដោយផ្តើមចេញពីបាតដៃទទេ តាំងពីឆ្នាំ ២០០១ រហូតមកដល់ពេលនេះ លោក សាន គឹមស៊ាន មើលឃើញថា វិស័យកីឡាហាប់គីដូ នាពេលបច្ចុប្បន្នមានការរីកចម្រើនគួរឱ្យកត់សម្គាល់ ដោយមានកីឡាករ កីឡាការិនីជាថ្នាក់ថ្នាលជំនាន់ក្រោយច្រើន ហើយក៏មានទីតាំងហ្វឹកហាត់ត្រឹមត្រូវ ក្រោមការជួយទំនុកបម្រុងពីថ្នាក់ដឹកនាំសហព័ន្ធ ជាពិសេសលោកគ្រូ គង់ ចាន់ធីណា ដែលបានតស៊ូជាមួយកីឡានេះជាង៣៥ឆ្នាំមកហើយ។
យ៉ាងណាក៏ដោយ លោក គឹមស៊ាន បានជំរុញឱ្យអ្នកពាក់ព័ន្ធលើវិស័យកីឡាហាប់គីដូ ត្រូវខំប្រឹងប្រែងបន្តទៀត។ ស្ថាបនិករូបនេះ បានបញ្ជាក់ថា៖ «ខ្ញុំមានបេះដូងបង្កើតឱ្យមានហាប់គីដូរស់ឡើងវិញនៅស្រុកខ្មែរ ជាមួយស្ថានិក និងគ្រូបង្វឹកមួយចំនួនទៀត ហើយយើងនឹងបន្តឈានទៅកាន់ពិភពលោក ដើម្បីឱ្យគេស្គាល់ថា ខ្មែរយើងក៏មានហាប់គីដូខ្លាំងពូកែដែរ ហេតុនេះក្មួយ! ចៅៗ ដែលខ្លះទើបមានអាយុ ១០ ឆ្នាំ និង ១៥ ឆ្នាំ គឺត្រូវខិតខំហ្វឹកហាត់បន្តទៀត កុំឈប់ឱ្យសោះ ដើម្បីក្លាយជាអ្នកខ្លាំងពូកែខាងហាប់គីដូតំណាងឱ្យកម្ពុជាយើង នាពេលអនាគត»៕
