តារាថៃហ្វៃ សៃយុគ បានទាត់ទៅលើ ធន់ រិទ្ធី ក្នុងការប្រកួតព្រឹត្តិការណ៍ The Battle of Kings កាលពីយប់ថ្ងៃអាទិត្យ។ រូបថត Krud
ភ្នំពេញ៖ អធិរាជលេងអំបោះឆៅ ធន់ រិទ្ធី បានបង្ហាញការសោកស្តាយ និងបានបន្ទោសខ្លួនឯង ដែលមិនអាចរក្សាឱកាសមាស ក្នុងការយកឈ្នះលើតារាថៃហ្វៃ សៃយុគ (Saiyok Pumpanmuang) សម្រាប់ការប្រកួតដាក់ខ្សែក្រវាត់ ក្នុងព្រឹត្តិការណ៍ The Battle of Kings របស់សង្វៀនប្រដាល់ទទក កាលពីយប់ថ្ងៃអាទិត្យ ចំណែក ឡៅ ចន្ទ្រា បានយកឈ្នះលើអតីតជើងខ្លាំងប្រចាំនៅ Thai Fight សុដសុខន (Sudsakorn SorKlinmee)ដើម្បីក្លាយជាម្ចាស់ខ្សែក្រវាត់ Krud Kun Khmer។
តាមរយៈការប្រកួត ដែលធ្វើនៅសង្កាត់ព្រែកឯង ខណ្ឌច្បារអំពៅ កាលពីយប់ថ្ងៃទី ៤ ខែកុម្ភៈ កន្លងមកនេះ សៃយុគ បានវាយចេញច្រើនជាង ធន់ រិទ្ធី ប៉ុន្តែការម៉ាត់ឆ្វេងចូលពេញរបស់ រិទ្ធី បានធ្វើឱ្យកីឡាករវ័យ ៣៨ ឆ្នាំរបស់ថៃម្នាក់នេះ លុតជង្គង់ទៅលើសង្វៀនទាំងវង្វេងស្មារតី នាំឱ្យលោកអាជ្ញាកណ្តាល ឡៅ ស៊ីណាត ធ្វើការរាប់ចំនួន៨ ទើបអាចបន្តការប្រកួតទៀតបាន។
ជាមួយការរាប់នេះត្រូវបានគេរំពឹងថា ធន់ រិទ្ធី នឹងអាចទទួលបានជ័យជម្នះ ដើម្បីក្លាយជាម្ចាស់ខ្សែក្រវាត់ទាំង២ខ្សែនារាត្រីដ៏មានន័យនេះជាមិនខាន ចំណែក រិទ្ធី ខ្លួនឯងក៏ជឿថា រូបគេ នឹងអាចរក្សាការមានប្រៀបនេះរហូតដល់ចប់ទឹកទី៣ ដើម្បីក្លាយជាអ្នកឈ្នះ និងអាចសងសឹកបានសម្រេច ចំពោះការចាញ់ដោយសន្លប់ក្នុងទឹកទី២ ក្រោមទម្ងន់ជើងឆ្វេងរបស់ សៃយុគ នាជំនួបនៅសង្វៀន Thai Fight កាលពីខែតុលា ឆ្នាំ ២០២២ ផងដែរ។
ប៉ុន្តែអ្វីៗបានប្រែប្រួលទាំងស្រុងព្រោះការព្យាយាមថយ និងវាយតាមបែបទប់ដើម្បីឱ្យចប់ទឹករបស់ ធន់ រិទ្ធី បែរជាផ្តល់ឱកាសឱ្យ សៃយុគ មានស្មារតីរឹងមាំវិញ និងបានតាមវាយលុកទៅលើ រិទ្ធី យ៉ាងខ្លាំងហើយខណៈការប្រកួតនៅសល់ ២០ វិនាទីទៀត នឹងត្រូវបញ្ចប់នោះ សៃយុគ បានទាត់ឆ្វេងចូលកញ្ចឹងក ធន់ រិទ្ធី រួចបានម៉ាត់ថែម២ដៃទៀត ធ្វើឱ្យ រិទ្ធី ប៊ិះសន្លប់ឈរ តែលោកអាជ្ញាកណ្តាល ឡៅ ស៊ីណាត បានចាប់ត្រកងទាន់ពេល រួចធ្វើការរាប់ដល់ ៨ ទើប រិទ្ធី អាចប្រកួតបានវិញ។
ជាមួយការវ៉ៃគ្នាប៊ិះសន្លប់រៀងៗខ្លួន នៅទឹកទី៣ ចុងក្រោយនេះ ចៅក្រមទាំង៥នាក់ បានសម្រេចឱ្យ ធន់ រិទ្ធី និង សៃយុគ ស្មើពិន្ទុគ្នា ព្រោះនេះជាការប្រកួតមិត្តភាពអន្តរជាតិគឺគ្រាន់តែអ្នកទាំង ២ នេះ បានដាក់ខ្សែក្រវាត់រៀងៗខ្លួន ដើម្បីឱ្យប្រកួតដណ្តើម ដែលធ្វើឱ្យជំនួបនេះ កាន់តែមានភាពទាក់ទាញ។
ទាក់ទងទៅនឹងការប្រកួតនេះ ធន់ រិទ្ធី បាននិយាយថា៖ «នៅពេលខ្ញុំវ៉ៃគាត់(សៃយុគ) រាប់ក្នុងទឹកទី៣ គឺខ្ញុំដឹងថា ខ្ញុំនឹងឈ្នះគាត់ហើយ ហេតុនេះខ្ញុំមិនបានចូលវ៉ៃគាត់ទៀតនោះទេ ព្រោះខ្លាចភ្លាត់វិញ។ ខ្ញុំបានក្តោបយកឱកាសមានប្រៀបនេះ ដោយវ៉ៃបែបទប់ៗវិញ និងព្យាយាមគេចចេញពីការតាមវាយរបស់គាត់ ប៉ុន្តែមានអី ក្នុងពេលកំពុងគេចនោះ ខ្ញុំរអិលជើងនាំឱ្យគាត់ទាត់ចូលកញ្ចឹងក ឡើងទន់ដល់ចុងជើងតែម្តង»។
ជាមួយការភ្លាត់ធ្វើឱ្យ សៃយុគ ទាត់ចូលកញ្ចឹងក និងត្រូវបានអាជ្ញាកណ្តាលរាប់វិញនេះ បានក្លាយជាវិប្បដិសារីខ្លាំងចំពោះ ធន់ រិទ្ធី ហើយរូបគេបានបន្ទោសខ្លួនឯង ដែលមិនអាចរក្សាឱកាសមាសនេះ ដើម្បីយកឈ្នះលើ សៃយុគ បាន។ រិទ្ធី បានបញ្ជាក់ពីអារម្មណ៍ពិតរបស់ខ្លួនបែបនេះថា៖ «ខ្ញុំអត់សប្បាយចិត្តលើខ្លួនឯង ដែលមិនគួរណាកើតមានបញ្ហាបែបនេះ នៅចុងទឹក»។
«យើងដឹងថាយើងឈ្នះ ទើបមិនចូលវាយប្តូរទៀត ព្រោះខ្លាចភ្លាត់ស្នៀតចូលរបស់គាត់វិញ ប៉ុន្តែនៅតែគេចមិនផុតពីការភ្លាត់ស្នៀត ដោយបញ្ហារអិលជើង នាំឱ្យគាត់ទាត់ចូលកញ្ចឹងកដដែល។ ហេតុនេះខ្ញុំមានតែលើកដៃសំពះសុំទោសដល់បងប្អូនទាំងអស់គ្នា និងលោកឧកញ៉ា សំអាង វឌ្ឍនៈ ដែលខ្ញុំធ្វើមិនបានល្អ»។ ធន់ រិទ្ធី បានបញ្ជាក់បន្ថែម។
យ៉ាងណាក៏ដោយ លោក សំអាង វឌ្ឍនៈ អគ្គនាយកក្រុមហ៊ុនវឌ្ឍនៈប្រ៊ូវើរី ដែលជាអ្នកឧបត្ថម្ភរៀបចំឱ្យ សៃយុគ មកប្រកួតជាមួយ ធន់ រិទ្ធី នៅកម្ពុជា ជាលើកដំបូងនេះបានប្រកាសឱ្យអ្នកទាំង ២ នេះជួបគ្នាម្តងទៀត ដើម្បីយកខ្សែក្រវាត់ទាំង ២ ខ្សែ ដែលដាក់ឱ្យប្រកួតដណ្តើមលើកនេះឱ្យបានដាច់ស្រេចហើយលោកបានស្នើឱ្យ ធន់ រិទ្ធី និង សៃយុគ ប្តូរខ្សែក្រវាត់គ្នាកាន់សិន ទម្រាំការប្រកួតលើកទី៣ របស់អ្នកទាំង ២ ឈានចូលមកដល់។
ដោយឡែក សម្រាប់ការប្រកួតដណ្តើមខ្សែក្រវាត់រវាង ឡៅ ចន្ទ្រា និងអ្នកប្រដាល់ចាស់វស្សារបស់ថៃ សុដសុខន កាលពីយប់ថ្ងៃអាទិត្យនោះដែរ គឺដាច់ស្រេចហើយ ដោយ ចន្ទ្រា បានក្លាយជាម្ចាស់ខ្សែក្រវាត់ បន្ទាប់ពីបានយកឈ្នះ សុដសុខន ដោយពិន្ទុ។ ប៉ុន្តែការប្រកួតរបស់អ្នកទាំង ២ នេះ មិនសូវមានភាពស្វិតស្វាញប៉ុន្មានឡើយ ហើយ ចន្ទ្រា ក៏បានទទួលស្គាល់ថា ពួកគេបានវាយសងគ្នាបែបយឺតៗផងដែរ។
ឡៅ ចន្ទ្រា បាននិយាយថា៖ «សម្រាប់ខ្ញុំ មើលឃើញថា គាត់ដូចជាមិនល្អអ្វីផង ដែលអាចមកពីគាត់ស្ទើរការហ្វឹកហាត់ គឺគាត់ចេញរាងយឺតដែរ ប៉ុន្តែខ្ញុំក៏យឺតដូចគ្នា ព្រោះបើយើងមិនយឺត ក៏គាត់ទាត់យើងមិនត្រូវនោះដែរ ហើយតាមរយៈការប្រកួតនេះ សមត្ថភាពរបស់ខ្ញុំ បានវិលរកភាពប្រសើរវិញ មិនទាន់បាន ៥០ ភាគរយទេ។ តែទោះបីជាយ៉ាងណា ខ្ញុំនឹងខិតខំហ្វឹកហាត់ និងលត់ដំខ្លួនថែមទៀត ដើម្បីប្រកួតឱ្យបានល្អឡើងវិញ»៕
