ឡៅ ចន្ទ្រា បានទាត់ទៅលើកីឡាករអ៊ីរ៉ង់ Dashangi សម្រាប់ការប្រកួត កាលពីយប់ថ្ងៃអាទិត្យ។ រូប Krud Kun Khmer
ភ្នំពេញ៖ កីឡាករជើងខ្លាំងជាម្ចាស់មេដាយមាសស៊ីហ្គេម ឡៅ ចន្ទ្រា រួមទាំង ឡុង ពិសិដ្ឋ, អ៊ូច ធារិទ្ធ និង គឹម វាសនា សុទ្ធតែបានប្រើបច្ចេកទេសវាយឱ្យអ្នកប្រដាល់បរទេសចាញ់ដោយសន្លប់ សម្រាប់ការបង្ហាញខ្លួនរួមគ្នា ក្នុងព្រឹត្តិការណ៍ Krud Kun Khmer របស់សង្វៀនប្រដាល់ទទក នៅលើទឹកដីខេត្តព្រៃវែង ចំណែក ធន់ រិទ្ធី មិនអាចប្រើកណ្តាប់ដៃដ៏ធ្ងន់របស់គេ ដើម្បីផ្តួលកីឡាករអ៊ីរ៉ង់ Keivan បានឡើយ។
សម្រាប់ការប្រកួត កាលពីយប់ថ្ងៃទី ៣ ខែមីនានេះ ឡៅ ចន្ទ្រា និង គឹម វាសនា បានវ៉ៃគូប្រកួតឱ្យសន្លប់ នៅក្នុងទឹកទី១ ដូចគ្នា។ ចន្ទ្រា បានប្រើទម្ងន់ជើងដ៏ធ្ងន់របស់គេ ទាត់ឱ្យកីឡាករអ៊ីរ៉ង់ Dashangi រាប់ចំនួន២លើក ហើយនៅពេលដៃគូម្នាក់នេះ ជម្នះចូលម៉ាត់សងវិញនោះ ចន្ទ្រា បានគេចយ៉ាងរហ័ស រួចច្រាសកែងឆ្វេងចូលផ្ទៃមុខពេញទំហឹង និងថែម ១ ជង្គង់ទៀតនាំឱ្យ Dashangi ដួលដេកចុករមួល ហើយត្រូវបានអាជ្ញាកណ្តាលបញ្ឈប់ការប្រកួត នៅចុងទឹកទី១ នេះតែម្តង។
ជាមួយការវាយកែងឆ្វេងដ៏មានប្រសិទ្ធភាពរបស់ ឡៅ ចន្ទ្រា នេះ បានធ្វើឱ្យកីឡាករអ៊ីរ៉ង់ Dashangi បែកក្រោមផ្នែកខាងស្តាំយ៉ាងធំ ហើយត្រូវបានគ្រូពេទ្យដេរអស់ ១២ ថ្នេរ។ ចំណែកការប្រកួតវ៉ៃអំបោះឆៅវិញ គឹម វាសនា បានម៉ាត់កីឡាករតួកគី Semet Omer ឱ្យដួលសន្លប់នៅចុងទឹកទី១ បន្ទាប់ពីរូបគេបានវ៉ៃដៃគូម្នាក់នេះឱ្យដួលទាំងវង្វេង និងត្រូវបានអាជ្ញាកណ្តាលរាប់ ១ លើក នៅពាក់កណ្តាលទឹកនោះ។
ដោយឡែកសម្រាប់ការប្រកួតជម្រុះដណ្តើមខ្សែក្រវាត់ទម្ងន់ ៥១ គីឡូក្រាមវិញ ម្ចាស់មេដាយស៊ីហ្គេម ឆ្នាំ ២០២៣ ឡុង ពិសិដ្ឋ បានផ្តួលកីឡាករថៃ Arpithan Poryuthphum ឱ្យសន្លប់ នៅក្នុងទឹកទី៣ តាមរយៈការវាយកែងឆ្វេងបានយ៉ាងល្អបំផុត ហើយនៅក្នុងទឹកនេះដែរ ពិសិដ្ឋ ក៏បានបុកកែង និងម៉ាត់ឱ្យកីឡាករ Arpithan ដួលទាំងវង្វេង និងត្រូវបានអាជ្ញាកណ្តាលរាប់ចំនួន២លើក។
ចំណែកការប្រកួតជម្រុះដណ្តើមខ្សែក្រវាត់ទម្ងន់ ៥៧ គីឡូក្រាមវិញ កីឡាករមានជំនាញទាំងប្រដាល់សកល និងគុនខ្មែរ អ៊ូច ធារិទ្ធ បានចំណាយថាមពល និងបច្ចេកទេសអស់ពីខ្លួន ដើម្បីផ្តួលកីឡាករថៃ Pitpiyak បោះបង់ការប្រកួតនៅទឹកទី៤ តាមរយៈការទាត់ឱ្យខូចជើងឆ្វេងដួលក្រោកលែងរួច។
ផ្ទុយពីនេះ ការវ៉ៃអំបោះឆៅរវាងអ្នកលេងកណ្តាប់ដៃ ធន់ រិទ្ធី និងកីឡាករអ៊ីរ៉ង់ Keivan ពិតជាទទួលបានការគាំទ្រខ្លាំង ព្រោះអ្នកទាំង២នេះ បានវាយប្តូរកណ្តាប់ដៃ៣ទឹកពេញ និងចំគោលដៅបានល្អដូចគ្នា ប៉ុន្តែទាំង រិទ្ធី និង Keivan ពិតជាមានភាពស៊ូខ្លាំង ដែលមិនបានបង្ហាញភាពថមថយដូចគ្នា ហើយនៅចុងបញ្ចប់ពួកគេ បានត្រឹមសរសើរគ្នាទៅវិញទៅមក ក្រោយប្រកាសឱ្យស្មើពិន្ទុ ខណៈ Keivan ក៏ធ្លាប់បានប្រកួតស្មើជាមួយអ្នកប្រយុទ្ធរបស់ថៃ សៃយុគ ដូច ធន់ រិទ្ធី ផងដែរ៕
