ការប្រកួតប្រដាល់នៅសង្វៀនប៉ុស្តិ៍លេខ ៥។ រូបថត សហការី
កីឡាករមានជំនាញទាំងប្រដាល់សកល និងគុនខ្មែរ ទូច ដេវីត បែរជាអាចប្រើបច្ចេកទេសវ៉ៃលក្ខណៈឃីកបុកស៊ីងបានយ៉ាងល្អបំផុត ដើម្បីផ្តួលអ្នកប្រដាល់របស់ថៃ Pech Narin ឱ្យសន្លប់ សម្រាប់ការជួបគ្នា នៅលើសង្វៀនប៉ុស្តិ៍លេខ៥។ ចំណែក វី ស្រីឆាយ ក៏ដណ្តើមបានជ័យជម្នះយ៉ាងលំបាកលើកីឡាការិនីរបស់អ៊ីរ៉ង់ Negin Shahinfar បន្ទាប់ពីបានខកខានឡើងប្រកួតអស់រយៈពេលប្រមាណ ៣ខែ។
ចំពោះ ទូត ដេវីត ត្រូវបានអ្នកគាំទ្រទទួលស្គាល់រួចទៅហើយថា មានសមត្ថភាពល្អទាំងការប្រកួតប្រដាល់កលស និងគុនខ្មែរ ប៉ុន្តែនេះជាលើកដំបូងហើយ ដែលអ្នកគ្រប់គ្រងនៅសង្វៀនប៉ុស្តិ៍លេខ៥ បានដាក់ឱ្យកីឡាកររបស់កម្ពុជារូបនេះ ប្រកួតជាលក្ខណៈឃីកបុកស៊ីងជាមួយអ្នកប្រដាល់របស់ថៃ Pech Narin ហើយជាលទ្ធផល ដេវីត បានវ៉ៃឱ្យថៃម្នាក់នេះរហូតអាជ្ញាកណ្តាលបញ្ឈប់នៅក្នុងទឹកទី២
ជាមួយគ្នានេះ លោក សេង កដិកា អ្នកគ្រប់គ្រងកម្មវិធីប្រដាល់ប្រចាំនៅសង្វៀនប៉ុស្តិ៍លេខ៥ បានសាទរខ្លាំងចំពោះសមត្ថភាពប្រកួតឃីកបុកស៊ីងរបស់ ទូច ដេវីត គឺពិតជាធ្វើបានយ៉ាងល្អ ដែលបង្កើតឱ្យមាននូវការចាប់អារម្មណ៍ពីអ្នកគាំទ្រ ហើយនេះជាការបោះជំហានថ្មីមួយទៀតរបស់សង្វៀនប៉ុស្តិ៍លេខ៥ ក្នុងការដាក់ឱ្យមានការប្រកួតបែបចម្រុះ គឺមានទាំងប្រដាល់គុនខ្មែរ ប្រដាល់ឃីកបុកស៊ីង វ៉ៃអំបោះឆៅ ការប្រកួតពាក់ហ្គង់ចេញម្រាម និងពាក់ហ្គង់ធម្មតា ទៅតាមការចង់បានរបស់សហព័ន្ធកីឡាប្រដាល់គុនខ្មែរ។
លោក សេង កដិកា បានប្រាប់ភ្នំពេញប៉ុស្តិ៍ នៅថ្ងៃចន្ទនេះថា៖ «សម្រាប់ការប្រកួតជាលក្ខណៈឃីកបុកស៊ីងរបស់ ទូច ដេវីត លើកនេះពិតជាមានការប្លែកភ្នែកសម្រាប់អ្នកទស្សនា ដោយពួកគាត់មានការសាទរខ្លាំង ជាពិសេសអ្នកគាំទ្រនៅសង្វៀនផ្ទាល់ ព្រោះ ដេវីត មានបច្ចេកទេសវាយសន្ធាប់បានល្អទាំងការប្រើស្នៀតជើង និងកណ្តាប់ដៃ ធ្វើឱ្យកីឡាកររបស់ថៃមិនអាចទប់ទល់បាន គឺត្រូវបានលោកអាជ្ញាកណ្តាប់បញ្ឈប់ការប្រកួត នៅត្រឹមទឹកទី២»។
ការប្រកួតប្រដាល់នៅសង្វៀនប៉ុស្តិ៍លេខ ៥។ រូបថត សហការី
តាមរយៈការប្រកួតជាក់ស្តែង កាលពីយប់ថ្ងៃទី២៥ ខែឧសភា កន្លងមកនេះ ទូច ដេវីត បានប្រើជំនាញប្រដាល់សកលរបស់ខ្លួន គឺការម៉ាត់ឆ្វេងស្តាំចូលពេញៗ ធ្វើឱ្យកីឡាករថៃ Pech Narin វង្វេងនាំឱ្យអាជ្ញាកណ្តាលរាប់ជាលើកទី១ និងបានរាប់ម្តងទៀត នៅចុងទឹកទី១ដដែលនេះ តាមរយៈការទាត់ជើងក្រោម នាំឱ្យ Pech Narin បាត់បង់ជំហរ។
បើទោះបីជា Pech Narin មានភាពស៊ូខ្លាំង មិនព្រមសន្លប់នៅក្នុងទឹកទី១ ប៉ុន្តែឈានចូលទឹកទី២ ទូច ដេវីត បានបង្កើនការវាយសម្រុកកាន់តែខ្លាំង ទាំងការប្រើកណ្តាប់ដៃ ជាពិសេសការទាត់សន្ធាប់ទៅលើជើងក្រោម ហើយទម្ងន់ទាត់ចេញៗធ្ងន់ៗរបស់ ដេវីត បានធ្វើឱ្យ Pech Narin ដួល ហើយត្រូវបានអាជ្ញាកណ្តាលរាប់ជាលើកទី ៣ និង ឈានដល់ការបញ្ឈប់ការប្រកួតតែម្តង នៅពេល ដេវីត បានទាត់ថៃម្នាក់នេះឱ្យដួលទាំងអស់ជំហរម្តងទៀត នៅពាក់កណ្តាលទឹកដដែលនេះ។
ដោយឡែក កីឡាការិនី វី ស្រីឆាយ ដែលទើបទទួលបានឱកាសឡើងប្រកួតជាថ្មី ក្រោយខកខានអស់រយៈពេលប្រមាណ៣ខែមកហើយនោះ បានព្យាយាមវ៉ៃប្តូរជាមួយកីឡាការិនីរបស់អ៊ីរ៉ង់ Negin Shahinfar យ៉ាងស្វិតស្វាញបំផុត។ ស្រីឆាយ បានទទួលការម៉ាត់ចូលពេញៗពីសំណាក់ដៃគូមានកម្ពស់ខ្ពស់រូបនេះ ហើយការបុកកែងរបស់ Negin Shahinfar ក៏បានធ្វើឱ្យ ស្រីឆាយ មានស្នាមពកយ៉ាងធំ នៅក្រោមភ្នែកខាងឆ្វេងផងដែរ។
ទោះបីជាយ៉ាងណា កីឡាការិនីកូន១ វី ស្រីឆាយ មិនបានបង្ហាញភាពទន់ជ្រាយនោះទេ គឺម្ចាស់មេដាយសំរឹទ្ធស៊ីហ្គេម២សម័យកាលរូបនេះ បានព្យាយាមប្តូរកណ្តាប់ដៃ ព្រមទាំងចូលចាប់បុកជង្គង់ និងវាយកែងរហូតចប់ ៣ ទឹកពេញ ហើយត្រូវបានប្រកាសឱ្យឈ្នះពិន្ទុ Negin Shahinfar យ៉ាងរំភើប បើទោះបីជាសាច់ប្រកួត៣ទឹកពេញ ត្រូវបានគេមើលឃើញថា កីឡាការិនីអ៊ីរ៉ង់ ហាក់មានប្រៀបជាង ស្រីឆាយ ក៏ដោយ។
ការប្រកួតប្រដាល់នៅសង្វៀនប៉ុស្តិ៍លេខ ៥។ រូបថត សហការី
ជាមួយគ្នានេះ លោក សេង កដិកា បានបញ្ចេញទស្សនៈផ្ទាល់ខ្លួនថា បើប្រកាសឱ្យ វី ស្រីឆាយ ស្មើពិន្ទុជាមួយ Negin Shahinfar អាចល្អជាងការឱ្យឈ្នះ។ តែទោះបីជាយ៉ាងណា លោកបានសរសើរពីទឹកចិត្តប្រកួតយ៉ាងអង់អាចរបស់ វី ស្រីឆាយ ហើយលោកក៏បានជំរុញឱ្យសង្វៀនប្រដាល់ផ្សេងៗទៀត ផ្តល់ឱកាសឱ្យកីឡាការិនីគុនខ្មែរ បានឡើងប្រកួតកាន់តែច្រើនថែមទៀត ដើម្បីមានឱកាសកាន់តែច្រើន ក្នុងការពង្រឹងសមត្ថភាពឱ្យបានកាន់តែប្រសើរ។
អ្នកគ្រប់គ្រងកម្មវិធីប្រដាល់ប្រចាំនៅសង្វៀនប៉ុស្តិ៍លេខ ៥ លោក សេង កដិកា បានបញ្ជាក់ថា៖ «ខ្ញុំយល់ថា ការផ្តល់ឱកាសឱ្យកីឡាការិនីបានឡើងប្រកួត វាជារឿងដ៏ល្អមួយ សម្រាប់វិស័យគុនខ្មែររបស់យើង ដើម្បីយើងមានធនធានកីឡាការិនីកាន់តែច្រើន សម្រាប់ត្រៀមការប្រកួតអន្តរជាតិតំណាងឱ្យជាតិ ហើយការងារនេះ គឺលុះត្រាតែគ្រប់សង្វៀនទាំងអស់នាំគ្នាធ្វើ ព្រោះបើមានការប្រកួតកាន់តែច្រើន ខ្ញុំជឿថា ក្លិបនីមួយៗ ក៏គាត់មានទឹកចិត្តបណ្តុះបណ្តាលឱ្យមានកីឡាការិនីកាន់តែច្រើនដូចគ្នា»។
សម្រាប់ការប្រកួត កាលពីយប់ថ្ងៃសៅរ៍នោះដែរ កីឡាករកម្ពុជា រិន សារ័ត្ន ក៏ខិតខំប្រឹងប្រែងអស់ពីសមត្ថភាព ដើម្បីយកឈ្នះអ្នកប្រដាល់របស់ថៃFasawang ដោយពិន្ទុ។
ចំពោះលទ្ធផលការប្រកួតរបស់កីឡាករក្នុងស្រុកចំនួន៤គូទៀត គឺកីឡាករថ្នាល ខាំ ពិសិដ្ឋ បានផ្តួល នីរិទ្ធី តុងលី ឱ្យសន្លប់ក្នុងទឹកទី១ រីឯ ធន់ ចាន់ណា បានទាត់ឱ្យ ខាំ ម្ទេសទុំ ខូចជើងក្នុងទឹកទី១ ចំណែក កីឡាករជើងចាស់ ថា សារុន បានត្រឹមស្មើពិន្ទុជាមួយ ចាត់ សីហា ខណៈ ទូច ប្រុសណុច បានឈ្នះ រិទ្ធី សុភាព ដោយពិន្ទុ៕
