![](https://pppkhmer.sgp1.digitaloceanspaces.com/image/main/20246/17_6_2024_boxing_at_tv_5.jpg)
ការប្រកួតរបស់កីឡាករជើងចាស់ ឡឹក វិបុល (ក្រហម) និងអ្នកប្រដាល់ឡាវ Chhang Prasit Khrotia នៅលើសង្វៀនប៉ុស្តិ៍លេខ៥ កាលពីថ្ងៃទី១៥ ខែមិថុនា។ រូបថត សហការី
កីឡាការិនីបារាំងមានបេះដូងខ្មែរ រិទ្ធី អេម៉ា បានកែប្រែស្ថានភាពប្រកួតដ៏គ្រោះពីការប៊ិះសន្លប់ ទៅជាផ្តួលកីឡាការិនីអ៊ីរ៉ង់ Nazunin Hseini ឱ្យសន្លប់វិញ ហើយការតស៊ូយ៉ាងអំណត់នេះ អេម៉ា បានអះអាងថា នាងធ្វើដើម្បីគុនខ្មែរ មិនមែនដើម្បីលុយនោះទេ។
ចំណែកអតីតកីឡាករធ្លាប់សាងបានភាពល្បីខ្លាំង ឡឹក វិបុល បានផ្តួលកីឡាករឡាវ Chhang Prasit Khrotia ឱ្យសន្លប់ត្រឹមទឹកទី២ សម្រាប់ការវិលមកកាន់សង្វៀនជាថ្មី បន្ទាប់ពីបានចូលនិវត្តន៍ពីអាជីពនេះអស់រយៈពេលចូល២០ឆ្នាំ។
សម្រាប់ការប្រកួតអំបោះឆៅជាលើកដំបូង នៅលើសង្វៀនប៉ុស្តិ៍លេខ៥ កាលពីថ្ងៃទី១៥ ខែមិថុនា កន្លងមកនេះ រិទ្ធី អេម៉ា បានព្យាយាមប្តូរកណ្តាប់ដៃជាមួយកីឡាការិនីអ៊ីរ៉ង់ Nazunin Hseini យ៉ាងរន្ធើន ប៉ុន្តែនាងត្រូវបានដៃគូវាយកណ្តាប់ដៃចូលផ្ទៃមុខប្រមាណ២០ដៃជាប់ៗគ្នា បណ្តាលឱ្យវង្វេង និងត្រូវបានអាជ្ញាកណ្តាលរាប់នៅពាក់កណ្តាលទឹកទី១។
បន្ថែមទៅលើការរាប់នេះ រិទ្ធី អេម៉ា កាន់តែមានស្ថានភាពយ៉ាប់យឺន នៅពេលដែលកីឡាការិនី Nazunin Hseini បានស្ទុះចូលវាយសម្រុកមិនឈប់ រួចបានជ្រុលបុកកែងបណ្តាលឱ្យបែកលើចិញ្ចើមខាងស្តាំរបស់ អេម៉ា ហូរឈាមស្រោចពេញផ្ទៃមុខនោះ។ ប៉ុន្តែឈានចូលទឹកទី២ អេម៉ា បែរអាចកែប្រែស្ថានភាពប្រកួតបានល្អ ហើយបានបុកជង្គង់ និងម៉ាត់ចូលផ្ទៃមុខរបស់ Nazunin Hseini ផ្ទួនៗប្រមាណ៥ដៃ បណ្តាលឱ្យកីឡាការិនីអ៊ីរ៉ង់រូបនេះដួលក្រោកឡើងលែងរួចដ៏គួរឱ្យភ្ញាក់ផ្អើលបំផុត។
ជាមួយការទទួលបានជ័យជម្នះទាំងវេទនានេះ រិទ្ធី អេម៉ា បាននិយាយក្រោយការប្រកួតថា៖ «នៅទឹកទី១ ខ្ញុំដឹងថា ខ្ញុំនឹងសន្លប់ ប៉ុន្តែចូលទឹកទី២ លោកគ្រូរបស់ខ្ញុំបានស្រែកឱ្យខ្ញុំលើកដៃឡើង (ដើម្បីបិទការវាយរបស់គូប្រកួត)។ ខ្ញុំស្តាប់តាមការស្រែករបស់គាត់ ហើយខ្ញុំពិតជាសប្បាយចិត្ត ដែលទទួលបានជ័យជម្នះ សម្រាប់ការប្រកួតអំបោះឆៅជាលើកដំបូងនេះ»។
យ៉ាងណាក៏ដោយ ស្នាមបែកនៅលើចិញ្ចើមស្តាំរបស់ រិទ្ធី អេម៉ា ក្រោមការវាយកែងថែមរបស់កីឡាការិនី Nazunin Hseini ត្រូវបានគ្រូពេទ្យដេរអស់៥ថ្នេរ ហើយ អេម៉ា ក៏មានស្នាមពកជាច្រើនកន្លែងទៀត នៅលើផ្ទៃមុខផងដែរ ប៉ុន្តែ រិទ្ធី អេម៉ា បានបញ្ជាក់ថា៖ «ខ្ញុំមិនបានឈឺនិងរបួសនេះទេ»។
![](https://pppkhmer.sgp1.cdn.digitaloceanspaces.com/image/main/20246/17_6_2024_boxing1_at_tv_5.jpg)
តែទោះបីជាយ៉ាងណា ចំពោះអ្នកគាំទ្រគុនខ្មែរ បានកើតចិត្តអាណិតខ្លាំងដល់ រិទ្ធី អេម៉ា ដែលមានរបួសបែក និងមានស្នាមពកក្រហមពេញផ្ទៃមុខនេះ ហើយពួកគេបាននាំគ្នាចូលរួមឧបត្ថម្ភដល់ អេម៉ា តាមរយៈការបាញ់លុយតាម ABA ដើម្បីជាការលើកទឹកចិត្ត និងអរគុណដល់កីឡាការិនីបារាំងម្នាក់នេះ ដែលបានចំណាយទាំងពេលវេលា និងថវិកាផ្ទាល់ខ្លួនមកហ្វឹកហាត់គុនខ្មែរ និងប្រកួតតំណាងឱ្យគុនខ្មែរ។
ប៉ុន្តែឆ្លើយទៅនឹងទង្វើរបស់អ្នកគាំទ្រនេះ រិទ្ធី អេម៉ា បានបញ្ជាក់ពីជម្រៅចិត្តរបស់ខ្លួន តាមរយៈការបង្ហោះសារនៅលើផេចហ្វេសប៊ុកផ្ទាល់ខ្លួនថា៖ «ខ្ញុំសូមអរគុណអ្នករាល់គ្នា ដែលបានផ្តល់លុយឱ្យខ្ញុំនៅ ABA ប៉ុន្តែសូមរក្សាប្រាក់របស់អ្នក។ ខ្ញុំមិនវាយគុនខ្មែរដើម្បីលុយទេ ខ្ញុំវាយគុនខ្មែរ ដើម្បីបង្ហាញពិភពលោកថា អ្វីជាអ្វី»។
កីឡាការិនីបារាំងមានបេះដូងខ្មែរ អេម៉ា បានបន្ថែមថា៖ «ខ្ញុំវាយគុនខ្មែរ ព្រោះខ្ញុំស្រឡាញ់វា ហើយចិត្តខ្ញុំមិនអាចពន្យល់វាបាន។ អ្នកទាំងអស់គ្នាផ្តល់ក្តីស្រឡាញ់ឱ្យខ្ញុំខ្លាំងណាស់ គាំទ្រខ្លាំងណាស់ ហើយនេះគ្មានតម្លៃទេ ព្រោះខ្ញុំមិនចង់ឱ្យបងប្អូនខ្មែរគិតថា ត្រូវផ្ញើលុយឱ្យខ្ញុំទេ។ ម្ដងទៀតអរគុណអ្នកគ្រប់គ្នា សម្រាប់លុយដែលអ្នកផ្តល់ឱ្យខ្ញុំ ប៉ុន្តែបើមិនមានលុយច្រើនទេ សូមអ្នកទុកវាសម្រាប់ខ្លួនឯងទៅ»។
ចំណែកអតីតជើងខ្លាំង ឡឹក វិបុល ដែលបានឃ្លាតឆ្ងាយពីសង្វៀនប្រដាល់ចូល២០ឆ្នាំមកហើយនោះ នៅតែមានបច្ចេកទេសប្រកួតបានយ៉ាងល្អ សម្រាប់ការបង្ហាញខ្លួនជាថ្មី នៅលើសង្វៀនប៉ុស្តិ៍លេខ៥ កាលពីយប់ថ្ងៃសៅរ៍នោះដែរ ដោយកីឡាករកម្ពុជាម្នាក់នេះ បានទាត់ជើងក្រោមនាំឱ្យលោកអាជ្ញាកណ្តាលរាប់ទៅលើអ្នកប្រដាល់ឡាវ Chhang Prasit Khrotia ចំនួន២លើក នៅក្នុងទឹកទី២ រួចធ្វើការបញ្ឈប់តែម្តង បន្ទាប់ពី ឡឹក វិបុល បានទាត់ឱ្យ Chhang Prasit Khrotia ដួលទាំងឈឺចាប់ជាលើកទី៣នោះ។
ជាមួការផ្តួលកីឡាករឡាវឱ្យសន្លប់នេះ ឡឹក វិបុល បាននិយាយក្រោយការប្រកួតថា៖ «កីឡាករឡាវម្នាក់នេះ គាត់ល្អដៃ ប៉ុន្តែខ្ញុំបានផ្តួលគាត់ ដោយការទាត់ជើងក្រោម គឺខ្ញុំបានទាត់ចូលច្រើនជើងដែរ ហើយខ្ញុំមិននឹកស្មានថា ខ្លួនឯងអាចធ្វើបាននោះទេ ព្រោះយើងក៏ចាស់ហើយដែរ និងខានប្រកួតច្រើនឆ្នាំទៀត»។
សម្រាប់ការសម្រេចចិត្តវិលត្រឡប់ឡើងប្រកួតជាថ្មីនេះ ឡឹក វិបុល បានទម្លាយថា ដោយលោកមានការនឹករលឹកដល់សង្វៀនប៉ុស្តិ៍លេខ៥ ដែលជាកន្លែងលោកធ្លាប់បានសាងភាពល្បីខ្លាំងរហូតទទួលអាវមាស បន្ទាប់ពីបានរក្សាការឈ្នះ៣ឆ្នាំជាប់ៗគ្នា នៅសង្វៀននេះ ហេតុនេះ ឡឹក វិបុល មានបំណងចង់បង្ហាញអាវមាសដ៏មានកិត្តិយសរបស់ខ្លួននេះ ឱ្យអ្នកទស្សនានៅលើពិភពលោកបានឃើញ។
ទន្ទឹមនឹងនេះកីឡាករជើងចាស់ ឡឹក វិបុល ការតាំងចិត្តធ្វើឱ្យបានកាន់តែល្អ ចំពោះការបង្ហាញវត្តមានក្រោយៗទៀត។
វិបុល បានបញ្ជាក់ថា៖ «សម្រាប់ការឡើងប្រកួតជាបន្តទៀត ខ្ញុំគិតថា អាចល្អជាងការប្រកួតលើកនេះ ព្រោះឥឡូវយើងនៅមានក្បាលពោះបន្តិច តែខ្ញុំនឹងខំហ្វឹកហាត់សម្រកក្បាលពោះឱ្យបានរាងស្អាត ទើបខ្ញុំហ៊ានឡើងវ៉ៃទៀត»។
ដោយឡែក សម្រាប់ការប្រកួតមិត្តភាពអន្តរជាតិ ចំនួន៤គូទៀត នៅលើសង្វៀនប៉ុស្តិ៍លេខ៥ កាលពីយប់ថ្ងៃសៅរ៍នោះដែរ កីឡាករជើងខ្លាំង មឿន សុខហ៊ុច បានទាត់ឆ្វេងចូលឆ្អឹងជំនីរបណ្តាលឱ្យអ្នកប្រដាល់រុស្ស៊ី Alexsandr បោះបង់ការប្រកួតនៅដើមទឹកទី២ រីឯ ហ៊ឹម គីមរៀង បានទាត់អ្នកប្រដាល់របស់ចិន Lu Zuoxiang ឱ្យខូចជើងក្រោម នៅទឹកទី១ ចំណែក វៀត ប៊ុនឌឿន បានឈ្នះកីឡាករចិន Jiang Chengbao ដោយពិន្ទុទាំងលំបាក ប៉ុន្តែ ធា នុរាជ បានចាញ់កីឡាករឡាវ Sutee Mongkolpeth ដោយពិន្ទុ៕