![](https://pppkhmer.sgp1.digitaloceanspaces.com/image/main/20246/17_6_2024_img_6202hubkido.jpg)
មហាសន្និបាតបញ្ចប់អាណត្តិទី ៧ និងបន្តអាណត្តិថ្មីទី ៨ ឆ្នាំ ២០២៤-២០២៨របស់សហព័ន្ធខ្មែរកីឡាហាប់គីដូ នៅទីស្នាក់ការ គណៈកម្មាធិការជាតិ អូឡាំពិកកម្ពុជា (NOCC) កាលពីថ្ងៃទី១៦ ខែមិថុនា។ រូបថត សហការី
ប្រធានសហព័ន្ធខ្មែរកីឡា ហាប់គីដូ លោក សៅ សេងហាក់ បានធ្វើការប្តេជ្ញាចិត្តជាមួយនិងការដាក់គោលដៅជាក់លាក់ ដើម្បីពង្រីកវិសាលភាពកីឡា ហាប់គីដូ ឱ្យបានកាន់តែខ្លាំង ទាំងនៅក្នុងប្រទេស និងនៅលើឆាកអន្តរជាតិ ស្របពេលដែលក្រុមអត្តពលិកហាក់គីដូកម្ពុជា ក៏កំពុងត្រៀមខ្លួនចេញទៅប្រកួតជើងឯកពិភពលោក ជាប្រវត្តិសាស្រ្តលើកដំបូង បន្ទាប់ពីប្រភេទកីឡានេះ បានកកើតនៅលើទឹកដីកម្ពុជាអស់រយៈពេលជាង៥០ឆ្នាំមកនេះ។
លោក សៅ សេងហាក់ បានថ្លែងថា៖«ខ្ញុំសូមប្ដេជ្ញាចិត្ត នឹងរៀបចំការប្រកួតជ្រើសរើសជើងថ្នាក់ជាតិឱ្យបានរៀងរាល់ឆ្នាំ ដើម្បីជំរុញការអភិវឌ្ឍវិស័យកីឡា ហាប់គីដូ នេះឱ្យកាន់តែមានភាពរីកចម្រើនក្នុងថ្នាក់ជាតិ និង អន្តរជាតិ ហើយយើងក៏ប្តេជ្ញានឹងបន្តជំរុញទាំងការងាររដ្ឋបាល បណ្តុះបណ្តាល និងផលិតនូវធនធានមនុស្សឱ្យកាន់តែរីកចម្រើនជាលំដាប់ សម្រាប់ត្រៀមចូលរួមការប្រកួតថ្នាក់ជាតិ និង អន្តរជាតិស្របតាមគោលការណ៍សហព័ន្ធជាសកល»។
ការបង្ហាញពីការប្តេជ្ញាចិត្តបែបនេះរបស់ លោក សៅ សេងហាក់ គឺដើម្បីឆ្លើយតបទៅនឹងអ្នកពាក់ព័ន្ធនៅក្នុងវិស័យកីឡាហាក់គីដូទាំងអស់ ដែលបានផ្តល់ទំនុកចិត្ត និងគាំទ្រដល់រូបលោក ឱ្យបន្តធ្វើជាប្រធានសហព័ន្ធក្នុងអាណត្តិថ្មី អមដោយអនុប្រធាន ៥នាក់ គឺលោក ជា បូរ៉ា, លោក ផាត់ សុភា, លោក គួច ហុងជៀក, លោក ទេព វីរៈ និងលោក សែ តារា រីឯលោក គង់ ចាន់ធីណា បន្តធ្វើជាអគ្គលេខាធិការ អមដោយអគ្គលេខាធិការង ២រូប ព្រមទាំងអគ្គហេរញ្ញិក អគ្គហេរញ្ញិករង និងសមាជិក ៣នាក់ទៀតសរុប១៥នាក់។
នៅក្នុងមហាសន្និបាតបញ្ចប់អាណត្តិទី ៧ និងបន្តអាណត្តិថ្មីទី ៨ ឆ្នាំ ២០២៤-២០២៨របស់សហព័ន្ធខ្មែរកីឡាហាប់គីដូ នៅទីស្នាក់ការ គណៈកម្មាធិការជាតិ អូឡាំពិកកម្ពុជា (NOCC) កាលពីថ្ងៃទី១៦ ខែមិថុនា លោក សេងហាក់ ក៏បានបង្ហើបពីផែនការដ៏សំខាន់របស់សហព័ន្ធនេះ គឺការត្រៀមបញ្ជូនក្រុមកីឡាករ កីឡាការិនី ទៅចូលរួមប្រកួតកីឡា ហាប់គីដូ ជ្រើសរើសជើងឯកពិភពលោក (World LH.F Hapkido Championship 2024) នៅប្រទេសថៃ ដែលនឹងប្រព្រឹត្តទៅចាប់ពីថ្ងៃទី១ ដល់ថ្ងៃទី៤ ខែសីហា ឆ្នាំ២០២៤។
ការត្រៀមខ្លួនទៅចូលរួមការប្រកួត World LH.F Hapkido Championship 2024 នេះ បានឆ្លុះបញ្ជាំងឱ្យឃើញពីដំណើរនៃការតស៊ូដ៏វែងឆ្ងាយរបស់សហព័ន្ធខ្មែរកីឡាហាប់គីដូគឺមានរយៈពេលចូល ៥០ឆ្នាំមកហើយ ទើបទទួលបានឱកាសទៅចូលរួមការប្រកួតអន្តរជាតិ ជាលើកដំបូង ក្នុងឆ្នាំ២០២៤នេះ។
បន្ថែមលើនេះ លោក សៅ សេងហាក់ បានប្តេជ្ញាអភិវឌ្ឍ និងលើកកិត្យានុភាពហាប់គីដូកម្ពុជាឱ្យកាន់តែមានភាពល្បីល្បាញថែមទៀត។
លោកបញ្ជាក់ថា៖ «សហព័ន្ធនឹងពង្រីកវិសាលភាពកីឡាហាប់គីដូ ឱ្យទៅដល់បណ្តាខេត្ត និងចាប់យកឱកាសចេញទៅចូលរួមការប្រកួតនៅក្រៅប្រទេសឱ្យបានច្រើនតាមលទ្ធិភាព ដែលយើងអាចធ្វើទៅបាន ដើម្បីបង្កើតស្នាដៃ និងលើកកិត្យានុភាព ហាប់គីដូកម្ពុជារបស់យើងឱ្យកាន់តែល្បីល្បាញទាំងក្នុងប្រទេស និងលើឆាកអន្តរជាតិ»។
ជាមួយគ្នានេះ លោកវរសេនីយ៍ឯក គង់ ចាន់ធីណា អគ្គលេខាធិការសហព័ន្ធខ្មែរកីឡាហាប់គីដូ បានធ្វើរបាយការណ៍យ៉ាងលម្អិតពីចំណុចខ្លាំង និងចំណុចខ្សោយនៃការអភិវឌ្ឍកីឡាហាប់គីដូនៅកម្ពុជា។ ចំណុចខ្លាំង គឺគណៈកម្មាធិការប្រតិបត្តិសហព័ន្ធនេះ បានបំពេញការងារដោយមានការសហការគ្នាយ៉ាងល្អ និងមានការលះបង់ខ្ពស់ទាំងធនធាន និងពេលវេលាផ្ទាល់ខ្លួន ដើម្បីសម្រេចបាននូវសមិទ្ធផលជាច្រើន ជាពិសេសនៅក្នុងអាណត្តិទី៧ ឆ្នាំ២០២០-២០២៤ ក្រោមការដឹកនាំរបស់លោក សៅ សេងហាក់។
លោក ចាន់ធីណា បានបញ្ជាក់នៅក្នុងរបាយការណ៍ថា៖ «នៅក្នុងអាណត្តិទី៧ យើងឃើញថា ហាប់គីដូ មានការចាប់អារម្មណ៍ពីស្រទាប់មហាជន និងកងកម្លាំង ហើយកីឡាករ កីឡាការិនីដែលប្រកបដោយវិន័យអត្តចរិតសីលធម៌ល្អ និងមានសាមគ្គីភាព កាន់តែបង្កើនបាននូវសមត្ថភាពបច្ចេកទេសខ្ពស់ថែមទៀត។ ក្នុងនោះសហព័ន្ធ បានយកចិត្តទុកដាក់ខ្ពស់លើយន្តការការងាររដ្ឋបាល និងផែនការអភិវឌ្ឍកីឡាកម្រិតជាតិឱ្យមានប្រសិទ្ធភាព ដើម្បីសម្រេចបាននូវគោលដៅអភិវឌ្ឍប្រកបដោយចីរភាពឈានទៅរកកម្រិតអន្តរជាតិ»។
ចំណែកចំណុចខ្សោយវិញ គឺសហព័ន្ធខ្មែរហាក់គីដូ នៅពុំទាន់មានកញ្ចប់ថវិកាពីក្រសួងអប់រំ យុវជន និងកីឡា សម្រាប់រៀបចំព្រឹត្តិការណ៍ប្រកួតផ្សេងៗឱ្យបានទៀតទាត់ឡើយ ហើយចំពោះបញ្ហានេះ លោក សៅ សេងហាក់ ក៏បានដាក់គោលដៅ ស្វែងរកប្រភពចំណូលបន្ថែមទៀត ក្នុងការបន្តអភិវឌ្ឍកីឡាហាប់គីដូឱ្យបានយូរអង្វែងផងដែរ។
ជាមួយគ្នានេះ លោក ទុយ ប៊ុនហឿន អនុប្រធាននាយកដ្ឋានអប់រំកាយ និងកីឡា នៃក្រសួងអប់រំ យុវជន និងកីឡា បានគូសបញ្ជាក់ថា បច្ចុប្បន្ន សហព័ន្ធកីឡាជាតិមានចំនួនសរុប ៦០ ហើយក្នុងនោះមានសហព័ន្ធកីឡាជាតិចំនួន ៤៨ ទទួលបានកញ្ចប់ថវិកាគាំទ្រប្រចាំឆ្នាំពីក្រសួង អប់រំ យុវជន និងកីឡា ដើម្បីដំណើរការអភិវឌ្ឍ។
លោកបានបន្តថា ដោយឡែក សម្រាប់ប្រភេទកីឡា ហាប់គីដូ គឺមិនទាន់ទទួលបានកញ្ចប់ថវិកាអភិវឌ្ឍន៍ប្រចាំឆ្នាំនៅឡើយ ហើយនៅក្នុងបញ្ហានេះ លោក ទុយ ប៊ុនហឿន បានប្រាប់ឱ្យគណៈកម្មាធិការប្រតិបត្តិថ្មីរបស់សហព័ន្ធខ្មែរហាប់គីដូ ដែលមានលោក សៅ សេងហាក់ ជាប្រធាន ស្នើសុំកញ្ចប់ថវិកាគាំទ្រពីក្រសួង អប់រំ យុវជន និងកីឡា ហើយក្រសួងអប់រំនឹងពិនិត្យពិចារណា ដើម្បីស្នើសុំបន្តទៅក្រសួងសេដ្ឋកិច្ច និង ហិរញ្ញវត្ថុ៕