ការប្រកួតបើកឆាករវាងក្រុម Royal D FT (ពណ៌ស) និងក្រុម Centurion នៅទីលាន T-Soccer កាលពីថ្ងៃទី១០ ខែសីហា ឆ្នាំ២០២៤។ រូបថត ឈន ណន
កីឡាករជាសិស្សនិស្សិតជាង ២០០ នាក់ ដែលអ្នកខ្លះបានបញ្ចប់ការសិក្សាថ្នាក់មហាវិទ្យាល័យទៅហើយនោះ បានយកទីលានបាល់ទាត់ហ្វុតសាល T-Soccer នៅម្តុំទួលគោក ជាកន្លែងជួបជុំគ្នា ដើម្បីប្រកួតបាល់ទាត់ដណ្តើមពានរង្វាន់ CamEd Men's Futsal Tournament ប្រចាំឆ្នាំ ២០២៤។
ការប្រកួតពាន CamEd Men's Futsal Tournament ឆ្នាំ២០២៤នេះ មានសិស្សនិស្សិតចូលរួមចំនួន២២៧នាក់ លេងតំណាងឱ្យចំនួន១៩ ក្នុងនោះសិស្សនិស្សិតកំពុងសិក្សាបរិញ្ញាបត្រចំនួន១០ក្រុម និងអតីតនិស្សិត និស្សិតបរិញ្ញាបត្រជាន់ខ្ពស់ និងសិស្សសិក្សាកម្មវីធី ACCA/CAT ចំនួន៩ក្រុម។
ការប្រកួតបានចាប់ផ្តើមកាលពីថ្ងៃទី១០ ខែសីហា នឹងគ្រោងបញ្ចប់នៅថ្ងៃទី៧ ខែកញ្ញា។
បើទោះបីជាការប្រកួត ដែលត្រូវបានរៀបចំឡើង ដោយវិទ្យាស្ថានខេមអេដនេះ មិនមានផ្តល់ប្រាក់រង្វាន់ សម្រាប់ក្រុមដែលទទួលបានជយលាភី ប៉ុន្តែក្រុមនិស្សិតដែលចូលរួមទាំងអស់ បានយកចិត្តទុកដាក់ខ្លាំងក្នុងការប្រកួតប្រជែងគ្នា ដើម្បីទាញយកអត្ថប្រយោជន៍ពីការលេងបាល់ទាត់នេះទៅពង្រឹងជំនាញ និងបទពិសោធន៍ជីវិតក្រៅម៉ោងសិក្សា ទៅតាមការចង្អុលបង្ហាញរបស់សាស្ត្រាចារ្យ។
នៅក្នុងពិធីបើកការប្រកួត កាលពីសៅរ៍ លោក ព្រុំ វិរៈ និងលោក Kenneth Paul Charman ជាសាស្ត្រាចារ្យប្រចាំវិទ្យាស្ថានខេមអេដ បានលើកឡើងពីសារៈសំខាន់របស់កីឡាចំពោះក្រុមនិស្សិត ដែលផ្តល់ផលប្រយោជន៍ចំពោះសុខភាពរាងកាយ និងផ្លូវចិត្ត ជាពិសេសបទពិសោធន៍ទទួលបានពីការលេងកីឡា បានក្លាយជាមេរៀនជីវិតយ៉ាងសំខាន់ ដើម្បីជួយឱ្យក្រុមនិស្សិត ចេះធ្វើការងារជាក្រុម ចេះធ្វើការងារក្រោមសម្ពាធដើម្បីភាពជោគជ័យ ហើយការឈ្នះ ចាញ់ នៅក្នុងការលេងកីឡានឹងបង្រៀនឱ្យពួកគេចេះទទួលស្គាល់ការពិត។
លោកសាស្រ្តាចារ្យ ព្រុំ វិរៈ បាននិយាយនៅចំពោះមុខក្រុមនិស្សិតទាំងអស់បែបនេះថា៖«ខ្ញុំដឹងថា អ្នកទាំងអស់គ្នាបានហ្វឹកហាត់ និងត្រៀមខ្លួនរួចរាល់សម្រាប់ការប្រកួតនេះ ប៉ុន្តែខ្ញុំមិនខ្វល់ថា ក្រុមណានឹងទទួលបានជ័យជម្នះនោះទេ។ អ្វីដែលខ្ញុំខ្វល់ គឺសូមឱ្យអ្នកទាំងអស់គ្នាប្រកួតប្រជែងដោយក្តីស្រលាញ់ ដែលបង្ហាញឱ្យឃើញនូវអាកប្បកិរិយាល្អ និងគោរពតាមបទបញ្ជាប្រកួតរបស់អាជ្ញាកណ្តាល ដើម្បីឱ្យអ្នកទាំងអស់គ្នាទទួលបាននូវអត្ថប្រយោជន៍ និងបទពិសោធន៍ល្អៗពីការលេងកីឡានេះ»។
ចំណែកនិស្សិតឆ្នាំទី៤ នៅវិទ្យាស្ថានខេមអេដ ប៊ុន គឹមឡុង ដែលជាសមាជិកក្រុម Royal D FT បាននិយាយថា៖ «សាលាតែងតែរៀបចំឱ្យមានការប្រកួតកីឡារហូត ដែលបានជួយដល់ពួកខ្ញុំមែនទែន ព្រោះយើងមិនត្រឹមតែបានរៀនទេ ប៉ុន្តែយើងបានលេងកីឡាដើម្បីលំហែអារម្មណ៍ទៀត ហើយខ្ញុំជឿថា ការលេងកីឡា ពិតជាផ្តល់អត្ថប្រយោជន៍ច្រើន ដែលធ្វើឱ្យយើងមានស្មារតីរឹងមាំ មានទស្សនៈវែងឆ្ងាយ និងចេះធ្វើការងារជាក្រុម ដោយមានសាមគ្គីភាពល្អ»។
គួររំឭកថា ក្រៅពីការរៀបចំឱ្យមានការប្រកួតបាល់ទាត់បុរសដណ្តើមពានរង្វាន់ CamEd Men's Futsal Tournament នេះ វិទ្យាស្ថានខេមអេស ក៏បានរៀបចំឱ្យមានការប្រកួតបាល់ទាត់នារីក្នុងសាល បាល់បោះ (បុរស-នារី) និងការប្រកួតកីឡាអត្តពលកម្មជារៀងរាល់ឆ្នាំផងដែរ ដើម្បីផ្តល់ឱកាសឱ្យសិស្សនិស្សិតរបស់ខ្លួនបានលេងកីឡា និងទទួលបានបទពិសោធន៍ជីវិតបន្ថែមទៅលើចំណេះដឹងទទួលបានពីការសិក្សានៅក្នុងសាលា។
បន្ថែមលើនេះ ខេមអេដ បានក្លាយជាសាលាគំរូមួយ ក្នុងការប្រកួតកីឡាឧត្តមសិក្សានិងមធ្យមសិក្សាបច្ចេកទេសប្រចាំឆ្នាំ ដែលរៀបចំដោយក្រសួងអប់រំ យុវជន និងកីឡា ដោយសាលានេះ តែងតែបានបញ្ជូនប្រតិភូកីឡាទៅប្រកួត ហើយគោរពនូវបទបញ្ជា និងលក្ខន្តិកប្រកួតបានល្អ ពិសេសក្រុមកីឡាករ កីឡាការិនីរបស់ខេមអេស តែងដណ្តើមបានលទ្ធផលល្អ គឺមកដល់ពេលនេះ ពួកគេទទួលបានមេដាយមាសចំនួន១៩ ប្រាក់១០ និងសំរឹទ្ធ១៦។
ជាមួយគ្នានេះ នាយកវិទ្យាស្ថានខេមអេដលោក Casey Barnett បានឱ្យតម្លៃសំខាន់លើបទពិសោធន៍ដែលបានពីការលេងកីឡា។ លោកអះអាងថា រាល់ឧបសគ្គ សម្ពាធ ភាពឈឺចាប់ និងភាពអំណត់អត់ធន់ ដែលកើតមាននៅក្នុងការប្រកួតកីឡា ជាមេរៀនជោគជ័យយ៉ាងសំខាន់សម្រាប់ក្រុមនិស្សិត នៅពេលពួកគេចេញធ្វើការ ឬបើកអាជីវកម្មអ្វីមួយ។
អ្នកជំនាញផ្នែកគណនេយ្យមកពីសហរដ្ឋអាមេរិក លោក Casey បានឱ្យដឹងទៀតថា និស្សិត ដែលលេងកីឡាភាគច្រើនជាអ្នករៀនពូកែ ហើយមានស្មារតីរឹងមាំ និងមានការតស៊ូខ្ពស់ក្នុងការជម្នះឧបសគ្គនៅចំពោះមុខ ក្នុងការឆ្ពោះទៅរកការទទួលបានភាពជោគជ័យ។
លោក Casey ធ្លាប់បានប្រាប់ភ្នំពេញប៉ុស្តិ៍ថា៖ «ខ្ញុំទទួលស្គាល់ពីអត្ថប្រយោជន៍ដែលទទួលបានពីការលេងកីឡា ដោយវាបង្កើនឱ្យមានភាពជោគជ័យ នៅពេលយើងចូលធ្វើការ រកស៊ីឬធ្វើអ្វីមួយ ព្រោះបទពិសោធន៍បានពីការលេងកីឡាវាជាមេរៀនជួយឱ្យយើងមានការប្រកួតប្រជែងដើម្បីឈ្នះ ជួយឱ្យយើងចេះខិតខំដើម្បីមានជោគជ័យ ក្នុងការកំណត់គោលដៅ»។
លោកបញ្ជាក់ថា៖ «យើងឃើញនិស្សិតច្រើន ដែលជាអតីតកីឡាករ កីឡាការិនីរបស់យើង គឺពេលពួកគេចូលធ្វើការងារ គេទទួលបានជោគជ័យ និងឡើងតួនាទីលឿន ព្រោះនិស្សិតលេងកីឡា មានការខិតខំធ្វើការងារ ចេះកំណត់គោលដៅ ចេះវាយតម្លៃខ្លួនឯង និងចេះកែចំណុចខ្សោយខ្លួនឯង ដ្បិតអីការឈ្នះ ចាញ់ នៅពេលលេងកីឡា វាបានបណ្តុះគំនិតឱ្យយើងចេះវាយតម្លៃទៅលើខ្លួនឯង»៕
