លោក ថោង ខុន ក្នុងពេលទទួលប្រតិភូកីឡាកម្ពុជា នៅព្រលានយន្តហោះអន្តរជាតិភ្នំពេញ កាលពីថ្ងៃចន្ទ។ រូបថត សហការី
ក្រុមប្រតិភូកីឡាកម្ពុជា បានបញ្ចប់បេសកកម្មការចូលរួមប្រកួតកីឡាអូឡាំពិកហ្គេម (Olympic Games Paris 2024) នៅទីក្រុងប៉ារីស ប្រទេសបារាំង ជាផ្លូវការហើយ ហើយពួកគេ បានវិលត្រឡប់មកដល់មាតុប្រទេសវិញ កាលពីរសៀលថ្ងៃទី១៤ ខែសីហា ដោយមានការស្វាគមន៍យ៉ាងកក់ក្តៅពីលោកទេសរដ្ឋមន្រ្តី ថោង ខុន ប្រធានគណៈកម្មាធិការជាតិអូឡាំពិកកម្ពុជា (NOCC) និងថ្នាក់ដឹកនាំកីឡាមួយចំនួនទៀត នៅព្រលានយន្តហោះអន្តរជាតិភ្នំពេញ។
សម្រាប់ការប្រកួតប្រជែង នៅអូឡាំពិកហ្គេម ដោយបានចាប់ផ្តើម កាលពីថ្ងៃទី២៦ ខែកក្កដា និងបានបញ្ចប់កាលពីថ្ងៃទី១១ ខែសីហា ឆ្នាំ២០២៤នេះ ក្រុមអត្តពលិកទាំង៣នាក់របស់កម្ពុជា មិនអាចបំបែកកំណត់ត្រារបស់ខ្លួនឯងទៅតាមការតាំងចិត្តនោះទេ។ ប៉ុន្តែលោក ថោង ខុន នៅតែវាយតម្លៃខ្ពស់ទៅលើកិច្ចខិតខំប្រឹងប្រែងរបស់ពួកគេ រួមទាំងប្រតិភូកីឡាកម្ពុជា ដែលនៅតែអាចរក្សាបាននូវកិត្តិយសជូនជាតិ។
លោក ថោង ខុន បានថ្លែងក្នុងពេលទទួលប្រតិភូកីឡាកម្ពុជា នៅព្រលានយន្តហោះអន្តរជាតិភ្នំពេញ កាលពីថ្ងៃចន្ទនោះថា៖ «ការចូលរួមកីឡាអូឡាំពិកនេះ ពិតជាសំខាន់ណាស់ សម្រាប់កម្ពុជាយើង គឺជាមោទនភាព ដែលយើងបានចូលរួមក្នុងព្រឹត្តិការណ៍អន្តរជាតិដ៏កំពូលដោយរក្សាបាននូវកិត្តិយស ការគោរពវិន័យ និងគោរពបច្ចេកទេសបានត្រឹមត្រូវ។ នេះជាកិត្តិយសដ៏សំខាន់សម្រាប់ប្រទេសជាតិយើង»។
«ចំណែកកីឡាករ កីឡាការិនីយើង គឺជាប្រវត្តិសាស្រ្ត ដែលបានចូលរួមប្រកួតហើយ ហើយមិនមានកំហុស និងបានរៀនសូត្រពីបច្ចេកទេស ព្រមទាំងរៀនពីបទបញ្ញត្តិ និងបទបញ្ជានានាពីការប្រកួតនេះ។ រីឯនាយកបេសកកម្ម ខាងគ្រូពេទ្យព្យាបាល និងផ្នែករដ្ឋបាលផ្សេងៗទៀត ក៏បំពេញការងារបានល្អ គឺជារួមឆ្លងកាត់ព្រឹត្តិការណ៍អូឡាំពិកលើកនេះ កម្ពុជារក្សាបាន និងលើកកម្ពស់បាននូវកិត្តិយសជូនជាតិយ៉ាងល្អ»។ លោក ថោន ខុន បានបន្ថែម។
ចំណែកលោក ញ៉ាន សុខវិសាល ជានាយបេសកកម្មក្នុងការប្រកួតអូឡាំពិកនេះ បាននិយាយថា៖ «បេសកកម្មរយៈពេល៣សប្តាហ៍បានបញ្ចប់ ហើយជាលទ្ធផលបច្ចេកទេស យើងមិនដណ្តើមបានមេដាយទេ ប៉ុន្តែមិនមែនមានន័យថា មានតែកម្ពុជាមួយទេ ព្រោះបើមើលទៅលើតារាងមេដាយសរុប គឺក្នុងចំណោម ២០៦អូឡាំពិក មានតែ៨៤ប្រទេសទេ ដែលបានមេដាយ អ៊ីចឹងកម្ពុជា បានស្ថិតក្នុងចំណោមប្រទេសជាង១០០ទៀត ដែលមិនបានមេដាយ ហើយជាក់ស្តែងកម្ពុជា មានអត្តពលិកចូលរួមតែ៣រូបទេ»។
សម្រាប់លទ្ធផលនៃការប្រកួតនៅអូឡាំពិកហ្គេម ឆ្នាំ២០២៤នេះ កីឡាករជាម្ចាស់មេដាយមាសស៊ីហ្គេម ឆ្នាំ២០២៣ ឈុន ប៊ុនថន បានបញ្ចប់ការប្រកួតទាំង២លើករបស់ខ្លួន លើវិញ្ញាសារត់ចម្ងាយ៨០០ម៉ែត្រ ជាមួយថិរវេលា១:៥៣.៣១ម៉ោងដូចគ្នា។ មានន័យថា ប៊ុនថន មិនអាចបំបែកកំណត់ត្រាចាស់ ដែលរូបគេធ្លាប់ធ្វើបានល្អបំផុត គឺ ១:៥០.០៩ ម៉ោង ក្នុងការប្រកួតកីឡាអត្តពលកម្មជើងឯកអាស៊ី (Asian Athletics Championship) ឆ្នាំ២០២៣ នៅក្រុងបាងកក ប្រទេសថៃឡើយ។
ចំណែកកីឡាករហែលទឹកកូនខ្មែរ-បារាំង ដឺឡាប៉ារង អង់ត្វ័ន បានបញ្ចប់ការប្រកួតហែលសេរីចម្ងាយ១០០ម៉ែត្រ ដោយប្រើពេល ៥២:៩៥ វិនាទី ជាប់ចំណាត់លេខ៣ក្នុង heat ហើយមានចំណាត់ថ្នាក់រួមទី៦៧ ក្នុងចំណោមកីឡាករទាំង៧៩នាក់ ដែលប្រកួតលើវិញ្ញាសានេះ។
រីឯកីឡាការិនីកូនកាត់ខ្មែរ-អាមេរិកកាំង សាក់ប៊ុន អប្សរា កាតារីណា បានប្រើពេល ២៦:៩០វិនាទី លើការហែលសេរីចម្ងាយ៥០ម៉ែត្រ ដោយជាប់លេខ៣៨លើពិភពលោកក្នុងចំណោម៧៩ប្រទេស ប៉ុន្តែថិរវេលានេះ បានធ្លាក់ចុះបើធៀបនឹងថិរវេលា ២៦:២៤ វិនាទី ដែល អប្សរា ធ្លាប់ធ្វើបាននៅស៊ីហ្គេម ឆ្នាំ២០២៣។
ជុំវិញការប្រកួតនៅកីឡាអូឡាំពិកហ្គេមនេះ កីឡាករ ឈុន ប៊ុនថន បាននិយាយថា៖ «ខ្ញុំបានប្រឹងប្រែងហាត់ដែរ ដើម្បីបំបែកកំណត់ត្រាចាស់របស់ខ្លួនឯង ប៉ុន្តែមិនអាចបំបែកបាន ព្រោះខ្ញុំរបួសកជើង គឺដុះឆ្អឹងនៅត្រង់កន្លែងកជើងហ្នឹង»។
តែទោះបីជាយ៉ាងណា ប៊ុនថន បញ្ជាក់ថា៖ «យើងបានបង្ហាញភាពក្លាហាន និងបង្ហាញពីចលនាអូឡាំពិក ដោយមិនបោះបង់ការប្រកួត ទោះយើងឈឺជើងក៏ដោយ អ៊ីចឹងយើងបានលើកទង់ជាតិរបស់យើង បង្ហាញពីកេរ្តិ៍ឈ្មោះប្រទេសជាតិយើងថា យើងមិនបោះបង់ការប្រកួតចោលទេ។ នេះជាកិត្តិយសមួយសម្រាប់ខ្ញុំ ក្នុងការចូលរួមកីឡាអូឡាំពិក ជាលើកដំបូងនេះ»។
ជាមួយគ្នានេះ នាយកបេសកកម្ម លោក ញ៉ាន សុខវិសាល បានឱ្យដឹងទៀតថា វាជាមោទនភាព ដែលក្រុមអត្តពលិកកម្ពុជា បានប្រកួតស្មើមុខស្មើមាត់ជាមួយប្រទេសទាំងអស់នៅលើពិភពលោក ហើយប្រតិភូកីឡាកម្ពុជា បានទទួលការសាទរច្រើន សូម្បីតែទូក ដែលប្រតិភូកម្ពុជាជិះនៅក្នុងពិធីបើកកីឡាអូឡាំពិក ក៏ជាទូតមានតម្លៃថ្លៃកម្រិតផ្កាយ៧របស់សណ្ឋាគារប្រចាំនៅទីក្រុងប៉ារីស។
ចំណែកនៅក្នុងពិធីបិទកីឡាអូឡាំពិកវិញ លោក សុខវិសាល បានអះអាងថា វាកាន់តែមានភាពអស្ចារ្យ ដែលតារាចម្រៀងរ៉េប វណ្ណដា បានទៅពញ្ញាក់អារម្មណ៍របស់ប្រជាជនខ្មែរយើងទាំងអ្នករស់នៅបារាំងក្តី និងនៅលើពិភពលោក ជាពិសេសមិត្តភក្តិបរទេសរបស់កម្ពុជាទាំងអស់ ដោយពួកគាត់មានការកោតសរសើរ និងបានសួរនាំច្រើនថាតើហេតុអ្វីតារាចម្រៀងកម្ពុជាមានលទ្ធភាពបានឡើងច្រៀងនៅក្នុងពិធីបិទកីឡាអូឡាំពិកនេះ។
លោក ញ៉ាន សុខវិសាល បញ្ជាក់ថា៖ «ភាពអស្ចារ្យបានកើតមានឡើង ដោយសារ វណ្ណដា បានឡើងទៅច្រៀងលើឆាកធំ ដែលមានតារាចម្រៀងតែប៉ុន្មានទេបានឡើងលើឆាកធំនោះ ហើយនេះជាមោទនភាពមួយ ចំណែកក្មេងៗជាកីឡាករ កីឡាការិនី ព្រមទាំងគ្រូបង្វឹក និងរូបខ្ញុំផ្ទាល់ ពិតជាមានមោទនភាព និងរំភើបរកអ្វីថ្លែងមិនបាន»៕
