លោកទេសរដ្ឋមន្ត្រី កែវ រ៉េមី ប្រធានគណៈកម្មការសិទ្ធិមនុស្សកម្ពុជា និងជាប្រធានសហព័ន្ធកីឡាតេក្វាន់ដូ ITF កម្ពុជាក្នុងសន្និសីទសារព័ត៌មាន នៅមជ្ឈមណ្ឌលជាតិហ្វឹកហ្វឺនកីឡា កាលពីល្ងាចថ្ងៃទី១៦ ខែសីហា។ រូបថត សហការី
លោកទេសរដ្ឋមន្ត្រី កែវ រ៉េមី ប្រធានគណៈកម្មការសិទ្ធិមនុស្សកម្ពុជា និងជាប្រធានសហព័ន្ធកីឡាតេក្វាន់ដូ ITF កម្ពុជា បានផ្តល់ការជឿជាក់ខ្លាំងទៅលើក្រុមកីឡាករ កីឡាការិនីតេក្វាន់ដូ ITF កម្ពុជា ថានឹងអាចដណ្តើមបានមេដាយច្រើនពីការប្រកួតកីឡាតេក្វាន់ដូ ITF ជ្រើសរើសជើងឯកអាស៊ី លើកទី១០ នៅប្រទេសឥណ្ឌាខាងមុខនេះ ដើម្បីលើកមុខមាត់ និងកិត្តិយសរបស់ជាតិជាមិនខាន។
ក្នុងសន្និសីទសារព័ត៌មាន នៅមជ្ឈមណ្ឌលជាតិហ្វឹកហ្វឺនកីឡា កាលពីល្ងាចថ្ងៃទី១៦ ខែសីហា លោក កែវ រ៉េមី បានបង្ហាញពីសក្តានុពលរបស់ក្រុមកីឡាតេក្វាន់ដូ ITFកម្ពុជា ដែលធ្លាប់ឈ្នះមេដាយមាស ពីការប្រកួតកម្រិតអាស៊ីអាគ្នេយ៍រាប់ភ្លេច ហើយក៏ធ្លាប់ឈ្នះបានមេដាយមាស ប្រាក់ និងសំរឹទ្ធ ពីការប្រកួតកម្រិតអាស៊ី និងពិភពលោកផងដែរ។
យ៉ាងណាក៏ដោយ សម្រាប់ការចេញទៅប្រកួតកីឡាតេក្វាន់ដូ ITF ជើងឯកអាស៊ី នៅប្រទេសឥណ្ឌា លើកនេះ កីឡាករ ប៉ាល់ ជីវ័ន ដែលធ្លាប់ឈ្នះបានមេដាយមាសពីការប្រកួតជើងឯកពិភពលោក ឆ្នាំ២០១៩ នៅប្រទេស ប៊ុលហ្គារី នឹងទៅចូលរួមក្នុងនាមជាគ្រូបង្វឹកវិញម្តង។
ចំណែកកីឡាករ នេត្រ ហាក់នី ដែលធ្លាប់ឈ្នះមេដាយមាសពីការប្រកួតជើងឯកអាស៊ី លើវិញ្ញាសាបំបែកក្តារ និងកីឡាករជាម្ចាស់មេដាយសំរឹទ្ធពិភពលោកលើវិញ្ញាសាប្រយុទ្ធ ហ៊ោ វិចិត្រ សុទ្ធតែមានភារកិច្ចផ្ទាល់ខ្លួន មិនអាចចូលរួមបានដូចគ្នា។
លោក កែវ រ៉េមី បានថ្លែងថា៖ «ក្រុមកីឡាតេក្វាន់ដូ ITFរបស់យើង មានសក្តានុពលខ្លាំង ដោយធ្លាប់ឈ្នះបានមេដាយមាស ប្រាក់ និងសំរឹទ្ធ ទាំងការប្រកួតកម្រិតអាស៊ាន អាស៊ី និងពិភពលោក តែសម្រាប់អ្នកធ្លាប់ឈ្នះមេដាយមាសពីការប្រកួតជើងឯកអាស៊ីក្តី និងពិភពលោកក្តី គឺគាត់មិនបានចូលរួមការប្រកួតនៅឥណ្ឌាលើកនេះទេ ដូចជាលោកគ្រូ ប៉ាល់ ជីវន្ត ដែលយើងសង្ឃឹមថា ស៊ីផុយយកមេដាយមាសហ្នឹង គឺយើងបាត់មួយហើយ»។
យ៉ាងណាក៏ដោយ នៅក្នុងចំណោមអត្តពលិកទាំង១៧នាក់ (ស្រី៦នាក់) ដែលត្រូវចេញទៅប្រកួតលើកនេះ លោក កែវ រ៉េមី អះអាងថា ក៏នៅមានកីឡាករ កីឡាការិនីជើងចាស់ធ្លាប់ឈ្នះបានមេដាយមួយចំនួន និងមានអ្នកថ្មី ដែលពោរពេញដោយសក្តានុពល ក្នុងការប្រជែងយកមេដាយ ហើយលោកបានដាក់ក្តីសង្ឃឹមលើប្រភេទវិញ្ញាសាការការពារខ្លួន (បុរស-នារី) វិញ្ញាសាបំបែកក្តារ វិញ្ញាសាប្រយុទ្ធទម្ងន់ស្រាល និងវិញ្ញាសាបច្ចេកទេសលោតទាត់យកកម្ពស់ ជាដើម។
លោកបានបញ្ជាក់ថា៖ «យើងមានសង្ឃឹមច្រើន តែយើងក៏នៅមានបញ្ហាប្រឈមដែរ ព្រោះការប្រកួតកម្រិតអាស៊ីលើកនេះ មានប្រទេសចូលរួមច្រើន ពិសេសកូរ៉េខាងត្បូង ដែលជាម្ចាស់ក្បាច់គុននេះ បានបញ្ជូនក្រុមអត្តពលិកមកច្រើន ដែលនេះជាការប្រឈមធំជាងគេរបស់ក្រុមអត្តពលិកយើង ចំណែករុស្ស៊ី និងកាហ្សាក់ស្ថាន បានបញ្ជូនក្រុមអត្តពលិកមកច្រើនដូចគ្នា ហើយក៏ជាជើងខ្លាំង ដែលយើងត្រូវតែប្រុងប្រយ័ត្ន»។
ប៉ុន្តែចំពោះប្រទេសផ្សេងៗទៀត រួមទាំងឥណ្ឌា ជាម្ចាស់ផ្ទះ ដែលមានកីឡាករ កីឡាការិនីច្រើនជាងគេនោះ មិនស្ថិតនៅក្នុងការបារម្ភរបស់ក្រុមអត្តពលិកកម្ពុជានោះទេ ហើយនេះជាអ្វីដែលលោក កែវ រ៉េមី នៅតែជឿជាក់ថា ក្រុមកម្ពុជា នឹងដណ្តើមបានមេដាយច្រើនជូនជាតិ។
លោកបញ្ជាក់ថា៖ «ពូសង្ឃឹមទៅលើកូនៗទាំងអស់ថា នឹងនាំមុខមាត់ កិត្តិយសជូនជាតិមាតុភូមិរបស់យើងឱ្យបាន»។
បើតាមលោក បួនហ៊ីង សុធីយ៉ា អគ្គលេខាធិការសហព័ន្ធកីឡាតេក្វាន់ដូ ITF កម្ពុជា បានឱ្យដឹងថា ការប្រកួតកីឡាតេក្វាន់ដូ ITF ជើងឯកអាស៊ី នៅឥណ្ឌាលើកនេះ ប្រមូលផ្តុំដោយក្រុមអត្តពលិកខ្លាំងៗមកពីជាង៣០ប្រទេស។ ចំណែកកម្ពុជា នឹងបញ្ជូនប្រតិភូកីឡាទៅចូលរួមចំនួន២៧រូប ដោយត្រូវចេញពីកម្ពុជា នាព្រឹកថ្ងៃទី១៩ ខែសីហា ហើយត្រឡប់មកដល់មាតុភូមិវិញ នៅថ្ងៃទី២៥ ខែសីហា។
ជាមួយគ្នានេះលោក សុធីយ៉ា បានបង្ហាញពីមោទនភាព ដែលកម្ពុជាបានបញ្ជូនក្រុមកីឡាការិនីច្រើននាក់ទៅប្រកួត។
លោកបញ្ជាក់ថា៖ «ក្រុមអត្តពលិករបស់យើង នឹងចូលរួមប្រកួតគ្រប់វិញ្ញាសាទាំងអស់ ហើយយើងពិតជាមានមោទនភាព ដែលសហព័ន្ធ បានបញ្ជូនកីឡាការិនីដ៏ច្រើនលើសលុប មិនធ្លាប់មានទៅប្រកួតជើងឯកអាស៊ី លើកនេះ ព្រោះរាល់ដង យើងបញ្ជូនបានត្រឹម២នាក់ តែលើកនេះយើងមានកីឡាការិនីរហូតដល់៦នាក់ ហើយនេះជាឱកាសដ៏ល្អ ដែលពួកគេ នឹងទទួលបានបទពិសោធន៍ សម្រាប់ត្រៀមធ្វើម្ចាស់ផ្ទះការប្រកួតជើងឯកអាស៊ាន នៅឆ្នាំក្រោយ»។
ចំណែកកីឡាករជើងចាស់ ធ្លាប់ឈ្នះមេដាយមាសជើងឯកអាស៊ី និងជាម្ចាស់មេដាយប្រាក់ជើងឯកពិភពលោក តាំង សៀសុង ដែលត្រូវប្រកួតវិញ្ញាសាមេគុនកម្រិត ៤ដាន់ ប្រយុទ្ធទម្ងន់ក្រោម ៧៨គីឡូក្រាម និង វិញ្ញាសាក្រុមបុរស បានកត់សម្គាល់ឃើញថា ម្ចាស់ក្បាច់គុនកូរ៉េខាងជើង រុស្ស៊ី និង កាហ្សាក់ស្ថាន សុទ្ធតែខ្លាំងៗ ហើយមានកម្ពស់ខ្ពស់ និងមានគុណភាពបច្ចេកទេសល្អជាងកម្ពុជា ប៉ុន្តែ សៀសុង បានតាំងចិត្តថា នឹងប្រឹងប្រែងឱ្យអស់ពីលទ្ធភាព ដើម្បីប្រជែងយកមេដាយ។
តាំង សៀសុង បញ្ជាក់ថា៖ «ខ្ញុំបានត្រៀមខ្លួនរួចហើយ ហើយខ្ញុំប្តេជ្ញាចិត្តនឹងព្យាយាមធ្វើឱ្យអស់ពីលទ្ធភាព ដើម្បីរកជ័យជម្នះជូនជាតិមាតុភូមិ»។
ប៉ុន្តែ សៀសុង មិនទាន់ហ៊ានកំណត់គោលដៅថា នឹងអាចដណ្តើមបានមេដាយកម្រិតណានោះទេ ដោយនិយាយថា៖ «ខ្ញុំមិនទាន់ហ៊ាននិយាយបាននោះទេ ដោយសារតែការប្រកួតប្រជែងនឹងមានភាពស្វិតស្វាញខ្លាំង។ ពេលយើងខ្ញុំទៅដល់កន្លែងប្រកួត យើងនឹងព្យាយាមធ្វើឱ្យបានល្អបំផុត តាមតែអាចធ្វើទៅបាន»៕
