កីឡាករក្រុមស្រីលង្កា រត់ស្រែកអបអរ ក្រោយយកឈ្នះក្រុមជម្រើសជាតិកម្ពុជា ក្នុងការប្រកួតជម្រុះពានរង្វាន់ AFC Asian Cup Saudi Arabia 2027 កាលពីយប់មិញ។ រូបថត សហការី
ក្រុមជម្រើសជាតិកម្ពុជា មិនអាចរក្សាគ្រាប់បាល់នាំមុខ ២-១ របស់ខ្លួនដល់ទីបញ្ចប់ ដើម្បីយកឈ្នះក្រុមជម្រើសជាតិស្រីលង្កានោះទេ គឺពួកគេបានរហូត១គ្រាប់វិញ នៅនាទីចុងក្រោយនៃម៉ោងបន្ថែម១៥នាទី២ដង រួចបានបន្តចាញ់ក្នុងការទាត់បាល់ប៉េណាល់ទីកាត់សេចក្តី និងបានធ្លាក់ចេញពីការប្រកួតជម្រុះពានរង្វាន់ AFC Asian Cup Saudi Arabia 2027 ដ៏គួរឱ្យសោកស្តាយបំផុត។
ក្រុមជម្រើសជាតិស្រីលង្កា ក្រោមការដឹកនាំរបស់គ្រូបង្គោលលោក Abdullah Almutairi បានរត់ទៅបំពាក់បំពួនគ្នា ដើម្បីអបអរជ័យជម្នះរបស់ខ្លួន បន្ទាប់ពីពួកគេ បានយកឈ្នះក្រុមម្ចាស់ផ្ទះកម្ពុជា ក្នុងការទាត់បាល់ប៉េណាល់ទី ដោយលទ្ធផល ៤-២ ហើយនេះជាលទ្ធផលដ៏គួរឱ្យរំភើបបំផុត ព្រោះវាបានកើតមានឡើង ក្នុងពេលវេលា ដែលគ្រប់គ្នានឹកស្មានមិនដល់។
តាមរយៈការប្រកួតកាត់សេចក្តីជើងទី២ នៅពហុកីឡដ្ឋានជាតិអូឡាំពិក កាលពីយប់ថ្ងៃអង្គារម្សិលមិញនេះ ខ្សែប្រយុទ្ធពាក់លេខ៩ K. Oliver Jame បានស៊ុតបញ្ចូលទីជួយឱ្យក្រុមស្រីលង្កា នាំមុខ ១-០ នៅនាទីទី៣៨ ប៉ុន្តែខ្សែប្រយុទ្ធ ញាន សុខស៊ីដាន បានជួយឱ្យក្រុមកម្ពុជា តាមស្មើ វិញ តាមរយៈការស៊ុតបាល់ចេញពីក្រៅគំនូសស បញ្ចូលទីយ៉ាងស្អាត នៅនាទីទី៥១ ហើយលទ្ធផលស្មើគ្នា ១-១ នេះបានអូសបន្លាយដល់នាទីទី៩០ ដែលធ្វើឱ្យក្រុមទាំង២ ឈានដល់ការប្រកួតបន្ថែមម៉ោង១៥នាទី២ដង។
នៅក្នុងការប្រកួតបន្ថែមម៉ោង១៥នាទីដំបូង ខ្សែបម្រើជើងចាស់ ដែលទើបបានចូលលេងឱ្យក្រុមជម្រើសជាតិកម្ពុជាជាថ្មី សុះ ស៊ូហាណា បានស៊ុតបាល់បញ្ចូលទីយ៉ាងស្អាត បន្ទាប់ពីរូបគេទទួលបានបាល់ពីការបញ្ជូនដោយប្រើកែងជើងពីសំណាក់ខ្សែការពារកណ្តាល Mo Kan នៅនាទីទី៩៩ ហើយការទាត់បកត្រឡប់ក្រោយបញ្ចូលទីដ៏អស្ចារ្យរបស់ខ្សែប្រយុទ្ធ សារ ទី គួរណាស់ជួយឱ្យកម្ពុជា នាំមុខ ៣-១ នៅនាទីទី១០៤ ប៉ុន្តែអាជ្ញាកណ្តាល បានច្រានចោលគ្រាប់បាល់នោះ ដោយសម្អែងថា ជាបាល់អកហ្ស៊ឺ។
ចំណែកការប្រកួត ១៥នាទីចុងក្រោយ ក្រុមកម្ពុជា ក៏មានឱកាសក្នុងការរកគ្រាប់បាល់បន្ថែមផងដែរ តែពួកគេមិនអាចធ្វើបាន ស្របពេលក្រុមកម្ពុជា បានផ្តោតខ្លាំងលើការលេងការពារក្នុងបំណងរក្សាការនាំមុខ ២-១ នេះឱ្យដល់ចប់ការប្រកួតតែម្តង ប៉ុន្តែអារម្មណ៍ខកចិត្តបានកើតមានឡើងចំពោះពួកគេ និងអ្នកគាំទ្រ នៅពេលខ្សែការពារ K.Clauddio Matthias បានស៊ុតបាល់បញ្ចូលទីតាមស្មើ ២-២ ឱ្យក្រុមស្រីលង្កា វិញនៅនាទីទីបន្ថែម ១២០+២។
បន្ថែមទៅលើការខកចិត្តនេះ ខ្សែប្រយុទ្ធ Doeung Nicolas Taylor និងខ្សែបម្រើ អន ចាន់ប៉ូលីន សុទ្ធតែស៊ុតបាល់មិនបានសម្រេច នៅក្នុងការទាត់បាល់ប៉េណាល់ទីកាត់សេចក្តី គឺមានតែ លឹម ពិសុទ្ធ និង សឿយ វិសាល ទេ ដែលស៊ុតបញ្ចូលទីបាន។ ផ្ទុយពីនេះកីឡាករទាំង៤នាក់របស់ក្រុមស្រីលង្កា សុទ្ធតែស៊ុតបាល់ដាច់ចង្កេះអ្នកចាំទី វីរៈ ដារ៉ា ដើម្បីយកឈ្នះក្រុមកម្ពុជា ៤-២ និងបានឡើងទៅប្រកួតជុំទី៣ពានរង្វាន់ AFC Asian Cup នេះ។
ដោយឡែក សមាជិកមួយចំនួនរបស់ក្រុមជម្រើសជាតិកម្ពុជា ពិសេសប្រធានក្រុម Yudai Ogawa និង Mo Kan សុទ្ធតែបានសម្រក់ទឹកភ្នែក បង្ហាញការសោកស្តាយ ចំពោះការចាញ់ក្រុមស្រីលង្កា សម្រាប់ការប្រកួតកាត់សេចក្តី នៅលើទឹកដីខ្លួនឯងនេះ ខណៈការប្រកួតជើងទី១ នៅលើទឹកដីស្រីលង្កា ក្រុមទាំង២នេះ បានស្មើគ្នា ០-០។
ជុំវិញការចាញ់ក្រុមស្រីលង្កានេះ លោក Felix Dalmas គ្រូបង្គោលក្រុមជម្រើសជាតិកម្ពុជា បាននិយាយក្នុងសន្និសីទកាសែតក្រោយការប្រកួតថា៖ «ក្រុមរបស់យើងបានព្យាយាមលេងយកឈ្នះតាំងពីនាទី ១មកម្ល៉េះ គឺយើងចង់ឈ្នះខ្លាំងណាស់ អ៊ីចឹងកីឡាកររបស់យើង បានប្រឹងប្រែងអស់ពីលទ្ធភាពហើយ ប៉ុន្តែបាល់ទាត់ពេលខ្លះត្រូវការសំណាងដែរ ហើយថ្ងៃនេះសំណាងមិននៅជាមួយក្រុមយើងទេ»។
ជាមួយគ្នានេះ លោក Felix ស្នើសុំដល់អ្នកគាំទ្រឱ្យបញ្ឈប់ការរិះគន់ បែបបំបាក់ទឹកចិត្តដល់កីឡាករ ព្រោះពួកគេបានលះបង់ច្រើនណាស់ ហើយមានការឈឺចាប់ខ្លាំងជាងអ្នកគាំទ្រទៅទៀត នៅពេលក្រុមចាញ់ តែធ្វើម៉េចកម្រិតលេងរបស់យើងពេលនេះបានត្រឹមប៉ុណ្ណឹង អ៊ីចឹងត្រូវមានការរួមរួមគ្នាបន្ថែមទៀត បើចង់ឃើញក្រុមជម្រើសជាតិកម្ពុជា មានការរីកចម្រើន និងលេងបានល្អជាងនេះ។
លោកបានសង្កត់ធ្ងន់ថា៖ «កីឡាករ ដែលបានមកចូលរួមនេះ សុទ្ធតែមកលេងដើម្បីឈ្នះ ព្រោះបើគាត់មិនចង់ឈ្នះទេ គាត់សុខចិត្តដេកនៅផ្ទះវិញល្អជាង សង់តែគេជេរ។ ពួកគាត់បានលះបង់ទាំងកម្លាំងកាយចិត្ត និងពេលវេលា ដោយសុខចិត្តឃ្លាតឆ្ងាយពីក្រុមគ្រួសារ ដើម្បីមកហ្វឹកហាត់ និងប្រកួត តែពេលមកហើយទទួលរងការរិះគន់ និងជេរប្រមាថបែបនេះ គឺគាត់មិនចង់បានឡើយ»។
លោកបានបន្ថែមថា៖ «ពួកគាត់មកលេងដើម្បីប្រទេសកម្ពុជា ហើយចង់ឈ្នះខ្លាំងណាស់ ហេតុនេះសូមអ្នកគាំទ្រ កុំដាក់សម្ពាធ និងរិះគន់បំបាក់ទឹកចិត្តពួកគាត់ខ្លាំងពេក គឺគួរតែមានការលើកទឹកចិត្ត និងជួយគ្នាទើបត្រឹមត្រូវ ព្រោះបើយើងមិនជួយគ្នា តើមានអ្នកខាងក្រៅឯណា មកជួយយើង»។
ទន្ទឹមនឹងនេះ លោក Felix បានដាក់ក្តីសង្ឃឹមថា ក្រុមកម្ពុជានឹងខ្លាំង និងបន្តធ្វើឱ្យបានល្អបើសិនមានការរួមគ្នា។
លោកបញ្ជាក់ថា៖ «យើងត្រូវតែរួបរួមគ្នាទាំងអស់គ្នា នៅលើផ្លូវតែមួយ ទៅមុខរួមគ្នា។ កម្ពុជាមានការដើរលើផ្លូវដ៏ត្រឹមត្រូវមួយនាពេលអនាគត ប្រសិនបើអ្នកទាំងអស់គ្នាទៅមុខរួមគ្នា ហើយការនិយាយបែបនេះ ព្រោះខ្ញុំស្រលាញ់កម្ពុជា ស្រលាញ់កីឡាករកម្ពុជា និងចង់យកជ័យជម្នះឱ្យអ្នកទាំងអស់គ្នា»៕
