ចាន់ វឌ្ឍនាកា បានព្យាយាមអូសបាល់រំលងកីឡាកររបស់ក្រុមខេត្តកំពង់ចាម ក្នុងការប្រកួតពានរង្វាន់សម្តេច ហ៊ុន សែន ឆ្នាំ២០២៥ កាលពីថ្ងៃពុធ។ រូបថត បឹងកេត
ការទទួលបានឱកាសបង្ហាញខ្លួន ក្នុងជម្រើស១១នាក់ដំបូងសារឡើងវិញរបស់ ចាន់ វឌ្ឍនាកា កំពុងស្ថិតនៅក្នុងភាពមន្ទិលជាថ្មី បន្ទាប់ពីខ្សែប្រយុទ្ធធ្លាប់មានឈ្មោះបោះសំឡេងខ្លាំងរូបនេះ បានបង្ហាញអាការៈឈឺចុកចាប់នៅផ្នែកជង្គង់ខាងឆ្វេង ហើយត្រូវបានប្តូរចេញ ក្នុងការប្រកួតពានរង្វាន់សម្តេច ហ៊ុន សែន លើកទី១៨ ឆ្នាំ២០២៥ កាលពីថ្ងៃពុធ។
សម្រាប់ការប្រកួតកាលពីម្សិលមិញនោះ ខ្សែប្រយុទ្ធពាក់ស្លាកប្រធានក្រុម ចាន់ វិឌ្ឍនាកា ជាអ្នករកបានគ្រាប់បាល់ទី២ ដើម្បីជួយឱ្យក្រុមបឹងកេត យកឈ្នះក្រុមម្ចាស់ផ្ទះមន្ទីរអយកខេត្តកំពង់ចាម ដោយលទ្ធផល ៨-១ ប៉ុន្តែគ្រាប់គ្នាមានការរំជួលចិត្ត នៅពេលឃើញខ្សែប្រយុទ្ធរូបនេះ ព្យាយាមអូសបាល់រំលងកីឡាកររបស់ក្រុមខេត្តកំពង់ចាម ហើយក៏ដួលតែម្នាក់ឯង ដោយបង្ហាញអាការៈឈឺចាប់ខ្លាំងនោះ។
ម្ចាស់អាវលេខ១១ ចាន់ វឌ្ឍនាកា បានបង្ហាញអាការៈឈឺចាប់នៅផ្នែកជង្គង់ខាងឆ្វេង ហើយក្រោយការត្រួតពិនិត្យរបស់គ្រូពេទ្យប្រចាំក្លិបបឹងកេត គឺសម្រេចប្តូរ វឌ្ឍនាកា ចេញនៅនាទីទី៤០។
ហេតុការណ៍នេះ បានធ្វើឱ្យអ្នកគាំទ្រ បង្ហាញការព្រួយបារម្ភ ព្រោះខ្លាចខ្សែប្រយុទ្ធឆ្នើមរូបនេះ ត្រូវអវត្តមានពីទីលានប្រកួតដោយបញ្ហារបួសម្តងទៀត។
ជុំវិញក្តីបារម្ភនេះ ចាន់ វឌ្ឍនាកា បានបង្ហោះសារនៅលើផេចហ្វេសប៊ុកផ្ទាល់ខ្លួន កាលពីព្រលប់ថ្ងៃពុធនោះថា៖ «អរគុណ ពុកម៉ែ បងប្អូន អុំពូមីងយាយតា នៅការបារម្ភ និងជូនពរមកកាន់រូបខ្ញុំ ក្រោយមានការដួលនៅក្នុងទីលាន នៅការប្រកួតល្ងាចម៉ិញ។ ស្ថានភាពខ្ញុំពេលនេះ គឺស្ថិតនៅក្រោមការតាមដាន និងរង់ចាំថតស្គេន (MRI) នៅថ្ងៃស្អែក (ថ្ងៃព្រហស្បតិ៍នេះ) អរគុណគ្រប់គ្នាដែលបារម្ភ និងជូនពរមកកាន់ខ្ញុំ»។
ចំណែកលោក Conor Nestor គ្រូបង្គោលក្រុមបឹងកេត ក៏កំពុងតែព្រួយបារម្ភខ្លាំងពីស្ថានភាពរបួសជង្គង់របស់ខ្សែប្រយុទ្ធ ចាន់ វឌ្ឍនាកា ផងដែរ។
គ្រូពេទ្យប្រចាំក្លិបបឹងកេត បានពិនិត្យមើលពីស្ថានភាពរបួសរបស់ ចាន់ វឌ្ឍនាកា រួចក៏បានសម្រេចប្តូរចេញ នៅនាទីទី៤០។ រូបថត បឹងកេត
លោកបាននិយាយក្រោយការប្រកួតថា៖ «ពួកយើងកំពុងតែរង់ចាំលទ្ធផលពីការថតស្កេន។ ឥទ្បួវនេះយើងមិនអាចនិយាយចំណុចអ្វីមួយឱ្យបានជាក់លាក់ទាល់តែសោះ ចំពោះស្ថានភាពរបួស ឬក៏ពេលវេលាជាសះស្បើយរបស់គាត់»។
លោកបានបន្ថែមថា៖ «ជាការពិតណាស់! វាមើលទៅកំពុងតែស្ថិតក្នុងស្ថានភាពមិនល្អ ហើយយើងពិតជាមានការព្រួយបារម្ភយ៉ាងខ្លាំងចំពោះគាត់ ប៉ុន្តែពេលនេះ យើងមិនអាចនិយាយអ្វីបានទាំងអស់ រហូតដល់ទទួលបានលទ្ធផល ពីការថតសស្កេន»។
គិតដល់ត្រឹមម៉ោង២រសៀល ថ្ងៃព្រហស្បតិ៍នេះ ក្លិបបាល់ទាត់បឹងកេត នៅមិនទាន់បានបង្ហាញពីការវិវឌ្ឍចុងក្រោយនៃរបួសរបស់ ចាន់ វឌ្ឍនាកា នៅឡើយទេ ស្របពេលដែលអតីតខ្សែប្រយុទ្ធក្រុមជម្រើសជាតិកម្ពុជារូបនេះ ក៏ទើបទទួលបានឱកាសបង្ហាញវត្តមាននៅលើទីលានបានពេញលេញវិញផងដែរ បន្ទាប់ពីរូបគេមានរបួសដាច់សរសៃជង្គង់ខាងស្តាំ (ACL) កាលពីឆ្នាំ២០២២។
ខ្សែប្រយុទ្ធ ចាន់ វឌ្ឍនាកា បានពាក់ស្លាកជាប្រធានក្រុមរបស់បឹងកេត ពេលប្រកួតជាមួយក្រុមខេត្តកំពុងចាម ពីថ្ងៃពុធ ហើយក៏ជាពេលដែលរូបគេមានរបួសជង្គង់ខាងឆ្វេងផងដែរ។ រូបថត FFC
ខ្សែប្រយុទ្ធបឹងកេត ចាន់ វឌ្ឍនាកា បានរងរបួសដាច់សរសៃជង្គង់ខាងស្តាំ ក្នុងជំនួបជាមួយក្រុមវិសាខា ក្នុងការប្រកួតពានរង្វាន់ Prince Beer Pre-season Cup នៅកីឡដ្ឋានព្រីនស៍ កាលពីថ្ងៃទី២៦ ខែមករា ឆ្នាំ២០២២ តែរូបគេវះកាត់ទទួលបានជោគជ័យ ហើយបានវិលត្រឡប់មកកាន់ទីលានប្រកួតជាផ្លូវការវិញ ក្នុងពេលក្រុមបឹងកេត បានយកឈ្នះក្រុមកងយោធពលខេមរភូមិន្ទ ៤-៣ នៃការប្រកួតពានរង្វាន់ខេមបូឌានលីគខាប់ (Cambodian League Cup) ឆ្នាំ កាលពីថ្ងៃទី៥ ខែមីនា ឆ្នាំ២០២៣។
មានន័យថា ចាន់ វឌ្ឍនាកា បានចំណាយពេល១ឆ្នាំ ១ខែ និង៨ថ្ងៃ ដើម្បីព្យាបាលរបួសដាច់សរសៃជង្គង់ស្តាំរបស់ខ្លួនឱ្យបានជាសះស្បើយ១០០ភាគរយវិញ ហើយពេលនេះ វឌ្ឍនាកា មានបញ្ហាជង្គង់ឆ្វេងវិញម្តង ដែលកំពុងរង់ចាំការថតស្កេតពិនិត្យមើលពីគ្រូពេទ្យជំនាញ ដើម្បីបានដឹងឱ្យប្រាកដពីស្ថានភាពរបួសលើកនេះ៕
