លោក Keisuke Honda ក្នុងពេលប្រគល់ពានដល់ក្រុមសៀមរាបយូណាយធីត ដែលបានក្លាយជាម្ចាស់ជើងឯកការប្រកួត4x4 Cambodia Cup។ រូបថត PEAK Sports
ទោះលែងមានតួនាទីអ្វី នៅក្នុងក្រុមជម្រើសជាតិកម្ពុជា ប៉ុន្តែវីរបុរសបាល់ទាត់របស់ប្រទេសជប៉ុន លោក Keisuke Honda នៅតែចងចាំមិនភ្លេចពីក្តីសុបិនរបស់លោក ដែលចង់ឃើញកម្ពុជា អាចបានទៅលេងនៅ World Cup តែលោកបានសុំឱ្យគ្រប់ភាគីពាក់ព័ន្ធ បន្តគាំទ្រដល់ការអភិវឌ្ឍយុវជនថ្នាលឱ្យបានខ្លាំងថែមទៀត ដើម្បីឈានទៅសម្រេចបំណងនេះ នៅពេលណាមួយ។
អតីតអ្នកចាត់ការទូទៅក្រុមជម្រើសជាតិកម្ពុជា លោក Keisuke Honda បានលើកឡើងបែបនេះ នៅពេលលោកវិលត្រឡប់មកកាន់ទឹកដីកម្ពុជាជាថ្មី ដើម្បីចូលរួមរៀបចំការប្រកួតពានរង្វាន់ 𝟒𝐯𝟒 សម្រាប់កុមារកម្ពុជាអាយុក្រោម១០ឆ្នាំ (4x4 Cambodia Cup) នៅទីលានវិទ្យាល័យព្រះសីសុវត្ថិ កាលពីថ្ងៃអាទិត្យ ដោយព្រឹត្តិការណ៍នេះ មាន៣២ក្រុមចូលរួម ហើយបែងចែកការប្រកួតជា៨ពូល។
លោក Honda បានឱ្យដឹងថា ការប្រកួតបាល់ទាត់ទម្រង់ 4x4 សម្រាប់កុមារនេះ ត្រូវបានបង្កើតឡើងនៅប្រទេសជប៉ុន ចូល២ឆ្នាំមកហើយ ហើយទើបតែបានពង្រីកកម្មវិធីប្រកួតនេះ មកកាន់បណ្តាប្រទេសក្នុងតំបន់អាស៊ាន និងអាស៊ី ដើម្បីបណ្តុះថ្នាក់ថ្នាលបាល់ទាត់ទៅថ្ងៃអនាគត។
លោក Honda បានបង្ហាញភាពរីករាយខ្លាំង ដែលបាននាំយកកម្មវិធីនេះ មករៀបចំនៅក្នុងប្រទេសកម្ពុជា ដើម្បីផ្តល់ឱកាសឱ្យយុវជនកម្ពុជា បានបង្ហាញសមត្ថភាព និងទេពកោសល្យ ដែលខ្លួនមាន តាមទម្រង់លេងបាល់បែបទំនើបមួយ។
បុរសដែលបានបញ្ចប់កិច្ចសន្យាពីតួនាទីជាអ្នកចាត់ការទូទៅក្រុមជម្រើសជាតិកម្ពុជា នៅដើមឆ្នាំ២០២៣ លោក Honda បានដាក់ក្តីសង្ឃឹមថា តាមរយៈការប្រកួត 4x4 នេះ យុវជនកម្ពុជា នឹងអាចបំពេញក្ដីស្រមៃរបស់ខ្លួន គឺបើគ្រប់គ្នាមិនបោះបង់ នឹងអាចក្លាយជាកីឡាករជម្រើសជាតិ ប្រកបដោយគុណភាពនាថ្ងៃអនាគត ហើយវាក៏ជាពេលដែលអាចជួយឱ្យកម្ពុជា ឈានទៅលេងនៅ World Cup ផងដែរ។
លោក Keisuke Honda បាននិយាយបែបថា៖ «ពួកគេនឹងក្លាយជាកីឡាករជម្រើសជាតិកម្ពុជានាពេលអនាគត ហើយពួកគេនឹងធ្វើឱ្យអ្នករីករាយ ដូច្នេះសូមបន្តគាំទ្រពួកគេបន្តទៅមុខទៀត ដោយខ្ញុំសង្ឃឹមថា ក្រុមជម្រើសជាតិកម្ពុជា នឹងកាន់តែខ្លាំងជាងមុន និងអាចលេង 𝗪𝗼𝗿𝗹𝗱 𝗖𝘂𝗽 នាពេលអនាគត វាគឺជាសុបិន្តរបស់ខ្ញុំ»។
លោក Keisuke Honda ពេលនិយាយទៅកាន់ក្រុមកីឡាករ នៅក្នុងពិធីបិទការប្រកួត 4x4 Cambodia Cup កាលពីថ្ងៃអាទិត្យ។ រូបថត PEAK Sports
តាមរយៈការប្រកួត 4x4 Cambodia Cup ពេញមួយថ្ងៃ នៅទីលានវិទ្យាល័យព្រះសីសុវត្ថិ កាលពីថ្ងៃអាទិត្យនោះ ក្រុមកុមារអាយុក្រោម១០ឆ្នាំរបស់សៀមរាបយូណាយធីត បានក្លាយជាម្ចាស់ជើងឯកយ៉ាងរំភើបបំផុត ក្រោយយកឈ្នះក្រុម Young Dragon ១-០ ដោយការទាត់បាល់ប៉េណាល់ទីកាត់សេចក្តី បន្ទាប់ពីក្រុមទាំង២នេះ បានស្មើគ្នា ៤-៤ ក្នុងការប្រកួតត្រឹម១០នាទី។
ការប្រកួតផ្តាច់ព្រ័ត្ររវាងក្រុមសៀមរាបយូណាយធីត (ពណ៌ខ្មៅ) ជាមួយក្រុម Young Dragon នៅទីលានវិទ្យាល័យព្រះសីសុវត្ថិ ក្នុងពាន 4x4 Cambodia Cup។ រូប PEAK Sports
ចំណែកក្រុមផ្ការីកគ្រប់រដូវ បានយកឈ្នះក្រុមយុវជនភ្នំពេញក្រោន ដោយលទ្ធផល ១-០ ក្នុងការទាត់បាល់ប៉េណាល់ទីកាត់សេចក្តីដូចគ្នា ក្រោយស្មើគ្នា ៤-៤ ដើម្បីទទួលបានចំណាត់ថ្នាក់លេខ៣ ខណៈការប្រកួត 4x4 Cambodia Cup ដែលមានការផ្សាយផ្ទាល់តាម PEAK Sports ផងនោះ ទទួលបានការចាប់អារម្មណ៍ច្រើនពីអ្នកទស្សនិកជន ជាអ្នកស្នេហាវិស័យកីឡាបាល់ទាត់។
សកម្មភាពការប្រកួត 4x4 Cambodia Cup នៅទីលានវិទ្យាល័យព្រះសីសុវត្ថិ កាលពីថ្ងៃអាទិត្យ។ រូប PEAK Sports
តាមរយៈលទ្ធផលការប្រកួតនេះ ក្រុមU10សៀមរាបយូណាយធីត នឹងត្រូវធ្វើដំណើរទៅប្រទេសជប៉ុនជាមួយលោក Keisuke Honda ដើម្បីចូលរួមការប្រកួត 𝟒𝐯𝟒 Asian Cup នារដូវក្តៅខាងមុខនេះជាមួយក្រុមជើងឯកយុវជន 4x4 មកពីប្រទេសនៅតំបន់អាស៊ាន និងអាស៊ី ផ្សេងៗទៀត ហើយចំពោះក្រុមចាញ់ ក៏កុំទាន់អស់សង្ឃឹម ព្រោះនេះគ្រាន់តែជាការចាប់ផ្ដើមប៉ុណ្ណោះ ដោយលោក Honda បានលើកទឹកចិត្តដល់យុវជនកម្ពុជា ត្រូវខំប្រឹងបន្តទៀត ដើម្បីឈានទៅសម្រេចក្តីស្រមៃនៅថ្ងៃអនាគត៕
