ការប្រកួតរវាងក្រុមក្រសួងមហាផ្ទៃ (ពណ៌លឿង) និងក្រុមបញ្ជាការដ្ឋានអង្គរក្ស នៅវិមានពហុកីឡដ្ឋានជាតិអូឡាំពិក កាលពីថ្ងៃអាទិត្យ។ រូបថត សហព័ន្ធ
ក្រុមបាល់ទះក្រសួងមហាផ្ទៃ បានបង្ហាញពីកម្រិតលេងកាន់តែល្អប្រសើរ ដើម្បីក្លាយជាក្រុមតែមួយគត់ ដែលមិនទាន់ស្គាល់ការចាញ់សោះ ក្នុងការប្រកួតព្រឹត្តិការណ៍បាល់ទះ «តេជោលីគ» រដូវកាលទី២ ឆ្នាំ២០២៥ (TECHO Volleyball Cambodia League) ប៉ុន្តែក្រុមស្នងការនគរបាលខេត្តពោធិ៍សាត់ បានធ្លាក់ចេញពីការប្រកួតនេះមុនគេ ចំណែកក្រុមស្នងការនគរបាលខេត្តតាកែវ ក៏គេចមិនផុតពីការធ្លាក់ដូចគ្នា។
សម្រាប់ការប្រកួតសន្សំពិន្ទុប្រចាំសប្តាហ៍ទី២ កាលពីថ្ងៃសៅរ៍ និងថ្ងៃអាទិត្យ កន្លងមកនេះ ក្រុមក្រសួងមហាផ្ទៃ ដណ្តើមបាន៦ពិន្ទុទៀត ពីការប្រកួតលើកទី៤ និងទី៥របស់ខ្លួន ដើម្បីបន្តឈរនៅកំពូលតារាងជាបណ្តោះអាសន្ន ដោយមាន១៥ពិន្ទុពេញ ជាមួយការឈ្នះទាំង៥ប្រកួតជាប់ៗគ្នា។
ក្រុមក្រសួងមហាផ្ទៃ បានយកឈ្នះក្រុមកងពលធំអន្តរាគមន៍លេខ៣ ដោយលទ្ធផល៣សិតដាច់ (៣-០) ហើយការបន្តទៅជួបក្រុមមិនទាន់ស្គាល់ការចាញ់ដូចគ្នា គឺបញ្ជាការដ្ឋានអង្គរក្ស កាលពីថ្ងៃអាទិត្យ មហាផ្ទៃ បានយកឈ្នះ ៣-១ ជាមួយគ្រាប់បាល់ ២៦-២៤ ២០-២៥ ២៧-២៥ និង ២៦-២៤ ដោយជំនួបរវាងក្រុមខ្លាំងទាំង២នេះ មានភាពស្វិតស្វាញ និងទទួលបានការគាំទ្រខ្លាំងពីទស្សនិកជន។
ផ្ទុយពីនេះក្រុមធ្លាប់សាងបានកំណត់ត្រាល្អផ្តាច់គេ ក្នុងការប្រកួតតេជោលីគ កាលពីឆ្នាំ២០២៤ គឺវិសាខា បានប្រកួតចាញ់ក្រុមកងពលធំអន្តរាគមន៍លេខ៣ ដោយលទ្ធផល ៣-២ ជាមួយគ្រាប់ ២០-២៥ ២២-២៥ ២៥-១៧ ២៥-២៣ និង ១២-១៥ ហើយនេះក៏ជាការចាញ់លើកទី២របស់វិសាខា ផងដែរ ដែលធ្វើឱ្យពួកគេ បន្តឈរនៅលេខ៣ បន្ទាប់ពីក្រុមបញ្ជាការដ្ឋានអង្គរក្ស។
ចំណែកក្រុមស្នងការនគរបាលខេត្តស្វាយរៀង ដែលបានចំណាយថវិកាច្រើន ក្នុងការនាំយកកីឡាកររបស់ឥណ្ឌាចំនួន២នាក់ មកជួយដល់ក្រុមនោះ ក៏នៅមិនទាន់បង្ហាញពីភាពលេចធ្លោអ្វីគួរឱ្យកត់សម្គាល់ប៉ុន្មានដែរ ព្រោះ២ប្រកួតក្នុងសប្តាហ៍នេះ ពួកគេ បានចាញ់ក្រុមបញ្ជាការដ្ឋានអង្គរក្ស ៣-០ មុនពេលយកឈ្នះលើក្រុមស្នងការនគរបាលខេត្តតាកែវ ដោយលទ្ធផល ៣-០ វិញ។
តារាងចំណាត់ថ្នាក់ជាបណ្តោះអាសន្ននៃការប្រកួតព្រឹត្តិការណ៍បាល់ទះ «តេជោលីគ» លើកទី២ ឆ្នាំ២០២៥ សម្រាប់សប្តាហ៍ទី២។ រូប សហព័ន្ធ
ចំណែកក្រុមស្នងការនគរបាលខេត្តតាកែវ និងក្រុមស្នងការនគរបាលខេត្តពោធិ៍សាត់ បានចាញ់ទាំង៥ប្រកួតដូចគ្នា ហើយលទ្ធផលនេះ បានបញ្ជាក់ថា ក្រុមខេត្តពោធិ៍សាត់ បានធ្លាក់ចេញពីការប្រកួតនេះ ដោយស្វ័យប្រវត្តិហើយ ទោះនៅសល់២ប្រកួតទៀតក្នុងដៃ។
ចំណែកក្រុមខេត្តតាកែវ ដែលមាន១ពិន្ទុនោះ នៅសល់ឱកាសស្ទួចស្តើងបំផុត ក្នុងការចាំអ៊ុតមើលការប្រកួត២លើកទៀតរបស់ខ្លួន ក្នុងសប្តាហ៍ទី៣។
ឱកាសបានឡើងទៅវគ្គបន្តរបស់ក្រុមស្នងការនគរបាលខេត្តតាកែវ គឺលុះត្រាតែពួកគេ អាចយកឈ្នះក្រុមស្នងការនគរបាលខេត្តពោធិ៍សាត់ និងក្រុមស្នងការនគរបាលរាជធានីភ្នំពេញ ដោយលទ្ធផល ៣-០ ដូចគ្នា ក្នុងពេលដែលក្រុមកំពុងមានមាន៧ពិន្ទុស្មើគ្នា គឺកងពលធំអន្តរាគមន៍លេខ៣ និងស្នងការនគរបាលខេត្តស្វាយរៀង បានចាញ់២ប្រកួតចុងក្រោយ ដោយលទ្ធផល ៣-០ ដូចគ្នា ប៉ុន្តែគេមិនរំពឹងថា លទ្ធផលបែបនេះ នឹងកើតមានឡើង ក្នុងការប្រកួតបញ្ចប់ជុំទី១ នៅសប្តាហ៍ទី៣នោះទេ៕
