លោក វ៉ាត់ ចំរើន ពេលជួបប្រជុំជាមួយថ្នាក់ដឹកនាំសហព័ន្ធកីឡាប្រដាល់គុនខ្មែរ និងភាគីពាក់ព័ន្ធ កាលពីថ្ងៃទី៨ ខែមករា ឆ្នាំ២០២៥។ រូបថត NOCC
ក្រសួងអប់រំ យុវជន និងកីឡា បានចេញសេចក្តីជម្រាបជូនមួយទៅកាន់សហព័ន្ធកីឡាប្រដាល់គុនខ្មែរ ដោយតម្រូវឱ្យសហព័ន្ធនេះ បោះឆ្នោតជ្រើសរើសថ្នាក់ដឹកនាំអាណត្តិទី៨ថ្មី ឱ្យបានត្រឹមត្រូវ និងយុត្តិធម៌ បើមិនដូច្នោះទេ ក្រសួង នឹងពិនិត្យពិចារណាលើការទទួលស្គាល់ថ្នាក់ដឹកនាំអាណត្តិថ្មីរបស់សហព័ន្ធមួយនេះឡើងវិញ។
តាមគម្រោងសហព័ន្ធកីឡាប្រដាល់គុនខ្មែរ នឹងរៀបចំការបោះឆ្នោតបញ្ចប់អាណត្តិចាស់ទី៧របស់ខ្លួន នៅថ្ងៃទី២២ ខែមករានេះ ដើម្បីជ្រើសរើសគណៈកម្មាធិការប្រតិបត្តិអាណត្តិថ្មី ហើយក្នុងគោលការណ៍នីតិវិធីរៀបចំការបោះឆ្នោតនេះ ក្រសួងអប់រំ ក្រោមចំណារដ៏ខ្ពង់ខ្ពស់របស់លោកឧបនាយករដ្ឋមន្ត្រី ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានណែនាំឱ្យសហព័ន្ធកីឡាប្រដាល់គុនខ្មែរ អនុវត្តនូវគោលការណ៍បោះឆ្នោតចំនួន៣ ដើម្បីរក្សាបាននូវតម្លាភាព និងយុត្តិធម៌។
លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា បានបញ្ជាក់នៅក្នុងសេចក្តីជួនដំណឹងរបស់ក្រសួងអប់រំ កាលពីថ្ងៃចន្ទថា៖ «ខ្ញុំសូមជម្រាបជូន សហព័ន្ធកីឡាប្រដាល់គុនខ្មែរ សូមរៀបចំមហាសន្និបាតបញ្ចប់អាណត្តិ តាមគោលការណ៍ណែនាំដូចខាងក្រោម ទី១ ត្រូវបោះឆ្នោតជ្រើសរើសសមាសភាពគណៈកម្មាធិការប្រតិបត្តិអាណត្តិថ្មី ប្រជាធិបតេយ្យ តម្លាភាព និងយុត្តិធម៌ត្រឹមត្រូវ»។
«ទី២ សហព័ន្ធកីឡាប្រដាល់គុនខ្មែរ ត្រូវរៀបចំនីតិវិធីឈរឈ្មោះ និងបោះឆ្នោតដោយផ្អែកតាមមតិភាគច្រើន អាចទទួលយកបានពីគ្រប់ សមាជិកទាំងអស់ ហើយ៣ សហព័ន្ធ ត្រូវអនុវត្តឱ្យស្របតាមប្រការ៩ នៃលក្ខន្តិកៈរបស់សហព័ន្ធកីឡាប្រដាល់គុនខ្មែរ»។ លោក វ៉ាត់ ចំរើន បានបន្ថែម។
ក្រសួងអប់រំ បានប្រាប់ឱ្យលោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ ត្រូវអនុវត្តតាមគោលការណ៍ណែនាំទាំង៣នេះ ឱ្យបានត្រឹម។ ផ្ទុយទៅវិញ បើសិនសហព័ន្ធ មិនអនុវត្តតាមគឺក្រសួងក៏នឹងពិចារណា មិនទទួលស្គាល់គណៈកម្មាធិការប្រតិបត្តិអាណត្តិថ្មីរបស់សហព័ន្ធកីឡាប្រដាល់គុនខ្មែរ ដូចគ្នា បើសិនរកឃើញថា មានភាពមិនប្រក្រតី នៅក្នុងចំណុចណាមួយ នៃការបោះឆ្នោតនេះ។
ក្រសួងអប់រំ បានបញ្ជាក់នៅក្នុងសេចក្តីជូនដំណឹងរបស់ខ្លួន បែបនេះថា៖ «ក្រសួងសង្ឃឹមថា សហព័ន្ធនឹងអនុវត្តតាមការណែនាំជាគោលការណ៍នេះ ឱ្យមានប្រសិទ្ធភាពខ្ពស់ប្រកបដោយការទទួលខុសត្រូវ។ ក្នុងករណីមិនអនុវត្តតាមគោលការណ៍ណែនាំរបស់ក្រសួងឱ្យបានត្រឹមត្រូវ ក្រសួង នឹងពិនិត្យពិចារណាលើការទទួលស្គាល់ថ្នាក់ដឹកនាំអាណត្តិថ្មីរបស់សហព័ន្ធឡើងវិញ»។
លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ អាណត្តិទី៧ ហើយលោកនឹងបន្តឈរឈ្មោះសម្រាប់ការបោះឆ្នោតក្នុងអាណត្តិទី៨ នាថ្ងៃទី២២ ខែមករានេះ។ រូបថត NOCC
គួររំឭកថា សហព័ន្ធកីឡាប្រដាល់គុនខ្មែរ ត្រូវបានបង្កើតឡើងជាផ្លូវការ នៅឆ្នាំ១៩៩៦ រហូតដល់ពេលនេះមានរយៈពេល២៨ឆ្នាំ ហើយគិតមកដល់ពេលនេះ មានបុគ្គល៤នាក់ បានកាន់តួនាទីជាប្រធាន គឺលោកព្រឹទ្ធាចារ្យ ព្រំ ភិច បានធ្វើជាប្រធានអាណត្តិទី១ ពីឆ្នាំ១៩៩៦ ដល់ឆ្នាំ២០០០។
បន្ទាប់មក លោក អ៊ុំ យូរ៉ាន់ បានធ្វើជាប្រធាន២អាណត្តិ ពីឆ្នាំ២០០០ ដល់ឆ្នាំ២០០៨ហើយក្រោយមក លោក តែម ម៉ឺន បានធ្វើជាប្រធាន៤អាណត្តិ ពីឆ្នាំ២០០៨ ដល់ឆ្នាំ២០២៤ មុនពេលលោកលាឈប់នៅចុងខែមីនា ឆ្នាំ២០២៤ ក្នុងពេលអាណត្តិទី៧មិនទាន់ចប់ ដោយបានតែងតាំងលោក ខូវ ឆាយ ឱ្យធ្វើជាប្រធានជំនួស នៅថ្ងៃទី២៩ ខែមីនា ដើម្បីបន្តដឹកនាំរហូតចប់អាណត្តិទី៧ (២០២១-២០២៥)។
លោក ហេង សុឃន ដែលត្រូវបានគេទម្លាយថា មានបំណងឈរឈ្មោះបោះឆ្នោតជាប្រធានសហព័ន្ធកីឡាប្រដាល់គុនខ្មែរ ដើម្បីប្រជែងជាមួយលោក ខូវ ឆាយ។ រូបថត NOCC
នៅក្នុងចំណោមប្រធានទាំង៤រូប លោក ខូវ ឆាយ ជាប្រធានសហព័ន្ធវ័យក្មេងជាងគេ ប៉ុន្តែសម្រាប់ការបោះឆ្នោតជ្រើសរើសប្រធានថ្មី ក្នុងអាណត្តិអាណត្តិទី៨ ឆ្នាំ២០២៥ ដល់ឆ្នាំ២០២៩នេះ មានព័ត៌មានរសើបបានទម្លាយមកថា លោក ហេង សុឃន ជាអគ្គលេខាធិការអាណត្តិចាស់ ចង់ឈរឈ្មោះប្រជែងតំណែងជាប្រធានពីលោក ខូវ ឆាយ ហើយនេះជាមូលហេតុដែលក្រសួងអប់រំ បានចេញសេចក្តីជូនដំណឹង ដោយណែនាំឱ្យសហព័ន្ធនេះ ធ្វើការបោះឆ្នោតឱ្យបានត្រឹមត្រូវ និងយុត្តិធម៌។
ជុំវិញរឿងនេះដែរ លោក វ៉ាត់ ចំរើន ដែលជាអគ្គលេខាធិការគណៈកម្មាធិការជាតិអូឡាំពិកកម្ពុជាផងដែរ បានជួបប្រជុំជាមួយថ្នាក់ដឹកនាំសហព័ន្ធកីឡាប្រដាល់គុនខ្មែរ ដោយមានការចូលរួមពីលោក ខូវ ឆាយ និងលោក ហេង សុខឃន ព្រមទាំងថ្នាក់ដឹកនាំអគ្គនាយកដ្ឋានកីឡាម្តងហើយ កាលពីថ្ងៃទី៨ ខែមករា ដើម្បីត្រួតពិនិត្យយន្ដការសំខាន់ៗ ជំរុញឱ្យការបោះឆ្នោតជ្រើសរើសថ្នាក់ដឹកនាំថ្មីរបស់សហព័ន្ធនេះ អាចដំណើរទៅបានល្អ និងស្របតាមគោលការណ៍ច្បាស់របស់កីឡា៕
