ខ្សែប្រយុទ្ធ Bounphachan Bounkong របស់ស្វាយរៀង បានស៊ុតបាល់រំលងអ្នកចាំទីក្រុម Dong A Thanh Hoa ប៉ុន្តែបាល់នោះ ហោះផុតសំណាញ់ទី។ រូប ស្វាយរៀង
ការប្រកួតប្រជែង ដើម្បីស្វែងរកឱកាសឡើងទៅកាន់វគ្គពាក់កណ្តាលផ្តាច់ព្រ័ត្រជាលើកដំបូង ក្នុងពានរង្វាន់ ASEAN Club Championship Shopee Cup 2024/2025 របស់ក្រុមព្រះខ័នរាជស្វាយរៀង ត្រូវបានរលាយហើយ បន្ទាប់ពីក្រុមតំណាងឱ្យកម្ពុជាមួយនេះ បានត្រឹមចែកគ្នាម្នាក់១ពិន្ទុជាមួយក្រុមម្ចាស់ផ្ទះ Dong A Thanh Hoa របស់វៀតណាម ជាមួយការទទួលបានលទ្ធផលស្មើគ្នា ០-០ នោះ។
តាមរយៈការប្រកួតសន្សំពិន្ទុ លើកទី៤ ប្រចាំពូលA នៅពហុកីឡដ្ឋាន Thanh Hoa Stadium កាលពីយប់ថ្ងៃពុធម្សិលមិញនេះ ក្រុមព្រះខ័នរាជស្វាយរៀង មានឱកាសគ្រប់គ្រងបាល់បានច្រើនជាងក្រុម Dong A Thanh Hoa ហើយពួកគេគួរតែទទួលបានជ័យជម្នះ ចំពោះការបង្កើតបានឱកាសល្អៗ ក្នុងការស៊ុតនៅមុខទីរបស់ក្រុមម្ចាស់ផ្ទះ។
គ្រូបង្គោលក្រុមព្រះខ័នរាជស្វាយរៀង លោក Pep Minoz បានអះអាងថា ក្រុមរបស់លោក បានព្យាយាមលេងបាល់វែងច្រើន ព្រោះចង់ទាញកីឡាកររបស់ក្រុម Dong A Thanh Hoa ឱ្យចុះមកលេងខាងដីរបស់ខ្លួន និងព្យាយាមលេងពីក្រោយខ្សែការពាររបស់គេវិញ ដើម្បីបង្កើតឱកាសក្នុងការស្វែងរកគ្រាប់បាល់។
ជាមួយការលេងទម្រង់បែបនេះ ខ្សែប្រយុទ្ធរបស់ឡាវ Bounphachan Bounkong ស្ទើរតែអាចរកបានគ្រាប់បាល់ ចំពោះការបង្កើតឱកាសចំនួន២ដងរបស់គេ នៅតង់ទី១ទៅហើយ ហើយខ្សែប្រយុទ្ធទើបដាក់ឱ្យចូលលេងនៅតង់ទី២ ណារ៉ុង កក្កដា ក៏មានឱកាសក្នុងការរកបានគ្រាប់បាល់ នៅចុងម៉ោងផងដែរ ប៉ុន្តែគ្រប់យ៉ាងបានត្រឹមសោកស្តាយ ជាមួយចេញមករារាំងទាន់ពេលរបស់អ្នកចាំទីក្រុម Dong A Thanh Hoa។
លោក Pep Munoz បាននិយាយក្រោយការប្រកួតថា៖ «យើងបានចាប់ផ្តើមនៅក្នុងកម្រិត១ដែលល្អ ជាពិសេសនៅតង់ទី១ យើងមានឱកាសទាត់បញ្ចូលទីមួយចំនួន ចំណែកនៅតង់ទី២ កម្រិតលេងរបស់យើងរាងធ្លាក់ចុះបន្តិច។ យើងព្យាយាមផ្លាស់ប្តូរកីឡាករមួយចំនួន ហើយក្រុមម្ចាស់ផ្ទះ បានព្យាយាមដាក់សម្ពាធថែមទៀត តែនៅនាទីចុងក្រោយ ណារ៉ុង កក្កដា មានឱកាសក្នុងការស៊ុតបញ្ចូលទី ប៉ុន្តែយើងធ្វើមិនបានទៀត នាំឱ្យយើងបាត់បង់ឱកាសឈ្នះបាន៣ពិន្ទុ»។
យ៉ាងណាក៏ដោយ លោក Pep Munoz នៅតែសរសើរពីឆន្ទៈលេងរបស់កូនក្រុម ដែលម្នាក់ៗបានប្រឹងប្រែងបង្ហាញពីគុណភាពលេង ទល់ជាមួយក្រុម Dong A Thanh Hoa ដែលមានកម្រិតលេងល្អ។ លោកថា ការប្រកួតនេះ មានការប្រជែងគ្នាខ្លាំង ប៉ុន្តែបញ្ហាស្ថានភាពទីលាន វាមិនអាចឱ្យក្រុមទាំង២ បានបង្ហាញពីគុណភាពលេងបានល្អជាងនេះ ដើម្បីធ្វើឱ្យអ្នកទស្សនាពេញចិត្តប៉ុន្មានទេ។
លោក Pep Munoz ពេលដឹកនាំក្រុមព្រះខ័នរាជស្វាយរៀង ប្រកួតជាមួយក្រុមម្ចាស់ផ្ទះ Dong A Thanh Hoa កាលពីថ្ងៃពុធ។ រូបថត ស្វាយរៀង
លោក Pep Munoz បានបញ្ជាក់ថា៖ «វាជាទីលាន ដែលយើងពិបាកក្នុងការលេង ជាពិសេសយើងបានលេងជាមួយក្រុមដែលមានកម្រិតខ្ពស់ ដោយពួកគេលេងបានខ្លាំងគ្រប់ពេល។ វាដូចទៅនឹងអ្វីដែលខ្ញុំបាននិយាយមុនការប្រកួត គឺយើងមកទីនេះ ដើម្បីឈ្នះការប្រកួត និងទទួលបាន៣ពិន្ទុ តែវាមិនងាយស្រួលសម្រាប់ពួកយើងនោះទេ»។
ជាមួយគ្នានេះ លោក Pep បានរំឭកទៅដល់ការប្រកួតចាញ់ក្រុមម្ចាស់ BG Pathum United របស់ថៃ ២-១ និងបានបន្តចាញ់ក្រុម PSM Makassar FC របស់ឥណ្ឌូនេស៊ី ១-០ នៅក្នុងទឹកដីខ្លួនឯង ដោយលោកយល់ថា ក្រុមស្វាយរៀង គួរតែទទួលបានពិន្ទុពីការប្រកួតទាំង២នេះ បន្ថែមទៅលើការយកឈ្នះលើក្រុម Terengganu FC ៣-២ សម្រាប់ការប្រកួតបើកឆាកប្រចាំពូលAនេះ កាលពីថ្ងៃទី២១ ខែសីហា។
ការប្រកួតរវាងក្រុមស្វាយរៀង (ពណ៌ខៀវ) ជាមួយក្រុម Dong A Thanh Hoa នៅលើទឹកដីប្រទេសវៀតណាម កាលពីយប់ថ្ងៃពុធ។ រូប ស្វាយរៀង
គ្រូបង្វឹកសញ្ជាតិអេស្ប៉ាញរូបនេះ បញ្ជាក់ថា៖ «សម្រាប់ការប្រកួតមួយចំនួនក្នុងពានរង្វាន់នេះ យើងគួរតែទទួលបានពិន្ទុ ប៉ុន្តែដោយសារយើងមិនអាចទាត់បញ្ចូលទីបាន ទើបយើងមិនអាចទទួលបានពិន្ទុពីការប្រកួតមុនៗ ជាពិសេសការប្រកួតជាមួយក្រុម Thanh Hoa នេះ គឺយើងមិនអាចលេងបានទៅតាមអ្វីដែលយើងបានរៀបចំ១០០ភាគរយនោះទេ»។
ផ្ទុយពីនេះក្រុម Terengganu FC បានយកឈ្នះក្រុម PSM Makassar FC ១-០ នៅលើទឹកដី ហើយក្រុម BG Pathum United បានយកឈ្នះក្រុមម្ចាស់ផ្ទះ Shan United ៤-១ កាលពីយប់ថ្ងៃពុធនោះដែរ ហើយតាមលទ្ធផលនេះបានជួយឱ្យក្រុម BG Pathum ឡើងទៅ ឈរនៅលេខ១វិញ មាន៨ពិន្ទុ រីឯក្រុម Terengganu ឈរនៅលេខ២ មាន៧ពិន្ទុស្មើជាមួយក្រុម PSM Makassar។
ចំណែកក្រុម Dong A Thanh Hoa ឈរនៅលេខ៤ មាន៦ពិន្ទុ ដែលនៅមានភាគរយប្រជែងឡើងទៅវគ្គពាក់កណ្តាលផ្តាច់ព្រ័ត្រ សម្រាប់ការប្រកួតលើកទី៥ចុងក្រោយរបស់ពួកគេជាមួយក្រុម PSM Makassar FC ប៉ុន្តែក្រុមព្រះខ័នរាជស្វាយរៀង ដែលឈរនៅលេខ៥ មាន៤ពិន្ទុនោះ បានធ្លាក់ចេញពីការប្រកួតនេះហើយ បើទោះបីជានៅសល់១ប្រកួតទៀតជាមួយក្រុមចាញ់ទាំង៤ប្រកួត Shan United ក៏ដោយ៕
