ចាន់ វឌ្ឍនាកា បានវះកាត់របួសដាច់សរសៃពួរជង្គង់ឆ្វេង និងដាច់បែកទ្រនាប់ឆ្អឹងខ្ចីជង្គង់ ដោយជោគជ័យ តែមិនទាន់ដឹងចំណាយពេលប៉ុន្មាន ក្នុងការព្យាបាលឱ្យជាសះស្បើយវិញ។ រូបថត វឌ្ឍនាកា
ខណៈដែលមនុស្សគ្រប់រូប សុទ្ធតែបានបង្ហាញពីរូបភាពជួបជុំជាមួយក្រុមគ្រួសារ និងមិត្តភក្តិយ៉ាងសប្បាយរីករាយ នៅក្នុងថ្ងៃកំណើតនោះ ខ្សែប្រយុទ្ធ ចាន់ វឌ្ឍនាកា បែរជាបង្ហោះរូបភាពដ៏កម្សត់ ដែលកំពុងដេកនៅលើគ្រែពេទ្យ ហើយបានជូនពរខ្លួនឯង សូមឱ្យអ្វីមិនល្អទៅតាមឆ្នាំចាស់ និងសូមលាភជ័យចូលមកក្នុងឆ្នាំថ្មី។
រូបភាពនេះ បានធ្វើឱ្យអ្នកគាំទ្រមានការអាណិតអាសូរខ្លាំងដល់ ចាន់ វឌ្ឍនាកា ខណៈខ្សែប្រយុទ្ធធ្លាប់មានឈ្មោះបោះសំឡេងខ្លាំងរបស់ក្រុមជម្រើសជាតិកម្ពុជារូបនេះ បានជួបហេតុការណ៍អាក្រក់ជាលើកទី២ គឺរបួសដាច់សរសៃពួរ(ACL)ជង្គង់ឆ្វេង និងដាច់បែកទ្រនាប់ឆ្អឹងខ្ចីជង្គង់ (meniscus) ហើយទើបបានវះកាត់រួចរាល់ កាលពីថ្ងៃព្រហស្បតិ៍។
ជាមួយរូបភាពកំពុងដេកព្យួរសេរ៉ូម នៅលើគ្រែពេទ្យ ចាន់ វឌ្ឍនាកា បានបង្ហាញសារដ៏គួរឱ្យសង្វេគបែបនេះ កាលពីថ្ងៃព្រហស្បតិ៍ថា៖ «រយៈពេល១ម៉ោង២០នាទី ការវះកាត់សរសៃពួរ (ACL) និងទ្រនាប់ឆ្អឹងខ្ចីជង្គង់ (meniscus) របស់ខ្ញុំ ត្រូវបានរួចរាល់។ រីករាយថ្ងៃកំណើតរបស់ខ្ញុំនៅថ្ងៃនេះ សូមឱ្យអ្វីមិនល្អទៅតាមឆ្នាំចាស់ សូមលាភជ័យចូលមកក្នុងឆ្នាំថ្មីនេះផង អរគុណដល់គ្រប់គ្នាដែលបារម្ភ និងជូនពរខ្ញុំ»។
គួររំឭកថា កីឡាកររបស់ក្លិបបឹងកេត ចាន់ វឌ្ឍនាកា បានរងរបួសអំឡុងពេលប្រកួតជាមួយក្រុមបាល់ទាត់ខេត្តកំពង់ចាម នៅទីលានវិទ្យាល័យព្រះសីហនុ ខេត្តកំពង់ចាម កាលពីថ្ងៃទី១៤ ខែ មករា ឆ្នាំ ២០២៥ ហើយត្រូវបានប្តូរចេញភ្លាមៗ នៅនាទី៤០។ ក្រោយការថតស្កេន បានបង្ហាញថា វឌ្ឍនាកា បានរងការដាច់សរសៃពួរជង្គង់ខាងឆ្វេង និងដាច់បែកទ្រនាប់ឆ្អឹងខ្ចីជង្គង់ ឆ្វេងផងដែរ។
នេះជាលើកទី២ហើយដែល ចាន់ វឌ្ឍនាកា បានទទួលរងរបួសដាច់សរសៃជង្គង់ (ACL) ព្រោះកាលពីឆ្នាំ២០២២ ម្ចាស់អាវលេខ១១រូបនេះ បានរងរបួសដាច់សរសៃពួរជង្គង់ស្តាំ ក្នុងជំនួបជាមួយក្រុមវិសាខា ក្នុងការប្រកួតពានរង្វាន់ Prince Beer Pre-season Cup នៅកីឡដ្ឋានព្រីនស៍ កាលពីថ្ងៃទី២៦ ខែមករា។
ចំពោះរបួសដាច់សរសៃពួរជង្គង់ស្តាំនោះ វឌ្ឍនាកា បានទទួលជោគជ័យ ក្នុងការវះកាត់ ហើយរូបគេបានវិលត្រឡប់មកកាន់ទីលានប្រកួតជាផ្លូវការវិញ ក្នុងពេលក្រុមបឹងកេត បានយកឈ្នះក្រុមកងយោធពលខេមរភូមិន្ទ ៤-៣ នៃការប្រកួតពានរង្វាន់ខេមបូឌានលីគខាប់ (Cambodian League Cup) កាលពីថ្ងៃទី៥ ខែមីនា ឆ្នាំ២០២៣។
ចាន់ វឌ្ឍនាកា បានព្យាយាមអូសបាល់រំលងកីឡាកររបស់ក្រុមខេត្តកំពង់ចាម ក្នុងការប្រកួតពានរង្វាន់សម្តេច ហ៊ុន សែន ឆ្នាំ២០២៥ កាលពីថ្ងៃពុធ។ រូបថត បឹងកេត
មានន័យថា ចាន់ វឌ្ឍនាកា បានចំណាយពេល១ឆ្នាំ ១ខែ និង៨ថ្ងៃ ដើម្បីព្យាបាលរបួសដាច់សរសៃជង្គង់ស្តាំរបស់ខ្លួនឱ្យបានជាសះស្បើយ១០០ភាគរយវិញ ប៉ុន្តែសម្រាប់ការវះកាត់របួសដាច់សរសៃពួរជង្គង់ឆ្វេង និងដាច់បែកទ្រនាប់ឆ្អឹងខ្ចីជង្គង់លើកនេះ ក្លិបបឹងកេត មិនបានបង្ហាញថា វឌ្ឍនាកា ត្រូវចំណាយពេលយូរប៉ុនណា ដើម្បីព្យាបាលរបួសនេះឱ្យបានជាសះស្បើយវិញ១០០ភាគរយនោះទេ។
ក្លិបបាល់ទាត់បឹងកេត បានត្រឹមប្រកាសព័ត៌មានជាបឋម កាលពីថ្ងៃព្រហស្បតិ៍បែបនេះថា «កីឡាករ ចាន់ វឌ្ឍនាកា បានទទួលការវះកាត់របួសជង្គង់ឆ្វេងរបស់ខ្លួនប្រកបដោយជោគជ័យហើយ ដោយនឹងត្រូវការពេលវេលាសម្រាប់ការសម្រាកព្យាបាល»។
យ៉ាងណាក៏ដោយចំពោះ ចាន់ វឌ្ឍនាកា ផ្ទាល់នៅតែប្រកាន់ជំហរច្បាស់លាស់ ក្នុងការជម្នះហេតុការណ៍ដ៏អាក្រក់ជាលើកទី២នេះ ដើម្បីអាចវិលត្រឡប់មកកាន់ទីលានប្រកួតវិញ ហើយជាមួយគ្នានេះ គ្រប់គ្នានៅក្លិបបឹងកេត បានជូនពរឱ្យ ចាន់ វឌ្ឍនាកា ឆាប់ជាសះស្បើយ និងត្រឡប់មកជួយក្រុមឆាប់ៗវិញ។
តាមរយៈក្លិបបឹងកេត ចាន់ វឌ្ឍនាកា បានបញ្ជាក់ថា៖ «ខ្ញុំមានអារម្មណ៍ថា សោកស្តាយដែលត្រូវមកជួបរឿងនេះម្តងទៀត ប៉ុន្តែបាល់ទាត់គឺបែបនេះ ខ្ញុំនឹងព្យាយាមឱ្យបានឆាប់ជាសះស្បើយ ១០០ភាគរយ ដើម្បីអាចចូលទីលានវិញបានលឿន»៕
